ZPM Lai District Headquarters

ZPM Lai District Headquarters

2/12/2025, 11:38:22 AM

“ Kan ram leh hnam tan ZPM sawrkarah beisei tur tam tak a awm avangin, vawiin hian min lainat a min duhsak thintu mi tam takte kalsanin ZPM ah kan rawn lut a ni. LADC tan awmze nei zawk leh sawt zawka hnathawh kan duh avangin he party-ah hian kan lo lut a, min demtu leh sawiseltu an awm pawhin an demawm loh e.ADC te hmakhaw ngaitu he ‘Kalphung thar’ hian Lairam mipuite tan thil thar, rorelna tha leh hmasawnna ngialnghet tak thlen tir kan tum dawn a ni. Kan ngaihpawimawh leh kan thupui ber chu ADC te hmakhaw ngaitu he ‘Kalphung thar’ sawrkarah hian, kan ram leh hnam hmasawnna tur ngialnghet tak thlen tir kan tum dawn a ni. - Pu V. Zirsanga, MDC. Leader, ZPM Legislature Party.

ZPM Lai District Headquarters

2/12/2025, 11:37:38 AM

“ Hun rei tak ata kan lo thlir leh kan nghahhlelh em em LADC-ah ‘Kalphung thar, Mipui Sawrkar’ lo piang mai tur hi a lawmawm ka ti tak zet zet a ni. ZPM MDC hmasa ber leh Leader of Opposition ni tawh ka nih avangin CEM nimai turah min beisei maithei a. Amaerawhchu, kan hotute hmalakna leh ruahmanna hi kan pawm a tha ber a, an rorel danah hian ka dam thlap a ni. Thawhhona tha tak leh inlungrualna nen ke i pen ho zel ang u. ” - K. Hre Kung, MDC. Member, ZPM Legislature Party.

ZPM Lai District Headquarters

2/12/2025, 2:23:53 PM

PRESS RELEASE "Vawiin hi ZPM tan LADC history-a hriatreng tawh tur ni pawimawh leh chhinchhiah tlak tak a ni a, 'Lairam thar indinna tanna ni' ah kan ngai a ni. " - Pu MC. Lalramchhana President ZPM Lai Dist. Hqtrs. Dated Lawngtlai, 12th Febuary, 2025. Vawiin khan ZPM Lai District Headquarters office Lawngtlaiah, 'Special Programme' pawimawh tak neih a ni a. He hun kaihruaitu Pu MC. Lalramchhana President ZPM Lai Dist. Hqtrs chuan ZPM Legislature Party member te'n LADC ah sawrkarna siam thei turin member an ngah tawk tawh thu sawiin, LADC ah 'Kalphung thar' sawrkar a piang ngei dawn nia a lan thu a sawi a. "Vawiin hi ZPM party tan LADC history-a hriatreng tawh tur ni pawimawh leh chhinchhiah tlak tak a ni a, 'Lairam thar indinna tanna ni' ah kan ngai a ni. " a ti. Pu V. Zirsanga, Leader ZPM Legislature Party chuan, “Kan ram leh hnam tan ZPM sawrkarah beisei tur tam tak a awm avangin, vawiin hian min lainat a min duhsak thintu mi tam takte kalsanin ZPM ah kan rawn lut a ni." a ti a. LADC tan awmze nei zawk leh sawt zawka hnathawh an duh avanga ZPM chu zawm an nih thu sawiin, ‘Kalphung thar’ sawrkarah Lairam mipuite tan thil thar, rorelna tha leh hmasawnna ngialnghet tak thlen tir an tum thu a sawi bawk a. Lâwm taka lo dawngsawngtu ZPM party chungah lawmthu a sawi bawk. ZPM Legislature Party Leader lo ni tawh Pu K. Hre Kung pawhin thusawiin, “ Hun rei tak ata kan lo thlir leh kan nghahhlelh em em LADC-ah ‘Kalphung thar, Mipui Sawrkar’ lo piang mai tur hi a lawmawm ka ti tak zet zet a ni." a ti a. ZPM MDC hmasa ber leh Leader of Opposition ni tawh a nih avanga CEM nimai tura beisei tute chu hotute hmalakna leh ruahmanna pawm thiam turin a ngen a. Amah pawh a rilru a dam thusawiin, thawhhona tha tak leh inlungrualna nena ke pen ho zel turin party mite chu a chah s ni. Ex-CEM Pu T. Zakunga pawhin thusawiin, " 11th LADC hun tawite kan la neih chhungin ZPM kaihhruai 'Kalphung thar' sawrkar hian danglamna nasa tak thlen tir kan tum a, he ZPM sawrkarah hian 'Lairam damna' tur khawpa hmalakna lian tham, kan tu leh fa te thlenga an hriatreng tawh tur, kan ram leh hnam tan hmasawnna rahbi thar thlen tir kan tum a ni." a ti bawk. ZPM Lai District Headquarters President Pu MC. Lalramchhana kaihhruai he hunah hian Pu H. Lallungruala Treasurer chuan hunserh hmangin, Pu J. Zahlira Sr. Vice President chuan thusawina hun a nei bawk a. ZPM Lai District Headquarters hruaitute, ZPM MDC te, ZPM party mi leh mipui thahnemtak an tel a ni. Issued by :- Media, IT & Publicity Department ZPM Lai District Headquarters PR. No. ZPM-04/Lai-DHQ/2024-2026/IT/62 Dated Lawngtlai, 12th Febuary, 2025.

