زْرمبش بلوچی | 🎙ZBC
5.6K subscribers
About زْرمبش بلوچی | 🎙ZBC
Zrumbesh Broadcasting Corporation is an autonomous body of BNM (Baloch National Movement : https://www.thebnm.org/) that broadcasts news in various languages🎙️
Similar Channels
Swipe to see more
Posts
درکانودی کوش ءُ زوراکیاں سرجمیں راج جنجالانی دیمپان کرتگ۔ ڈاکٹر شلی بلوچ یک شمبے، 22 جون 2025 زرمبش بلوچی https://zrumbesh.com/13332/ بلوچ وومن پورم ءِ سروک ڈاکٹر شلی بلوچ ءَ نیشنل ڈیمو کریٹک پارٹی ءِ بنجاھی پتر ءِ باسک گنی بلوچ ءِ زوریں بیگواھی ءَ ماھےءِ گوزگ ءُ آواران ءِ جاہ منند سگیر بلوچ ءُ آئی ناکو زتک اکرار جنگیان ءِ لھتیں روچ پیش ءِ زوریں بیگواھی ءِ سر ءَ بژن درشان کرتگ ءُ گوشتگ کہ اے ویلانی ھواری ءَ بلوچ راج ءِ بگیری ءَ گیش بیوکیں درکانودی کوش ءُ زوراکیاں سرجمیں راج جنجالانی دیمپان کرتگ۔ آئی ءَ گوشتگ کہ زوریں بیگواھی میان استمانی کانود ءِ رد ءَ منگ نہ بیت ءُ پاکستان ءِ راھبند ھم ایشی موکل ءَ نہ دنت، بلے ریاستی ادارہ بلوچاں آیانی پجار ءِ بنیاد ءَ آوارجنگ ءُ چیریں آزار جاھاں بندیگ کنگ ءَ اِنت، اود ءَ آ گنتریں جانی ءُ سسائی آزارانی دیمپان اَنت۔ باز براں آزارانی سوب ءَ مرگ ءَ اَنت کہ انسانی ھکانی تچکیں بگیری اِنت۔ ڈاکٹر شلی بلوچ ءَ گوشتگ کہ چہ زوریں بیگواھیاں ریاستی ھمگرنچی ءَ ابید کینگ، بے ستکی ءُ مردمانی تہ ءَ دوری ودی بوگ ءَ اِنت۔ گوں ریاستی ادارھاں لوٹ کن ایں کہ بلوچستان ءَ زوریں بیگواھی ءُ رستری شوندات ھلاس کنگ بہ بنت۔ آئی ءَ گڈی ءَ گوں لس بلوچاں لوٹ کرتگ کہ آ پہ اے نزوریناں توار چست بہ کن اَنت، چی ءَ کہ مچی توار ءُ جھد مئے راجی باندات ءَ مھکم کنت۔
زرمبش ٹی وی ءِ ھال| شمبے، 21 جون 2025 https://youtu.be/LbV2DksgZLA?si=VCbwulpek1qIJQ9G
بلوچ راج پہ منی برات بیبرگ بلوچ ءِ آجوئی ءَ توار چست بہ کنت۔ گھار https://youtu.be/f9J1PHRcSr8
