السلام عليكم ورحمه الله وبركاته غالبا كل رمضان بييجى علينا بنروح شادين اول ٣ ايام وبعدها بنريح خالص الا اللى ربنا بيوفقه ودة بيبقى بسبب انك مش متعود على العبادة بالطريقة دى فبيحصل لك زى اللى بيحصله شد عضلى كدة كأنك واحد داخل الجيم اول مرة فى حياته وراح داخل على طول انه يشيل ييجى ١٠٠ كيلو فالحل للموضوع دة وباقى اقل من شهر على رمضان انك تبدأ من دلوقتى تعود قلبك وجوارحك على الطاعة فبالتالى لما ربنا يكرمك وتجتهد فى رمضان زيادة يبقى انت زى ما يكون مسخن وقلبك منشرح لانه يزود اكتر واكتر وجوارحك كذلك فتعمل ايه بقى ؟! قال رسول الله صلى الله عليه وسلم عن صوم شعبان: "ذاك شهر تغفل الناس فيه عنه، بين رجب ورمضان، وهو شهر ترفع فيه الأعمال إلى رب العالمين، وأحب أن يرفع عملي وأنا صائم." ١- انك تبدأ تعود نفسك على الصيام من دلوقتى هتنفذ سنة الرسول صلى الله عليه وسلم + هتاخد حسنات الصيام + الصيام فى رمضان بإذن الله هيبقى أخف عليك لانك هتكون بدأت تتعود حاجة كمان تستفيدها من الحديث دة : انك لما تعبد فى شعبان(وقت وصفه الرسول صلى الله عليه وسلم انه وقت يغفل عنه الناس) فدة بإذن الله يكون اكبر فى الاجر ليك ٢- انك تبدأ تقرأ قرآن ويبقى ليك كل يوم ورد ولو حاجة قليلة جدا فبإذن الله لما رمضان ييجى تكون متعود وتقدر تزود ٣- تبدأ تزود من النوافل عموما وتبدأ تعود نفسك عليهم ولو هتاخد كل يوم جزء بسيط من كل حاجة وخصوصا السنن الرواتب وقيام الليل ٤- ومن أهم الحاجات أنك تبدأ من دلوقتى تحصى ذنوبك وايه اللى عايز تتخلص منه ومش عارف او اللى بتجاهد فيه جامد جدا وتبدأ من دلوقتي تعود نفسك انك تبعد عنه وتجاهد نفسك فيه فلما رمضان ييجى بإذن الله تكون قطعت شوط كبير فى مجاهدتك ضد الذنب وبإذن الله ربنا يوفقك للبعد عنه خالص ٥- ابدأ ادع ربنا أنه يطهر قلبك ويعينك على العبادة ويبعدك عن الذنوب ويبلغك رمضان ويرزقك التوفيق فى العبادة فيه.