ليوم أحسن شعور أخوتي من بعد 12 العام ديال المعانات والتفكير والمرض والاكتئاب لأنني كنت كنكدب على راسي أنني سعيد فحياتي في كثير من الأوقات ولكن الغمة دائما كانت تلاحقني والصبيطارات والفرماسيان والمصائب أقسم لكم بالله في ضرف 3 سنوات تصلطت علي 3 مصائب لو صادفت أحدهم لفكر في الإ .ن.ت.حا.ر والعيادو بالله لولى إماني بالله.اليوم أخوتي مشيت البنكة درت لاكارت كيشي أوهي تبان ليا الخلصة كاملة مكمولة مانقص منها تا ريال اليوم أخوتي تهنيت من الربى باركو ليا والله إسهل على كل واحد غارق فهاد الموصيبة .خوتي قبل مانتزوج كنت جامع واحد البركة ديال 11 مليون سخن عليا راسي خديت قرض ديال السكن الإقتصادي من البنكة في مبلغ 14 المليون باش نكمل الدار ب25 مليون المهم أخوتي ضربت معاهم سنين ديال الإقتطاعات خلصت ما مجموعه 13 المليون واحد نهار مشيت البنك كنت داك الساعات تزوجت سولت شحال مازاليا الو ليا مازال ليك تقريبا 13مليون أو نص أو غادي تكملها تال 2035 أنا كاع ماتفاچأت جاتني عادي والإخوان اللي غادي قولو كيفاش دارو ليها هنا فين كايتقولبو صحاب لكريدي هاديك 13 مليون اللي خداو فالاول فيها فوائد البنكة النص بالنص أوهاداك هو الربح ديالهم يعني 13 عام ديال الإقتطاع يلاااه خداو فلوسهم وانا هادشي كنت عارفو ياحصرا بالتاحيماريت ديالي. المهم قالو ليا إلى خلصتي اللي باقي ليك كلشي فمرة غادي تنقصوليك الفوائد يعني غدي تجيك واحد 9 مليون.ناري شنو غادي ندير فهاد الموصيبة منين غادي نجيب 9 مليون الوقت مزيرا الصالير على قد الحال 4000 درهم تال 2035.رجعت للدار ريحت مع المدام الله يحفظها ليا ضحات معايا ونا غادي نعاود ليكم كيفاش .المهم أخوتي رجعت للدار وضعت خطة مع المدام طبقنا خطة التزقريم والحرمان والتقشف. بعت البطوموبيل واحد العضيم جابت ليا 3ملييون أو 2500 ألفرنك شريت موطور باش نديباني شاطت ليا 2 مليون وفرتها نقصت من السفر داكشي ديال إفران مراكش تطوان مابقاش فالصيف كاندي لوليدات سيمانة ديال لبحر حدهم بحر سلا وباقي العطلة كانديهم لعروبية يلعبو مع كلاب والحمير ويسرحو مع ولاد العائلة.كاينا دار الوليد الله يرحمو فالعروبية .نقصت من مصروف حيت الطوموبيل كانت كاتزعمني على السفر و مرجان أوداك تخربيق كاتكون غادي عل حاجة كتجيب حوايج زائد وفرت فلوس مازوت والميكانيك اللي كانو كل شهر . لماكلا فالزنقة مابقاتش المونة ديال شهر نقصات الضروريات فقط خنشة طحين زيت .. راكم عارفين أخوتي متوسط الدخل شنو تايشري المهم تاناخد تقديا ديال فطور عادي غدا عادي كاسكروط عشا عاادي جدا جدا اللحم مابقاش كيدخل للدار الدحاج فقط الحوت مابقاش التنوع السردين والشطون فقط مرا مرا الباجو الديسير حسب الموسم تايرخاص أقسم لكم بالله إلا زت شيحاجة عليكم .