Mizoram sorkar, All Political Party leh All NGO in Border fencing leh FMR thiah duh lo. India Sorkarin India-Myanmar ramri hung a tum leh Zofate zalen taka kan inkal pawh ve na dan FMR thíah a tum chu Mizoram Sorkar in tha a ti lova, Chief Minister Pu Lalduhoma pawhin tha a tíh loh thu hi sorkar laipui hruaitute a lo sawiput tawh a. Mizoram chhunga Political party hrang hrang pawhin an duh loh thu an lo auchhuah pui tawh bawk a ni. Kan state rorel tura kan thlan MLA te chuan Assembly session ni 28, February 2024 a neihah khan Pu K. Sapdanga Home Minister official resolution "Sorkar laipuiin FMR tih tawp a tum leh Myanmar nena kan inrina, ramri hung a tum hì tha kan ti loa, ti lo turin kan ngen a ni. Dik lo taka British sorkarin 'divide and rule policy' hmanga Zofate min thendarh hi rorelna pakhat hnuaia kan kun leh theihna turin hma min lakpui zawk rawh se" tỉh chu dodalna pakhat mah awm lovin an lo pass tawh a ni. NGO Coordination committee (CYMA, MUP, MHIP, MZP, MSU) Union Home Minister-ah duhlohna memorandum an lo thehlut tawh a, ni 21. 2. 2024 khan NGO Coordination committee chuan Vanapa hall kawtah duh loh lantir nan punkhawm an lo huathawt tawh a ni. Tin, ZORO pawhin nasa taka dodalna lan tirin Myanmar Boder Zokhawthar hmunah punkhawm huaihawtin, duhlohna kawngzawh te a lo huathawt tawh bawk a ni. Mizoram sorkar, All political party, NGO Coordination Committee ten an duh lo chunga India in ramri a hung lui a, FMR hi a thiat lui a nih chuan kan hmalam hun chu a thím viau ang tih a rin theih a ni. ~TGO MEDIA™