*الحلقة 20 من السيرة النبوية* *يلا صلوا على النبى* *حصار قريش لبنى هاشم"قبيله رسول الله"(ج2)* شوفنا مع بعض إمبارح قد إيه الحصار كان قاسى جدا جدا على بنى هاشم.. الصحابه كانوا بيستحملوا وياكلوا ورق الشجر وثبتوا على دينهم (دا احنا لو الاكل مش عاجبنا فى يوم او لو مفيش فى الثلاجة العصير اللى بنحبه بنزعل ونتقمص.. واحنا مش مطلوب مننا نتعب ولا نستحمل ناكل ورق شجر.. كل اللى مطلوب مننا أننا نثبت على صلاه الفجر وأننا نصبر على أهلنا ونبرهم ) الكافر من بنى هاشم تعب واستحمل الحصار وثبت عشان الرسول صل الله عليه وسلم واحنا مش قادرين نثبت على الحجاب أو الصلاه رغم أننا مؤمنين أنها حق ربنا علينا الحصار شديد.. طب ليه ربنا ساب النبى عليه الصلاه والسلام والصحابه فى المحنة دى.. ليه هتستمر المعاناه فى الحصار 3سنين؟ بصوا بقي فى الاخر هيخلى الحصار يتفك بس ربنا أراد ان النبى والصحابه يتعبوا شويه عشانى وعشانك عشان نحس ونشوف قد ايه الرسول والصحابة تعبوا عشان الدين يوصل لنا... وعشان لما نشوف المعاناه بتاعت النبى والصحابه ننط من على السرير ونقوم نصلى الفجر ونقول تعبك وشقاك مرحش هدر يا رسول الله).. تعرفوا أن الصحابة اللى كانوا فى حصار الشعب دول، هما نفس الصحابه اللى هيثبتوا مع النبى وسط قتال غزوة أحد الشديد ووسط غزوة حنين.. كانوا متربيين على الصبر والثبات.. طب ليه محدش ضعف منهم وقال تبرأت من النبى وريح نفسه من المعاناه اللى فى الحصار ده؟ اصل الصحابه كانوا بيثبتوا بعض.. كلهم بيساعدوا بعض.. واحنا لازم نتعلم أن الصحبة الصالحة بتثبتك على طريق الله.. المهم فين ابو طالب عم رسول الله دلوقتى؟ ابو طالب عنده حوالى 80 سنة وبياكل ورق شجر وكل ليلة يروح للنبى فى عز نومه يصحيه ويقول له: قم معى يا محمد فياخده ويوديه خيمة تانيه وياخد الراجل اللى فى الخيمة يوديه مكان النبى.. والنبى ينام وبعد شويه يقوم ابوطالب جى تانى ويقوله: قم معى يا محمد وياخده ويبدل مكان النبى بمكان الراجل التانى.. طيب ليه ابو طالب بيعمل كده؟ اصل ابو طالب خايف جدا على النبى عليه الصلاه والسلام فخايف حد يحدد مكان النبى ويخطط يقتله والناس نايمه، فكان الكل ينام إلا أبو طالب (مش عايزاكم تنسوا أن ابو طالب كافر وبيعمل كده.. طب واحنا المفروض نعمل إيه عشان ندافع عن رسول الله !!!!) المهم هيفضل الحصار لمده 3 سنين.. قريش زهقت والمسلمين مش بيستسلموا.. وأبو جهل كان بيحاول يخلى قريش تثبت على موقفها من بنى هاشم والإسلام.. ويستمر الحصار لحد ما ربنا سبحانه وتعالى يسخر للمسلمين بنى ادم اسمه "هشام بن عمرو" ده واحد من الكفار بس مكنش قادر يتحمل بكاء الاطفال اكثر من كده.. هشام بن عمرو كان ياخد الجمل بتاعه ويحط عليه غطا واكل وشرب كتيييير ويروح بالليل والناس نايمه عند الشعب المحاصر.. ويقف بالجمل قدام الشِعب ويزق الجمل، فالجمل يجرى ويدخل لوحده جوا الشِعب وبنى هاشم والصحابه يفرحوو قوى وياكلوا ويشربوا.. ويعدى يومين تلاتة ويعمل هشام بن عمرو نفس الحاجة وبنى هاشم مش عارفين مين اللى بيبعت الجمل بالأكل.. وبعد مرة والثانية والثالثة، قريش رصدت الموضوع ومسكوا هشام بن عمرو؟ وقالو له: يا هشام أأسلمت فيقول: لا والله.. فيقول ابو لهب: تباً لك، فلما تفعل هذا؟.. فيرد هشام ويقول: والله لا احتمل سماع بكاء الصبيان، فلا اصيب طعام (مش قادر احط لقمه فى بوقى وانا سامع اطفال بتصرخ من الجوع) ويقول: صبيان بنو هاشم يموتون جوعا يا معشر قريش رحمآ (ما هما فى الاخر قرشيين ومننا) فيقولوله: يا هشام لإن عدت إلى هذا لنقاتلنك.. فيقول هشام: لن اعد.. ويعدى يومين ثلاثة ويعمل هشام نفس الحاجة فيتقبض عليه ويروح قايل لهم: أنا آسف لن اعد.. لن أعد.. ويكرر هشام نفس الحاجه ويتقبض عليه لكن هينضرب المرة دى ضرب عنيف جدا لدرجه انه هيقع ويغمى عليه.. وبعد ما فاق راح لواحد صاحبه اسمه زهير بن امية فيقول له: يا زهير بن أمية يرضيك أننا ناكل ونشرب وتموت بنى هاشم من الجوع؟... فقاله: لا يرضينى.. فقال هشام: طيب احنا ساكتين ليه؟.. فقال زهير: طيب هنعمل إيه فى ابو جهل والوثيقة؟... فقال هشام: نروح نتكلم ونعمل دوشة... فزهير قال: لأ.. احنا اتنين بس لازم نبقى مجموعه.. فرد هشام وقال: سأفعل.. ويروح يخبط على واحد تانى أسمه زمعة بن الاسود: يفتح زمعة.. وهشام يقوله نفس الكلام فيوافق زمعه ويقوله لازم نكون مجموعه.. فيخرج هشام ويروح لواحد اسمه "المطعم بن عدى".. ويوافق.. ويروح لواحد خامس أسمه "ابو البخترى بن هشام" ويوافق ويقول لهشام بس احنا اتنين.. فيرد هشام يقوله لأ احنا خمسه.. (هشام /زهير/زمعه /المطعم/ ابو البخترى) طيب بقوا مجموعه من 5افراد.. ها إيه اللى هتعملوا بعد كده؟ بدأ هشام بن عمرو يحط خطه و تانى يوم الصبح راحوا كلهم عند الحرم واتفقوا يوقفوا متفرقين يعنى كل واحد فى ناحيه عشان يبان انهم مش سوا. وفجأة وقف هشام بن عمرو وقال: ايها الناس هذه صحيفة ظالمة إلى متى نأكل ونشرب وتموت بنى هاشم.. أليسوا من أمتنا؟ فيرد عليه واحد من الاربعه واقف علي اليمين ويقول: صدقت ويرد الثانى يقول: بلى من أمتنا... والتالت يقول صدقت.. هما بيعملوا ايه؟ هما بيعملوا رأى عام ،كأن كذا حد رافض الوثيقه الظالمه.. فيبص لهم أبو جهل ويقول: والله هذا أمر سويتموه بالأمس (هو قفش الموضوع وحس ان دول ناس متفقين بس خلاص الناس اجتمعوا وبدأت تقول هذه الوثيقه ظالمه.. ظالمه) وفى وسط الحصار ينزل سيدنا جبريل على النبى صلى الله عليه وسلم ويقول: يا محمد إن الله قد سلط الأردة (يعنى الدوده ) على الصحيفة فأكلت كل البغى (الظلم) الذى فيها إلا كلمة "باسمك اللهم".. ويقول النبى الكلام ده لعمه أبوطالب.. فيروح ابو طالب ويقول: يا معشر قريش ان بن اخى اخبرنى ان ربه قد سلط "الاردة" (الدودة) على الصحيفة فأكلت كل البغى الذى فيها إلا كلمة " باسمك اللهم" ويا معشر قريش افتحوا الكعبة وانظروا إلى الصحيفة فإن كان محمد صادقآ فانتهوا عن المقاطعة والحصار وإن كان كاذباً نسلمكم "محمد".. فقالت قريش : "صدقت يا ابو طالب" ووافقوا وفعلا راحو يفتحوا الكعبه ويبصوا على الصحيفة فيلاقوا الدود بياكل فى الصحيفه ويمشى ويمشى لحد ما يجى عند كلمة باسمك اللهم يقوم سايبها ولافف حوالايها ويكمل وياكل ويوصل عندها تانى فيعديها تانى.. فقريش اتصدمت وقالت: هذا من سحر محمد.. فقال ابو طالب: صدق ابن أخى.. فلتنتهى هذه المقاطعة!!! وتخلص المقاطعة وينفك الحصار.. قال تعالى: "وَمَا يَعْلَمُ جُنُودَ رَبِّكَ إِلَّا هُوَ".. سبحان الله كأن ربنا رايد يقول لنا أنا أقدر بدودة أعمل اللى جيش كبير مايقدرش يعمله" وبعد ما اتفك الحصار الحمدلله.. حصل شئ لا علي البال لا علي الخاطر.. حصل إيه؟ ابو طالب بيموت ابو طالب تعب.. عنده 80 سنة ويحزن النبى عليه الصلاه والسلام حزن شديد قوى.. ولما النبى يعرف ان ابو طالب بيحتضر بقى يجرى على بيت ابو طالب وطول السكة فضل يبكى ويبكى على ابو طالب ويدخل عليه ويقول له:"يا عمى يا عمى قل كلمة واحدة احاج لك بها عند ربى.. ويبكى (النبى بيطلب من عمه انه يقول لا إله إلا الله عشان يقدر يشفع له عليه الصلاه والسلام يوم القيامه).. ففجأه يقول ابو جهل: يا أبا طالب أترغب عن ملة ابيك؟!! (انت هتسيب دين آبائك وأجدادك!!! شايفين الأصدقاء السوء.. فيبص ابو طالب للنبى ويقوله: يا محمد انى والله لأسرع الناس لما تحب (انا اكتر حد يحب يفرحك) ولكن لن ارغب عن ملة آبائى.. فيبكى النبى اكتر ويقول: يا عمى ارجوك قل كلمة واحدة.. قل لا اله الا الله قل كلمه أحاج لك بها عند ربى.. فيرد عليه ابو طالب ويقول: يا بنى أريد أن اقولها ولكن اخشى ان تعايرنى بها العرب بعد موتى.. ومرضيش ابدا يسيب مله ابوه عبد المطلب ويموت ابو طالب ويبكى النبى بكاء شديد جدا.. وتنزل الأيه الكريمه قال تعالى: "إِنَّكَ لَا تَهْدِي مَنْ أَحْبَبْتَ وَلَٰكِنَّ اللَّهَ يَهْدِي مَن يَشَاءُ وَهُوَ أَعْلَمُ بِالْمُهْتَدِين".. ابو طالب اختار يموت على الكفر.. دلوقتى ربنا ثبت النبى بالقرآن لكن للأسف بعد 7 ايام هتحصل حاجه كمان.. خديجة بتموت...يااااااه.. دا ابو طالب كان الضهر بره البيت وخديجه كانت الحضن جوه البيت! لحظة الوفاة, ورأس خديجة على صدر النبى عليه الصلاة والسلام, ويمسح على راسها ويدعى لها بالشفاء ينزل جبريل عليه السلام فيقول جبريل: "يا رسول الله أقرىء خديجة من ربها السلام", فيقول الرسول: "يا خديجة إن الله يقرئك السلام" ,فتقول: "هو السلام ومنه السلام وعليه السلام وعلى جبريل السلام". وجبريل قال : " يا رسول الله بشر خديجة بقصر فى الجنة لا نصب فيه ولا وصب", ثم يستئذن ملك الموت فى الدخول, وتموت السيدة خديجة, ويبكى النبى بكاءً شديداً... ياااااه قصر فى الجنه لا فيه تعب ولا حزن! .. فاكرين قد إيه تعبت في الدنيا وهي طالعه الغار فوق جبل عالى رغم سنها الكبير عشان تطلع لحبيبها النبى الأكل والمايه.. خلاص يا خديجه مفيش تعب تانى .. فاكرين لما دخل عليه الصلاة والسلام عليها وقال زملونى زملونى فغطته خديجه وحضنته حتى سكن وبقى هادى بعد ما شاف جبريل لأول مره.. فاكرين لما ثبتت النبى ان اكيد اللى شافه ده خير مش شر وقالت: لا والله لا يخزيك الله أبدا إنك لتطعم الطعام وتكرم الضيف وتعين على الحق.. ماتت خديجه وبقى دايما النبى يقول: "لقد رُزقت حبها". وكان كل ما يذبح ذبيحة يشيل منها جزء لصاحبات خديجة, كان نعم الزوج الوفى لزوجته. ويوم فتح مكة فاكرين لما كان النبى مشغول جداً فى مبايعة القبائل على الدخول فى الإسلام ويلاقى ست عجوزه فيفرح ويقعد معاها ساعه وتغير عائشه لما تعرف أنها واحده من صحاب خديجه وتقوله: لقد أبدلك الله خيراً من خديجه (تقصد نفسها ).. فيرد النبى ويقول: لا يا عائشة وهل فى الدنيا مثل خديجة؟ لقد أواتنى حين طردنى الناس, وصدقتنى حين كذبنى الناس, وواستنى بنفسها ومالها إذ حرمنى الناس, وهل فى الدنيا مثل خديجة؟ " فقالت عائشة: "والله لا أراجعك فيها أبداً يا رسول الله, ولا أذكرها إلا بخير". وتقول عائشة: "والله ما غيرت قط من أمرأة من زوجات رسول الله إلا خديجة ولم أرها" مات عم النبى وماتت زوجته حبيبته وتتسمى السنه دى بـ عام الحزن.. صلى الله على محمد صلى الله عليه وسلم .. *طب إيه اللي هيحصل بعد كده* *هنعرف مع بعض بعد شويه بإذن الله* *قصة حياة النبي صلى الله عليه وسلم*.. 🫶🏻