*Halakat Se Bachne Ka Hadis-e-Paak Se Behtareen Nuskha* Zamana jitna zyada ALLAH ke Rasool ﷺ ke zamane se door hota jayega, fitna barhta jayega. Jo gumrahi aaj se das saal pehle nahi thi, wo aaj zyada aam ho chuki hai, aur aane wala kal is se bhi zyada purfitan hoga. In fitnon se bachne ka ek aasan tareeqa wahi hai jo Hadis-e-Paak me mazkoor hai. Hazrat Abdur Rahman bin Abi Bukrah apne walid se riwayat karte hain ke maine ALLAH ke Rasool ﷺ ko farmate hue suna: *"Ya to Aalim bano, ya Talib-e-Ilm, ya Ilm sunne wala, ya Ilm se muhabbat karne wala, aur paanchwa (Ilm wa Ahl-e-Ilm se nafrat karne wala) mat bano, warna halak ho jaoge."* (Al-Mu'jam Al-Awsat, J:5, S:231, Hadis: 5171, Dar Al-Harmain) Aaj logon ke gumrah hone ki badi wajah Ilm-e-Deen aur Ulama se bezari hai, balki duniya bhar me aise afraad khade kiye gaye hain jinka kaam hi logon ko Ilm wa Ulama se nafrat dilana hai. *✍️: Muhammad Wasim Akram Razavi* Titlagarh, Balangir, Odisha, Hind