ZPM Lai District Headquarters

2/12/2025, 11:38:40 AM

" 11th LADC sawrkar kal mekah, hun tlemte kan la neih chhung hian ZPM kaihhruai he 'Kalphung thar' sawrkar lo piang tur hian danglamna nasa tak thlen tir kan tum a ni. 'Lairam damna tur' policy kan buaipui dawn a, kan tu leh fate thlenga an hriatreng tawh tur, he kan Lairam leh hnam tan hian hmasawnna rahbi thar lian tak thlen tir ngei kan tum nghet tlat a ni." - Pu T. Zakunga, MDC ZPM Legislature Party.

ZPM Lai District Headquarters

2/12/2025, 8:23:21 AM

LADC AH SAWRKARNA SIAM TURIN ZPM AN INPEIH Dated Lawngtlai, 12th Febuary, 2025. 11th LADC sawrkar kal mekah, elected MDC 13 neitu ZPM party chu sawrkarna siam turin a inpeih fel. Pu C. Lalmuanthanga kaihhruai Congress leh MNF inzawm ULP sawrkara MNF elected MDC pahnih, Pu V. Zirsanga Paithar bialtu MDC leh, Pu Lallawmsanga Apetow Sekulh bial MDC te leh, nominated MDC Pu H. Lalramfawna leh Pi Z. Ngunchhini te chuan vawiin khan ZPM party an zawm tak avangin, ULP sawrkar kal mek chuan elected MDC 12 neiin, sawrkarna siam turin MDC an ngah tawk tawh lova. ZPM Legislature Party chuan elected member 13 nei thungin, sawrkarna siam turin an tling tawk (majority command) tawh thung a ni. Heti hian member 29 awm mekna LADC ah, ZPM party chuan MDC 15 (elected 13 & nominated 2) neiin, ULP chuan MDC 14 (elected 12 & nominated 2) an nei mek a, sawrkarna siam turin an tling tawk a ni. ZPM Legislature Party member-te hian Mizoram Governor hnenah sawrkarna an siam theih thu a hma thei ang berin thlen an tum bawk a ni. Issued by :- Media, IT & Publicity Dept. ZPM Lai Dist. Hqtrs, Lawngtlai.

ZPM Lai District Headquarters

2/10/2025, 2:40:06 PM

*REPORT* Dated Lawngtlai, 10th February, 2025. Vawiin chawhma dar 11 : 00 a.m khan 'party chhung inkhawm leh tawngtairualna hun' ZPM Lai District Headquarters Lawngtlai Office ah hman a ni. He hun hmanna ah hian Pu Biakchhunga Chinzah Adviser, ZPM Lai District Headquarters chuan thusawina hun hmangin, 'Green Revolution for Food Security' chungchang ngaihnawm tak leh bengvarthlak tak a sawi a. Mizoram ei leh bar a kan intodelh a tul zia leh kan ram hruaitu hmasate hetiang kawng a an inthlahdah avang a tun thleng a State dangte thawhchhuah ring a khawsa kan ni a, a pawi takzet a ni, a ti a. Ei leh bar intodelhna theihna tur a hma la tur hian mimal tinte hian kan rilru leh kan ngaihtuahna te kan sen theuh a tul a ni' a ti. A sawizelna ah, 'Lawngtlai District bik phei chu buh leh bal chinna tur hmunhma kan nei tha em em a, Mizoram pumpui chawm theitur khawp buh leh bal tharchhuah theihna kan nei a ni. LADC sawrkar hian ei leh bar a kan intodelh theihna tur kawng hi ngaihtuah se, a tak in hma la se, a chhung a chengte hian tih takzetin hma la theuh ila, kan intodelh ngei ang' a ti. Vawiin hun hmanna ah hian Pu Samuel Laldawngliana, General Secretary chuan Media Department aiawhin thil pek hlanna hun hmangin, ZPM Lai District Headquarters-ah party fund atan Rs. 5,000 /- a hlan a ni. Pu NT. Lalmuanzuala, General Secretary hnen atangin Sekulh bial zin report ngaihnawm tak ngaithlak zui a ni bawk. Vawiin chhung inkhawm hi Pu Lalzirtluanga, General Secretary chuan kaihhruaiin, Upa K. Zozamliana Adviser, ZPM Lai District Headquaters in hunserh a hmang a. Pu MC. Lalramchhana President ZPM Lai District Headquarters, Pu K. Hre Kung Leader, ZPM Legislature Party LADC leh a thawhpui ZPM MDCs te, ZPM Lai District Headquarters hruaitute leh party mi engemawzat an tel a ni. Issued by :- Media, IT & Publicity Dept. ZPM Lai Dist. Hqtrs Lawngtlai.