Sarbaz Wafa

Sarbaz Wafa

5/23/2025, 4:40:30 PM

باسمائیں جاوید، جاوید گنوک بوت نبشتہ کار; سرباز وپاؔ ایردستی ھما شومیں ھوپ اِنت کہ ایردستیں راج ءَ چہ جتائیں نیمگاں وران ءُ تباہ کنان کنت۔ پہ ایردستیں راجاں لھتیں انچیں جیڑہ بنت کہ آ تچک ءَ ایردستی ءَ پیش دار اَنت بلے ھمے ایردستی ءِ تہ ءَ لھتیں انچیں ویل بنت کہ آیاں مردم ایردستی سما نہ کن اَنت، بلکیں پہ نیمون چاگردی جیڑہ لیک اَنت۔ چوش کہ بلوچستان ءَ دگ ویل اَنت، اے انچیں جیڑھے کہ ایشی ءَ مردم چاگردی جیڑہ لیک اَنت ءُ وزیر ءُ گزیرانی نابودیانی نام ءَ دے اَنت، بلے ھمے دگ ویلاں انچیں مردم وتی ارجان جتگ کہ آ بیران یا کہ پہ مدامی زوال آماچ بوتگ اَنت کہ مردم ءِ دل کپ بیت۔ چہ اے دگ ویلاں بیران یا سانمند بوتگیں مردمانی تہ ءَ ڈاکٹر، وکیل، انجینئر، نودربر ءُ کسان کسانیں زھگ ھم ھوار اَنت کہ زورگر ءِ نامگپتیں دگاں وتی ارجان جتگ اَنت۔ چہ ھمے دگ ویلاں سانمند بوتگیں ورنایاں یکے جاوید مراد اِنت کہ آ جاہ ءِ آھو گزی ءِ جاہ منند اِنت۔ اے ورنا منی باز نزیکیں ھمبلے اَت۔ جاوید یک گریبیں مردمے ءُ دھکانکارے ءِ زھگ اِنت۔ آئی پس ءَ گوں دھکانکاری ءَ پہ مرادے وتی زھگ وانگ ءَ دیم دات کہ منی زھگ ڈاکٹر یا ماسٹرے بیت شریں اگدھے ءِ سر ءَ بیت۔ منی پیری ءِ اَسا بیت منی کوپگ ءَ سبک کنت۔ جاوید چہ وانگ ءُ زانگ ءَ یک انچیں باسما ءُ زمہ واریں ورنایے اَت ہرکس پہ آئی سنگتی ءَ ھدوک اَت کہ جاوید گوں من نزیک بہ بیت۔ جاوید سکا مھروان ءُ وش زبانے اَت۔ ایردستی ءَ لانت بات! آئی ءِ چہ وانگجاہ ءَ گپتگیں ڈگری بس پیتی ءِ باھوٹ بوت اَنت۔ پہ نوکری ءَ ھمک جاہ ءَ آئی ءَ وتی کاگد برتگ اَنت، بلے ھچ پہ ھچ ھمک جاہ ءَ بے اوست بوگ ءَ اَت۔ داں دہ پانزہ سالاں وانگجاھاں ونتگیں ورنا ءَ دھکانکاری کرت نہ کت۔ جاہ ءِ آھو ءَ دگہ شریں روزگارے نیست اَت کہ آ گوں دگہ کار ءُ روزگارے ءَ مشکول بہ بیت۔ بلے چے کن ئے دوزھیں لاپ ءُ لاچاری مردم ءَ الّم کار کنگ پرمائیت۔ پہ جاوید ءَ دگہ ھچ راہ پشت نہ کپتگ اَت، آ لاچار بوت کہ جاہ ءِ آھو ءِ لوکل گاڑی ءَ کلینڈری ءِ کار بندات ئے کرتگ۔ ھمے اوست ءَ کہ من وتی وھد ءَ تیلانک دات کنان ءُ دومی کجام وھد ءَ پوسٹے ءِ سوج بہ بیت من موکل کرت ءُ شت کن آں۔ پِٹّے ایردستی! جاوید جان گوں ھمے لوکل گاڑی ءِ کلینڈری ءَ وتی وھد ءَ تیلانک دیگ ءَ اَت کہ چہ دگ ویلے ءَ آئی ءِ سر لگ ات ءُ ٹپی بوت۔ چہ ڈاکٹرانی درمان کنگ ءَ آئی زند رک اِت بلے سر ءَ ناوش ءُ گنوک بوت۔ ھما مردم کہ پہ جاوید ءِ چارگ ءُ سنگتی ءَ ھدوک بوتگ اَنت مرچی ھما مردم ھم جاوید ءَ وتی نزیک ءَ نیل اَنت ھمے گوش اَنت جاوید گنوکے۔ ھما جاوید کہ آئی کھول ءَ ھوار نزیکیں مردمانی مزنیں اوستتے اَت کہ آ شریں نوکری یے گیت ءُ راج ءِ ھزمتگارے بیت، بلے آ دیستگیں واب بے مانا بوت اَنت۔ https://www.facebook.com/share/p/1Hism7DJkf/

