حاول تشجع نفسك كل يوم على كثرة ذكر الله! أكتر حاجة هنحتاج ليها جامد في رمضان.. طريقة حلوة إنك تلزم نفسك بعد كل صلاة بعدد معيّن، براحتك بقى عاوز بعد كل صلاة ١٠٠ استغفار ١٠٠ حوقلة ١٠٠ صلاة على النبيّ ١٠٠ تسبيحة وهكذا، تبقى في آخر اليوم عملت ٥٠٠ من كل ذكر، وبعد كدا ابقى زود براحتك، أعرف ناس صُحابي بيجيبوا في اليوم ٥٠٠٠ من كل ذكر وناس تاني أكتر وأكتر .. مش من يوم وليلة بقُوا كدا، لأ كان في الأول برضه ٤٠ و٥٠ ذكر، بس بالتكرار خلاص لسانهُم اتعود، وسبحان الله رغم إن الذكر عبادة سهلة وبسيطة وأجرها عالي إلا أنه لا يوفق فيه كثير من النّاس، إخلص النيّة وتوكل على الله ومكِّن لسانك على ذكر الله.. وأنت بقى في مواصلاتك/شُغلك/ بيتك في آي مكان متوقفش لسانك، لسانك ده يدخلك الجنة ويكون سبب في ملئ جبال من الحسنات والله، في الأول هتلاقي الموضوع صعب وبتنسى كتير، بس هتتعود، خاتم التسبيح علطول في ايدك عشان يذكرك ومتقولش خايف يبقى رياء، لا مش رياء إن شاء الله، ببتهج أنا برؤية مشاهد خواتم التسبيح وأنا ماشية مع الناس، بحس إن معناها "لا مش عاوزين ننسى ذكرُه في مشاغل اليوم" ف لو نسيت هو هيذكرك بإذن الله.")