*أنتيڪآ* 📜 *روايات* *قليلٌ من الوقت مع القصص يساوي حياةٌ بأكملها🤎🕰️* *نشر جميع القصص والروايات 🤎🕰️* *قناة خاصة لمحبي القراءة والقصص* _ *ننشر جميع القصص والروايات*🤎🕰️ *حب 🤎🕰️* *حزن 🤎🕰️* *اكشن🤎🕰️* *رعب🤎🕰️* *تـحـت إشـࢪاف: تـيـم*​​​​​​​​​​​​​​​​​​​​​​​​​​​​📜🤎 *ࢪابـط الـقـنـاة:* https://whatsapp.com/channel/0029VamfKJHK0IBbdBbxOc3d *.#لعنة_الفؤاد🤎* # الجزء_السابع بدبي وعلى طاولة كبيرة بأحد الفنادق .. كان مجتمع فريق عمل شركة العامري مع الوفد الصيني والإيطالي انتهى الاجتماع بتوقيع كل الاطراف على المشاريع .. تجمعوا الوفود مع فريق عمل شركة العامري وتوجهوا للمطعم اللي حجزو فؤاد قعدوا اعضاء الوفد حول الطاولة .. وقفت جومانا ما عارفة حالها وين بدها تقعد .. حست على قبضة ايد انلفت حول معصمها قرب منها وهمس ..: انا ما قلتلك لا تلبسي هالفستان اطلعت عليه بتحدي ..: وانت لي بتحكي معي من الاساس .. مو عامل حالك زعلان وماخد موقف شد ايده على معصمها اكتر ..: الف مرة قلتلك لا تجاوبي على سؤالي بسؤال .. بس لا تعملي شي .. انا بعرف كيف اتصرف. سحبها لعندو اكتر ..: تفضلي اقعدي هون جومانا : ما بدي اقعد جنبك لف ايده على خصرها ..: مشي انحرجت من الناس وقررت ما تكابر معو لانها بتعرفو ما بفرق معو حدا ومستعد يعمل فضيحة اذا كملت بعنادها معو قعدت عالكرسي وقعد جنبها قرب منها وهمس ..: بتمنى الشيطان يوزلك تقومي من جنبي ..لانو اذا وزك شيطانك شيطاني انا رح يشوف شغلو .. وساعتها ما رح اضمن حالي وما رح اعمل حساب أحدا .. رح احملك وحققلك مشاهد رواياتك .. رجف قلبها من تهديدو الصريح والجريء فؤاد بحزم ..؛ ما بتتحركي الا بعد ما العالم كلها تقوم .. لانو اذا تحركتي كل مشاعري رح تتحرك وما رح اعرف اضبط حالي تجاهلت جومانا تهديدو وعملت حالها غبية ..: محسسني انو ما عندن نسوان وبنات وما في غيري القطعة الاخيرة قرب من اذنها وهمس بحب ..: انت اغلى قطعة بنسبة اللي .. وما بهمني حدا غيرك حست بقشعريرة سرت بكل جسما من كلامو .. اطلعت بعيونو البنيات ونظراتو اللي كلها حب .. وحولت نظرها لشفافو االي كانت بتهمس بكلمة وحدة..( بحبك).. لفت وجهها عنو وبلعت ريقها قرب منها وهمس ..: شبك توترتي كنتي عاملة حالك غبية وما فاهمة شي !؟ بدون ما تلتفتلو..: فؤاد اختصر فؤاد بمزاح ..: يسعدلي الخجول .. بعد العشا بنقعد وبنتفاهم ..اعملي حسابك اليوم بدي نحدد مستقبلنا اطلعت عليه بإستغراب هز راسو..: ايه .. لتكوني مفكرة اني شب صغير مراهق .. جومانا: نحنا حكينا بالموضوع فؤاد.. وقلتلك .. قطعت كلامها بعد ما سمعت تنين من الوفود بحكو مع بعض بالروسي .. ..: ( هذا غير منطقي) ..: ( هم قالو لي انها شركة عالمية) ..:( صحيح .. فقط بهذهِ اللحظة ادركت انا الشركة لعرب .. انا لا اصدق اننا سنعمل مع عرب هذا غير جيد) ..: ( انا متأكد من عدم قدرتهم على تسليم المشروع بالوقت المحدد ) اتدخلت جومانا بالحديث ..:( سيدي سيدتي .. هذا غير صحيح .. شركتنا شركة كبيرة وعالمية .. يمكنك الدخول لموقعنا