چہ کلات ءُ گوادر ءَ سے مردمانی لاش دزکپتگ یک شمبے۔ 22 جون 2025 زرمبش بلوچی https://zrumbesh.com/13329/ کلاتءُ گوادر ءَسے مردم ءِ لاش دزکپتگ کہ چہ آیاں دو زور بیگواھیں مردم اَنت۔ بنشون ءِ رد ءَ چہ کلات ءِ ھند منگوچر ءِ نزیک ءَ دو مردم ءِ لاش دزکپتگ چہ آیاں یکے زور بیگواھیں سیپ اللہ ء رھیم داد اِنت کہ 11 جون 2025 ءَ زور بیگواہ کنگ بیتگ۔ دومی مردم انگت ءَ پجارگ نہ بیتگ۔ دومی نیمگ ءَ چہ گوادر ءِ ھند نیا آباد ءَ درچکانی تہ ءَ مردمے ءِ لاش دزکپتگ۔ آئی ءِ نام پیسل ھاسل اِنت کہ لھتیں روچ پیش بیگواہ کنگ بیتگ۔ پولیس ءِ گوشگ اِنت کہ آئی لاش ءَ لھتیں روچ بیت کوھن اِنت ھمے درچکانی تہ ءَ چیر دیگ بیتگ۔ کھول ءِ گوشگ اِنت کہ آئی نمبر انگت ءَ پچ اِنت ءُ پجار نہ بیتگیں مردم آئی ءَ کارمرز کنگ ءَ اَنت۔
جاھو ءَ پاکستانی پوج ءِ سر ءَ اُرش ءِ زمہ واری بی ایل ایپ ءَ من اِتگ شمبے، 21 جون 2025، زرمبش بلوچی https://zrumbesh.com/13325/ بلوچستان لبریشن پرنٹ (بی ایل ایپ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچاراں 20 جون 2025 ءِ بیگاہ ءَ آواران ءِ ھند جاھو ڈولیجی ءَ برجاھیں پاکستانی پوج ءِ چوکی ءِ سر ءَ گوں نوکیں سلاھاں اُرش کرتگ۔ آئی گوشتگ کہ اُرش ءِ آسر ءَ دژمنیں پوج ءِ دو کارمند مرتگ ءُ سَے ٹپی بوتگ۔ میجر گھرام ءَ اُرش ءِ زمہ واری من اِتگ۔
بلوچ نودربر مھمد ندیم زوت دیمءَ آرگ بہ بیت۔ نسر اللہ بلوچ یک شمبے، 22 جون 2025 زرمبش بلوچی https://zrumbesh.com/13335/ شال: وائس فار بلوچ مسنگ پرسن ( وی بی ایم پی ) ءِ سرکماش نسر اللہ بلوچ ءَ وتی شنگ کرتگیں درشانے ءَ گوشتگ کہ زور بیگواھیں مھمد ندیم ءِ کھول ءِ گوشگ اِنت کہ مھمد ندیم ء ھاپز مھمد رھیم مھمد ھسنی،کلات ءِ ھند منگچر، کلی گزک جوھان دوراھی ءِ جاہ منند اِنت، آئی اُمرشانزدہ سال اِنت ءُ ھزدار ءَ بلوچستان ریزیڈنشل کالج (BRC) ءِ نودربر اِنت۔ آئی ءَ گوشگ اِنت کہ مھمد ندیم گرمی ءِ موکلاں پہ گیشتر وانگ ءَ شال ءَ اتکگ ءُ گلوبل بلڈنگ ءَ سلیم میڈیکل کمپلیکس ءِ نزیک ءَ بیتگ دانکہ ٹیوشن سینڑ ءَبوان ایت۔ 14 ءُ 15 جون ءِ میانی شپ ءَ یک ءَ پوج ءُ دگہ بازیں سادگ پوشاکیں مردم اتکگ اَنت مھمد ندیم آوار جتگ ءُ بیگواہ کرتگ۔ اے ویل ءِ چم دیستگیں گواہ نودربر ءُ آدگہ مردم اَنت کہ ھمے ماڑی ءَ جاہ منند بیتگ اَنت۔ نسر اللہ بلوچ ءَ گوشتگ کہ اے ویل ءَ پد مھمد ندیم ءِ ھچ وڑیں ھال نیست۔ کھول، سنگتءُ آدگہ سیاد جتائیں تانہ۔ ادارہ ءُ نادراھجاھاں شتگ ءُ پٹ ءُ پول اِش کرتگ بلے داں انوں مھمد ندیم ءِ ھچ وڑیں ھال نیست۔ اے وھد ءَ کھول سکا جنجال ءُ تکانسر اِنت۔ آئی ءَ گوشتگ کہ وی بی ایم پی ھمے لوٹ ءَ کنت کہ ندیم ءِ سر ءَ چونیں بھتامے ھست گڑا کانود ءِ رد ءَ آمیدگس ءَ پیش کنگ بہ بیت ءُ آئی کھول سھی کنگ ءُ کانود ءِ لوٹ پیلو کنگ بہ بنت۔ درکانودی زور بیگواہ کنگ نہ تھنا کانود ءِ بگیری اِنت بلکیں انسانی ھکانی پادمالی اِنت۔
امریکہ ءَ ایران ءِ سر ءَ اُرش کرتگ ءُ جوھری شوربندی نشانگ کرتگ اَنت یک شمبے، 22 جون 2025، زرمبش بلوچی https://zrumbesh.com/13338/ امریکہ ءَ ایران ءِ سر ءَ اُرش کرتگ ءُ ایران ءِ جوھری شوربندی نشانگ کرتگ اَنت۔ امریکی مھتر ڈونلڈ ٹرمپ ءَ اے اُرش سوبمند ءُ ھژدری لیک اِتگ اَنت۔ جھانی رسانکدر ءِ رد ءَ اُرش ءَ پرڈو، نتنز ءُ اسپھان ءِ جوھری شوربندی نشانگ کنگ بیتگ اَنت۔ اے بابت ءَ امریکی سرکار ءِ گوشگ اِنت کہ اے ارش ایران ءِ سر ءَ پہ جوھری پروگرام ءِ دارگ ءُ اسرائیل ءِ سر ءَ میزائل اُرشانی پژدر ءَ کنگ بیتگ اَنت۔ ایرانی سرکار ءِ گوشگ اِنت کہ نشانگ بیتگیں شوربندی پیسر ءَ ھالی کنگ بیتگ اَنت، پمشکا دگہ جانی تاوان ءِ ھال نیست ءُ جوھری مواد ھم مھکم اَنت۔ ایرانی دری کارانی وزیر ءَ اے اُرش زوراکی ءُ میان استمانی پہ ایمنی ءَ ترس لیک اتگ اَنت ءُ ایشی بیرگیری ءِ بیھار داتگ۔ ایرانی رسانکدر ءِ رد ءَ ارشاں پد زوت ایران ءَ اسرائیل ءِ باز شوربندی پسھی اُرش ءَ گوں میزائلاں نشانگ کرتگ اَنت۔ چہ ایشی آسر ءَ لھتیں مردمانی ٹپی بوگ ءِ ھال اِنت۔ اکوام مھتدہ ءِ کارگشاد جنرل انتونیو گوٹریس ءَ جاورانی سر ءَ بژن درشان کرتگ ءُ دوئیں نیمگاں پہ سپارتی گیش ءُ گیوار ءَ لوٹ کرتگ۔ یورپی یونین ءُ روس ءَ امریکہ ءِ اے گامگیج ءِ سر ءَ نادلکشی درشان کرتگ۔
بی وائی سی ءِ سروک درکانودی بندیگ اَنت پہ بلوچ ءُ بلوچستان ءَ توار چست بہ کن اِت۔ سائر بلوچ https://youtu.be/OjJP6f5CbxM
کلات ءِ اُرشاں زورگریں پاکستانی پوج ءِ 15 کارمند کشتگ - بی ایل اے شمبے، 21 جون 2025، زرمبش بلوچی https://zrumbesh.com/13327/ بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں کلات ءَ شش یکشلیں اُرشاں زورگریں پاکستانی پوج سکا تاوان داتگ ءُ پانزده کارمند کشتگ. اے اُرشاں چیر کرتگیں بمب ءُ سلاه بندیں اُرش ھوار اَنت۔ آئی ءَ گوشتگ که بی ایل اے ءِ سرمچاراں مرچی کلات ءِ ھند منگچر ءَ ڈیم ءِ نزیک ءَ زورگریں پاکستانی پوج ءِ کارمند ھما وھد ءَ گوں چیر کرتگیں شورھاں نشانگ کرتگ اَنت که آ په کاروان ءِ پھازگ ءَ سنگرے ءَ سر بیتگ اَنت که سرمچاراں ساری ءَ اود ءَ تراکناکیں شورھ چیر کرتگ اَت، تراک ءِ آسر ءَ دژمن ءِ دو کارمند جاھی مرتگ۔ جارکش ءَ گوشتگ که ھمے ھند ءَ سرمچاراں دومی بمب اُرش ءَ دژمنیں لشکر ءِ کارمند ھما وھد ءَ نشانگ کرتگ اَنت که آ یکجاه ءَ مچ بیتگ اَنت. تراک ءِ آسر ءَ چه شش کارمنداں دو کارمند جاھی مرتگ ءُ دگہ چار سکا ٹپی بیت۔ آئی ءَ گوشتگ که ھمے وڑ ءَ بی ایل اے ءِ سرمچاراں کلات ءِ ھند موڑگند ءِ نزیک ءَ مکٹی ءَ پاکستانی پوج ءِ کاروان ءِ پھازداریں ھما کارمند که پوج ءِ سنگرے ءَ سر بیتگ اَنت گوں چیرکرتگیں شورھاں نشانگ کرتگ اَنت که چه ایشی ءَ دو کارمند جاهی مرتگ۔ جارکش ءَ گوشتگ که چه ایشی ءَ پد سرمچاراں ھمے ھند ءَ بمب درگیجوکیں دو کارمند گوں چیرکرتگیں نشانگ کرتگ ءُ کشتگ۔ آئی ءَ گوشتگ که ھمے ھند ءَ پاکستانی پوج ءِ لشکرکشی کنوکیں گاڑی یے ھم سرمچاراں گوں تراکناکیں شورھاں نشانگ کرتگ که ایشی آسر ءَ گاڑی سرجم ءَ تباه بیتگ ءُ سواریں چار کارمند مرتگ اَنت۔ جارکش ءَ گوشتگ که ھمے ھند ءَ سرمچاراں سنگر گپتگ ءُ پاکستانی پوج ءِ لشکرکشی کنوکیں کاروانے ءَ ھواریں پرپٹ ءُ گاڑی اُرشے ءَ نشانگ کرتگ اَنت ، زورگریں پاکستانی پوج ءِ یک گاڑی یے سرجم ءَ اُرش ءِ زد ءَ اتکگ که ایشی آسر ءَ پوج ءِ سے کارمند جاھی مرتگ ءُ دو سکا ٹپی بیتگ۔ جیھند بلوچ ءَ درشان ءِ گڈی ءَ اے اُرشانی زمه واری من اتگ گوشتگ که دژمنءِ سر ءَ اے وڑیں ترندیں اُرشانی یکشل ءَ برجاه دارگ ءِ کول ءَ کن ایں۔
مستونگ ءَ تیرگواری ءَ دو مردم بیران بوتگ شمبے، 21 جون 2025، زرمبش بلوچی مستونگ: دتو ءَ سلاہ بندیں مردمانی تیرگواری ءَ دو مردم بیران بوتگ۔ اھوالکار ءِ رد ءَ سلاہ بندیں مردماں دتو ءَ ھوٹل ءِ نزیک ءَ تیرگواری کرتگ ءُ پولیس کارمند شکیل بنگلزھی ءُ ادنان دھوار کشتگ اَنت۔ بیران بوتگیں مردمانی لاش پہ ھژدری چار ءُ ٹپاس کنگ ءَ نادراھجاہ ءَ برگ بوتگ اَنت۔ کوش ءِ سوب انگت زانگ نہ بوتگ۔ https://t.me/zrumbesh/30869