الحلقة 9 من السيرة النبوية يلا صلوا على النبى وقفنا امبارح ان سيدنا محمد ﷺ عرف انه نبي اخر الزمان وانه مكلف يبلغ الدين الإسلامي لكل الناس طب هيعمل أيه ده اللي هنعرفوا مع بعض دلوقتي... هيبدأ النبي عليه الصلاة والسلام يفكر في طريقة يبلغ بيها دين الله .. يبدأ النبى ﷺ يحكي لأصحابه القريبين منه فقرر النبي يختار ناس من أصحابه ..اللى بيحس ان فيهم خير وهيبدأ يحكيلهم.. هتختار مين يارسول الله ؟ طبعاً ابو بكر الصديق " خير البشر بعد رسول الله ".. ابو بكر ده صاحب النبي من زمان .. فالنبي ﷺ يروح له ويقول له "لقد بعثني الله بالإسلام" فيقول ابو بكر " آمنت بك يامحمد" والجميل ان النبي ﷺ قال على ابوبكر :" والله ما من احد دعوته إلي الاسلام إلا ونظر وتردد وفكر إلا ابي بكر ما ان دعوته اسلم لله عز وجل .. الصديق.. بيصدق رسول الله بمجرد ما بيتكلم .. ليه؟ عشرة عمر.. معاه من صغره شايفه وشايف أخلاقه ومركز وشايف علامات النبوه على النبى صلى الله عليه وسلم ويقول النبى عليه الصلاة والسلام لو كنت متخداً من العالمين خليلاً لأتخذت أبا بكر خليلاً.. غير ان صاحبكم " يقصد نفسه" خليل الرحمن .. ((والخُلة هي ان يتخلل الحُب كل مسام القلب وهذه المنزلة لا تنبغي في قلب الرسول الا لرب العالمين )) ابو بكر اسلم.. وبعد إسلامه بيوم يسلم علي إيديه أربعة من المبشرين بالجنة.. تخيلوا: عثمان بن عفان - طلحة بن عبيد الله - الزبير بن العوام - سعد بن ابي وقّاص .. بعد إسلام ابو بكر ..يسلم علي بن ابي طالب وكان عمره عشر سنوات .. وبعدين يسلم زيد بن حارثة (ابن النبى ﷺ بالتبنى قبل تحريم التبنى) بدأ الصحابة يكتروا.. وبقوا محتاجين مكان يجتمعوا فيه ويتعلموا القرآن .. فيطلع شاب عمره ١٣ سنة اسمه الأرقم يقول: "يارسول الله انا اتبرع ببيتي للمسلمين".. فيأخذه المسلمين وتسمي دار الأرقم بن ابي الأرقم .. ويجتمع المسلمين في الدار المباركة دى.. وربنا يخلد اسم الشاب ده في التاريخ .. " دار الأرقم " النبي ﷺ يبدأ يعلم الصحابة القران اللى بينزل عليه.. اول آيات نزلت كانت من جزء عّم " الجزء الثلاثين"..آيات قصيرة ذات تواصل بديع كلها تتكلم عن الجنة والنار.. وعن يوم القيامة.. وعن رؤية الله عز وجل.. وعن رحمة ربنا سبحانه وتعالي.. وكان اجتماعهم فى دار الارقم يبقى فى السر .. كان ده مهم قوى فى البدايه.. ليه؟ عشان خايفين من إبادة المسلمين .. المهم بدأو الصحابة يحبوا الاسلام وترق قلوبهم وبدأوا الصحابة يحبوا النبي ﷺ حب شديد.. وبعد فترة تنزل علي النبي ﷺ آية " وَأَنذِرْ عَشِيرَتَكَ الْأَقْرَبِين " وده معناه ان النبى لازم يبدأ يجهر بالدعوه لدين الله و يعلن عنها لكل الناس..خرج النبى يصلى ووراه خديجه وبعدين جه طفل صغير يصلى معاهم ..مين الطفل ده؟ على بن أبى طالب طب حد شافهم؟ ايوه ..مين؟ "عفيف الكندى" ( واحد من كفار قريش) كان واقف يتكلم مع أبو طالب كان بينهم وبين بيت النبى ﷺ كام متر وكانوا بيتكلموا فى التجارة, فعفيف بيحكى بيقول وانا أتحدث مع ابى طالب: وجدت رجل شديد الوضاءة (جميل) خرج فنظر الى الشمس ثم دخل, ثم خرج وقام يصلى. فخرجت خلفه امرأة وفعلت مثلما يفعل. ثم خرج صبى, ففعل كما فعلا. فقلت: من هؤلاء يا أبا طالب؟ فقال: هذا محمد ابن أخى. وماذا يفعل؟ فقال: لا أدرى, يزعم أنه نبى ويزعم ان هكذا يصلى (بيقول على نفسه انه نبى وان دى طريقه الصلاه لربنا ) عفيف بيقول فضلت باصص للنبى وسرحت فيه.. فأبو طالب بصلى وقالى: يا عفيف تحب تكلمه؟ ففكرت كده ورحت قايل لأبو طالب: لا لا خلينا فى تجارتنا خلينا فى شغلنا.. ويقول عفيف اديت النبى ضهرى وكملت كلامى فى التجاره.. وهتعدى الأيام وينتشر الإسلام وهنشوف ده سوا ويجى عفيف يوم فتح المسلمين لمكه.. يجى مسلم يبايع النبى ﷺ على الإسلام وكان بيعيط قوى وندمان وبيقول يا ليتنى ما فعلت.. فالنبى ﷺ فكر ان عفيف زعلان من ذنوب عملها. فقاله ﷺ:يا عفيف الإسلام بيمسح اى ذنوب قبله. فرد عفيف وقال ' انى لست أبكى من أجل ذلك يا رسول الله ولكنى أبكى ليوم كذا وكذا وحكى عفيف للنبى ﷺ انه شافه زمان لكن مهتمش انه يسمع النبى ﷺ ويتكلم معاه وفضل يقول يا ليتنى فعلت ومشى وهو يبكى ويقول: يا ليتنى فعلت (كان نفسه يكون من اوائل الناس اللى أسلمت... من أصحاب الايه الكريمه دى : وَالسَّابِقُونَ السَّابِقُونَ أُولَٰئِكَ الْمُقَرَّبُونَ فِي جَنَّاتِ النَّعِيمِ ... لازم نركز ونتعلم من الموقف ده وبلاش ابدا نأخر الطاعة عشان ربنا بيحب السابقون فهم المقربون فى جنات النعيم وعشان منندمش ونقول: ياليتنى فعلت, يا ليتنى فعلت! طيب النبىﷺ بدأ يجهر بالدعوه.. هتعمل إيه كمان يا رسول الله؟ النبى ﷺ يعمل وليمة (عزومه) ودعا كل أسياد قريش, وكانوا 40 رجل.. وبعد ما النبى عليه الصلاه والسلام عمل وليمه ودعا فيها كبراء مكه عشان يعلن انه رسول الله ويدعوهم للإسلام.. فأول ما خلصوا أكل.. قام النبى ﷺ وقف ولسه هيبدأ يتكلم معاهم.. فوقف قدامه "أبو لهب" (ده عم رسول الله .. وأولاد أبو لهب تزوجوا من بنات النبى, وطبعاً لاحظوا تغييرات مفاجأه على زوجاتهم, عشان كده عرف أبو لهب باللى هيقوله النبى).. ووقف ابو لهب وقال: يا محمد لا تتكلم, فانى لا أعلم برجلاً جاء على قومه بشر مما جئت به يا محمد!"(مشفتش حد جه بشر قد اللى أنت جى بيه يا محمد). فالنبى ﷺيسكت ويتحرج , وطبعا ميرفعش صوته على عمه أدباً وحياءاً منه, إنك على خلق عظيم بشهادة رب العالمين كان الحبيب عليه الصلاه والسلام بيصبر على آذى الناس بكل رحمه ورفق .. عارفين الصحابه بيقولوا: كنا نرى رسول الله يمشى فى طرقات مكة, وخلفه رجلا وضيئا يقذفه بالحجارة, فنقول من هذا؟ فيقولوا عمه أبو لهب! فيتعجبون لم لا يرد النبى ﷺ عليه.. (ليه النبى سايبه يأذيه كده ومش بيوقفه عند حده).. وكان أبو لهب شديد الحسن, ولقب بأبو لهب لأن لحيته كالشمس, وكان أزرق العينين, ففيه من جمال النبى ﷺ بحكم القرابة, ولكنه مات كافرا...