الإلكتروني والاطلاع على جميع مشاريعنا والاطلاع على كل الآراء ، هذه ليست المرة الأولى التي نعمل مع عملاء أجانب) .. ..: (ما هذا انت تتحدثين اللغة الروسية بطلاقة) جومانا : نعم ، أمي من روسيا وأتحدث الروسية بطلاقة ..: مذهل ، رائع أن تجد شخصًا عربيًا يتحدث الروسية .. انها لغة صعبة جومانا: لذا ، كما أخبرتك ، يمكنك البحث عنا عبر الإنترنت ومشاهدة مشاريعنا الكبيرة خارج البلاد مسك فؤاد ايدها وسحبها لعندو ..: شو عم تحكي .. ما عم افهم شي .. جومانا : روسي .. فؤاد: وانت وين تعلمتي الروسي جومانا : امي من روسيا .. ولما كنت سافر عندها كانت تعلمني فؤاد بإستغراب ..: وبتعرفي روسي ! جومانا : ايه .. بعرف احكي روسي منيح .. فؤاد: لاحظي انو لهلق في كتير شغلات ما بعرفها عنك جومانا: وانا كمان .. في كتير اشيا ما بعرفها عنك فؤاد: بس نخلص العشا خلينا نطلع نشرب شي ونحكي جومانا : بلاها .. بعد معنا ثلاث ايام .. ايمتى ما بدك بنطلع فؤاد: بكرا في المؤتمر واللي بعدو في الجولة واللي بعدو عنا اجتماع واللي بعدو في الاحتفال .. انت شايفة انو في مجال !! جومانا : خلص بشوف فؤاد: عم تحسسني اني طالبك ل… سكت وما كمل جملتو جومانا : لا كمل .. شو كنت بدك تقول فؤا بغضب ..: خلص ولا شي .. جومانا بعناد ..: لا قول .. كمل جملتك مسك ايدها بعصبية ..: انت لايمتى بدك تبقي هيك بهالعناد .. خلص .. ما توقفيلي على كل كلمة .. انا بلشت ضوج كزت جومانا على اسنانها ..: وبدك مني ارتبط فيك .. سحبت الفوطة عن رجليها ورمتها عالطاولة قدام نظر الجميع قامت من مكانها بعصبية ..: انا شبعت .. تصبح على خير .. حملت حالها وطلعت من المطعم .. اخدت تاكسي رجعت للفندق بقي قاعد مكانو وبراكين شاعلة بداخلو .. اطلع بالوفد وابتسم بود وكمل احاديثو .. ___ دخلت لجناحها بالفندق والعصبية بتطاير من عيونها .. رمت الكندرة من رجلها وصارت اتمتمت ..: ما في يختم لحظة متل البشر .. قلب عليي الطاولة بلحظة .. همجي متخلف لا يطاق .. رمت الجزدان من ايدها بعصبية ..: هدا كيف بدي قضي معو حياتي صفنت شوي ..: بقولو البنت بتاخد متل ابوها .. ولي لو هالحكي صحيح .. اخد متل ابي .. لالالا .. لازم عيد ترتيب اموري .. لازم انهي هالعلاقة انا ناقصني امراض نفسية .. توجهت لشنطتها طالعت بيجامة بناتية وتوجهت للحمام وقفت تحت الدوش لتريح اعصابها ما كانت حاسة بالوقت وما عرفت قدي قضت وقت تحت المي .. فتحت عيونها على صوت نقرات على باب الجناح كزت على اسنانها وتمتمت ..: اكيد هاي ناديا المتخلفة .. ضيعت كرت الغرفة متل العادة .. اساساً ما بتكون ناديا اذا ما ضيعتو .. صرخت بكل صوتها ..: لحظة ست ناديا .. انا بالحمام .. لبست البنطلون وحاولت تلبس بلوزة البيجامة بسرعة دخلت ايد وحدة وطلعت مستعجلة فتحت الباب بقوة .. بس ما كان في حدا .. ابتسمت ببلاها ..: شتمت ناديا عالفاضي .. طلعت مظلومة .. هدا اكيد حدا من خدمة الغرف .. سكرت الباب ولبست الايد التانية وتركتها مفتوحة .. ولفت حالها تمسمرت مكانها لما شافتو قاعد عالكنبة بنص