Myanmar raltlante tiduhdahtu Manipur Chief Minister N Biren Singh banna a theh lut Tahan Post 11st February, 2025 Myanmar raltlante mana Military council te hnena thawntu India, Manipur State Chief Minister N Biren Singh chu February ni 9, Sunday khan a nih atangin banna a theh luh thu hriat a ni. Manipur Chief Minister chuan February ni 9, khan Manipur Larsap Ajay Kumar Bhalla hnenah Chief minister aṭanga a banna lehkha a theh lut a, Manipur Governor chuan a banna chu pawmpuiin Chief Minister a nihna chu thil tul dang tihfel hma chu lo chelh chhunzawm rih turin a ti a ni. Manipur State-ah tualchhunga chi leh chi buaina avang te, Meitei mite chetna avang te bakah BJP Party-te nekna avangtein banna a theh luh thu tualchhung news chuan a tar lang a ni. Manipur State-ah kum 2023 May atang khan chi leh chi avangin Meitei leh Kuki mite inkarah buai a chhuak nasa hle a, thi leh hliam an awm nual thu hriat a ni a, kum 2 hnuah heti hian Chief Minister a nihna ata banna a theh lut a ni. Chief Minister N Biren Singh chuan, Manipur State-a buaina chhuahna chhan hi Myanmar atanga dan lova lut Kuki mite vang a ni a ti a, Indo-Myanmar ramri hung tur chungchangah pawh India sorkar laipuiah ngenna a theh luh bawk a ni. Heng bakah hian Myanmar ram buaina vanga Manipur State-a raltlante chu, Biometric data laktir te, a man a, a thawn haw bawk a, Imphal tan ina dan lova a man Myanmar mi 100 chuang a chhuah duh loh mai bakah thenkhatte chu Military council hnenah a thawn thu hriat a ni. India for Myanmar hotu Salai Do Khar chuan, “Banna a theh luh avangin an mante tan, keini Advocacy te chuan kawng tha a inhawng niah kan ngai a. Tuna CM hi keini tan chuan hnaih ngam loh khawpin a khirh a, mi dang lo awm leh tur hi khirh lo turin kan tawngtai a ni. Tuna tang mek te hi chhuak turin leh ram dinhmun a danglam theihna turin hma kan la mek” tiin a sawi. Tun dinhmunah hian Manipur State, Imphal tan inah ram dang mi dana an man, Myanmar hmeichhia 40 leh mipa 90 vel te an la hren mek thu hriat a ni. Hetiang vek hian India, Assam State-ah pawh hmeichhia telin Chin thalai mi 32 te, foreign case-in kum 2021 khan an man a, an thubuai chungchangah sum an seng nual tawh a, chhuah mai theih an nih laiin vawiin thlengin an la hreng mek a ni.