الله يعافينا ويعافيكم.. المهم بعد ما العزومه الأولى باظت.. النبى صلى الله عليه وسلم مستسلمش وعمل وليمة تانيه , ولكن المره دى بقي قرر يتكلم قبل ما ياكلوا, وقام النبى ﷺ قايل كلمات جميله جداً: إن الحمد لله,نحمده ونستعينه ونستهديه ونستغفره, من يهده الله فلا مضل له, ومن يضلل فلا هادى له. أيها الناس, أما انى رسول الله اليكم. أما انها جنة أبدا, أو نار أبدا, أسلموا الى الله رب العالمين". ويقف أبو لهب ويقول: يا محمد, اسكت! اسكتوه... فيقف أبو طالب يزعق ويقوله: دع محمد يا هذاااا.. ويبص للنبى ﷺ ويقوله: والله انا اسرع واحد فى الدنيا عشان اعمل اللى تحبه (انه يسلم لله يعنى) ولكن لولا انى متمسك بدين أبائى كنت أسلمت.. بس والله يا محمد لأحميك منهم طول ما انا عايش.. قول اللى انت عايزه يا محمد انا جنبك.. (كان العرب بيعتزوا بدين الاباء وكان بيبقى عيب انك تسيب دين أبائك وابو طالب كان من كبراء مكه ) وبعد ما سمع النبى عليه الصلاه والسلام كلام عمه ابو طالب فرح جداً جداً.. ومن هنا, بدأ النبى ﷺبالجهر بالدعوة فى كل وقت, فيقف فوق جبل الصفا, وفضل ينادى كل قبيله بإسمها يا معشر فلان ابن فلان.. لحد ما اتجمعوا.. فراح قايلهم ﷺ: أرأيتكم لو أخبرتكم أن خيلا بالوادي تريد أن تغير عليكم (تحاربكم) أكنتم مصدّقيّ؟، قالوا: نعم، ما جربنا عليك إلا صِدْقا !!، (ازاى ميصدقوش دول بنفسهم لقبوه بالصادق الأمين).. فرد النبى ﷺ عليهم وقال: إني نذير لكم بين يدي عذاب شديد..وينادى كل قبيله بإسمها : "يا معشر فلان بن فلان, أسلموا لله عز وجل, فإنى لا أغنى عنكم من الله شيئا. يا فاطمة بنت محمد, أسلمى, فانى لا أغنى عنكى من الله شيئا" ... فيقف له أبو لهب ويقول : "تباً لك سائر اليوم, ألهذا جمعتنا؟ تباً لك!" ... فتنزل فيه الآيات من الله عز وجل : تَبَّتْ يَدَا أَبِي لَهَبٍ وَتَبّ ( يعنى الهلاك و العذاب لأبى لهب) .. الأيه دى فيها إعجاز جميل قوى .. بتقول ان ابو لهب اكيد هيموت على الكفر.. لان الأيه بتقول ان العذاب و الهلاك لأبو لهب .. والأيه دى خالده مخلده ليوم الدين.. طب كان ممكن ابو لهب لما تنزل الأيه دى يعمل مقلب كويس ويقول طيب انا هسلم بقي يبقى انا هخش الجنه ومحمد بيقول تبت يدا ابى لهب.. يبقى القرآن غلط.. لكن طبعا محصلش ده.. قال تعالى: وَمَنْ أَصْدَقُ مِنَ اللَّهِ حَدِيثًا.. وفعلا هيموت ابو لهب على الكفر بعد ما جهر النبى ﷺ بالدعوه اسلم عدد من الناس.. بس للأسف هيتعرضوا للتعذيب سيدنا بلال بن رباح رضى الله عنه كان عبد عند أمية بن خلف وأمية عذبه قوى..