*أنتيڪآ* 📜 *روايات* *قليلٌ من الوقت مع القصص يساوي حياةٌ بأكملها🤎🕰️* *نشر جميع القصص والروايات 🤎🕰️* *قناة خاصة لمحبي القراءة والقصص* _ *ننشر جميع القصص والروايات*🤎🕰️ *حب 🤎🕰️* *حزن 🤎🕰️* *اكشن🤎🕰️* *رعب🤎🕰️* *تـحـت إشـࢪاف: تـيـم*​​​​​​​​​​​​​​​​​​​​​​​​​​​​📜🤎 *ࢪابـط الـقـنـاة:* https://whatsapp.com/channel/0029VamfKJHK0IBbdBbxOc3d *.#لعنة_الفؤاد🤎* #الجزء_الثالث رفعت جومانا راسها بهدوء... وقفت على رجليها وجسمها كلو برجف .. قربت منو شوي شوي وابتسامة باهتة على وجهها .. شايفتو قدامها بملامحو الباردة .. جسمو .. طولو .. عرضو.. كل شي .. هدا هو ما غيرو .. رجعت ابتسمت اكتر وهي شايفة طاقة الامل والنور اللي انفتحت بوجهها .. .. 🥀🥀فـــــلاش بــــــاك 🥀🥀 … فتحت عيونها بنشاط .. عكس كل يوم .. كانت دايماً تقوم كسلانة ونعسانة ونفسها تبقى كل الوقت دفيانة بتختها .. توجهت للحمام اخدت دوش دافئ .. خلصت وتوجهت للتسريحة حطت مكياج خفيف مناسب للجامعة ومناسب لليوم اللي ناطرتو من زمان .. اليوم رح تسلم مشروعها اللي كانت عم تشتغل عليه من اشهر .. وقفت قدام المراي وعيونها على انعكاس صورتها .. شدت ظهرها وخاطبت نفسها بكل ثقة ..: جومانا انت حدا كتير ناجح .. حدا قدر يثبت حالو رغم كل العثرات .. اليوم هو اليوم الموعود .. رح تسلمي المشروع وتنهي مسيرتك الدراسية وان شاء الله تفتتحي مسيرتك المهنية وتصيري اكبر مهندسة معمارية بالبلد حملت شنطتها واغراضها وطلعت من غرفتها مستعجلة .. دخلت لغرفة القعدة كان ابوها ومرتو قاعدين قربت من ابوها.. مسكت ايدو وباستها ..: صباح الخير ابي .. قربت من مرت ابوها وباست راسها ..: يسعدلي صباحك خالتو رائدة رائدة : يصبحك بالخير يا بنتي رمضان : شو على وين انشالله عند هالصبح؟ جومانا : عالجامعة رمضان : والله ما بعرف شو لزوم الجامعة انقهرت جومانا من كلام ابوها .. اليوم هي بنهاية السنة الرابعة والاخيرة من الجامعة ولسا كل يوم نفس الكلام رمضان : يلا لنشوف شو بدك تاخدي من هالجامعة .. كلو من اخوكي رياض .. الا بدو ياني وافق على هالمسخرة رائدة: ولو يا ابو رياض .. بنتك رح تكون اكبر مهندسة بالعيلة .. بكرا رح تكون معها بتخرجها وترفع راسك فيها وبشهادتها وتفتحلها المكتب اللي بتحلم فيه.. لو يامن يحط عقلو براسو ويصير مثل جومانا رمضان بعصبية..: ما في شغل .. انا حكيت كلمة وما بتراجع فيها .. كل عمرها البنت من بيت اهلها لبيت جوزها من وين طلعتولي بالخرافات عقدت جومانا حاجبها ..: انا رايحة اتأخرت كتير ، يلا سلام رائدة : استني ، افطري قبل ما تروحي جومانا : خالتو بدي الحق الباص اتأخرت كتير ولازم سلم مشروعي اليوم ... قربت على خالتها وباست راسها .. : ادعيلي من قلبك رائدة : الله يوفقك ويسرلك امورك .. وشوفك اكبر مهندسة بالبلد رمضان بتهكم ..: ادعيلها تنستر احسن .. اخدت نفس بقهر وطلعت بسرعة من غرفة القعدة وضربت باخوها يامن يامن بغضب ..: وين، وين يا مسهل !؟ جومانا ؛ صباح الخير يامن يامن : تيابي جاهزات ! جومانا : اخي تيابك جنب التخت ، انا تأخرت عالجامعة يامن : روحي جيبي السباط وجراباتي واعمليلي قهوة جومانا : روح اعمل الي بدك ياه ، قلتلك عندي جامعة ومتأخرة كثير قرب عليها بدو يشد شعراتها صارت تصرخ ...: خالتو شوفي ، قليلو يبعد عني طلعت رائدة على اصواتهن ..: خلص يا ولاد، يامن اترك اختك تروح ..: صباح الخير ، لي اصواتكون طالعة !؟ ركضت عليه ونطت على رقبته ، وطبعت بوسة طويلة على خده ..؛ يا صباح الفل رباض ، حمدلله صحيت ، شوف اخوك شو عمل بشعراتي، قول لاخوك يتركني بحالي رياض: يامن خلص حِل عنها ، كل يوم نفس الموال قرب يامن عليها ، هي اتخبت ورا رياض يامن : تعالي ، تعالي لي خايفة ، فكرك اذا تخبيتي ورا رياض ما بطولك رياض: لك بعدين معك ... (التفت على جومانا ).. روحي اختي عجامعتك انا بتفاهم معو طلعت لسانها وصارت تجاكر بيامن ..: سلام يا حلو كان بدو يلحقها بس رياض وقفو ..: خلص يامن اتركها تروح يامن بعصبية ..: ضلك دللها انت وامي ، بكرا بتجيبلنا مصيبة على راسنا من ورا دلالك رياض : اختك مرباية منيح وانا بثق فيها كثير ، يلا تعال نفطر وننزل عالمحل .. حكى معي ابو ياسر وبدو يجيب قطع اليوم وبضاعة يامن : لا مو فاضي .. عندي مشوار مهم لازم اقضي بالاول .. روح انت وانا بلحقك قربت رائدة من يامن ..: انت لي بتعاملها هيك للبنت .. وشو الك علاقة فيها .. هاي اختك .. بدل ما تكون الامان والسند لالها .. ضرب يامن رجلو بالطاولة ..: خليكي هيك امي ، زيديها دلال تقولو بنت بطنها .. لك امي هاي بنت ضرتك مو بنتك .. رائدة بعصبية ..: اخرس احسنلك حط يامن ايده على تمو ..: ايه رح اخرس .. ما رح احكي وبس تجبلنا مصيبة نصير نضرب على راسنا .. انا رايح .. ** هاي عيلة جومانا .. جومانا كان نصيبها من الحياة غير كل البنات ..ابوها وامها انفصلوا وهي بعمر صغير بس عوضها ربنا بزوجة اب احن من امها عليها .. عوضتتها حنان امها وابوها زوجة اب حاملة قلب طيب ورحيم .. ابوها اتزوج بعد انفصالو على طول ... كانت حنونة معها وشايلتها على راسها ___ بقاعة الاجتماعات كان مجتمع كل مدراء الاقسام والمساعدين بالشركة .. قربت مديرة قسم الديكور على زميلتها ..: شايفة يا وئام النا اكثر من ربع ساعة ناطرين يشرف حضرة مدير الشركة ..لك الله يسعده استاذ مدحت والله كان ما في منو .. رح يصرلي بشتغل بهالشركة اكثر من عشر سنين ولا مرة بهالسنين حسيت حالي بشتغل عند حدا غريب وئام: والله وانا كمان ايناس : من وقت ما استلم ابنو الادارة وكانو انقلب كل شي .. لك الو اكثر من شهر مستلم وما كلف خاطرو يجتمع معنا ولا يورجينا صورة وجهو .. وئام : لك وطي صوتك لحدا يسمع ايناس: لك يسمعوا يعني شو الها طعمة هالحركات .. كلنا عنا شغل .. والله اللي ثلثين خاطر اترك هالشغل .. لولا كوم اللحم اللي برقبتي وئام : لك خلص خلص.. شو الشغل الي انا .. هدا شغلو بالاخر .. وهو حر بشغلو دخل شب ووقف عند راس الطاولة.. : منعتذر عالتأخير .. انا يزن مدير مكتب رئيس مجلس الإدارة بعدها دخل شب طويل اسمر البشرة الشيب مالي شعرو ودقنو عاطينو جمال ووقار... ملامحو باردة وابتسامة صغيرة على شفافو توسعت عيون كل الموظفات .. تنحنح يزن ..: رح قدملكن الاستاذ فؤاد العامري .. رئيس مجلس الادارة الجديد وقف فؤاد جنب يزن .. : عارف الاغلب عندو استفسارات .. كان مفروض نجتمع من شهر .. من وقت ما استلمت الادارة .. بس كان لازم يصير تغييرات جذرية .. واليوم الاجتماع مشان اسمع أي حدا عندو شكاوي تنحنح واحد ..: استاذ فؤاد اذا بتسمحلي احكي شغلة قعد فؤاد على الكرسي وشبك ايده .: انا موجود اليوم لحتى اسمع .. تفضل مجدي مجدي: عم توصلني كثير شكاوي من مواقع البناء .. بتقول انو اغلب معدات البناء مو صالحة للعمل واسمحلي بهاي الكلمة .. حضرتك ما بتعرف شي عن الشركة بس الاستاذ حسن كان مسؤول وانا شخصياً قدمت هاي الشكاوي لالو بس ما كان في تجاوب وتعاون منو .. كمل واحد تاني ..: وانا مسؤول عن العمال بمواقع البناء ..وسائل الامان تقريباً معدومة .. للاسف من فترة شهرين .. يعني بفترة مرض الاستاذ مدحت صارت حادثتين لتنين من العمال.. ولليوم العمال بالمشفى فؤاد: عندي علم والعمال عم يتلقوا العلاج بالمشفى وأمرت بتقديم تعويضات للاهل وطبعاً الرواتب رح توصلن طول فترة العلاج .. وبالنسبة للمعدات .. اليوم وقعت على صفقة معدات جديدة .. والطاقم رح يزيد .. قاطعو مدير الموارد البشرية ..: استاذ بس الخطة كانت تقليل العمال والموظفين .. بحيث تتناسب مع خطة الاستاذ حسن اللي قدمها اول السنة لحتى نوصل للارباح الي اقترحها بالخطة .. وقف فؤاد وحكى بحزم ..: كأنو في قسم ما سمع منيح اللي حكيتو .. اليوم انا رئيس مجلس الادارة .. واي شي كان قبل ما استلم هالمنصب ملغي .. ولحظة انت كمدير موارد بشرية كيف بتمشي مع هيك اقتراح .. بدك مني سرح عمال بيوتها مفتوحة من الشغل هون بالشركة .. كل شي خطط انحطت قبل استلامي منصب رئيس مجلس الادارة ملغية .. بقيوا بالاجتماع لاكثر من ساعتين وكان اجتماع ناجح .. بين فيه قدي فؤاد شخص مسؤول وصارم بشغلو مما ادى الي انقسام الموظفين لمجوعتين .. منن اللي كان موافق مع قراراتو وخططو الجديدة لتكبير الشركة وقسم كان معارض وبشدة بسبب المطامع الشخصية .. باخر الاجتماع وقف فؤاد وبكل زر جاكيتو ..: نحنا رح نكون عيلة كبيرة مو موظفين ومدير .. مكتبي مفتوح دايماً لاي شي بتحتاجو وشكراً لالكن تفضلو عمكاتبكن حمل فؤاد موبايلو وطلع من غرفة الاجتماعات وتوجه لمكتبو .. دخل لمكتبو وقعد ورا الطاولة قرب منو يزن ..: شو ابو شريك لابقلك المكتب فؤاد : مو وقتك يزن: قلي بدك تغير شي من المكتب .. حاب اطلبلك مكتب جديد يكون … قاطعو فؤاد: لا ما بدها المسألة .. الشركة مو ناقصها مصاريف يزن: متل ما بدك .. رح روح بدك مني شي.. فؤاد : ابعت ايميل للشركة اللي اتفقنا معها مشان المعدات الجديدة .. وكمان لشركة التامين .. وجيبلي كل ملفات العمال الموجودة عنا بدي راجعها .. وكمان .. قاطعو يزن ..: هوووب هوووب عمهلك عليي .. انا مو سكرتيرة فؤاد: لي لا .. شو رأيك تكون سكرتيرتي .. يزن : كتير مهضوم فؤاد يلا اطلبلنا فنجانيين قهوة وجيبلي حسابات الشركة لاطلع عليها واعرف شو في تخبيصات تانية يزن : رجعنا للطلبات فؤاد: اخر طلب يزن: انا شو جبرني وافق كون مدير مكتبك فؤاد: انت عرضت المساعدة وانا وافقت يزن: خليني روح اعمل اللي قلتلي عليه قبل ما انسى وشوف موضوع السكرتيرة طلع يزن من المكتب وانشغل فؤاد بالاوراق اللي عندو .. ___ رجعت جومانا من الجامعة .. دخلت غرفتها وتسطحت عالتخت دخلت لعندها رائدة ..: شو حبيبتي لي راجعة بكير التفتت عليها ..: في احتفال بالجامعة اليوم وانا ما اللي خلق اتخانق انا ويامن .. لو كنت بعرف ما كان رحت من الاساس اليوم .. بدك مساعدة شي .. رائدة : لا يعمري .. بدي سلامتك .. خلص ارتاحي وانا رح حضر فنجان قهوة نشربو سوا جومانا: لا بدي نام شوي .. علمك مكسور عليي نوم كتير قربت رائدة من الشباك وسكرتو ونزلت الستار ..: يلا نامي وانا بصحيكي عالعشا .. نسيت قلك .. يامن ورياض وابوكي نزلو عالضيعة بدهن يقعدو يومين قعدت جومانا عالتخت ..: ايــه لا تقوليها .. لي ما قلتيلي كان حضرت الحفلة بالجامعة رائدة : والله ما كنت بعرف .. راحو عالضيعة على اساس مشوار صد رد بس قبل نص ساعة اتصل وقال انهن بقيانين يومين جومانا : لي صاير شي بالضيعة رائدة : ما بعرف في مشكلة مع عمامك وعمال الارض وراح ابوكي يحلها جومانا بفرح ..: لكن انا رح نام ساعتين وبعدها بدي روح عند ناديا بلكي اقنعتها