- "ضوابط الخطوبة الشرعية". ضوابط الخطوبة تتفقوا فيها مع بعض من الأول علشان ميكونش فيه مخالفات وعشان محدش يكون متوقع حاجة ويلاقي دنيا تانية خالص غير الـ حاططها في دماغه يبقى الأفضل نحط النقط على الحروف من البداية. _ مبدئيًا .. - قبل الخطوبة في حاجة اسمها رؤية شرعية .. يعني العريس بيروح للعروسة .. يشوفها و تشوفه و يتكلموا مع بعض و يشوفوا في قبول ولا لأ .. - الزيارة بتتكرر لحد ما هو يطمئن ليها و العكس .. أول ما يحسم أمره و يوافق هو و هي لازم يغض بصره عنها لحد الجواز و هي كمان. - الخطوبة وعد بالزواج. خطيبك راجل أجنبي عنك "مش مِن بلاد برة لأ " أجنبي يعني مش مَحرم و ده يترتب عليه حاجات كتير جدًا .. مش حب و دباديب و رغي طول الوقت " - مينفعش يسلم عليكِ حتى ولا يلبسك الدبلة ولا السلسة .. والدته او أخته يعملوا كدا لأنه لسه غريب عنك. - مينفعش تقعدوا مع بعض من غير محرم. "لازم عزول لحد كتب الكتاب". - الخطوبة مش عشان تتفسحوا وتخرجوا وترغوا في الفاضي والمليان .. ولو عايزين تخرجوا لازم حد محرم يخرج معاكم والكلام يبقى في حدود الحلال بردو 🤎 الخطوبة مش معمولة عشان تحبوا في بعض .. معمولة عشان تتعرفوا على بعض صح وفي حدود شرعية وتعرفوا شخصياتكم متوافقة مع بعض ولا لأ ..حياتكم هتمشي إزاي ")) - لو عندكم أسئلة تسألوها "بس يكون الكلام بيجيب بعضه كدا مش سؤال وجواب كأنه interview .. يكون الأسلوب مش فظ ولا منفر ولا فيه ميوعة وتساهل .. الاعتدال حلو" ومبقولش متعرفيش شخصيته ! لأ اعرفيها وكل حاجة بس بضوابط. - غض البصر فرض في الخطوبة علفكرة "فرض عليك وعليها" مش معني إنكم اتخطبتوا يبقى تطلقوا البصر .. لازم كل واحد يغض بصره عن التاني "أتأملوا السجاد بيكون حلو أحسن ما تاخدوا ذنوب ويكون ليها عواقب بعدين ". 🙂😂🤎🤎 ودي نقطة هتعرفوها طول الخطوبة يا تري هو بيغض بصره عامةً ولا لأ .. هيدخل يقعد في مكان يكشف منه البيت كله ولا هيقعد في مكان ميجرحش البيت وهكذا .. دي كلها ملاحظات بتاخدوها على بعض من غير كلام خالص. - حفلة الخطوبة مش واجب ولو اتعملت مينفعش يبقى فيه اختلاط بين الرجال والنساء ووجود موسيقى .. ميبقاش ربنا أنعم عليك بالخطوبة وتيسير أمورك فتشكره بمعصية ! - مينفعش صورك تبقى مع خطيبك نهائي ولا حتى تنزلوها على السوشيال ! - مينفعش تعبروا عن مشاعركم .. مش من حقك تقولها أي كلمة ولا من حقها تسمع أى حاجة من مشاعرك "حبيبي وحبيبتي وروحي وقلبي وبنكرياسي وطحالي وامعائي وكل الكلام ده يتكنسل ". حوشوها لحد كتب الكتاب عشان يبقى فيه مخزون كبير وتلاقوا حاجة تقولوها في الحلال. - الخطوبة مش معمولة عشان كل طرف يتجمَّل قدام التاني ويظهر أحسن ما عنده ولما يتجوزا يتصدموا ببعض ، لأ! خليكوا صُرحة مع بعض وكوني تلقائية "بضوابط من غير دلع وسهوكة" الخطوبة مش هي الحلال المنتظر والله يا جماعة 🤎 - تتكلموا في حاجة مباحة من الكلام .. تتفقوا على الشقة والألوان والديكورات .. والشغل والدراسة تتعرفوا الـ قدامكم بيتعامل ازاى مع الناس وأسلوبه .. وحياتكم ماشية إزاى وهتمشوها إزاى بعد الزواج وهكذا .. - إيه العبادات الـ بتعملوها .. والـ عايزين تثبتوا عليها .. وإزاي تقربوا من ربنا "من غير رومانسية الله يكرمكم عشان المرارة بس". الكلام يكون جد وبحدود ومفيش حاجة أسمها رومانسية إسلامية في الخطوبة .. فجأتكوا؟ إني أسف. #التليفون_للضرورة_وقدام_محرم. اتصدمتوا؟ معلش. - فيه كمان حاجه لو أنتِ لابسه نقاب تفضلي بيه ما هو خلاص شافك قبل كده مره أو اتنين بعد كده تقعدي بحجابك الشرعي عادي لأن ده لسه مبقاش جوزك ولسه غريب عنك. - كمان حاجه بلاش بقى الفيس وأجواء الفيس دي وأنت حبيبي وأنتِ دنيتي بلاش بالله لأنه لا يجوز. بالله فرقوا بين الخطوبة والزواج! ممكن حد يقول إيه الضوابط القاسية دي لما اجي اقعد معاه يبقى فيه محرم لما اجي اكلمه في الموبايل يبقى للضروري وكمان فيه محرم كل ده ليه ؟ - علشان ربنا يُريد أن يحافظ علينَّا ويحمينَّا من وساوس الشيطان وما أدراك من وساوس الشيطان ! مُهم تتفقوا إزاى الخطوبة تمشي بالضوابط الشرعيه وتعدوا الإختبار دا على خير. هي في الغالب مش أجمل فترة ولا حاجة دي فترة صعبة وكلها فتن واختبارات .. بس كله بالحلال وما يُرضي الله هيعدي. وهكرر تانى كلام الدكتور محمد الغليظ ") الخطوبه مجرد وعد بالزواج."مجرد وعد". __ ممكن أفهم الحكمة من عدم الكلام في المشاعر في الخطوبة ؟ ج/ سؤال جميل .. الكلام في المشاعر بين الطرفين في فترة الخطوبة لا يصحّ لهذه الأسباب :- ❶ لأن المشاعر سبب لتعلق الإنسان بالإنسان الآخر، وكلما زاد الحديث عن المشاعر زاد التعلّق والميل القلبي .. بس الخطوبة مجرد وعد بالزواج، فلو الخطوبة مليانة مشاعر وحصل تعلق شديد، وبعد كدا الخطوبة فركشت، هيحصل مشاكل كتير جدًا بعد الفركشة للطرفين بسبب تعلق كل منهما بالآخر .. وكل واحد فينا عارف خمسين مشكلة من النوعية دي .. وبالتالي فغلق الباب دا أولى، وأكرم، وأحفظ للطرفين. ❷ لأن المشاعر كلما تعاظمت في القلب كلما خفق القلب بوهج الحبّ، فتقوى رغبة الإنسان في ترجمة هذه المشاعر إلى أفعال، مثل التقبيل والأحضان والكلام العاطفي وغير ذلك، ولو المشاعر جياشة فالإنسان مش هيقدر يمسك نفسه من ارتكاب الحرام .. فكل هذه أفعال لا تحلّ بين طرفين غير متزوجين .. وبالتالي فالبوابة دي تُسدّ تمامًا لأنها ذريعة للحرام، وسدّ الذرائع من المقاصد الشرعية. ❸ لأن الخطوبة هي بتعريفها مجرد (وعد بالزواج)، وليست زواجًا، يعني الرجل لسا في حكم الشرع (أجنبي) بالنسبة للمرأة، وما ينفعش امرأة تقول لرجل أجنبي عنها أنها بتحبه أو العكس .. بعد ما يتم العقد (كتب الكتاب) قولوا الكلام اللطيف وأشعار الغزل الرقيقة ومحن السنين براحتكم لأن أنتم حلال لبعض، أما قبل العقد فهو أجنبي وهي أجنبية. 🔊 ضوابط الخطوبة 🔊 🌳إذا كان الخطيبانِ في فترة الخطوبة، ولم يُعْقَد بيْنَهُما النِّكاح، فهُما أجنبيَّان عن بعضِهِما، فلا يَراهَا ولا تراهُ إلاَّ لحاجة وبِحضرة أحَدِ مَحارِمِها؛ لأنَّه لا يَجوزُ لَهُما الخلوة، ولا الخروجُ، ولا التَّكلُّم بِعباراتِ الحُبِّ والغَزَل. 🌳أمَّا إذا تكلَّم الخاطب مع مَخطوبته كلامًا فيه مصلحة، فهذا لا مانعَ منه ما لم يتجاوَزْ حدود الحاجة المقصودة، وبِضوابطَ شرعيَّةٍ، ومنها: 1- أن لا يتجاوز الكلامُ قدرَ الحاجة. 2- أن لا تكون هناك خلوة. 3- أن لا يحدث بينهما مُصافحة وغيرها. 4- الالتزام بغضّ البصر بين الطرفيْنِ. 5- أن لا تكون هناك رِيبةٌ وشهوةٌ في قلبَيْهما أو أحدهما. 6- أن لا يكونَ من المرأة خضوعٌ بالقول. 7- أن تكون المرأةُ بكامِلِ الحِجابِ والحِشمةِ، أو يخاطبها من وراء حجاب. فإذا تحققت هذه الشروط، وأُمِنَتِ الفتنةُ فلا بأس من حديثِكَ معها. 🌳وليعلمْ أنَّ التَّساهُل في كلام الخاطب مع مخطوبته، أوِ التخلّي عن أيٍّ من الضوابط السابقة ذريعةٌ إلى الفاحشةِ والفسادِ، وقد يُفْضِي إلى ما لا تُحمَدُ عُقباهُ من الوقوع في كبائر الذنوب؛ والواقع خير شاهد على ذلك. نسأل اللهَ العافيةَ. "مَن عفَّ قلبَهُ عن الحَرَام ؛ رزَقَه اللهُ جَميلَ الَحلال".🤎🤎🤎🤎🤎.