Sarbaz Wafa

6/15/2025, 8:53:27 AM

دستونک چراگاں اھدے ءِ نام ءَ بلیناں اے داگاں اھدے ءِ نام ءَ بلیناں زھیر ءِ کسہ ءَ درشانگ ءَ اِنت کہ راگاں اھدے ءِ نام ءَ بلیناں زمانگ تیزگامیں کشک رند ایت من واگاں اھدے ءِ نام ءَ بلیناں ودار ءِ زید اُمرے شیکگائیں ماں شاگاں اھدے ءِ نام ءَ بلیناں کُلیانی توار ءَ چاڑے گون اِنت کہ باگاں اھدے ءِ نام ءَ بلیناں بلوچی کسھے واناں پہ تو من ءُ پاگاں اھدے ءِ نام ءَ بلیناں وپا دستونک انچو مانگیش اَنت دماگاں اھدے ءِ نام ءَ بلیناں سرباز وپا https://www.facebook.com/share/p/1FBWyVjX39/

Sarbaz Wafa

6/9/2025, 10:02:20 AM

دستونک زندمان کسّہ کنت ھر دمان کسّہ کنت جُنزگ ءَ اِنت پہ دابے کاروان کسّہ کنت آجوئی ءِ پہ جنگ ءَ تیرکمان کسّہ کنت راجی سر مڑاھانی پھر ءُ شان کسّہ کنت شپ تھاری ءِ نام ءَ ماھکان کسّہ کنت اشک ءِ کسّھے انچیں بے زُبان کسّہ کنت گوں ماہ ءُ استالاں آزمان کسّہ کنت وش نمائیں کردانی اے جھان کسّہ کنت زیمرے تْرھیت جان ءَ وش لِسان کسّہ کنت ما وپاؔ ابدمان بہ اِیں مئے جھان کسّہ کنت سرباز وپاؔ https://www.facebook.com/share/p/1J1R19P7yR/

