بلوچ راجی زْرمبشت ( بی این ایم )
77 subscribers
Similar Channels
Swipe to see more
Posts
*پانک اپریل 2025 ءِ گزارش : چہ بلوچستان ءَ 151 کس زور بیگواہ ءُ 23 کس ءِ در آمیدگس ءُ مھترھندی کوش* چار شمبے ، مئی 21، 2025 | بن شون : PRBNM44/2025 گزارش پی ڈی ایف ءِ تہ ءَ : https://thebnm.org/wp-content/uploads/2025/05/Paank-HR-Report-April-2025.pdf https://thebnm.org/balochi/paank/23679/ پانک ءِ ماھی گزارش ءِ رد ءَ ، بلوچستان ءَ زور بیگواھی ، در آمیدگس ءُ مھترھندی کوش ءِ ویل یکشل ءَ برجاہ اَنت ، بلکیں ایشانی تہ ءَ بے تاھیر کنوکیں کچے ءَ گیشی اتکگ۔ بلوچ راجی زْرمبشت ( بی این ایم ) ءِ مردمی اگبالانی تْرامگیج پانک ءِ گزارش ءِ رد ءَ مردمی اگبالانی تْرام اتگ ءُ پہ زانت کرتگیں کارروائیاں بلوچستان ءِ 18 ھنکیناں مردم نشانگ کنگ بیتگ اَنت۔ چہ پانک ءِ نیمگ ءَ ھمک ویل ٹپاسگ ءَ پد اے گزارش ءِ بھر کنگ بیتگ۔ اپریل 2025 ءَ 151 مردم پاکستانی لشکرءُ گوں آئی ءِ بندوکاں تْرامگیجاں زور بیگواہ کرتگ۔ چہ درساں گیش کیچ ھنکین ءَ 53 کس زور بیگواہ کنگ بیتگ ، چہ ایشی ءَ پد چہ گوادر ءَ 19 ، ءُ چہ شال ءَ 18 کس ءِ زور بیگواھی ءِ حال رس اتگ۔چہ دگہ ھنکیناں ھم مردمی اگبالانی بگیری برجاہ اِنت چہ آیاں ڈیرہ بگٹی ءَ 13 ، پنجگور ءَ 8 ، آواران ءَ 7 ، سیبی ءَ 6 ، بارکان ءَ 5 ، کراچی ءُ مستونگ ءَ 4-4 ، لسبیلہ ، موسی خیل ، چاگے ، خضدار ، کلات ءَ 2-2 ، واشک ، خاران ، سوارب ءُ نوشکے ءَ یک یک مردمے زور بیگواہ کنگ بیتگ۔ اے کچ ءُ شمار ھمے درانگاز اَنت کہ سرجمیں بلوچستان مردم یک پیم ءَ زوراکیانی نشانگ کنگ بیگ ءَ اَنت۔ پانک ءِ رد ءَ زور بیگواھی مردم چہ آیانی کھول ءُ آ دگہ جھان ءَ سندگ بہ اَنت ، باز بر ءَ زور بیگواھی مردم درآمیدگسی کشگ بہ اَنت۔ اپریل ءِ ماہ ءَ 50 مردم چہ پاکستانی لشکر ءِ آزارجاھاں یلہ کنگ بیتگ۔ 23 کس درآمیدگسی کشگ بیتگ ، اے کوش ءُ زور بیگواھیانی تہ ءَ پاکستانی لشکر تچکے ءَ گون اِنت۔ باز مردم ناراھی دزگیری ءَ پد چہ آزاراں ٹپی ھم بیتگ ، بلے داں اے وھدی زانگ نہ بیتگ کہ کے ءُ چنت مردم اَنت۔ گزارش ءَ زور بیگواھی ءِ میان ءَ دزگیریں کوشانی سر ءَ ھم گپ جنگ بیتگ۔ اپریل 2025 ءَ بلوچستان ءَ درآمیدگسی کوش ءِ بازیں ویل پیتبند بیتگ چہ ایشاں باز زور بیگواھی ءَ پد کشگ بیتگ۔عبدالمالک ، 11 اکتوبر 2024 ءَ چہ تربت ( کیچ ) ءَ زور بیگواہ کنگ بیتگ ءُ 4 اپریل 2025ءَ آئی ءِ کنٹ چہ باغبانہ ، خضدار ءَ دست کپتگ۔