الله يسمح ليا الحولي العيد لكبير مابقيتش كانشريه شي مرات كندوزو مع الوليدة الله إطوليا فعمرها بحكم عندها رزقها الحمد الله ومرة عند نساب الله إجازيهم بالخير بحكم العلاقة عندي معاهم جيدة . لواليدة ونسيب بوحدهم اللي فراسهم الخطة لأن السترة مزيانة واخا سمعنا عليها حشيان هدور من شي وحدين من المقربين المقربين بما فيهم الإخوة الله إسامحهم . المهم أخوتي حتى الكلاس فالقهوة درت بناقص .وليت كانخدم فأوقات الفراغ ديالي فشي حوايج خارجين على الدومين ديالي خدمت فمخبازة بالليل تانسالي تال 6 ديال صباح وانا خدام صباح مع :8:00 تانخرج مع 14:00 بعت الحوايج فالأعياد والمناسبات بعت فالفايسبوك درت عساس بالليل فالفيلات أوكانصبح خدام . لبنيتة خرجتها من مدرسة بريفي دخلتها الحكومة . رمضان مصروف عادي جداجدا.رغم دلك كانو ضروف تايخرجو مرة مرة بحال المرض وأشياء أخري غير متوقعة هاد الظروف استمرت لمدة خمس سنوات أقسم لكم بالله.ولكن الحمد لله إستطعنا أقول إستطعتا نوفرو مابين 2000 تال 2500 فالشهر والحمد لله اللي عطاني ربي رضات الواليدة والزوجة الصالحة ضحات معايا هاد الخمس سنوات وكنطلب من الله نجازيهاعلى الصبر ديالها بحيت أنها حرمات راسها من بزاف ديال لحوايج جلابة ديال العيد ماكاتشريهاش باش توفر المصروف كاتاخد بيجاما عادية لاتبالي بما يلبسه الآخرون يوم العيد . الخطأ اللي درت أو مانصحش بيه الشباب بالخصوص أصحاب الصالير المحدود هو خديت قرض قبل الزواج كنت ديال راسي مكانحسش الإقتطاع من بعد الزواج تزيرت . ديك 11 مليون جمعتها قبل الزواج كنت كانخدم ديال راسي ليل ونهار ولكن كانت الخدمة مامرسماش من بين الخدامي كنت خدام في شركة بالليل غادي جاي بالطومبيل عساسين من السرقة على الخيوط ديال الفيبر أوبتيك فالفوسيات كل واحد عاطينو مسافة ديالو غادي جاي الليل كامل لخلا والقيفار البرد والشتاء تهبط فالفوسي تقلب إلى شكيتي فشي حاجة الغيس والضلام كانو شركة الإتصالات يالاه بداو كيربطوه الفيبر بين المدن .خدمت فالفريكو ديال صكوك درت فراشة خدمت فالشانطي اوبزاف ديال لخدامي مامرسمينش ومنين لقيت خدمة مرسمة بصالير عادي قررت نتزوج وتزيرت .المهم و الحمد لله من بعد خمس سنين ديال جوع والحرمان إستطعت نجمع ليهم فلوسهم المديرة ديال البنكة قالت ليا نتا مرضي الوالدين حيدتي عليك كريدي قالت ليا الناس بصالير فوق 10000 أودازو ليهم الديور فالسيزي .كنت أول ما أدعيه في الصباح. الله يطول ليا فعمر الوالدة والله يحفظ وليداتي والله يفكني من هاد الموصيبة ديال الربي والحمد لله دابا غادي نبقى نعس أوبالي مرتاح من جيهت وليداتي اللي نصورو ناكلو وقررت داكشي اللي كانت كاتديه البنكة نعطيه لمراتي تشري بيه اللي بغات و تشري اولادها اللي خاصهم وانا عارفها غادي توفر منهم و تخسرهم فالمصلحة وفي الأخير الله إصاوب للجميع واللي عندو شي غمة ربي إفرجها عليه وأكرر مرة أخرى للشباب عند شي رزييق استتمرو توقف على رجليك أوشري دويرة على قد الحال تايسهل مولانا أنا البنك الداتات ليا 10 مليون هاكاك حراما محرمة ولكن أنا اللي دارتها بيدي . أطلب من الله العفو والمغفرة لي ولجميع المسلمين #منقول