Sarbaz Wafa

6/4/2025, 11:26:18 AM

نوائیں درمان بلوچے نبشتہ کار: سرباز وپاؔ زرنبش نبشتانک https://zrumbesh.com/article/sarbaz/4723/ 29 مئی ءِ مگرب ءَ تھاری ءَ مانپوشتگ اَت، من چہ وتی لپٹاپ ءَ استاد منھاج مکتار ءِ شیرکنیں توار ءَ سنگت یونس کلانچی ءِ پربند ( اے نہ اِنت الّم کہ تیر ءُ تیرکمانے گوں بہ بیت ) ءَ گوش دارگ ءَ اِت آں ءُ چہ کوٹی ءِ دریگ ءَ ڈن ءِ لیٹ ءُ استالاں چارگ ءَ اِت آں۔ من دل ءَ ھمے گوشت کہ نوں داں بیست دمان یا نیم ادارے ءَ موبائل ءَ دست نہ جنان ءُ کمو وتی جند ءَ گوں ھاوند ءِ بکشاتگیں زیبائیاں مُلمہ بہ کن آں۔ اے وھد ءَ موبائل منی دیم ءَ ایر اَت ءُ نوٹیپکیشنانی توار اَت، بلے من موبائل ءَ دست جنگ ءَ نہ اِت آں۔ ھمے دمان ءَ من ءَ کسے ءَ مسکالے دات ءُ منی موبائل ءِ اسکرین ءِ لائٹ روک بوت، من دیست کہ واجہ ماسٹر شھداد ءِ وائسے اتکگ۔ گڑا من زوت زوت ءَ موبائل زرت ءُ واجہ ءِ وائس گوش داشت۔ آ گوشگ ءَ اَت کہ ”وپا! منی اِش کنگ ءَ درمان آوار جنگ بوتگ ءُ منی ھال دیوکیں مردم پکائیں مردمے، بلے تو ھم انگت ءَ چست ءُ پرس بہ کن ءُ پد ءَ چہ زرمبش ءِ نیمگ ءَ ھالے شنگ کن۔“ من گوشت شر! الّم ھالے شنگ کن آں، بلے اے نوائیں درمان ءِ اولی بر نہ اِنت کہ زوراکیانی آماچ اِنت، چہ ایشی ءَ پیش ھم باز براں برگ ءُ آزار دیگ بوتگ۔ گڑا من ھم دگہ دو سے سنگتان ءَ میسج کرت۔ بلے ھال پکا اَت کہ آ کوھڑو چہ پاکستانی پوج ءِ کیمپ ءَ درکپتگ ءُ دیم پہ وتی گسانی نیمگ ءَ چھبی ءَ روگ ءَ بوتگ کہ چہ کوھڑو ءِ میتگ ءِ نزیک ءَ آوار جنگ بوتگ۔ من زوت زوت اے ھال شنگ کرت، بلے منی دل ءَ وھمے نشتگ اَت کہ اے ناشریں پوج درمان ءَ شھید کنت۔ چی ءَ کہ اے ھمے وھد اَت، ھمے یکیں ھپتگ ءَ تھنا چہ آواران دمگ ءَ پاکستانی پوج ءَ ھشت مردم شھید کرتگ اَت۔ اے شپ ءَ من داں دیر ءَ درمان ءِ ترانگ ءَ کپتگ اِت آں، چی ءَ کہ منی ءُ درمان ءِ میتگ نزیک اِت اَنت۔ من درمان دیستگ اَت ءُ چہ آئی سادگ تبی ءُ ایمانداری ءَ ھم سرپد اِت آں۔ من کہ وھدے سھب ءَ چہ واب ءَ پاد اتک آں ءُ چہ چاہ ءِ ورگ ءَ پد وتی موبائل چالو کرت داں یک ءُ دو مردم ءَ میسج کرتگ اَت کہ درمان ءِ لاش چہ کوھڑو ءَ دست کپتگ۔ اے ھبر ءِ اِش کنگ ءَ من سک دلپدرد بوت آں کہ درمان یک سادگ تبیں ھمبلے اَت ءُ بلوچ راجی جنز ءِ دوزواھے اَت۔ بلے! گپ ایش اِنت کہ درمان بلوچ ءِ نمیرانی ءَ مئے ھند ءِ بازیں مردمان ءَ بے کساس تکانسر کرتگ اَت۔ چہ آئی نمیرانی ءَ پد باز مردم ءَ کہ من ءَ ھال کرتگ ءُ ھمے یکیں گپ بوتگ کہ اے نوائیں درمان ھچ نہ کرتگ، بلے ناھک ءَ شھید کنگ بوت۔ اے بابت ءَ منی گپ ھمیش اِنت کہ اے نوائیں درمان پہ بلوچ راج ءُ راجی جنز ءَ چے کرتگ یا نہ کرتگ، اے گپ ءَ آئی جند ءُ دومی راجی جنز سرپد اِنت کہ آ کئے بوتگ۔ چی ءَ کہ راجی جنز ھمک مردم ءِ شری ءُ ناشریاں وتی اندر ءَ نکش کنت۔ شھید درمان ءِ بابت ءَ من انوں تھنا ھمے گپ ءَ گوشت کن آں کہ آئی شھید استاد الی جان ءِ دیوان، شھید سابر پنام ءِ یاگی جان ءِ کندگ ءُ مزاک، کسانسالیں شھید مجاھد جان ءُ شھید ناجد جان ءِ ٹھک، شھید پدائی جمال شاد پنام ء مھروان کمبر، شھید کمار جان، شھید نوربکش بالاچ جان ءِ پنت ءُ سکین، شھید کماندار اللہ بکش آجز پنام ءِ بشام جان، شھیدگلشیر بلوچ، شھید لال بکش شمبے، شھید داد جان، شھید سلیم جان ءُ شھید شھباز جان ءِ نیمگ ءَ لگوریں دژمن ءِ سر ءَ گورتگیں تیرانی توار اش کرتگ اَنت۔ 28 اکتوبر داں 30 اکتوبر 2017 ءَ کوھڑو ءَ زورگریں پاکستانی پوج ءِ دست ءَ کوھڑو میتگ ءَ جنین ءُ زھگانی یکشل ءَ لٹ دیگ ءُ زاہ ءُ بد گوشگ، ماسٹر نورجان، سالونکیں نواز، تالب جان، تاج مھمد، گلام جان، کماشیں دوست مھمد، کماشیں چودرھی الاھی بکش، مھمد اُمر ءُ مولابکش ءِ تیر سپتیں لاش دیستگ اَنت۔ آئی ءَ شھیدانی جنوزام ءُ چورہ گوں بزگی ءُ زور بیگواھیں مردمانی ماس، گْوھار، زھگ ءُ لوگبانک ائید ءُ وشیانی ساھت ءَ ارس شلینگ ءَ دیستگ اَنت گڑا آئی دل ءَ نہ منّ اتگ کہ آ زوراکیں واجہ ءِ دیم ءَ سر جھل بہ کنت ءُ پہ آیانی ھُکم ءِ پد ءَ وتی راج ءِ دلاری ءَ بہ کنت ءُ درآمدیں پوج ءَ بزور ایت ءُ بْیار ایت وتی بلوچانی گس ءَ مکھیں ماس ءُ بانکیں گْوھارانی گُدانی پٹگ ءَ بہ پرمائیت۔ من سدکاں کہ اے نوائیں درمان ءِ زبان ءِ گڈی دانک ھمے بیت ”جی نہ واجہ! من چہ شمئے پرمان ءِ رد ءَ وتی راج ءِ دلاری ءَ کرت نہ کن آں۔ من بلوچے آں، من بلوچ بوگ ءُ زندگی کنگ لوٹ آں۔“ گڑا پمیشکا آ لگوری دژمن ءِ کِر ءَ دگہ ھچ راہ پشت نہ کپ ایت، آ بس وتی ھمے شلسریں تیرانی دیم ءَ نوائیں درمان ءِ سینگ ءَ دار اِیت ءُ تیرگواری کنت۔ ماتیں سرڈگار ءِ ھما جاہ ءَ کہ نوائیں درمان ءِ ھونانی ترمپ کپتگ اَنت گڑا آ جاہ ھمے گوش ایت ”اَے بلوچستان! تو گواہ ببو کہ نوائیں درمان بلوچے ءُ گوں بلوچی شان ءَ مرتگ۔“

