❤️🥹أسئلة متداولة في بيوت المغاربة عامة : نتا باقي ماخدمتيش - باقي ماباغاش تخدمي - اش نفعاتك القراية - سيادك خدمو ونتا باقي غا النعاس لا خدمة لا ردما - باقي غامنشور هنا - باقي ماباغيش تزوج - باقي ماباغاش تزوجي ..وفلانة وبنت فلانة وجارت فلانة كلهم تزوجو وغيرها من العبارات..وفلان ديير بحال صحابك راهم خدمو جاو غير من وراك …اللي كايقولوها أقرب الناس ليك فالدار...وتاتولي تسول راسك واش فعلا المشكل مني ؟ وتاتولي ماحاملش الدار وماحاملش تجلس مع أقرب الناس ليك ..غاباش ماتسمعش ديك الهضرة ... ولذلك أنا نقول ليك هاد الهضور كاتلقاها فأكثر البيوت المغربية..وطبيعي ..حيث حنا فزمان تقديس الأسباب ماشي تقديس المسبب لي هو الله تعالى..والناس ايلا قلتي ليها كلشي بالمكتاب كلشي رزق ..تاتقول ليك خلينا من هاد الهضرة أرا ليا واش كاين شي فلوس...وعادي تسمع هاكا حيث زمن الماديات هو لي فيه حنا دابا ..ايلا ماشافش حاجة بعينيه وقدامو تايطلق لسانو بلا فران ومايقولش دابا يفتح الرزاق شي باب دالرزق...نتا فهاد الحالة ملي تشوف هاد الحملة موجهة ليك.. خاص تمرن راسك نهار بعد نهار أن كلام الناس مايأثرش فيك..لأنه ايلا كان يأثر فيك غاتمحن..حيث نتا عايش فالدنيا مع الناس ..ماشي بوحدك..وممكن تولي صخرة قدام كلام الناس كيما بغاو يكونو لكن بالتمرن والصمت والتجاهل وانا نقوليك نتا ونتي ماشي نتوما لي منكم المشكل.. المشكل فهادو لي تايطرحو الأسئلة بهاد الطريقة ..حيث قلة الدين هي لي كاتخلي الواحد يناقش تأخر الرزق ..والدين مهم بزاف فالبيت العائلية..ولذلك نهار غانوليو يعيش معانا الدين فبيتنا ..النهار لي غانرتاحو ..والوالدين كانعذروهم وتا الناس الكبار فالعمر لي تايسولو هاد الأسئلة..حيث كايكونو تساؤلاتهم مصحوبة بجهل....وهوما الوالدين هم أصلا بحالا تقولوا باغين يزرعو فيكم الحماس ويشوفوكم فمراتب زوينة لكن ماعارفينش كيفاش يوصلوها ليكم.. ولكن نتا ماكاينش لاش تقلق من باك ومك ...حيث والديك فنهاية المطاف واخا ويبقاو عليك نتا باقي مادرتيش وباقي مادرتيش..ماتقلقش.. دوي بهدوء وشرح ليهم أنك نتا تادير الأسباب وأن نتا مابيديك والو وأن كلشي بيد لي خلقني وخلقكم ...تادير الأسباب وتاتقلب ونهار تكتاب ليك شي حاجة راه غاتجي ..وهاد الهضرة خاص تآمن بيها ماشي غاتبقا تقولها..ونتا الداخل ديالك عكس كلامك..لابد من الوعي بهاد الأمور . فإن ضيق الرزق وسعته وتأخر العمل والزواج وغير ذلك من الأمور، إنما تجري بقضاء الله وقدره، قال تعالى: إنا كل شيء خلقناه بقدر {القمر:49}. وقال تعالى: وكل شيء عنده بمقدار {الرعد:8}. Mohssine habba ✍️