Aw ni wula. An ka bi kibaruyaw filɛ 🇬🇳An b'a daminɛ Guinée. Bi février kalo tile 9 bi ben a kalo 5 ma ni Fasoden tɔgɔlaton FNDC mɔgɔ fila diyagoya minɛra : an kan bi Oumar SYLLA Foniké Mengué ni Mamadou Billo BAH de ma. A kalo 5 ye n'o taga fan ma don, o minɛbaga kɛrɛnkɛrɛn fana si ma don. Jalakiw kɔni bɛ ka ɲasin marabaaw de ma sabula serew ka fɔla cɛ fila nunu minɛbagaw tun ye fanitigiw ye. Foniké Mengué ni Billo BAH masurunya mɔgɔw ni adamaden hakɛ lafasatonw kɔni jɔrɔlendo wa u bɛ wilikajɔw la fana sanko u ka ye. Aboubacar SYLLA ye OGDH ɲama dɔ ye, an k'a ta welekan lamɛ. 🇳🇪Fan wɛrɛ fɛ, Niger marabaaw bɛna sigikafɔba "Assises nationales" sigi, ka daminɛ Février kalo in tile 15 ka kuncɛ a tile 19. O jamanadenw kafu kun ye ka hakinaw faraɲɔgon kan sanko ka ɔnatɛmɛfanga kuncɛ wagati bɔ. Niger kɔnɔko minisiri de y'o kibariya lase dantigɛli dɔ kɔnɔ kunu suura foroba jabaraniso la. Mohamed BAZOUM ka fanga dafiri kɔ, Aout kalo saan 2023 kɔnɔ, Niger sodasi fanga ɲama Général Abdourahamane TIANI tun y'a lase ko sigikafɔ ba tun bɛna kɛ ka dɔnatɛmɛ wagati kuntagala kuma fɔ. O wagati a tun ye saan 3 de kofɔ, ko donatɛmɛfanga m'an kan ka tɛmɛ o kan. Nga fɔ sisan da tun ma maga o kan tuguni. 🇨🇩RD Congo kɔrɔnyanfan na, Marifa mankanw lalɔra kabi bi sɔgɔma fɔlɔ. Goma dugu ni Nord Kivu mara minɛli kɔ lɔgɔkun tɛmɛni na, M23 banbanciw n'u dɛmɛbaga Rwandakanw tun ye kɛlɛkura dabɔ Sud kivu mara kɔnɔ. O basigibaliya kɔsɔn Farafinna kɔrɔnyafan ni cɛmɛnacɛyanfan ka ton filaw EAC ni SADC ye ɲɔgonye karabani kɛ jumalon ni kuu sibirilon. Jamana kuntigi y'a ɲini ka kɛlɛ ka lalɔ teliya la, sira ka di sanko dɛmɛ ka se ka don o maraw kɔnɔ. RD Congo jamana kuntigi ma se kɛnɛkan nga a ye talikɛ ɲɔgonye in na nɛgɛjuru sirafɛ. Ale ka kumalasela k'olu ma wasa kumankan laban kɔ sabula ko Rwanda jalaki kɛrɛnkɛrɛnyala a ka walew la RD Congo jamana kɔnɔ. Issouf ZERBO ben’a bɛɛ walawala aw ye.