PU PS HAOKIP NATOH HO. By :- Thanglam Manlun independent freelance writer. Naa-tong'in atohkhel jong um'in tin, apha aboldoh jong umding ahi. Hichu mihem hinkho chedol ahi. PU PS AHAOKIP OPEN LETTER KAPEHNA AJEH :- Bible a OT khang laiyin, leng hon tohkhel bolkhel anei tengu leh, abolkhel leh atohkhel ho akigeldoh theina din, themgao hon lengho ana phohyi uvin ahi. Hichu mudana leh demna ahipon nam ngailut jeh'a lengho chu aphoyi'u ahi. Chutima chun meilhei gaal inei laitah'uva Pu PS Haokip thusei leh nam mipi lung-gel akitolou jeh'a aseikhel ho akigeldoh theina dinga open letter kapeh ahi. Keihi koima maipha hol louva nam'a dinga ase'a kagel hochu MLA, Minister, leh Thing-noi lamkai thu umlouva, kasei dingdol kakisei jeng ahi. Ajeh chu lekhajih hina'a thutah le khantouna thu seidinga kipedoh kahi jeh'in, thutah seina a thiding hijong leh kichalou kahi. PU PS NAA-TOH AKHATNA :- Eiho Kuki nam mitehi phung-gui kisut nam mite ihiu toh kilhon'in, phung thu'ah boina inei jing'un ahi. Ajeh chu Pu le pate'n mitvahna aneilou jeh'un, jihtho thuchin ana neipouvin ahi. Hijeh chun u-pat leh neojo thu'ah boina inei jing'un ahi. Pu-gao phamai hen lang, Pu Kipgen leh Pu Haokip kikah'a upat leh neojo thu'a boina anaumjing chu Pu PS Haokip in ahin sutoh'in Sa-ting chedol ahin semtoh tan ahi. Pu Kipgen leh Pu Haokip chilhah hohi kikhen thei hilou laigui kijop ahi. Hijeh'a chu i-nam sung'uva, mitam pente Pu Kipgen leh Pu Haokip ten angatna'u akito nini leh inam'u hat'in tin machal ding, namdang te jana jong i-chan dingu ahi. PU PS NAA TOH ANINA :- Pu Kipgen leh Pu Haokip kikah asuhtoh jouvin, nampi chetoh ding gelkhohna jeh'in, Moreh khopi'ah chavang kut loupi tah'in abollin, hiche'a chun Kuki nam miten i-peltheiyu hilou mi-u-pa, Pu Guite pa chu mi-u-pa hina akiphong doh'in ahi. Hichetoh kisam kai chun Pu Doungel ten Pu Guite pa kom'ah Sa-ting ana petauvin ahi. Hiti chun phung thu'a boina ho aban ban'in ahung kisuhtoh in ahileh tunin u-pat leh neojo thu'a boina aum tapon ahi. PU PS NAA-TOH ATHUMNA :- Kuki nam mite kilungto nading leh kipum khatna din, phunga boina ho suhtoh'a aum jouvin, houva kipum khat theina din Kuki nam sunga denomination jouse'a lamkai cheng akou khom'in houva kipumkhatna ding thu asei khompi'n ahi. Hiche'a kon chun KCLF ahung kisemdoh'in tuni chan geiyin a function jing nalaiyin ahi. KCLF in houva i-kipum khat theina diu lampi agon diuva mopohna kipe ahitan ahi. Hitoh kilhon chun tuma sang chun hou lamkai hon Mizoram mun'ah kihouna aneiyun, akihouna'u amachal jinga ahileh, houva ikipum khatna diu jong hung umdoh vahding ahitan ahi. PU PS NAA TOH ALINA :- Nam khat identity leh indigenous hina chu history'n proof abolding ngai ahi. Mikang te leh writer chom chom'in Kuki ihinau anajih'un, hiche ho banjom chun Pu PS Haokip in "ZALENGAM" kiti lekhahbu khat English paovin ajih'in ahi. Hiche lekhabu sunga chun Kuki nam mite history, custom and culture chuleh tradition ho bulhing set'in akijih'in ahi. Hiche lekhabu chu amang thei loudin India sung leh British library ho'ah koilut ahitan ahi. PU PS NAA TOH ANGA NA :- Nam khat kilungtona ding leh kipum khatna din, nam'in anei chonna golnop ho'a lhatkhom a kipakhom ding angaiyin ahi. Hijeh chun Pu PS Haokip in, Lamka khopi'ah chavang kut loupi tah'in agong'in, thisan'a sopi Chin leh Mizo nam lamkai hocheng toh, chavang kut ina mang khom'un ahi. Hitoh kilhon chun Kuki nam sunga tribe umho A-Z chan, amang talou din song chunga jihdohna leh tundohna aum tan ahi. I-hat nikhou ahung lhun teng hiche'a kijih doh i-sopi hou Kuki hina dinga thupem ho khun kisih pum'a, eihin bel thou thoudiu ahi. PU PS NAA TOH AGUPNA :-Anatoh agupna chu ahileh, nampi thulhun melchihna songphu, Songpi khopi'a kibol chu ahi. Hiche songphu nikho'a mipi kilungtona chu athupi mong mong'in ahi. Songpi lentah heizam sam pum'a iput'uva itundoh'u chu tuni geiyin ading jing nalaiyin ahi. Ahin, hiche nikho'a ikilung tona'u chu tulang hin dailha dan'in aumtan aphamo lheh'in ahi. Song chunga itousah'u Nu Perchy leh Nu Moi chu athupi pen ahipon, mipi kilungtona chu athupi pen hijo ahi. Hiche nikho'a i-kilungto bang'uva chu i-lungto jing'uva ahileh i-nampi'u dopsanga umding ahi. Achaina a kaseinom chu OT khanglaiya leng minthang David The man after God's own heart kitipan jong tohkhel aneiyin ahi. Mihem koima abulhing aki-umpon, khatvei tohkhel jeh'a thilpha som kibolho suhmil lou ding ahi.