Mexico president Claudi Sheibaum chuan Google hnenah lehkha thawnin, Google Maps-ah Gulf of Mexico hming chu thlak lo turin a ngen. US president Donald Trump chuan President atana lak luh a nih hnuah US, Cuba leh Mexico huala awm, Gulf of Mexico tih chu Gulf of America tia thlakna tur thupek a ziak a ni. Sorkar map leh document zawng zawngah 'Gulf of America' tih hming hi hmang tawh tura tih a ni. US-a awmte tan a hming hi Google Maps-ah Gulf of America tiin a lang tawh dawn a, khawvel hmun danga awmte tan erawh kum tam tak sawi dan lo ni tawh, Gulf of Mexico tihin a lang thung ang. Mexico chuan US President thupek siam hi hnialin, US hian a hming hi a thlak ngawt thei lo, a ti. United Nations Convention-a Law of the Sea chuan ram pakhatin tuipui kam aṭanga tui mel, nautical mile 12 thleng chin chauha chu a ram angin a chhal thei a ni tiin, President Trump-a'n a hming a thlak tir pawh hi US coastline aṭanga nautical mile 12 chin chiah a huam a ni, tiin Sheibaum chuan a sawi. "Kan tan chuan Gulf of Mexico a ni reng a, khawvel hmun dang tan pawh Gulf of Mexico a ni," a ti. Google chuan hemi chungchangah hian sawi a la nei lo a, mahse a hmain sorkarin hming hi official-a an thlak a nih chuan anni pawhin an lo thlak sak ve mai ṭhin tih a sawi. Trump-a thupek lo siam tawh angin, US-a tlang sang ber, Mount Denali chu Mount McKinley tiin a thlak dawn tih a sawi bawk a ni. He tlang hming hi kum 1917 khan Mount McKinley tia thlak a ni a, mahse km 2015 khan President hlui Barack Obama chaun Denali tiin a thlak let leh a ni. Tunah chuan US President hlui, William McKinley hming chawiin Mount McKinley tih a ni leh tawh ang.