تنام عندي اليوم رائدة : ايه خليها تيجي تسهر بنتسلى .. يلا نامي مشان تكوني مصحصة رمت بوسة بالهوا ..: تقبريني رائدة: بعيد الشر عن قلبك يعمري قامت بدلت تيابها وبعدها غطست بالنوم __ بعد نهار طويل بالشغل وصل فؤاد عالبيت نزل من السيارة وراسو رح يتفجر .. دخل عالبيت وكان امو وابوه قاعدين بالصالة فؤاد : مسا الخير ردو عليه : مسا النور هيام: اهلين ابني حطلك عشا فؤاد : لا امي تسلمي.. اكلت بالشركة .. ابي لازم نحكي .. مدحت : تفضل قعد فؤاد عالكنبة ..: ابي الشركة بوضع صعب.. وما بعرف قدي بدي وقت لارجع وقفها على رجليها .. في كتير مصاري انسحبت بالفترة الاخيرة وما بعرف وين راحت هيام بعصبية..: يلا حط الحق والغلط كلو على حسن .. كل فشلكن رح ترموه على هالصبي .. فؤاد: امي .. انا عم بحكي الواقع .. وبهاي الفترة ما كان غير حسن بإيدو كل الصلاحيات .. هيام: ايـــه هدا اللي بدك توصلو .. يا مهندس يا محترم وين كنت حضرتك لما كل المسؤولية انحطت على ظهر حسن .. انت رحت وطنشت كل شي وعلى اساس تعمل شغل لحالك بعيد عن ابوك واخوك.. وهلق جاي تحط الحق على حسن .. حسن كان ماسك كل الشغل وكان الوضع ممتاز بس اكيد في حدا من الموظفين كان يختلس فؤاد: المصاري اللي كانت تنسحب كلها حسن اللي سحبها .. وكان في تلاعب واضح بالحسابات وحسن اللي كان مسؤول عن الحسابات .. هيام: ناقص تقول حسن حرامي فؤاد: ما قلت هيك .. هلق انا ما جاي احكي بالماضي .. الوضع صار واضح بالشركة .. الشركة اليوم عليها ديون كثير ولحتى تسد الديون اللي عليها بدها عالاقل سنة بدون ما يكون في ارباح .. مدحت : شو ناوي تعمل .. فؤاد: اليوم خلصت الخطة اللي حطيتها لسنة .. وتقريباً بدأت بتنفيذها .. مدخت: ممتاز انا واثق فيك .. هيام: وحسن ؟ فؤاد : ما رح اسحب منو صلاحياتو بس اسمحيلي امي.. رح كون مراقب كل شي .. ما رح اسمحلو يمرق قرارات بدون ما يرجعلي .. طبعاً بعد اذنك ابي مدحت : معك كامل الصلاحيات .. هيام بغضب ..: بدك تصغر اخوك قدام الموظفين وقف فؤاد وعلامات الاستياء على وجهو ..: ما قصة صغرو ولا كبرو .. القصة انو اخدت على عاتقي مسؤولية كبيرة لحتى احمي كل شي ابي وصلو .. ولحتى حافظ على الشركة .. الشركة اللي ابي فنى كل عمرو لحتى عملها .. الشركة اللي تركنا ونحنا اطفال وتركك انت بالضيعة سنين لحتى يعملها .. بدي رجع حق الايام اللي عاش فيها بعيد عنا .. فهمتيني امي .. دخل حسن للصالة عيونو حُمر وما كان صاحي قعد عالكنبة ..: هلق انتو عم تتخانقو عليي .. تعوا لريحكن .. انا ما عاد هوّب ناح الشركة .. وما عاد بدي اشتغل .. وانت أستاذ فؤاد .. خلي الشركة لالك بس ارباحي بدي اخدها .. بتعمل حسابك على هدا الأساس .. انا اللي نصيب فيها اطلع عليه مدحت ..: عم تقسم ورث وانا عايش !! حسن : اخرتك بدك تموت ابي .. ولا ناوي تخلد فيها هجم عليه فؤاد ومسكو من ياقة القميص ..: احترم حالك يا كلب .. هدا ابوك .. وما في أرباح .. روح طبش راسك واشتغل وجيب مصروفك قربت منن هيام وبعدت فؤاد عن حسن ..: بكسر ايدك اذا بتمدها عليه مرة تانية .. ما حكى شي .. حسن الو نصيب بالشركة وارباحو لازم ياخدها صرخ فؤاد بغضب ..: شو اللي ساعة عم بحكي .. ما في أرباح .. حابب تعمل أرباح تفضل نشوف شطارتك بعد ما دمرت الشركة وغرقتها بالديون مشى حسن بإتجاه الباب ..: ما اللي صالح .. خليها الك واللي قلتو بتعملو هيام : لا تخاف امي اما بعطيك روح ارتاح تقبرني فؤاد : شو امي مبسوطة فيه هيك .. ما سألتي حالك وين بروح بهالمصاري .. قربت منو بغضب ورفعت اصبعها بوجههو ..: اول واخر مرة بتمد ايدك على اخوك .. بغضب عليك ليوم الدين .. ما الك فيه .. شب وبدو ينبسط بهالحياة .. مدحت : خلص ابني اهدى لا ترد على حدا شوف شو مناسب واعملو فؤاد: بالاذن .. انا طالع .. __ بعد ساعتين اجت رائدة تصحيها من النوم ..: جوج اصحي حبيبتي ناديا دقتلك كتير فتحت جومانا عيونها بتعب ..: يا ربي ناديا وراي وراي رائدة: بتقول بدها ياكي بشي ضروري جومانا : لا تردي عليها .. بتقول شي ضروري مشان روح لعندها كرفتة رائدة : لك خلص قومي وبعدين معك قامت عن التخت ..: قمت قمت .. راحت غسلت وجهها وبدلت تبابها وطلعت من البيت لعند ناديا حكت معها قبل ما تطلع وقلتلها انها جاية وصلت لتحت بيت ناديا .. شافتها واقفة تحت قربت منها ..: شبك واقفة هون رفعت مفتاح سيارة وصارت تلوح فيه ..: احزري شو هاد جومانا؛ شو هاد!! ناديا : مفتاح سيارة اخدتو منها وصارت تقلب في وحكت بجدية ..: تصدقي ما كنت بعرف .. سبحان الله مفتاح سيارة .. يا الله اول مرة بشوف مفتاح سيارة .. حمدلله على نعمة وجودك بحياتي اخدت منها المفتاح ..: مثقل دمك .. هدا مفتاح سيارة خالي .. لطشتو منو بدون ما يحس جومانا بعدم فهم ..: ايه؟ اشرت عالسيارة اللي جنبها ..: رح نعمل فتلة .. شو انا عملت شهادة سواقة لاصمدها بالفترينا جومانا : مجنونة انت .. بحياتك ما سقتي سيارة غير مرة او تنين ناديا : وهاي التالتة اطلعت عليها جومانا وابتسمت ..: يلا محدا ماخد معو شي .. بس امانة خلينا نرجع صاغ سليم عالبيت مو يروحو يجيبونا من المشافي ناديا بفخر ..: ناديا لديكم لا خوف عليكم .. لا تخافي ناديا معك .. ركبو بالسيارة جومانا: طيب وبعدين ناديا : اول شي رح نشغل السيارة .. انصدمت جومانا..: لك جاي تتعلمي هلق .. خلص انزلي غيرت رايي ناديا بإصرار ..: لك لحظة لحظة .. ها اشتغلت .. حطي حزامك .. حطوا الحزام وانطلقت ناديا ناديا : شفتي بعرف سوق جومانا: خلص اعملي فتلة هون بالحارة لا تطلعي عالشارع الرئيسي بلا ما نعمل مصيبة ناديا: لك خلص اسكتي واستمتعي .. الله يطعمنا جومانا : اميييين .. انا ناقصني سيارة وبتكمل محاسني ضلو يتفتلو بالسيارة اكتر من تلت الساعة .. ناديا : نجيب شي زاكي جومانا : ايه معي مصاري .. روحي نجيب بوظة غالية جعل لا حدا حوش .. توجهو لمحل البوظة .. كانت بدها توقف السيارة بالموقف المقابل لمحل البوظة .. وهي ترجع مشان تركن السيارة.. طلع صوت خبط قوي .. فتحت جومانا عيونها عالاخر وناديا صابها تشنج .. جومانا : يخرب بيتك شو عملتي ناديا : الله لا يوفقني .. انخرب بيتي .. انزلي شوفي شو صار .. ما عم حس برجلي جومانا بخوف ..: انا شو دخلني انت الشوفير مو انا .. ناديا : جوجو حبيبتي .. انزلي بس القي نظرة وشوفي الضرر كبير ولا صغير .. مشان الله جـــــوج جومانا بعصبية..: هلق وقت دلعك .. نزلت من السيارة ترجف .. اطلعت عمؤخرة السيارة وكان في ضرر .. التفتت للجهة التانية وكانت المصيبة .. ناديا رجعت على سيارة تانية وواضح انها غالية .. اطلعت حولها وما كان في حدا رجعت عالسيارة ..: اهربي اهربي ما في حدا .. وصاحب السيارة التانية الله بعوضو .. كانت رح تتحرك بس شحطت فرامل قوية جومانا بعصبية ..: الله لا يوفقك شبك .؟؟؟ اطلعت على ناديا وشافتها بتأشر باصبعها لبرا اطلعت جومانا عمكان ما بتأشر وشافت شخص واقف قدام السيارة طلعت راسها من الشباك ..: شو اعمى .. هيك علموك بالمدرسة تقطع الشارع !؟؟ توجه لعند شباك ناديا جومانا : لك امشي بسرعة .. شكلو متحرش تشنجت ناديا وما عادت عرفت تعمل شي .. دق على الشباك واشرلها تنزل .. فتحت ناديا الباب بهدوء مسكتها جومانا ..: شبك .. لا تنزلي واضح انو متحرش ما ردت ناديا ونزلت لحقتها جومانا وصارت تصرخ ..: يا متحرش يا كلب يا ابن الكلب .. بعد عنها .. اطلع عليها الرجال من فوق لتحت ..: متحرش!! بمين .. فيكي .. انت شفتي حالك بالمراي قبل انصدمت من جوابو .. اطلعت على حالها وعلى تبابها .. كانت لابسة بجامة رياضية .. الرجال : الانسة ضربتلي السيارة مسكت ناديا بإيدو ..: مشان الله سامحني .. ما كان قصدي .. بالغلط .. اساساً اول مرة بسوق وهاي مو سيارتي .. استرني الله يستر عليك .. سحبت جومانا ايدها ..: شبك بتترجي فيه .. ( اطلعت عليه) .. اعلى ما بخيل اركبو واحمض ما عندك اطبخو .. روح اعمل محضر واذا عرفت تجيبنا ما تقصر .. اركبي انت التانية الرجال ببرود..: بعرف كيف جيبك لا تخافي .. ولا تنسي رقم السيارة صار معي ناديا : انا بعوضك .. اساساً انا سارقة السيارة ضربت جومانا على صدرها ..: يخرب بيتك الرجال : السيارة مسروقة كمان ناديا بخرف ..: الله لا يوفقني .. لك لا مو مسروقة .. هاي سيارة خالي .. استعرتها منو بدون ما يعرف .. خلص شوف الضرر اللي عندك وانا جاهزة ..اعطيني تلفونك لسجل رقمي وبنتحاكى .. واي شي انا جاهزة .. الرجال: وانت بتتحملي تكلفة تصليحها .. اذا بتحطي اللي فوقك واللي تحتك ما بكفي حق دولاب منها جومانا بعصبية ..: وعشو شايف حالك لكن .. اذا هالقد غني روح صلحها لحالك لشو عم تتمقطع بهالمسكينة ناديا بهمس ..: جومانا اخرسي الرجال : انا رح خبر قسم الشرطة رجعت مسكت ايدو..: اعتبرني اختك الصغيرة .. اختك وغلطت .. محتاجة شرطة جومانا بإستفزاز..: اختو الصغيرة شو .. قولي بنتو ..مو شايفتي قد جدي مسكتها ناديا بعصبية وجرتها للسيارة ورجعتلو .. ناديا : استاذ شو قلت .. الرجال : مشان طول لسان رفيقتك رح خبر الشرطة صرخت جومانا من جوا السيارة ..: لك لسا عم تتوسلي وتترجي فيه .. يروح يبلط البحر هالختيار رفعلها حاجبو عضت ناديا على شفتها بغيظ من كلام حومانا ..: استاذ .. اختك الصغيرة كمان .. لسانها طويل يبعتلو قطعو اللهي .. اعطيني اسجل رقمي عندك وبنلتقي بكرا وبنخلص الامور .. شفق على ناديا وقد ما ترجتو …: خلص روحي .. مو مشكلة .. ناديا بفرح ..: بتحكي جد استاذ .. الله يخليلك شبابك .. الله يخليلك حبابك .. ركبت السيارة وانطلقت بقي واقف مكانو وابتسامة صفرا على وجهو .. رن تلفونو ..: ايه يزن .. وينك انت .. تمام جاي ____ بعد أسبوع بعدما خلصت المحاضرة وطلع الدكتور .. ريحت قعدتها عالكرسي وحطت ايدها على صدرها بعدم ارتياح في شي ناقزها .. قلبها مو مرتاح .. سكرت اللابتوب واخدت نفس قربت ناديا وهمست جنب ادنها ..: لك جومانا شبك اطلعت جومانا وعلامات الانزعاج عوجهها…: شبك شبك .. نقزتيني؟ ناديا :بشو سرحانة؟ مسكت اللابتوب ودخلتو بالشنطة ووقفت ..: نحنا قدمنا مشاريع التخرج من وين طلعو بالمحاضرات بعد المشروع شو بدي استفيد انا .. مو المفروض مشروع تخرج وبعدها تخرج .. كيف المحاضرات دخلت بالنص .. ناديا : لي معصبة صاير معك شي جومانا : ما شي ..