شاہ نوار ءُ ظھور احمد 5 اپریل ءَ چہ مشکے ، آواران ءَ آوار جنگ ءَ پد دزگیری جاہ ءَ کشگ بیتگ اَنت ، حبیب مارچ 2025 ءَ آوار جنگ بیتگ ءُ ھمیشاں پجیگ ءَ 5 اپریل کشگ ءُ چگل دیگ بیتگ۔ ساحل ، 12 سالی زھگے ، اپریل ءِ ماہ ءَ چہ پسنی ، گوادر ءَ آوار جنگ بیتگ ، آئی ءِ کنٹ شاہ جان ھوٹل ، پسنی ءِ پشت ءَ دست کپتگ۔مھراب ءُ خان محمد 6 اپریل ءَ آوار جنگ ءَ پد کشگ بیتگ اَنت۔ حق نواز ، شیرو ءُ گل زمان بزدار 5 اپریل ءَ چہ بارکان ءَ زور بیگواہ کنگ ءَ پد دروگیں میڑے ءَ کشگ بیتگ اَنت۔ بھادر شفیع ءُ آئی ءِ سئے ناکو زتک 7 اپریل ءَ ماں وشبود ، پنجگور ءَ مھترھندی مردم کشیں رمباں نشانگ کرتگ ءُ کشتگ اَنت۔نادر 6 اپریل ءَ چہ کنداری ، مشکے زور بیگواہ کنگ بیتگ ءُ دومی روچ ءَ آئی ءِ کںٹ دست کپتگ۔ نظام چہ پسنی ءَ پاکستانی لشکر ءَ آوار جتگ 16 اپریل ءَ آئی ءِ ژانگولیں کنٹ دست کپتگ۔ فاروق 14 اپریل چہ خضدار آوار جنگ بیتگ ءُ 15 اپریل ءَ چہ نال ءَ آئی ءِ کنٹ دست کپتگ۔شیرخان نذر چہ تربت ءَ آوار جنگ ءَ پد 17 اپریل ءَ کشگ بیتگ۔نبیل کہ وانگ ءُ زانگ ءُ احوالکاری ءَ بندوک اَنت ، اپریل ءَ ماں تمپ کالج ءَ ، کیچ ءَ تیر جنگ کشگ بیتگ۔ دوکی ، ھنکین ءَ درآمیدگسی کوش ءِ دْرچ ءَ باز کس سرمچار لیکگ ءُ کشگ بیتگ ، چہ ایشاں محمد دین مری ، اعجاز احمد ، نبیل مری ءُ خیر محمد محمد حسنی ھوار اَنت۔ گزارش ءَ زانگ بیتگ کہ پاکستانی لشکر ھمے زوراکیاں کنگ ءَ اِنت کہ چہ ھرچ رنگیں گر ءُ بند ءَ آزات اِنت۔ زندان ءِ جاہ ءُ لشکری بندیگجاھانی بارہ ءَ سرپدی نہ دیگ ، سانمندیں مردمانی کھول ءُ وکیلاں گوں آیاں گندک ءَ دارف اے در مردمی روشت ءِ مزنیں مناکے۔ پانک ءِ گزراش ءِ رد ءَ پاکستانی لشکر ءِ چیردستی ءَ کارکنوکیں مردم کشیں رمبانی پارست ءَ کشگ بیتگیں مردمانی بارہ ءَ ھم گپ جنگ بیتگ ، مردم کشیں رمب پاکستانی لشکر ءِ بلوچستان ءَ چہ درستاں گیش سک دلیں بھر ھمکار اَنت، چہ آئین ءُ راھبند ءَ برزتر مردم کشیں مشین ءِ کرد ءَ پیلو کنگ ءَ اَنت۔ پانک چہ میان راج ءُ ھمگرنچیں تْرامگیجاں لوٹ کنت کہ آ زیت اے ویلانی سر ءَ آزاتیں پٹ ءُ پول بہ کنت ، زور بیگواھیانی بارہ ءَ سرپدی بہ دے اَنت کہ آ پرچا، کج ءَ ءُ کجام میار ءَ گرگ ءُ بند کنگ بیتگ ءُ زور بیگواھیانی زمہ وارانی بگیری ءَ کارروائی کنگ بہ بیت۔ پانک ءَ وتی گزارش ءِ گڈ سر ءَ چہ میان راج ءَ دزبندی کرتگ کہ آ زور بیگواھیں مردمانی پھزگ ءَ میان راجی کنونش ءِ منگ ءُ برجاھی ءَ الم بہ کنت ءُ انچیں گامگیج بہ زیر ایت کہ مردمی اگبالانی بگیری دارگ بہ بہ اَنت۔ اگاں زیت چوشیں گامگیجے زیرگ مہ بیت گڑا بلوچستان ءَ اے زوراکیں ناں ایوک ءَ مردمانی اگبالاں سانمند کن اَنت بلکیں اے پہ سرجمیں دمگ ءِ ایمنی ءُ داشت ءَ داشت ءَ ھم بیھارے۔ *« چاگردی رسانکدر ءِ چیڑو : ایکس |پیس بک | ٹیلی گرام | واٹساپ چینل »* https://x.com/BNMbalochi/status/1925230748832760231 https://www.facebook.com/share/p/1AZcPDv4op/ https://t.me/bnmovement/6617 https://whatsapp.com/channel/0029Va68s311dAw0lOJfGt2l
*چیردستیں بلوچستان ءِ مردم پاکستان ءِ داشتگیں دینی ناشرکاری ءُ گندگیں ایٹمی مراگش ءِ آماچ اَنت ، بی این ایم ءِ ماں ءَ امریکا ءَ 28 مئی ءِ کارزار* آدینگ ، 30 مئی ، 2025 | بن شون : PRBNM47/2025 https://thebnm.org/balochi/campaigns/23690/ بلوچ راجی زْرمبشت ( بی این ایم ) جھان ءَ اے باور کنائینگ لوٹ ایت کہ چیردستیں بلوچستان ءِ مردم گْورے تچکے ءَ پاکستانی لشکر ءِ ارشانی دیمپان اَنت ءُ نیمگے در دودی شوندات — چوش کہ دینی ناشرکاری — ءُ ’’ گندگیں ایٹمی مراگش ‘‘ ءِ ھم آماچ اَنت۔ اے گپ چہ بلوچ راجی زْرمبشت ( بی این ایم ) ءِ نیمگ ءَ درشانگ بیتگ اَنت۔ بی این ایم ءَ امریکا ءِ بنجاھی شھر واشنگٹن ڈی سی ءَ اسپیتگیں ماڑی ( وائٹ ھاؤس ) ءُ امریکا ءِ دری کارانی کارگس ءِ دیم ءَ ءُ واشنگٹن پرگنگ ( پَر گِنگ : اسٹیٹ ، ڈیھے ءِ مزنیں انتظامی یونٹ ) ءَ ھمے یکیں وھد ءَ 28 مئی ءِ بارہ ءَ کارزارے برجم داشتگ۔بی این ایم امریکی تک ءِ کماش سمیع ءِ سروکی ءَ اے کارزار ءِ میان ءَ 28 مئی ءِ درگت ءَ پنتاک بھر کنگ بیتگ۔اے کار ءَ محمد حسن ءُ بی این ایم واشنگٹن پرگنگ ءِ باسکاں بھر زرتگ۔ ھمے رد ءَ امریکا ءَ ابید آلمان ( جرمنی ) ءُ نیدرلیںڈز ءَ ھم زھرشانی ءُ روانک کشگ بیتگ۔ بلوچستان ءِ بازیں دمگ ، گوادر ، تربت ءِ کش ءُ گْور ءِ کوچگ ءُ ھلک پشوکان ، کلدان ، کلاتک ، شئے کھن ، نودز ءُ ناصرآباد ءَ ھم پنتاک بھر کنگ بیتگ۔بی این ایم ءِ پنتاک مزنیں کچے ءَ تندجاھی رسانک ءِ پارست ءَ بھر کنگ بہ اَنت بلے گل وھد پہ وھد بلوچستان ءِ مردمانی میان ءَ وتی ھستی ءِ درانگاز ءَ شھرانی تہ ءَ ھم کسانیں کچے ءَ کْوھنیں ربیدگانی رد ءَ دیوال نبیسی ءُ پنتاک بھر کنت ،اے کار چہ دیرو ( ڈیرہ غازی خان ) ءَ بہ گر داں جیمڑی ءَ سرجمیں بلوچستان ءَ بیت۔ ھمے دم ءُ درگت ءَ امریکا ءَ بیتگیں کارزار ءِ میان ءَ اے نیمگ ءَ ھم دلگوش گْور کنگ بیتگ کہ سلیمان کوہ ءِ جاھمنند ھم چہ ایٹمی تابکاری ءَ تھر پہ تھریں شیمک ءُ ڈی این اے ءَ تاوان دیوکیں نادْراھیانی آماچ اَنت ۔ چہ آ اود ءَ یورینیم ءِ کھن کاری بیت ءُ ڈیرہ غازی خان ءِ آبادیں ھند بغلچور ءَ پاکستان اٹامک انرجی کمیشن ’ ایٹمی آکوٹ ‘ کل کنگ ءَ اِنت۔ناپتیں ( غیرجانبدار ) پارستاں ھم اے جیڑہ ءِ چار گزار ءَ آزاتیں رنگے ءَ پٹ ءُ پول کنوکیں پترے ءِ لوٹ کرتگ کہ دنیگت منگ نہ بیتگ۔ امریکا ءَ بی این ایم ءِ باسکاں ماں واشنگٹن ءَ مردم گپ جتگ ءُ اے بارہ ءَ سھی کرتگ اَنت کہ 1998 ءَ پیش پاکستان ءَ مدام گْوشتگ اَت کہ آئی ءِ ایٹمی مراگش پہ پرایمنیں کاران اِنت بلے انچوش کہ موہ ئِے رس اِت ، پاکستان ءِ چیریں لشکری سرکار ءَ وتی ’ گندگیں من ‘ پدر کرت ءُ 28 مئی 1998 ءَ بلوچستان ءِ ھنکین چاگے ءَ ءُ 30 مئی 1998 ءَ خاران ءِ ریک ءَ شش ایٹمی چکاس کرت۔ اے بارہ ءَ آ اود ءِ مردم سھی کنگ نہ بیتگ اَنت ءُ ناں کہ آیانی چہ آ اود ءَ در کنگ ءِ چن ءُ لانچ کنگ بیتگ۔گْوشگ بیت کہ چکاسی تْراک زمین ءِ چیر ءِ ھونڈاں بیتگ اَنت پمیشکا تابکاری تالان نہ بیتگ ، گْوں زانشتی داستان نبیسی ءَ راستی ءِ بْراھداری رنگے ءَ چیر دیگ ءِ کوشست کنگ بیت۔ پاکستان ءِ دروگ ءَ پاشک کنان آیاں گْوشتگ دستاویزی مناک ءُ تامر ھست اَنت کہ چہ ایٹمی تْراکاں پد راسکوہ ءِ سرٹل آس گپتگ ءُ چہ تابکاری ءِ سان ءَ آئی ءِ ناسی ئیں رنگ پرو تر اتگ۔چہ اے چکاساں پد چاگے ءُ خاران ءِ اگواز تچکے ءَ ایٹمی تابکاری ءِ دیمپان بوت ، چہ ایشی ءَ دمگ ءِ مردین ، جنین ءُ چک ھون ءِ شیمک ( لیوکیمیا ) ، تھر پہ تھریں شیمک ءُ تیلیسیمیا رنگیں نادْراھیانی آماچ بیگ ءُ مرگ ءَ اَنت۔چہ تابکاری ءَ سانمند بیتگیں دمگ ءَ سیرکرتگیں مرد ءُ جنیانی چک مات بیگ ءِ کچ ھم کم بیتگ۔ *« چاگردی رسانکدر ءِ چیڑو : ایکس |پیس بک | ٹیلی گرام | واٹساپ چینل »* https://x.com/BNMbalochi/status/1928441758486089855 https://www.facebook.com/share/p/16Q6GjU4y5/ https://t.me/bnmovement/6708 https://whatsapp.com/channel/0029Va68s311dAw0lOJfGt2l