Sarbaz Wafa

5/26/2025, 8:25:12 PM

لالا لتیپ ءِ ترانگ نبشتہ کار: ڈاکٹر نسیم بلوچ رجانک: سرباز وپاؔ زرمبش نبشتانک https://zrumbesh.com/article/editor-choice/4676/ بیست ءُ چار مئی ءِ سھب ءَ پاکستانی لشکر ءَ بلوچستان ءِ ھند مَشکے ءَ منی تُروزتک ءُ ھمبل اھوالکار لتیپ بلوچ کشتگ۔ اے تھنا یک اھوالکارے ءِ کوش نہ اِنت اے مئے مردمانی یک سکا شریپ، شرپدار ءُ نہ ترسیں ارواھے ءِ کوش زانگ بیت۔ مئے شھر ءَ لتیپ پہ مھر لالا ءِ نام ءَ توار جنگ بوتگ، چی ءَ کہ اے پہ آئی آجزی، وتی دل پھکی ءُ گوں آدگہ مردماں بے کساسیں مھرانی مُز اَت۔ آ یک انچیں مردمے اَت کہ گوں درساں پہ شرپ پیش بوتگ اَت، بے گوشگ ءَ مردمانی کمک ئے کرتگ اَت۔ آ وتی بے تواری جاہ ءَ تچک ءُ راست بوتگ۔ بلے گپ ایش اِنت کہ مشکے ءِ مردماں چہ امر ءَ نہ بلکیں مھروانی ءَ لالا گوشتگ، مستریں براس۔ لتیپ بلوچ یک انچیں اھوالکاے اَت مَشکے ءِ وڑیں جاھے ءَ دامگ ( نیٹ) یک وابے اَت ءُ موبائل نیٹورک ھم بزگ کنت، بلے آئی ءَ رپورٹنگ کرتگ۔ آئی چپ ءُ چاگرد بے توار اَت، بلے آئی لس بلوچ ءِ ھمک روچی درد ءُ رنج نبشتہ کرت اَنت۔ آئی ءَ زانتگ اَت کہ اے کار گران اِنت، بلے آئی وتی کار برجاہ داشتگ۔ پہ اے کھول ءَ اے بنداتی ویل نہ اِنت، ھمے سال ءِ مارچ ءَ آئی زھگ پاکستانی لشکر ءَ گوں کھول ءِ آدگہ ھشت نزیکیں سْیاداں آوار جتگ ءُ کشتگ۔ آئی براس ءُ منی تُروزتک راشد بلوچ 2011 ءَ آوار جنگ ءَ پد کشگ ءُ لاش چگل دیگ بوت۔ دگہ یک کستریں براسے ھالد اِنت، بلوچی زبان ءِ استادے آوار جنگ بوتگ۔ داں بازیں ماہ ءَ زوریں بیگواھی ءُ آزار ورگ ءَ پد آجو بوتگ۔ گوست ءَ لتیپ بلوچ وت ھم دوبر آوار جنگ بوتگ، بلے آ واتر بوتگ گڑا مدام وتی کار ئِے برجاہ داشتگ اَنت۔ آ کدی ترس ءِ آماچ ءُ بے توکل نہ بوتگ۔ پرائی اھوالکاری یک کارے نہ ات، بلکیں گھگیری یے اِت۔ بلے منی باز کوھینیں یات گوں آئی ءَ بندوک اَنت، 1990 ءِ دھک ءِ بندات ءَ وھدے من یک وانگجاھے ءَ نودربر اِت آں گڑا من بلوچ اسٹوڈنٹس آرگنائزیشن ( بی ایس او ) ءِ ترانہ ءُ آشوبی سوت اولی بر ءَ اُش کرتگ۔ ریڈیو یا دگہ مچی ءَ نہ، بلکیں گس ءَ چہ آئی ٹیپ ءَ سرجمیں پیت بند اش کرتگ۔ ھمے سوتاں منی دل ءَ گوں آشوبی سوت ءُ پہ سْیاست ءَ مھر ودی کرتگ۔ اے منی بنداتی مھکمی اَت ءُ اے من ءَ چہ لالا لتیپ ءِ برورد ءَ رستگ۔ من، لتیپ بلوچ، اکتر ندیم ءُ میا نیاز بندات ءَ ھواری ءَ مَشکے ءَ پہ دربرگ ءَ ساز ءُ زیملی کلبے پچ کرت۔ اے کسانیں کار منّگ نہ بوتگ، چی ءَ کہ یک دودمانی گھگیری یے ءُ اے سرڈگار ءِ سر ءَ میارے لیکگ بوت۔ ھمے کلب ءِ پارست ءَ ما وتی واھشت ءُ گھگیری برجاہ داشتگ ءُ لالا لتیپ ھمے زرمبشت ءِ بنجاہ بوتگ۔ مئے استاد ھیرجان بھمنی اَت، ھمے کلب ءَ مارا ساز ئے ھیل داتگ۔ آ تھنا یک سْیادے نہ اَت، یک براتے، یک سنگتے، یک لیکھی ھمسپرے اَت، منی سْیاست ءِ زانشت ءِ بنیاد بوتگ۔ 1990 ءِ دھک ءَ وھدے بلوچ اسٹوڈنٹس آرگنائزیشن ءُ لھتیں مزھبی ٹولیانی میان ءَ جنگ بوتگ اَت، گڑا پولیس ءَ لالا لتیپ دزگیر کرت۔ ھمے کیس ءَ ڈاکٹر دین جان ءُ ڈاکٹر واھد ( کہ آ ویٹینری ڈاکٹرے اَت) بند کنگ بوتگ اَنت۔ ما چہ گِس ءَ پہ آیاں نان برتگ، ایشی بزانت ھمیش اِنت کہ آ چہ کسانی ءَ جھد ءِ بھر بوتگ۔ مرچی ریاستی توانمنداں آ کشتگ گڑا ھمے سرپد بنت کہ یک توارے دارگ بوتگ، بلے راستی ھمیش اِنت کہ آئی اے زرمبش گیشتر مزن کرتگ۔ اے لیکہ ھمک ھما اھوالکار ءِ تہ ءَ مان اِنت کہ آ پہ راستی ءَ گوں ترس ءَ دیم پہ دیمی کنت۔ ھمک ھما سوت ءَ گوں ھمگرنچ اِنت کہ گھگیری ءِ چیدگ اِنت ءُ ھمک ھما جھدکار ءِ تہ ءَ اِنت کہ زوراکیانی بگیری ءَ جست بوتگ ءُ ابدمان بیت۔ مرچی ھم مَشکے آئرا لالا توار کنت؛ براس۔