كانوا بيخدوا سيدنا بلال وقت الضهر فى عز الشمس والحر.. وبيلبسوه درع حديد :'( (انتو متخيلين السخونه!!) وكانوا يضربوه بالسياط (الكرباج) ويأمروه يشتم النبى عليه الصلاه والسلام.. وكان يرد عليهم ويقول الجمله الشهيره "أحد.. أحد" وكان أمية يربط بلال بالحبل ويدى الحبل للولاد الصغيرين ويفضلوا يجرجروه ويلفوا بيه فى طرقات مكه.. وكان لما أمية يزهق منه ،هيتجنن من ثباته فيقوله قول كلمه الكفر يقوم سيدنا بلال يغيظه أكتر ويقوله: ايه بتقول.. ايه انا لسانى مش عارف ينطق اللى بتقوله ويستمر تعذيب بلال لحد ما راح سيدنا أبو بكر علشان يشتريه من أمية ويحرره.. ويفضل أمية يطلب اموال كتير وأبو بكر قرر يدفع.. وبعد ما دفع أمية ضحك وقال: بلال ميسواش عندى كل ده.. دا انا ابيعه بأرخص تمن ( عايز يقوله انه ضحك عليه فى سعر بيع بلال) فرد سيدنا ابو بكر رضى الله عنه وقاله: انت لو كنت طلبت اكتر كنت اديتك بلال يسوى عندنا كتيييير قوى.. (عايز يقوله ان انا اللى ضحكت عليك وبلال يستاهل اكتر من اللى دفعتهولك ).. وبلال هيبقى بعد كده مؤذن الرسول ﷺ. صوتك جلجل بكلمه أحد أحد وانت بتتعذب هيعلى اكتر برفع الآذان لكل صلاه ويكون لك هذا الشرف العظيم ( مؤذن رسول الله).. مين كمان بيتعذب؟ سيدنا خباب بن الأرت سيدنا خباب كان عبد عند سيدة من قريش.. ولما عرفت أنه أسلم مسكت حديده وسخنتها جامد.. (متخيلين اللون الاحمر لما الحديد يسخن) وحطتها على راس خباب.. ومش عجيب أن ست قاسيه زى دى.. بعد كده ربنا هيبتليها بمرض وهتفضل تصرخ من الوجع .. وعلاجها هو أن راسها تتكوى. ومن التعذيب كمان اللى اتعرضله سيدنا خباب رضى الله عنه انهم كانوا بينيموه على حجر مولع ( زى الفحم كده لما يبقى سخن جدا) وكان بيحكى ويقول أن مكنش بيطفى النار دى إلا شحم ضهرى (يعنى جلده اللى ساح). وتتعذب عيله من اب وأم وابن "آل ياسر" اتعذبوا عذاب شديد..وفى مره عدى النبى جنبهم وهما بيتعذبوا وقال ﷺ : صبراً آل ياسر فإن موعدكم الجنه .. "ياسر" مات من التعذيب و"سميه بنت خياط"عذبها أبو جهل وضربها بالرمح فى مكان عفتها.. وأبنهم "عمار" اتعذب عذاب شديد غير العذاب اللى شاف أهله فيه.. عمار تحت ضغط كبييير قوى.. عمار بيطلبوا منه يقول كلمه الكفر عشان يسيبوه.. وفعلا عمار هينطق كلمه الكفر.. قريش سابت عمار... عمار يبكى ويبكى ويجرى لرسول الله.. وينزل القرآن بكلام الله.. يطمن ويجبر قلب عمار.. قال تعالى: مَن كَفَرَ بِاللَّهِ مِن بَعْدِ إِيمَانِهِ إِلَّا مَنْ أُكْرِهَ وَقَلْبُهُ مُطْمَئِنٌّ بِالْإِيمَانِ . عمار قلتها بلسانك تحت ضغط كبير.. لكن قلبك مؤمن بالله وبمحمد ﷺ..أنت مكفرتش.. انت لسه مسلم انتوا متخيلين ي جماعة الناس زمان عشان كانوا بيدخلوا الاسلام كان بيحصلهم ايه من الكفار ، فما الان فانت بتتولد مسلم ودينك الدين الغالب ف العالم ومش بتتعرض لتعذيب عشان كده ومع ذالك كثار الذنوب الا من رحمه ربه .... الحمد لله علي نعمة الاسلام وكفي بها نعمة استقيموا يرحمكم الله *نكمل بكره إن شاء الله* *قصة حياة النبي صلى* *الله عليه وسلم*