*پاکستان ءِ ایٹم بم ۔ بلوچستان ءُ دمگ ءِ سر ءَ سان !* https://thebnm.org/balochi/pamphlets/23686/ پی ڈی ایف : https://thebnm.org/balochi/wp-content/uploads/2025/05/28May2025-Poster.jpg ایٹمی توان یا ایٹمی ناشرکار ؟ پاکستان وت ھمے گْوش ایت کہ آئی ءَ ھندوستان ءِ ایٹمی چکاسانی پسو ءَ ایٹمی تْراک کرتگ اَنت ، بلے راستی ایش اِنت کہ پاکستان ءَ چہ ھندوستان ءِ ایٹمی تْراکاں پیش ایٹم بم جوڑ کنگ ءِ شور کرتگ اَت۔پاکستان ایٹمی توان کمیشن ءِ باسک ءُ ’ چاگے یک تْراک ‘ ءَ ھواریں سائنسدانانی بولک ءِ سروک ڈاکٹر ثمر مبارک مند ءِ رد ءَ سال 1972 ءَ ھما وھد ءِ سروزیر ذوالفقار علی بھٹو ءَ ڈیھ ءِ سائنسدان ملتان ءَ لوٹائینت اَنت ، ھمود ءَ ما راست ءَ راست ’ ایٹمی سلحہ جوڑ کنگ ءِ سوگند وارتگ اَت۔‘‘ پاکستان ناابرمیں بھر ءُ بانگے ءِ پد ءَ جوڑ بیتگ ، اے مھترھند ( ریاست ) دین ءِ بنیاد ءَ کست ءُ کینگ ءُ نام گپتیں لیکھی سیمسرانی پھزگ ءِ سر ءَ اوشتاتگ۔ ھمے بنیاد ایشی ءَ پہ مدامی لشکری مھترھندے جوڑ کن اَنت ، کہ پہ وتی ھستی ءَ مدام وتساچیں دژمن جوڑ کنت۔ اگاں پاکستانی لشکر چوش مہ کنت پہ آئی ءَ وتی توکی اڑاندانی گر ءُ دار گْران بیت۔ پرچا کہ پاکستان چیردستیں راجانی زمین ءِ سر ءَ برجاہ اِنت کہ چہ اے مھترھند ءَ آجوئی لوٹ اَنت ءُ بلوچ راج ھم پہ وتی آجوئی ءَ جھد ءَ اِنت۔ چاگے : ایٹمی چکاسانی پڑ 28 مئی 1998 ءَ پاکستان ءَ ماں چاگے ھنکین ءِ کوھی دْرچ ’ راسکوہ ‘ ءَ ایٹمی تْراک کرت اَنت ، دوستان وڈ ءِ ھلک ’چتر ‘ ھمے کوہ ءِ بن ءَ اِنت ، دوستان وڈ ’ 344 ‘ چار پھناتی کیلومیڑ ءِ دمگے۔ پاکستان ءَ اے دمگ ویران لیک اتگ بلے راستی ایش اِنت کہ اد ءَ ناں ایوک ءَ ھزاراں مردم جاھمنند اِنت بلکیں اد ءِ مردم ھمے کوہ ءُ ایشی ءِ کور ءُ کمبانی سر ءَ وتی زند ءَ گوازینگ ءَ اَنت۔ 2023 ءِ مردم شماری ءِ رد ءَ چاگے ءِ آبادی چہ 2 لک ءُ 69 ھزار ءَ گیشتر اِنت۔ اد ءِ زمین ، کوہ ، کور ءُ زمین چیر ءِ آپ پہ اد ءِ نندوک ، آیانی دلوت ءُ کشت ءُ کشار ءِ بنکی آسراتی اَنت۔ ایٹمی سان ءُ مھترھند ءِ نمنوگری ! اے چکاساں پد چاگے ءُ ھمگْوریں دمگاں چہ تابکاری ساناں شیمک ، پوست ءُ دم ءِ نادْراھی گیش بیتگ۔ چوش ھم گْوشگ بیت کہ زمین چیری ءِ آپ ھم چہ تابکاری ءَ گھ اتگ اَنت۔ بلوچ رسانک ءُ گلاں اے جیڑہ سھرا کرت ، بلے مھترھند ناں ایوک ءَ اے بارہ ءَ ھچ پٹ ءُ پول ءَ ساڑی نہ بوت بلکیں سانمندیں مردماں ھم ھچ رنگیں کمک ئِے نہ دات۔راستی ایش اِنت کہ اے بلوچستان ءَ ایٹمی چکاس نہ اَت اَنت بلکیں بلوچستان ءِ سر ءَ ایٹمی ارش اَت اَنت۔ دمگ ءِ لشکری بالادستی ءُ چاگردی پدمنتگی پاکستان یکشل ءَ وتی دیمپانی ءُ جنگی چن ءُ لانچانی نام ءَ مردمانی آسراتیاں لشکر ءِ سر ءَ خرچ کنت ، ایشی ءِ آسر ایش اِنت کہ : • وانگ ، جاندْراھی ءُ روزگار ءِ تہ ءَ نزوری ءُ کمی اتکگ۔ • مردم نیزگاری ءُ نیستی ءِ آماچ اَنت۔ • ھمساھگیں ڈیھاں دزمانجنی کنگ ءُ آیاں ھلک ( ھَل لَک : غیرمستحکم ) کنگ ءِ کوشست ءَ اِنت۔ • پاکستان ایٹمی توان بیگ ءِ ٹاپار ءَ جنت ءُ ھمساھگیں ڈیھانی سر ءَ ایٹمی ارش کنگ ءِ بیھار دنت ، اے پہ سرجمی دمگ ءَ مدامی ئیں ترسے۔ چہ جھان ءَ لوٹ پاکستان رنگیں ھلکیں ڈیھے ءِ دست ءَ ایٹمی سلحہ پہ جھانی ایمنی ءَ ترسے۔ پہ مردمگری ءِ پھریزگ ءَ المی اِنت کہ : • جھانی واکانی چیردستی ءَ پاکستان چہ ایٹمی توان ءَ زبھر کنگ بہ بیت۔ • بلوچستان ءَ چہ ایٹمی چکاساں سانمند بیتگیں مردمانی جاور ءِ زانگ ءَ آزاتیں رنگے ءَ پٹ ءُ پول ءُ کمکی گامگیج زیرگ بہ بیت۔ اے ایوک ءَ بلوچستان ءِ جیڑہ نہ اِنت بلکیں سرجمیں مردمگری ءِ پھریزگ ءُ ایمنی ءِ گپ اِنت۔ *بلوچ راجی زْرمبشت ( بی این ایم )* ☢️ #NukeAftermathInBalochistan
*ھندوستان کسانیں بیڑانی جاہ ءَ ، دمگ ءِ آمید ءِ نیمگ ءَ دلگوش بہ کنت ءُ تچکیں شونداتے بہ ٹاھین ایت — ڈاکٹر نسیم* آدینگ ، 16 مئی ، 2025 |بن شون : PRBNM43/2025 https://thebnm.org/balochi/statements/23677/ بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ پاکستان ءُ ھندوستان ءِ انگیں گر ءُ چیلانی سر ءَ درائینتگ ھندوستان ءُ پاکستان ءِ میان ءَ اے جیڑہ ایوک ءَ دو مھترھندانی میان ءَ نہ اِنت بلکیں ھندوستان ءِ بھر کنگ ءِ ھما گْوستانکی ویل ءِ برجاھی اِنت کہ بلوچستان ءِ پجیگ ءَ سرجمیں دمگ ایشی ءِ تاوانانی دیمپان اِنت۔ ھندوستان ءِ بھر ءُ بانگ ءَ کْوھنیں مھترھند ، راج ءُ دیرمانیں ایمنی ، داشت ءِ گت ءُ گمان پہ مدامی آدرو کرت اَنت۔ایشی ءِ پد ءَ اے دمگ ءَ جاھے گرم ءُ جاھے سارتیں جنگ ءِ جمبر پہ مدامی ساھیل اَنت۔ آئی ءَ گْوشتگ چہ ھندوستان ءِ نیمگ ءَ پاکستان ءِ سر ءَ بیوکیں کسان ءُ مانگیش اتگیں بیڑ ، جنگ بندی ءِ جار ءُ سوب ءُ پروش ءِ ککارانی تہ ءَ اے پرارزشتیں گپ ڈالچار بیگ ءَ اِنت کہ بلوچ ، پشتون ، سندی ءُ کشمیری راج ءَ اے جنگ ءِ سر ءَ تچکیں دیدانکے زرتگ کہ اے جنگ پاکستانی پنجاب شاھی ءُ ھندوستان ءِ میان ءَ اِنت ، چیردست راج چہ ایشی ءَ یک کر اَنت۔ ڈاکٹر نسیم ءَ گْوشتگ اگاں ھندوستان پہ راستی ءَ اے دمگ ءَ پاداریں ایمنی ، دیمروئی ءُ پاکستان ءِ ناشرکاریاں پہ مدامی آسر کنگ لوٹ ایت گڑا آئی ءَ ایوک ءَ کسانیں لشکری بیڑانی سر ءَ اوست بندگ نہ لوٹ ایت بلکیں دمگ ءِ بنکی سیاسی ساچ ، زیردستیں راجانی بستار ءُ دمگی آمید ءِ پد ءَ تچکیں شوندات ءُ راھے گیشنگی اِنت۔ ابید چہ مگیم ءُ شیشاریں سیاسی ءُ جنگی چار ءُ ٹپاس ءَ ایٹمی سلحہ داروکیں پاکستان رنگیں لیکھی ترندروئیں مھترھند ایوک گوں کسانیں بیڑاں نزور کنگ نہ بیت۔ ڈاکٹر نسیم ءَ گْوشتگ ماؤنٹ بیٹن ءِ شور انچیں کاٹارے کہ مروچی ھم ھندوستانی دمگ ءِ سینگ ءَ پیوست اِنت ءُ چہ آئی ءَ یکشل ءَ ھون رچگ ءَ اِنت۔داں وھدے اے گْوستانکی زوراکی ءُ ردی منگ مہ بیت ، انیگیں جاور ءِ راستیں چار ءُ ٹپاس ءُ گر ءُ دار بیت نہ کنت۔ پاکستان ناابرمیں مھترھندے ، کہ کْوھنیں راجانی زمینانی سر ءَ کینگ ءُ کستی ئیں لیکہ ءُ زورشاھی شورانی رد ءَ برجاہ اِنت۔مھترھند ، آئی ءِ درسیں وس ءُ واک گوں ایمٹی سلحاں انچیں ترندروئیں لشکر ءِ دست ءَ اِنت کہ ناں ایوک ءَ ھندوستان بلکیں پہ سرجمیں دمگ ءُ جھانی ایمنی ءَ یکشلیں بیھارے۔ آئی ءَ گْوشتگ ماں پھلگام ءَ چہ پاکستانی مھترھند ءِ کمک ءَ بیتگیں ناشرکاریں ارش کہ آئی ءِ تہ ءَ بے میاریں مردم کشگ بیتگ اَنت ، ھمے شوندات ءِ دْرچ اِنت کہ آئی ءِ تہ ءَ ناشرکاری پاکستان ءِ تھی ءُ دری شونداتانی بنکی پلپا اِنت۔ اے مھترھند ناشرکاری ءِ رودم جاہ اِنت ءُ اے ناشرکاری ءَ مھترھندی تک ءَ مالی ، لیکھی ءُ لشکری کمک ھست۔داں اد ءَ جھانی ناشرکار مولانا مسعود اظھر ءِ نزیکیں مردمانی کوش ءَ پد ھم پاکستانی لشکر ءِ سروگان روچ ء رامانی آیانی جنازہ ءَ گون بیتگ اَنت ، چہ ایشی ءَ اے کلوہ رس ایت کہ مھترھندی ناشرکاری اوشتگ ءِ وڑ ءَ نہ اِنت۔ بی این ایم ءِ سرکماش ءَ گْوشتگ دمگ ءَ ناشرکاری ءِ آسر کنگ ، ایمنی ، داشت ءُ پاداریں دیمروئی ءِ ھچ راہ داں ھما وھد ءَ کارامد نہ بیت کہ 14 اگست 1947 ءِ گْوستانکی سیاسی ردی منگ مہ بہ اَنت ءُ نا ابرمی مھترھند ءِ ساچشتی اڑاند ءِ سنگینیں چار ءُ ٹپاس کنگ مہ بیت ، دمگ ءِ چیردستیں راج ، گچینی بلوچستان ءِ گْوستانکی بستار ، راجی پجار ءُ آجوئی ءِ جھد دیناداسی منگ مہ بہ اَنت۔ھمے تیوکیں راہ اِنت کہ اے دمگ ءَ چہ مدامی ئیں جنگ ، ناشرکار ی ءُ بے تاھیری ءَ در کنت ءُ پر ایمن ، آمید ءُ دیمروئی کنوکیں باندات ءِ نیمگ ءَ برت کنت۔ *« چاگردی رسانکدر ءِ چیڑو : ایکس |پیس بک | ٹیلی گرام | واٹساپ چینل »* https://x.com/BNMbalochi/status/1923457931497898020 https://www.facebook.com/share/p/17BLwfYxcU/ https://t.me/bnmovement/6588 https://whatsapp.com/channel/0029Va68s311dAw0lOJfGt2l
https://x.com/drnaseembaluch/status/1929177393496793350?s=46
