Milong ho hinkho man leh kivaipoh dan nagaland sunga cheng eimi hon hechen lheh inte. Hinlah ka na kholjin na gam khat ahijeh in kathil mudan chu kasei nom in ahi. Hiche kasei nom chu milong ho lah a Liangmei ho kivai pohdan chu ahi. A chen nau gam pheng hi Manipur,senapati, Noney, jiri le Tamenglong gam apat a nagaland Paren District sung chan a gam pheng alo u ahi. State ni kaimat a cheng ahiuve. Kholui tah² anei uvin, Apu apa khutsohsa thil ho sumang louvin ana ching tup uve. Chonna dan anei hou hi eiho toh akibah na a tam in eiho a ihet uleh ahi jeng e Tia nganse thei ahi. Apu apa inn sah na Thingpi kisui, khompi kisui, Songpi a kijih lim,kiti ho hi mang talou dia aven tup u ahi. Koitabang journalist vah le in jong avet a leh thu tampi adoh lo ji un, hiche athu sim u chu asei peh ji uvin ahi. Agam sunga Gamsa ju le va, Lui dung Ngaa te jong aveng bit u've. November apat Jan/Feb chan kah bou sa kap phal ahin, jule va te gamsa ten nou le tui op(eggs) ahin nei tah diu phat March apat October lang chen koima gam len aphal kit pouvin ahi. Luidung a poison, Electronic system ho a ngamat phal ahipoi. Kho sung kivai poh na hi ahoidan tampi sei ding aum e. Hinlah hiche ho chan chu sei da ute saoval inte,eiho dia pha chom dinga kagel bou sei inge. Houbung kivaipoh, Khosung V/A kivaipoh, Youth Club kivaipoh na ho ahin don le kai sum le pai akitup lheh in ahi. Community Hall ahin kavah lut in Bang achun Lekha lentah akitah in, Don le kai (donation) sum hunglut jat akijih in, mitom ngai MLA ham,mimal ham hileh, khat in sum apeh tapou jat jong akisun in ahi. Kin le dong aum leh anikho a kimang doh jat jong akisun kit ngal e program kichai tengle. Hitia kibol danhi elected Lamkai term khat sunga vaipo ho pen² chun ama vaipoh sunga Chu ijakai details tah a, atah jiu ahin. Akoi jousen lhangphong a avet thei dia kibol ahi. Chule Council Hall ho achun Gam Map akitah in, lampi kho le veng chule agam umdan kho kinaipi, chule akho chun gam ite areas anei ham kicheh tah in akitah doh e. Hiche ho kaga mu doh a kagel achun, gal le tol nei la hi lou uva ipi dia hitabang a kichehset lom² a kivaipo u ham ti chu kagel in ahi. Aban a mipi Sum le pai koiman aneguh ngaipoi ti chu aki cheh lheh e. Eihon Gal le Toul inei uvin, Don le kai chung changa hitia Clear tah leh Open tah a Bang chunga tahdoh ding vang chu ingam sam pouve kati nom e. Ahileh iti dan na mite khun hitia kivaipoh kitup tah akibol uva akhohsah u hintem? Hiche point hi ochat jong um kasah chuleh eihon jong ikisem thei u, khangthah tampin thutah a kivaipoh na akhoh sah ding kadei sah lheh jeh a bou kamu dan kahin sei ahi...✍️ By- NP(Kimcy Nanao)