*النهاردة إن شاء الله يا شباب معانا الجزء التالت من الإسعافات الأولية* طيب كنا خلصنا امبارح التقييم والاساسيات والمفروض اعمل ايه اول ما اشوف حادثة وقولنا ان احنا هنبدأ نتعرف على ايه الاجراءات اللي المفروض اعملها مع الحالات المختلفة وهكذا بس كنا نسينا ان لسه في حاجات محتاجين نعرفها زى ايه موضوعنا النهارده وهو *شنطة الإسعافات الأولية* ودى طبعا من الحاجات المهمة اللي مينفعش تكون مش موجوده في بيتك او عربيتك. وعلشان كده النهارده هنتكلم عن هنحط ايه جواها علشان نستخدمه في حالات الطؤارى. طبعا اول حاجه معانا هنجيب صندوق علشان نحط فيه الحاجات دى ويفضل يكون بيتقفل وعليه علامه مميزة علشان ميتمش الخلط بينه وبين اى شى اخر. ودالوقتى هنتكلم عن الحاجات اللي هنحطها فيه وهى مش حاجة واحدة هما كتير وعلشان كده هنقسمهم فئات اول حاجه معانا *الأدوات والمستلزمات:-* 1.قطن طبى:- بنستخدمه علشان نغسل بيه او نطهر بيه الجرح. 2.فوطه بطن(غيار):- ودى بنستخدمها مثلا لو الحالات بتنزف فبنضغط بيها علي مكان النزيف علشان نوقفه. 3.شاش طبى:- بنستخدمه علشان نلف الجرح اللى احنا عملناله تطهير. 4.شاش فازلين:- بنستخدمه في تغطية مكان الحرق علشان بيتشال بسهولة من غير ما يأثر علي الجلد. 5.ملقاط *(non tothed):-* ودا بنستخدمه في الجروح اللي سببها كسر الزجاج فبنحتاج ننظف الجرح من أى بقايا زجاج موجودة *ونتاكد ان هو مطهر بالكحول قبل ما نستخدمه* او لو في امكانيه يتعقم يكون افضل . 6.البلاستر الطبى:- ودا علشان نثبت الشاش علي الجرح وفيه منه احجام كتير ومختلفة في الصيدلية حاول تجيب الحجم الوسط. وتجيب بلاستر الصوابع (اللى هو للجروح الصغيرة وللجلد الحساس وهكذا). 7.رباط ضاغط:- ودا بنستخدمه في حالات الالتواء أو الكسر علشان يثبت المكان منعا للاهتزاز لحد ما يوصل المستشفى علشان ميحصلش مضاعفات. 8. مقص طبى:- ودا بنستخدمه علشان نقطع بيه الشاش او الدريسنج او البلاستر او الملابس اللي مغطية الجرح. 9.سرنجات:- بمقاساتها المختلفة وخصوصا الأنسولين. 10.جلافز طبى وماسك جراحى:- ودا علشان نحمى نفسنا من العدوى ونحمى الجرح من التلوث أو الإصابة بالعدوى. تانى حاجه معانا *الأجهزة:-* 1.ترمومتر:- ودا علشان نقيس بيه الحرارة لو حسينا ان المصاب جسمه دافى او بارد. 2.جهاز قياس سكر الدم العشوائى:- ودا علشان نقيس نسبة السكر خصوصا لو المصاب مريض سكر. (ودا يعني لو قدرت توفره). ندخل على تالت حاجه *الأدوية:-* 1.محلول ملح:- لغسيل الجروح. 2.بيتادين جراحى 10%:- لتطيهر الجروح. 3.كحول 70%:- مادة للتطهير. 4.بنادول او بروفين:- برشام مسكن وخافض للحرارة. 5.تيكساكورت:- مرهم للحساسية (علشان لو حشرة قرصتك مثلا). 6.ميبو:- مرهم للحروق. 7.هيموكلار:- مرهم للكدمات والالتوءات. 8.فولتارين:- مرهم مسكن للألم ومضاد للتورم والالتهابات. 9.فيوسيدين:- مرهم مضاد حيوى. 10.بانتازول او اوميز20:- مضاد للحموضة. 11.أنتينال:- مضاد للإسهال. 12.لاكتيلوز:- مضاد للإمساك. *أهم حاجة تشيك على تاريخ الانتهاء لكل الأدوية كل فترة علشان متستخدمش علاج منتهى الصلاحية* وبس كده خلصنا شنطة الإسعافات الأولية وانتظروا بقا الجزء الجاى إن شاء الله هنتكلم عن الإنعاش القلبى الرئوى للكبار CPR 🔥 وبس كده *_`كمل سعى مفيش مجهود بيضيع♡`_* *_`خليك متميز♡`_*