🇲🇱Mali la, dɔ farala jumadon jatigɛwalebinkani mɔgɔ faatulen hakɛ kan, ka kɛ 32 ɲɔgɔn ye, kɛnɛya tigilamɔgɔw ka fɔli la. O binkani min kɛra Gao ani Asongho duguw furancɛ la, jamana kɔrɔyanfan fɛ. O kɛra wagati min sɔrasiw tun bɛ ka jamanaden siviliw ka bolimafɛn dɔw de lakana, yanni u ka taa bin jatigɛwalekuluw ka jan kɔnɔ. ➡️https://rfi.my/BOb9 🇨🇩U ka lajɛrɛ in kuncɛlen kɔ kunu, Dar Es Salma, Tanzanie faaba la, Farafinna kɔrɔyanfan n'a woroduguyanfan, tɔn fila SADC ani EAC jamanakuntigiw y'a laɲini kɛlɛw ka sonsori tɛliya la, RD Congo kɔrɔnyanfan fɛ ka sɔrɔ ɲɔgɔnsama-sama fosi ma kɛ a ko la tuguni. O Kɛlɛw yɛrɛ bɛ ka taa ɲɛ Bukavu mara kɔnɔ nin waati Sud-Kivu maraboloba la. Hali n'u ma Rwanda ka M23 kɔkɔrɔmadonwalew kɔn, bɛn kɛr'a kan fana ko EAC ani SADC jamanaw kɛlɛboloɲɛmɔgow bɛna sigikafɔ dɔ kɛ, walasa ka kɛlɛsonsori fɛɛrɛw boloda. ➡️https://rfi.my/BOb1 🇨🇮Laurent Gbagbo ye munumunu dɔ daminɛ kunu sibiri Abidjan Marcory kin na. PPA-CI ɲɛmɔgɔ y’a ka cɛbɔya lase ɲinan jamanaɲɛmɔgɔkalata la. Wa a ka munumunu in laɲini ye ka nin kura fiyɛ tɔndenw la k’a bɛn o kalata cɛsiri nataw ma. Kunu lajɛrɛ bolila kalata labɛnko ɲuman de kan. ➡️https://rfi.my/BObD