قبل ما انسى .. مشي معي عند الدكتور رأفت .. ناديا بغيظ..: لا يا جوجو ما بدي شوف خلقتو النحس اليوم .. خلي نهارنا يمرق على خير بلا شوفتو اليوم .. مشان الله جومانا : لا مشي معي بدي اسألو مشان شغلة وعدني فيها .. ما بدي روح لحالي ناديا : حاضر .. مشت جومانا ووراها ناديا وطلعو من قاعة المحاضرات وتوجو لمكتب الدكتور ناديا بمزاح ..: شايفة ما احسني ما رح اتركك تتمسي بخلقتو النحس لحالك حطت جومانا ايدها على اكتاف ناديا ..: يخليلي رفيقة دربي اللي معي عالحلوة والمرة وصلو للمكتب ودقت جومانا الباب .. دخلت بعد ما سمحلها الدكتور تدخل دخلوا وكان شخص متواجد مع الدكتور بالمكتب جومانا : مسا الخير دكتور .. رأفت : تفضلي جومانا جومانا : دكتور بالنسبة للموضوع اللي حكينا فيه من فترة .. اطلع الدكتور للشخص اللي قاعد مقابلو عالمكتب جومانا بارتباك ..: دكتور اذا مشغول برجع بكرا رأفت بمزاح ..: لا بس انا بقول انك مو بحاجة مساعدتي .. جومانا : كيف يعني .. انت حكيت الموضوع عندك .. قاطعها بإستعجال ..: قصدي انو الموضوع ومجموعتو قاعد هون قربت جومانا ببلاهة ومدت راسها قدام الشخص الي قاعد بالمكتب .. رأفت : الاستاذ فؤاد العامري .. التفت فؤاد عليها واطلع عليها من فوق لتحت ..: شفتكون بشي مكان ؟؟ وغمزها بعدما عرفها احمر وجه جومانا وناديا .. بس تعرفو عليه قربت ناديا من جومانا وهمست ..: أيـــه بربي هو .. الله لا يوفقك يا جومانا لاحظ الدكتور تغير معالم وجهه جومانا ..: بتعرفو بعض ؟ اتداركت ناديا الموقف ..: اكيد بعرفو .. الاستاذ فؤاد اشهر من نار على علم .. بس ما بعرف اذا مشبه علينا !! فؤاد بإبتسامة صفرا .. : ما اعتقد في الها شبيه ضحكت ناديا بغباء وهمست ..: صدقت أستاذ .. جومانا فيا في منها ومن لسانها تنحنح رأفت.. : استاذ فؤاد .. هاي هي جومانا اللي رشحتلك ياه .. وكمان ناديا .. جومانا وناديا اشطر طالبات عندي بالقسم ورح تقدملهن خبرة كبيرة بالشغل معك بمجموعتك .. انرسمت الابتسامة عوجه ناديا وحكت بانفعال واضح ..: ايـــه لا .. دكتور لا تقولها .. رح نشتغل عند الاستاذ ونكون فرد من افراد مجموعتو !!! ضربتها جومانا بإيدها ..: دكتور لا تواخذها .. بتعرف ناديا لما بتنفعل مسكتها ناديا وسكتتها ..: دكتور نحنا موافقات .. من بكرا رح نشتغل اذا بدك استاذ .. نحنا جاهزات.. نحنا مستعدات نترك الجامعة وما نتخرج ونشتغل عندك اذا معني .. ضحك الدكتور وفؤاد على انفعال ناديا فؤاد بوقار ..: لا مو لهدرجة .. ما رح تتركو الجامعة .. فيكو تبلشوا شغل بعد التخرج فوراً قاطعت جومانا حديثو بهجومية ..: بس انا ما اعطيت موافقتي .. استغرب فؤاد من ردة فعلها واطلع عالدكتور..: رأفت انت حكيتلي انو الطالبة هي اللي طلبت تنضم لمجموعتنا .. ( التفت لجومانا ) بعتذر يا انسة ممكن انا فهمت غلط.. وقف وبكل رز جاكيتو ..: انا بستأذن طلع من المكتب وعلامات الانزعاج على وجهو رأفت: جومانا شو هدا اللي عملتيه .. انت طلبتي مني هدا الشي .. كيف هيك بتحكي قدامو !؟ حست جومانا انها وقعت حالها بمشكلة كبيرة وردة الفعل القوية اللي اعطتها رح تخرب عليها .. وما عملت حساب لهيك شي .. رأفت : انا عم استنى تفسير جومانا .. اتدخلت ناديا بسرعة لحتى تخفف من التوتر ..: دكتور ما تواخذها بس جومانا بتمرق بظروف صعبة بالبيت .. لا تقلق رح نصلح الموقف اللي صار .. بس لو سمحت ممكن رقم تلفونو للاستاذ فؤاد .. بوعدك نعتذر منو .. ونبيض وجهك معو اطلعت على جومانا ونقزتها من ايدها رأفت: انا بقول هيك كمان .. لازم تعتذري من الاستاذ فؤاد يا جومانا .. هدا التدريب رح يكون اضافة كبيرة لخبرتك ولل cv .. واساساً انت اللي طلبتي مني .. يا ريت تقدري اللي عملتو .. هزت جومانا براسها ..: حاضر دكتور .. بعتذر منك .. بالاذن _____ طلعوا من مكتب الدكتور وجه جومانا ما بيتفسر وشاردة بالعدم وقفت فجأة ..: ناديا انا عملت شي ؟ ناديا : يعني ما تزعلي مني .. بس ما كان بدها هالقد .. وانت زودتيها كثير .. يعني لو ما بعرفك بقول في تار بينك وبينو جومانا بنرفزة ..: انت بتعرفي اني ما بحب حدا يحددلي خطواتي .. ناديا : لك شو عمل الرجال .. كان قمة فالادب .. وبعدين شو حكى قال ايمتى ما بدنا فينا نبلش بالتدريب وهو بالاساس مو مجبور يدخلنا على الشركة ويسمحلنا نشتغل فيها او نتدرب ونحنا بدون خبرة خمس دقايق .. يعني منيح انو وافق .. هو بموافقتو فضّل علينا وعمللنا خدمة بتسوى ذهب .. وانت واقفة قدامو بكل جحود بتتقلي عليه كانو عم يترجاكي توافقي .. انت عارفة كم شب بحلم يشتغل بشركتو .. لك هاي اكبر شركة بالبلد .. جومانا : بس .. اللي عملو معك .. وكيف كنتي تترجيه ناديا بمقاطعة ..: جومانا .. انا غلطت وكتر خيرو سامحني بالضرر اللي تسببت فيه لسيارتو جومانا : بس.. ناديا : لا بس ولا شي .. مشي معي نشرب قهوة وبعدها نحكي معو او برأي تروحي انت عندو عالشركة بكون افضل .. وهيك بشوف انك عاملتيلو قيمة ومقدرة معروفو معنا .. جومانا : لا ما بدي .. بحكي معو عالتلفون وخلص .. ناديا بنرفزة ..: ايه ايه خليكي كبري براسك .. بكرا بتوقعي عوجهك طب .. مسكتها جومانا من ايدها وجرتها ..: مشي مشي .. اساساً اذا بدي اعتذر منو بس مشانك ما بهون عليي ضيع عليكي هيك فرصة مسكتلها خدودها وشدت ..: ايييي يسلملي الحنون انا .. ___ تاني يوم كانت ماشية ورافعة راسها بكل فخر متوجهة لعند جومانا بإيدها ملف وعم تلوح فيه .. قربت من جومانا ..: احزري شو هدا اخدت منها الملف..: شو ؟ ناديا بفخر ..: ملف جومانا بإستغراب ..: ايـــه لا .. لا تقوليها سحبت منها الملف وقعدت جنبها ..: لا تبلشي .. غليظة .. هدا ملف في معلومات مهمة عن الاستاذ فؤاد .. مشان نعرف كيف ندخلو .. من مبارح سهرانة عليه جومانا ببرود ..: جايبة معلومات من النت وبتقوليلي مهمة ناديا: حتى ولو .. مهمة بنسبة النا .. فتحت الملف ..: شوفي .. فؤاد العامري .. ٣٥ سنة .. اعزب .. ضربت بإيدها عالملف ..: شفتي .. اعزب .. يعني فيكي اطبقي .. ضربتها جومانا بخفة … :اختصري بلا ما طبق راسك ناديا: نكمل .. برج العذراء .. ليكي قدي تعبت بجمع المعلومات .. نكمل انفصل مؤاخراً عن حبيبتهِ عارضة الازياء المشهورة .. كريستينا نصار .. يعني اكيد متل ابطال قصصك معقد وما بحب الستات .. صاحب شركة ميدا للمنشئات في امستردام .. يعني عندو شركتو الخاصة.. سحبت جومانا الملف منها بغضب ..: وانا شو استفيد من معلوماتك .. شو رح يضيفولي ناديا بغباء ..: ما شي رمتو عليها ..: لكن بليه واشربي ميتو .. لحظة .. مين هاي كرستينا نصار .. عارضة ازياء معروفة .. كيف معروفة وانا ما بعرفها ضحكت ..: قومي .. قومي خلينا نرجع عالبيت بلا هالكلام الفاضي ____ بعد يومين كان قاعد بمكتبو ومشغول بشوية اوراق رن تلفونو برقم غريب .. اطلع عالرقم ورد..: ايوه .. عالطرف الثاني صوت انثوي ناعم ..: حضرتك الاستاذ فؤاد العامري ؟ فؤاد: نعم انا فؤاد العامري .. مين معي .. عالطرف الثاني ..: انا جومانا .. تذكرتني ؟ رجع ظهرو لورا بالكرسي ونص ابتسامة عوجهو ..: لا ما عرفتك .. تفضلي بشو فيني اخدمك . جومانا : التقينا عند الدكتور رأفت .. اللي عرض عليك انو ننضم انا ورفيقتي لمجموعتك ونبدأ تدريب عندك بالشركة رجع ابتسم فؤاد ..: على ما اذكر انت اللي اقترحتي هالاقتراح مو رأفت سكتت جومانا وما ردت فؤاد: شو المطلوب ؟ جومانا : انا بعتذر يمكن دقيتلك بالوقت الغلط .. بعتذر كمان مرة .. سكرت الخط بوجهو .. اطلع فؤاد على شاشة التلفون وضحك بصوت عالي ..: شكلك رح تتعبيني معك .. بس يلا حقك تددلي .. ورجع يضحك .. _____ عالطرف الثاني اطلعت ناديا على معالم وجه جومانا اللي ما بتتفسر ..: جوج شبك .. لي سكرتي الخط .. شو قلك .. بس ما يكون ما وافق وقلك يعوض الله .. لك جوجو ردي شبك اطلعت عليها جومانا ..: انا بدي تكسير ايدين ناديا باستغراب ..: شبك .. لي .. شو قال !؟ مسكتها من شعرها ..: وانت بدك تنتيف شعر ناديا بخوف ..: لك مشان الله شو قلك جومانا: انا عارفة الدكتور رأفت بحياتو ما عمل شي منيح .. من كل عقلي صدقت انو رح يعمل معي منيح .. ناديا : يا الله منك .. دايما بتعملي دراما .. احكي خلصيني جومانا بغيظ ..:لك عم يتهاضم عليي .. وبقلي شو المطلوب وانت اللي قتلتي حالك لتشتغلي عندي زفرت ناديا بإرتياح ..: لك هيك بس .. فكرت قلك ما بدنا موظفين جومانا بغضب ..: شو قصدك انت كمان .. ما تحلمي ارجع فكر اشتغل عندو لك هدا واحد متخلف .. وشايف حالو ما بعرف على شو .. مفكر حالو اخر قطعة نادرة بالكون .. ايه فشر بنص عينو .. الف شركة بتقبل توظفنا .. قاطعتها ناديا..: ايــه لا .. لا تطولي ولا تقصري ما حدا رح يوظفنا غيرو .. ليكون مفكرة حالك مهندسة عالمية ولا ما في منك تنين .. نحنا بشهادتنا هاي اللي لسا ما اخدناها ما بنسوا قشرة بصلة وولا شركة معفنة رح تقبل توظفنا ونحنا ما معنا خبرة نص يوم .. وبلشي فكري مزبوط باللي عملتي .. لك انت سكرتي الخط بوجهو .. يعني سكرتي طاقة القدر اللي انفتحتلنا .. ومو بعيد يحطك براسو وينهي مستقبلك المهني قبل ما يبدأ.. والله خايفة يحط اسمك عند كل شركات البلد ويمنعك تشتغلي عند حدا .. لك هدا حدا واصل بالبلد واسمو معروف .. يعني بجرة قلم بنهيكي .. وبنهيني معك .. خطيتي برقبتك يا بعيدة سكتت جومانا بعد ما استوعبت حجم المصيبة اللي عملتها وبلشت السيناريوهات اللي حكتها ناديا تطلع بوجهها .. وتذكرت كيف عملت مشكلة مع اهلها لحتى وافقو يخلوها تشتغل وهي بكلمة وحدة هدت كل شي .. اطلعت على ناديا بخوف ..: لك انا عملت العمايل لحتى وافقو اهلي اني اشتغل .. لك شو بدي اعمل هلق .. اطلعت عليها ناديا بشماتة ..: انا شو دخلني .. ما بكفي ضيعتيلي مستقبلي !! مسكتها جومانا من ايدها ..: ناديا مشان الله خلص رح اعمل كل جهدي لحتى صلح كل شي اطلعت عليها ناديا بطرف عينها وبقلبها بتضحك عليها من شدة خوفها ..: ايــه هيك اضبطي الاداء وشيلي كبريائك على جنب خلينا نعمر مستقبلنا جومانا بغيظ ..: هدا اللي بدك ياه .. يلا قولي خلصيني ناديا بفخر ..: اول شي مشي نروح عالكوافير نزبط هالخلقة جومانا بإستغراب ..: لشو الكوافير !؟ ناديا بثقة..: بدك تروحي عندو عالشركة هيك خلقتلك متل المطلوبين للعدالة !؟ جومانا بصدمة ..: اروح عندو !! ناديا بغيظ..: ايــه هلق صارت غبية جومانا: لك ناديا خلص .. ناديا: لازم تروحي عندو وتعتذري واذا لزم الامر .. تترجيه فتحت جومانا عيونها عالاخر ..: اروح عندو واترجاه .. لا ما فشرتي .. اطلعت عليها ناديا من فوق لتحت ..: بلاش لا تروحي ولا تيجي .. خلص حلي عني انا راجعة عالبيت وانت خليكي هون انت وكبريائك .. خليني اشوف كبريائك كيف بدو يعيشيك ملكة .. مشت ناديا تاركة جومانا مصعوقة وراها .. اطلعت جومانا حولها وما لقت ناديا .. مدت نظرها لبعيد وشافت ناديا ماشية وتاركتها .. ركضت لعندها لحتى وصلتلها جومانا : لك استني .. خلص خلص موافقة .. بس سيبك من دور الضحية اللي انا ضيعتلها مستقبلها ابتسمت ناديا بإنتصار ..: يلا مشي معي جومانا : ما رح روح عند الكوافير .. هيك شكلي عاجبني ناديا : بلاش .. تعالي وصلك للشركة جومانا : شو وصلك ما وصلك .. بدك تطلعي معي لعندو .. ما رح روح لحالي .. بدك يستفرد فيني مسكتها من ايدها وسحبتها ..: خلصيني امشي اخدو تاكسي وراحو للشركة نزلو من التاكسي واخدو نظرة طويلة عالمبنى .. كان مبنى ضخم مكون من ثلاث طوابق .. اخدت ناديا نفس ..: يا ربي انا رح اشتغل هون .. يا رب اوعدنا جومانا بغيظ..: لا تعلي سقف طموحاتك .. رح تدربي هون .. البلد بتمر بازمة اقتصادية .. يعني رح يحرثو عليكي بدون مقابل اطلعت عليها ناديا بطرف عينها جومانا : ما حابة خليكي تحلمي كثير سحبتها من ايدها ..: مشي مشي .. تسلميلي انت وهالواقع الزفت اللي عايشة فيه .. كل عمرك عايشة بالروايات هلق على دوري تذكرتي الواقع دخلو للشركة واتوجهو للاستقبال ناديا بثقة ..: مرحبا .. بدنا نقابل المدير الموظفة: اي مدير لو سمحتي؟ ناديا: الاستاذ فؤاد العامري الموظفة: في موعد مسبق .. شو الاسم ؟ تلبكت ناديا ..: لا ما في موعد .. الشي شخصي الموظفة : ما فيكي تقابليه جدول اعمالو مليان ناديا : انت قوليلو جومانا وناديا الموظفة : صعب كثير .. اطلعت جومانا على ناديا بشماتة ..: حمدلله التفتت ناديا للمصعد اللي كان واقف مقابلو موظف .. ابتسمت ناديا نص ابتسامة ..: لا ما حزرتي .. ما فهمت جومانا شو قصد ناديا بكلامها مسكت ناديا ايد جومانا وسحبتها وراها ركض لعند المصعد ودخلو فيه والموظفة ما عم تستوعب اللي عم يصير ولحتى طلبت من الحراس انن يلاحقو البنتين كان المصعد مسكر بابو وتحرك اخدت ناديا نفس ونعمت صوتها ..: استاذ مكتب الاستاذ فؤاد بأي طابق اطلع عليها الموظف من فوق لتحت ..: الثالث .. وقف المصعد عند الطابق الثالث .. اطلعت ناديا عالموظف ..: ممنونة سحبت جومانا من ايدها وبلشت تفتش على مكتب فؤاد واخيراً وصلو لعندو .. اطلعت ناديا على يزن وشافتو قاعد بغرفة مكتبو ومشغول بشوية اوراق سحبت جومانا عالهدا وتسحبت لعند مكتب فؤاد انتبه يزن لحركة قدام مكتب فؤاد وتوجه لعندو بالاثناء دخلت ناديا وجومانا للمكتب ووقفوا يطلعو ببعض رفع فؤاد راسو وشاف البنات قدامو .. ابتسم نص ابتسامة ..: نعم .. كيف فيني ساعدكن؟ اطلعت جومانا على ناديا وعضت عشفايفها بغضب تجاهلتها ناديا وتقدمت لعند مكتب فؤاد ..: كيفك استاذ فؤاد .. انا ناديا وهاي رفيقتي جومانا .. التقينا بمكتب الدكتور رأفت .. انشالله ما تكون نسيتنا ابتسم فؤاد بوقار ..: ايه تذكرتك .. صعب انساكي انت حكى هالكلمتين وعيونو على جومانا اللي دابت بتيابها من نظراتو لاحظت ناديا نظراتو لجومانا ..: يعني استاذ نحنا لسا عند اتفاقنا ؟ بهالوقت دخل يزن لعند فؤاد وشاف البنات عندو يزن : خير فؤاد .. مين الصبايا ؟ فؤاد ولسا نظراتو على جومانا ..: يزن خد الانسة .. ( اطلع على ناديا ) .. شو الاسم انتعشت ناديا ..: ناديا .. اسمي ناديا استاذ .. رجع عيونو على جومانا ..: خد الانسة ناديا وفهمها شغلها يزن بغباء ..: ما فهمت توجهت ناديا لعند يزن ..: تعال يا يزن انا بفهمك مو مشكلة انصدم يزن من كلام ناديا ..: يزن !!!! ناديا بظرافة..: مو مهم استاذ ولا مو استاذ رح نصير زملاء بإذن الله .. مشي الله يرضى عليك قبل ما يغير رايو .. كانت جومانا رح تتحرك مع ناديا ويزن بس صوت فؤاد وقفها ..: على وين يا انسة ؟؟ التفتت عليه بإستغراب ..: على .. قام عن الكرسي وتوجه لعندها ..: لا انت خليكي هون .. يزن تفضل لو سمحت واطلبلي قهوة جومانا : ما بشرب قهوة فؤاد بنفي..: مو الك .. قهوة الي حست جومانا بإحراج وضلت واقفة مكانها طلع يزن وناديا من المكتب وبقيت جومانا وفؤاد فؤاد : شو قلتيلي اسمك !؟ جومانا بغيظ ..: ما قلتلك ! ابتسم فؤاد..: فيكي تقوليلي هلق كزت جومانا على اسنانها ..: جومانا فؤاد: جومانا .. حلو .. بتعرفي يا جومانا شو معنى اسمك ؟ اطلعت عليه بنظرة حادة ..: انا ما جيت لهون لحتى تتعرف على اسمي ومعنى اسمي ابتسم فؤاد نص ابتسامة ..: بعرف .. بس انا بآمن انو الشخص الو من اسمو نصيب .. يعني.. اسم جومانا معناه اللؤلؤ الأبيض او الحجر الكريم والشي النادر .. والظاهر انو انت واسمك ومو زابطين على بعض .. رفعت جومانا حاجبها وحكت بثقة ..: بالعكس .. انا كثير الاسم لابقلي .. متل ما حكيت اللؤلؤ الأبيض يعني قطعة نادرة وغالية جداً .. وانا غالية كتير وما في مني ابداً .. قطعة نادرة واذا انوجدت لازم تتعامل معاملة خاصة للمحافظة عليها .. قرب منها وهمس ..: بضلك حجر ما فيه مشاعر .. نادر او لا ..