*Jingkah Devotion* Dr. S. Chongloi January 24, 2025 nikhoa simding: Colossians 3:9; Ephessians 4:29 *JOU KISEIHI HINKHON AKIPOLEL JINGE* Jineina khat a akimuto lhonin, chadonpi dia atemle anomin, cha adonpet lhona seiding hevah louva aumjeh in, khatnu inna kile dia akigot laihin, jahcha val'in, *"Waiter, chi naneile neipen, ka coffee lah a kilhah inge"* ahin tidoh in ahile, avel'a chadon jouse lungdongin kamka leuvin aveuvin ahi. Hichun chi ahinlahpeh un, maisan tentunin a coffee lah a akilhah in adontan ahi. Agolnun, *"Golpa, chi nadu tah tah ham?"* tia adoh leh aman, *"Kadu e, kaneolaiyin twikhanglen pama kana chengun, twi chi-al chu kana donjingin ahi. Hijeh chun chi hi kadon teng kaneolaiya kanu kapa chule kana khanletna twipi pam kageldohjin kalung atongkhaji vale"* tin amitlhi ahung long doh jengin ahi. Hijeh chun achenna gam le anu le apa geldoh a mitlhi long leu pasal chu mikitah, mingailu hiteiyinte tin atahsan tan, kum tampi akingai nung lhonin akicheng lhon tan ahi. Ajinun, coffee asemseh le ama deipen chi chu alhahpeh jingjin ahi. Kum 40 akichen jou lhonin ajipa adam mon athitai. Athijouhin lekha khat anadalhan ajinu koma, *"Ngai, chitwi thua jou kana seijeh in ngaidam kathume, ikimu masatpena chitwi kadon chu kadu jeh ahipoi. Ka jahcha (nervous) vala chini kathumle kaki seikhel'a chi kathum khah ahi. Hijongle kahinkho lhumkeiyin chitwi chu kadonjing tai. Chitwi chun nangto eihinkhomsah ahijeh in kakisih poi. Avela penkit a chitwi donjing ding hijongle nangto kaumkhom ding poule kadeipen ahijinge"* tia kisun asimdoh chun ajinu mitlhin alekhasim achap chedeh jeng tan ahi. Jou iseihin inung ajuiyin hinkho lhum keiyin eisugimin apang jingin ahi. Pathenin jou sei ahon thutah adeiye. Jou seihi milui hinkho ahi tin Paul'in eihiluve. *"Khat le khat thujouvin kihou hih-un ; ijeh-inem itile mihem lui chu achonna jouse pum'a ponse lelhah banga nale lhahsau ahitai"* atin ahi. Chusanga atah jenga kihou din eihiluve. *"Hijeh chun jou pailhan, nang ho khat cheh chu aheng akomto thutah jengin kihou hen; ijeh-inem itile eiho khat cheh hi tibah khat ihibouvui"* ati.