Sarbaz Wafa

2/15/2025, 9:52:06 AM

دانک نبشتہ کار: ڈاکٹر اللہ نزر بلوچ رجانک: سرباز وپا ماھتاک اسپر ءِ پنچمی تاک https://zrumbesh.com/article/sarbaz/4023/ اگاں جھان ءِ گْوستانک ءِ سر ءَ چمشانک بہ دے گڑا اے گپ پدر بیت کہ چہ کوھنیں زمانگ ءَ بہ گر داں بادشاہ ءُ نوکیں ریاستاں، درس ھمے یک چیزے ءَ ھوار اَنت آ ایش اِنت کہ بادشاھانی وانگ دژمنی اِنت۔ بادشاہ مدام زانشت دژمن بنت۔ زانشت دژمنی، چہ زانت ءُ زانگ ءَ ترس آیانی ھواریں آدتے۔ سکرات ءَ پہ زانت ءِ تالان کنگ ءَ جیوری ءَ زھر داتگ۔ کتابانی نبشتہ کار پروپیسر سبا دشتیاری پمیشکا شھید کنگ بیت کہ زانت ءُ زانشت ءِ تالان کنگ ءَ بوتگ۔ استاد زاھد آسکانی ءِ شھیدی، پروپیسر رزاک زھری ءِ شھیدی، ڈاکٹر داؤد ءِ شھیدی، ڈاکٹر مزار ھان ءِ شھیدی، اسلم جان جمالدینی ءِ زھگ نئیم سابر ءِ شھیدی بہ بیت یا انوگیں بلوچ نودربر اللہ داد ءِ کوش بادشاھانی ھمے زانت ءُ زانشت ءِ بگیریں پالیسانی بھر اَنت۔ پمیشکا زورگر پہ وتی زورگپتی ءِ دْراجکش کنگ ءَ زانت ءُ زانشت ءَ مٹ کنگ لوٹ اِیت۔ انچوش گمان کرت کن اِت کہ گوستگیں سیزدہ سال اِنت مشکے ءِ کالج لشکر ءَ گپتگ ءُ نشتگ، یونیورسٹی ھم لشکر ءِ میراس جوڑ بوتگ اَنت۔ سرجمیں بلوچستان ءِ کوچگانی وانگجاہ لشکری چوکی جوڑ بوتگ اَنت۔ کوھنیں پیرو ءِ بادشاہ ءَ وتی سپیر پہ ھمساھگیں بادشاہ ءَ دیم داتگ کہ تئی ڈیھ ایمن اِنت ءُ منی ڈیھ ءَ ھمک وھد ءَ جنگ بیت۔ گڑا بادشاہ ءَ پیرو ءِ سپیر گوشتگ کہ ایشی پسو ءَ ترا باندا سھب ءَ دے آں۔ وھدے کہ سھب بوتگ گڑا بادشاہ ءَ پیرو بادشاہ ءِ سپیر زرتگ ءُ باگ ءَ برتگ۔ وتی گلام ئے گوشتگ کہ چنڈوکیں گلھانی درآتکگیں ھوشگاں بہ بُر، گلام ءَ ھما وڑ کرتگ۔ بادشاہ ءَ گوں سپیر ءَ گوشتگ کہ برو وتی بادشاہ ءَ ھمے ھال ءَ بہ دے۔ وھدے کہ پیرو ءِ سپیر وتی بادشاہ ءِ کِر ءَ سر بوت گڑا گوشت ئِے کہ بادشاہ ءَ من ءَ ھچ نہ گوشتگ تھنا گلھانی ھوشگ ءِ بُر اِتگ اَنت ءُ گوشتگ ئِے ھمے ھال ءَ بادشاہ ءَ بہ دے۔ گڑا بادشاہ ءَ سپیر جست کرتگ کہ چہ ھوشگاں چیزے پشت کپتگ؟ سپیر ءَ گوشتگ کہ نہ درسیں گلہ یک وڑ ءَ بوتگ اَنت ھوشگ پشت نہ کپتگ۔ گڑا پیرو ءِ بادشاہ ءَ گوشتگ کہ ایشی بزانت ھمیش اِنت کہ زانوگریں مردم سرکش بنت اے کلوہ ءِ متلب ھمے بیت کہ کجامی سر جست کرت آ ھلاس کنگی اِنت۔ پاکستان چہ بندات ءَ زورگپتیں بلوچستان ءَ ھمے کار ءَ کنگ ءَ اِنت۔ چہ جنرل ایوب ھان ءَ بہ گر داں زولپکار الی بھٹو ءَ ھرکس ءَ سرجہ ءِ چیر ءَ میکاولی ءِ کتاب ایر کرتگ۔ بسمارک ساھب ءِ ھمے گپ اِنت کہ مردم چہ وتی تجربھاں در بر اَنت، من چہ آدگرانی تجربھاں دربراں۔

Sarbaz Wafa

2/23/2025, 1:24:19 PM

دانک نبشتہ کار: ڈاکٹر اللہ نزر بلوچ رجانک: سرباز وپا ماھتاک اسپر ءِ چارمی تاک توار: ماھو بلوچ https://youtu.be/OxPCNvz_RVk

Sarbaz Wafa

2/7/2025, 11:35:08 AM

جنگولیں پدا - سرباز وپا صباء انسٹی ٹیوٹ آف ریسرچ اینڈ پبلیکیشنز https://t.me/Sabainstitute_research

Sarbaz Wafa

2/17/2025, 5:25:07 PM

اھد سازیں زندمانے چے گوش ئے واجہ اکتر ندیم ءِ نام ءَ شائر : سرباز وپا توار : ایچ این بلوچ آبادی https://youtu.be/fUdprFfmgac

Sarbaz Wafa

2/18/2025, 7:57:08 AM

ایردستیں راج ءِ راجی تبیب نبشتہ کار: سرباز وپاؔ https://www.facebook.com/share/p/1AEsTkLsie/