( وغمزها) جومانا : واضح انك عامل بحث عن معنى اسمي .. يعني متذكرو .. دخل الآذن ومعو فنجان قهوة .. حطو عالطاولة وطلع توجه فؤاد لمكتبو .. حمل الفنجان واخد منو رشفة..: انا بعتذر .. نسيت قلك تفضلي اقعدي جومانا : ما في داعي .. انا جيت لهون ودخلت بطريقة مو حلوة لعندك مع انو حاولو يمنعوني بس مشان شغلة وحدة فؤاد: تفضلي سامعك جومانا بثقة ..: انا كان اسلوبي مو لطيف معك من اول لقاء .. مع انك كنت نبيل بتصرفك معنا وسامحت نادية على الضرر اللي عملتو بسيارتك .. ومع ذلك اصريت على نفس الاسلوب الهجومي معك .. انا جيت اعتذر منك كان رح يقاطعها بس وسكتتو بكلامها ..: انا جاي اعتذر مو مشان الوظيفة او شي .. لا ابداً انا حدا راضي بالقسمة والنصيب وبعد كل هالمواقف واخر شي هلق تأكدت انو ما اللي نصيب بالشغل هون .. بس بترجاك لا تقطع بنصيب رفيقتي ناديا .. هي بحاجة الشغل وبحاجة خبرة اكثر من حاجتها للشغل نفسو .. يا ريت تقبل اعتذاري .. شكراً الك بالاذن كانت رح تمشي ووقفها بكلامو ..: اهم شغلة عنا بالشركة انو نسمع العميل .. وبطريقتك هاي ما رح تقدري تشتغلي هون او بأي شركة ثانية .. انت قدمتي اعتذارك ومن الذوق انك تنطري جوابي يا اقبل اعتذارك يا لا .. اسلوبك كلو بايخ من الاول .. بس انا اعطيت رأفت كلمة وما تعودت اتراجع عن كلمتي .. فيكي تتفضلي لعند يزن وهو رح يدلك على مكتبك انت ورفيقتك .. رح تكونو تحت التدريب شهر وبعدها بنشوف اذا فيكو تكفو معنا ولا لا اطلعت عليه وشافتو على وجهو ابتسامة نصر .. غمزها ..: واحد صفر لالي .. نزل راسو ورجع للاوارق اللي قدامو بدون ما يلتفت عليها ..: تفضلي .. بالتوفيق حست بالاهانة بكلامو بس كانت بحاجة تثبت حالها انها قد المسؤولية بالاخص انها اقنعت اهلها بالعافية انها تتشتغل شدت على شنطتها وطلعت من المكتب وهي عم تشتم حالها رفع فؤاد راسو وتمتم ..: راسك يابس .. بس ومالو .. __ عند يزن اخد ناديا وتوجهو للمكتب الجديد جنب مكتبو وقف بنص المكتب ..: هدا رح يكون مكتبك ومكتب زميلتك .. مجهز بكل شي رح تحتاجو ناديا بفرحة ..: يعني يا يزن انتو كنتو عاميلن حسابنا بكل شي انصدم يزن ..: يزن !!! اطلعت عليه ناديا ..: خلي البساط احمدي متل ما بقولو لي اقلك استاذ وتقلي انسة .. خلص انا موظفة وانت موظف .. ما جاوبتي.. قاطعها : لا .. المكتب مو مخصوص مشانك يا انسة ناديا .. نحنا فتحنا مكاتب جديدة هون بالطابق للموظفين الجدد .. مو مشانك انت بالذات .. رح ينضم للشركة كمان موظفين .. ناديا : مو مشاني والله فكرت مشاني يزن : مين انت لجهز مكتب مشانك .. انت جاي تدربي هون فترة شهر واذا كنتي قد الشغل رح تكملي واذا انشالله ما كنتي رح نطردك بدون ما نتأثر ناديا بثقة ..: لا تخاف رح كون قد الشغل وانشالله باخد مكانك كمان رفع حاجبو قاطع حديثهن وصول جومانا اطلع عيلها يزن وناديا وشافو وجهها ما بيتفسر ناديا : جوج شبك .. بس ما يكون هدا فؤاد حكى معك شي يزن : فؤاد!؟ جومانا : لا ما في شي .. اعتذرت وخلص الامر يزن: تفضلي انسة هون رح يكون مكتبك ورح تكونو تحت التدريب وانا رح كون مسؤول عنكن لنهاية شهر التدريب وبعدها رح تشتغلو مع المهندس سامح .. ايمتى ما بتحبو فيكون تبلشو شغل .. بالتوفيق طلع يزن من المكتب تفتلت ناديا بكل المكتب ..: لك هدا مكتب احلامي .. وهاي شركة احلامي .. حمدلله ما عاد بدي شي تاني من هالدنيا اطلعت ناديا على جومانا وشافتها صافنة بالعدم .. قربت منها ..: لك شبك .. شو صار معك عندو .. احكيلي جومانا ببرود ..: ما شي .. خلينا نرجع عالبيت بلا ما نتأخر .. طلعت جومانا من المكتب ومن الشركة ولحقتها ناديا ناديا: لك عمهل شبك .. تعي احكيلي جومانا: بهدلني بطريقة مؤدبة ضحكت ناديا عليها ..: ايه بتستاهلي .. البهدلة المؤدبة بتوجع اكتر من الضرب موو جومانا بإبتسامة ..: مو ناديا بمسخرة ..: احكيلي بالزبط شو قلك .. خليني شاركك البهدلة حكتلها جومانا كل حرف دار بينها وفؤاد ضحكت ناديا بكل صوتها جومانا : ايه اضحكي اضحكي .. كلو منك .. انت السبب ناديا: وانت ناسية اللي عملتيه .. رجعت تضحك ..: قلتيلي قلك واحد صفر .. وقفت جومانا ..: شو قصدو ناديا: يا جدبة .. واضح انو ما رح توقف عند هاي الشغلة .. هدا الزلمة حطك براسو .. انتبهي منو جومانا : يا ربي شو هالعلقة اطلعت بساعتها ..: يا ربي تأخرت عالبيت هلق ابي بعملي مشكلة .. امشي بسرعة ___ رجعت عالبيت .. كانت الساعة اربعة العصر .. دخلت تتسحب شوي شوي ..: شبك فايتة تسحب!؟ نقزت من الصوت .. اطلعت وراها كانت رائدة ..: خالتي نقزتيني .. وين ابي ؟ ابتسمت رائدة ..: نزل عالقهوة اخدت نفسها براحة ..: اففف طمنتيني .. قربت عليها وحضنتها ..: باركيلي خالة .. توظفت رائدة بفرح ..: ايـــه لا .. هاي بدها زلغروطة .. جومانا : مو مصدقة .. حاسة حالي بحلم رائدة : والله فرحتيني .. يلا فوتي بدلي تيابك بسرعة قبل ما يرجع ابوكي ويعرف انك هلق وصلتي ركضت جومانا لغرفتها وهي اتمتم ..: ما ناقصني يفقسلي فرحتي .. ____ بعد شهر بقاعة كبيرة كان مجتمع فوج التخرج بلباس التخرج اطلعت جومانا على ناديا ومسكت ايدها ..: مو مصدقة .. تعب الاربع سنين خلص .. يا ربي حلمي تحقق صدح صوت بالمايك ..: الخريجة جومانا رمضان السيد .. قامت جومانا وبعيونها دمعة عالقة على طرف عينها .. تقدمت من عميد الجامعة واخدت شهادتها .. صافحتو وصافحت بعدها الموجودين جنبو وقفت قدام الجمهور والكل بسقفلها .. رفعت شهادتها وصارت تلوح فيها وقفت فجأة عن الحركة بعد ما اجت عينها بعين اخر شخص كانت تتوقع حضورو .. استغربت وجودو .. نزلت وقلبها بدق بسرعة .. قعدت جنب ناديا ..: لك هدا شو جابو ناديا بإستغراب ..: مين جومانا : فؤاد العامري .. شفتو هون واجت عيني بعينو قامت ناديا وصارت تفتش عليه بين الموجودين ..: ما في حدا جومانا بإصرار ..: متأكدة شفتو قربت منها وهمستلها ..: ما يكون عاجبك لدرجة صرتي تتخيليه جنبك .. خلص لا تخافي الأسبوع الجاي ما رح يغيب عن عينك جومانا بغيظ ..: اخرسي خلص الاحتفال والكل رجع على بيتو يتبع 🥀🥀..