الحلقة 11 من السيرة النبوية يلا صلو على النبى رحمه رسول الله وقفنا إمبارح عند موت عبدالله بن أبى بن سلول والرسول غسله وهيصلي علية ولسه عمر بن الخطاب بيحاول يقنع رسول اللهﷺ بإنه لازم ميصليش على عبدالله بن أبى بن سلول بعد ما مات لأنه اتهم عائشه زوجه النبى بالزنا.. فعُمر بيقول: والله ظللت أذكره بمساؤى هذا الرجل (وبرضه مافيش فايدة).. لحد ما عُمر خلاص مش قادر فمسك النبىﷺ وقاله يا رسول الله أتصلى عليه وقد نهاك الله ؟؟! فالنبىﷺ يقول: لا يا عُمر بل قال الله : "اسْتَغْفِرْ لَهُمْ أَوْ لَا تَسْتَغْفِرْ لَهُمْ إِن تَسْتَغْفِرْ لَهُمْ سَبْعِينَ مَرَّةً فَلَن يَغْفِرَ اللَّهُ لَهُمْ " وأنا يا عمر سأزيد على السبعين لعل الله يغفر له.. ويصلى عليه فعلا ويستغفرله أكتر من سبعين مرة وينزل قول الله تعالى ”وَلَا تُصَلِّ عَلَىٰ أَحَدٍ مِّنْهُم مَّاتَ أَبَدًا وَلَا تَقُمْ عَلَىٰ قَبْرِهِ ۖ إِنَّهُمْ كَفَرُوا بِاللَّهِ وَرَسُولِهِ وَمَاتُوا وَهُمْ فَاسِقُونَ “ ومرة واحد كان ماسك الشاة(الغنم) بتاعته هيدبحها وماسك السكينة بأيده وبأيده التانية بيجر الشاة فينفعل النبى ﷺ ويقول: يا أخى أتريد أن تقتلها مرتين؟ هلا حددت شفرتها قبل أن تنحرها (ما تخليهاش تشوف السكينة، سن السكينة الأول وبعدين أنحرها علشان ماتشوفهاش وقالﷺ أما يتقى أحدكم ربه فى شاته ! .. صلى الله على محمد ويبقى النبى عليه الصلاه والسلام فى خروجه لغزوه(معركه) بيرد فيها الإعتداء على المسلمين فيوصى جيش المسلمين ويقول: أيها الناس لا تقتلوا شيخاً لا تقتلوا إمرأةً لا تقتلوا طفلاً لا تقتلوا مريضاً لا تهدموا بيتاً لا تحرقوا زرعاً لا تقطعوا نخلاً لا تحرقوا زهراً، ستجدون رجال فى الصوامع "كفار" تفرغوا للعبادة دعوهم وما هم فيه ولا تغيروا "تهجموا" على الجيش ليلاً، قالوا لِمَ يا رسول الله؟ قال حتى لا تُفزّعوا النساء والأطفال.. أرحم الخلق صلوات ربى وسلامه عليه.. وما أرسلناك الا رحمةً للعالمين فيستحيل يتفسر الحديث ده "لقد جئتكم بالذبح " بالشكل اللى فئه من الناس فسرته بيه وقصوا الحديث من الاحداث اللى قال النبىﷺ الحديث فيه." ونرجع للإيذاء الشديد اللى اتعرض له الصحابه ..الصحابى "مصعب بن عُمير" صحابي جميل .. كان شاب غني جدا ابن أسرة كبيرة جدا في مكة .. عنده ٢٣ سنة . وكان مترف جدا كل ملابسه وعطره من الشام (مستورد).. ومع ذلك مصعب كان بطل من ابطال الاسلام.. يوم غزوة أحد هيستشهد دفاعاً عن رسول الله.. الشاب الجميل ده اسلم فأمه قالت له: ان لم تنتهي حرمتك من الميراث.. راح قايل لها: خذي ما شئتي.. فأمه حبسته ومنعت عنه الأكل والشرب لحد ما بقى هزيل وضعيف وأصيب بحساسيه خلت جلده أتقطع وبقى جلده شبهه جلد الحية. والصحابى صهيب الرومي : صحابي جميل وشعره طويل ومكنش عربي.. كان من بلاد الروم.. قريش عذبته بعد إسلامه .. كانوا يمسكوه من شعره الطويل ويغطسوا وشه في ميه سخنه جدا ويعذبوه اول ما يحسوا انه خلاص هيتقطع نفسه ويموت فيطلعوا بسرعه راسه من الميه.. والصحابى سعد بن أبى وقاص، سعد أسلم فأمه قالتله : والله يا سعد لإن لم تنتهى عن دين محمد لا آكل طعاماً ولا أشرب شراباً حتى أموت ويقال لك يا قاتل أمك.. (أمه هتبطل تاكل وتشرب لحد ما يرجع عن الإسلام وإلا هتموت). فيقوم سعد يقول: والله يا أمى لو كانت لك مائة نفس تخرج نفساً تلو نفس على أن أترك دين محمد ما تركته فإن شئتى فكلى وإن شئتى فأتركى.. (انتى حره تكلى متكليش لو تموتى نفسك ميت مره مش هسيب دين محمد) فينزل القرأن الكريم كلام الله تبارك وتعالى مخصوص قال تعالى: ”وَوَصَّيْنَا الْإِنسَانَ بِوَالِدَيْهِ حُسْنًا ۖ وَإِن جَاهَدَاكَ لِتُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا ۚ إِلَيَّ مَرْجِعُكُمْ فَأُنَبِّئُكُم بِمَا كُنتُمْ تَعْمَلُونَ “ (لا يا سعد صاحبها يا سعد.. بس يارب دى كافرة !!.. مهما كانت صاحبها يا سعد، شوفوا القرأن أد أيه بيوصى الانسان بأمه الكافرة ما بالكم بالمسلمة؟! اللى بيأذى أمه واللى بيتسبب فى نزول دمعة من عين أمه.. الدمعة دى يا ترى قد إيه فى ميزانك يوم القيامة ؟! الصحابى عبد الله بن مسعود أسلم وحفظ سورة جديدة ونفسه يجهر بالقرأن ويعلنها.. عبد الله بن مسعود كان رفيع قوى وجسمه نحيف رضى الله عنه وأرضاه.. فعبد الله بن مسعود قال إيه؟ قال: لأجهرن بالقرأن بين ظهرانيهم.. فيخرج ويقف على جبل الصفا ويبدأ يقرا بصوت عالى ويقول: الرَّحْمَٰنُ*عَلَّمَ الْقُرْآنَ*خَلَقَ الْإِنسَانَ "سوره الرحمن". فقريش تبدأ تسأل.. مين ده اللى بيقول كلام محمد؟؟ ومش خايف مننا؟؟(كان عبدالله بن مسعودأول من يجهر بالقرآن بعد رسول الله صلى الله عليه و سلم) فيمسكوا عبد الله بن مسعود ويضربوه ضرب جامد قوى لحد ما وشه يبقى كله دم رضى الله عنه.. فيقع ويغمى عليه فبسرعه الصحابه يخدوه ويعالجوه فى بيته وأول ما يفوق يقول والله لأعيدنها غداً.. ويروح تانى يوم وفوق الجبل يطلع يقول: الرَّحْمَٰنُ*عَلَّمَ الْقُرْآنَ*خَلَقَ الْإِنسَانَ ويضربوه ضرب أشد من اليوم الاول فيقول والله لأعيدنها غداً.. فيجيله النبى ويقوله يا ابن مسعود كفاك.. فإنك أسمعتهم من كلام الله ما يكفى.. فيقول: يا رسول الله والله لقد هانوا عليا (انا اتعودت على الضرب بتاعهم انا مش تعبان).. والصحابه يبدؤا يقنعوه ان كفايه كده وفى الآخر سمع كلامهم.. الحمدلله بدأت قريش تفقد أعصابها.. زوجه أبولهب" أم جميل" أمرت أولادها عُتبة وعتيبة وهددتهم وأجبرتهم انهم لازم يطلقوا بنات النبي ﷺ أم كلثوم وزينب.. (اصل بنات النبى كانوا زوجات ولاد أبو لهب) وفعلا يطلقوا).. ومره يبقى النبىﷺ ساجد فيقوم أبو جهل والله ان لم ينتهي محمد لاطئن بقدمي هذه علي رقبته فاعفرن وجهه في التراب (اول ما يسجد حدوس على رقبته )فيروح للنبىﷺ وهو ساجد فلسه هيقرب من النبىﷺ فالكفار يلاقوه بيرجع لورا فيقع علي ضهره ويجري.. فقالوا ماذا بك؟ فقال: والله رأيت بيني وبين محمد خندقا من نار، لإن دهست(خطيت خطوه) فيها لأحترقْت.. ووسط كل العذاب ده.. كان ابو بكر الصديق من ارحم الناس.. قال عنه الرسول صلي الله عليه وسلم "أرحم امتي بأمتي ابو بكر" كان غني جداً يملك سبع متاجر في مكة.. كان ابو بكر يشتري العبيد المسلمين ويقولهم اذهبوا أنتم احرار لوجه الله. اشتري بلال ( زى ما حكينا قبل كده) واشترى عمار وزنيرة وخباب وجارية عمر (هنحكى عن تعذيبها بعدين بالتفصيل) والد ابوبكر اسمه" ابو قحافة" كان كافر فقال له: يابني.. اني اراك تشتري رجالا ضعاف فإذا كنت تريد ان تشتري فأشتري رجالا اقوياء يحموك اذا غضبت عليك قريش.. فيقول ابو بكر: والله يابي إنما ابغي وجه الله.. فينزل القران: "وَسَيُجَنَّبُهَا الْأَتْقَى*الَّذِي يُؤْتِي مَالَهُ يَتَزَكَّىٰ*وَمَا لِأَحَدٍ عِندَهُ مِن نِّعْمَةٍ تُجْزَى*إِلَّا ابْتِغَاءَ وَجْهِ رَبِّهِ الْأَعْلَىٰ*وَلَسَوْفَ يَرْضَىٰ" كانت قريش مبترحمش لا كبير ولا صغير فى مكه وتحاول تتفنن في ايذاء النبي.. وتسخر منه وتتهمه بالجنون. بس قريش دلوقتى عندها مشكلة كبيرة جدا.. موسم الحج الوثني قرب.. وقريش مرعوبة ان الحجاج هيسمعوا كلام محمد وهيعجبهم ويسلموا ويتحالفوا ويحاربوا قريش، فهما مش عايزين اي حد من العرب يسمع كلام محمد.. هتعمل ايه قريش؟ هنعرف سوا بكره إن شاء الله