الغرفة .. شدت البلوزة على جسمها لتغطيه ..: انت شو عن تعمل هون قام من مكانو وقرب لعندها بهدوء ..: قلت لنصفي حساباتنا هون لوحدنا .. بلا ما نفرجي العالم على حالنا .. شدت البلوزة اكتر ..: اطلع من الغرفة .. بلا ما يشوفك حدا هون قرب منها اكتر بخطوات ثابتة..: انت عاشقة للروايات .. وانا حابب حققلك قسم من مشاهد هالروايات تراجعت كم خطوة لورا ..: انت شو عم تخبص .. فؤاد لا تجن مو من مصلحتك اللي عم تعملو قرب منها اكتر ..: مو هيك بصير بالروايات .. البطل بكون زعلان من البطلة بس طبعاً كبريائها ما بسمحلها تراضيه .. فهو بعمل بأصلو وبروح يراضيها واكيد بدو يراضي نفسو .. اطلع عليها بخباثة ..: البطل بقرب من البطلة لحتى توصل للحيط ويحاصرها بإيديه وما بعود عندها مجال تهرب حط ايديه على كتافها فجأة واطلع خلفها ..: بس المسافة طويلة لنصل الحيط سحبها للحيط اللي جنبو ووقفها وحاصرها بإيديه ..قرب عليها لصار جسمو قريب من جسمها وهمس ..: بقرب منها لدرجة انفاسن بتختلط .. ودقات قلب البطلة بتصير مليون .. قرب وجهو منها وما عاد في فاصل بين شفافو وشفافها .. حط ايدو على رقبتها .. سرت رعشة بكل جسمها .. كان قريب منها بشكل كبير همست وهي مخدرة بين ايده ..: فؤاد.. فؤاد بحب ..: هيك تماماً.. بقرب البطل وبسرق بوسة من شفافها كان نفسو فيها من اول الرواية .. سيطر التوتر عليها .. صدرها عم يعلى وينزل .. انفاسها تخربطت ما عاد طلع معها الكلام وكانت متل المخدرة ومو حاسة عشي همس ..: بتتوتر البطلة وبتستسلم لللحظة متلك تماماً ..ببوس البطل البطلة وكل القراء بتفرح .. بس انا ما رح كملك المشهد للاخر . اطلعت عليه باستغراب بعد ما شافت ابتسامة خباثة على شفافو . بعد عنا ورجع قعد للكنبة .. تاركها وراه بصدمتها حط رجل على رجل ..: تعي تعي .. ما رح اعمل شي .. ضحك بخباثة..: شبك تجمدتي .. بس ما تكوني حابة كمل المشهد للاخر .. تعي حبيبتي .. جبلك مي لتروقي كزت على اسنانها وشدت االبلوزة عجسمها ..: قوم اطلع من هون بسرعة .. ما بدي شوف وجهك من اليوم ورايح.. وانا هلق راجعة عالبلد قام من مكانو وتوجه لعندها ولسا نفس الابتسامة عوجهو ..: خلص بعتذر .. المرة الجاي بكمل المشهد .. ما رح اقطع الحبل فيكي بنص الطريق ضربتو عصدو بغضب ..: روح من وجهي .. واحد متلك عايش بالروايات مو انا لف ايدو على خصرها..: من وراكي صرت اقرأ روايات .. تعي بنعمل مشهد تاني قرأتو الليلة الماضية دفشتو عنها ..: بعد عني لا تدقرني فؤاد بمزاح .. : خلص تعي بمزح معك انا اسف .. ما رح عيدها .. سحبها من خصرها وقعدها عالكنبة وقعد جنبها ..: شو هدا اللي عملتيه بالمطعم .. هاي تصرفات موظفة نجيبة !! جومانا بغصب ..: فؤاد لا تبلش .. انت انسان مستفز وبارد فؤاد : بدك كون عصبي يعني .. لك انا اذا بعصب عليكي ما بتعودي تتحمليني دقيقة.. وبعدين كم مرة قلتلك افصلي بين الشغل وعلاقتنا .. من ورا عصبيتك نزعتي العشاء حست بغلطها ..: بعتذر .. اخر مرة وعد .. فؤاد: هلق نرجع لفؤاد وجوج مو المدير والموظفة .. اشتقتيلي مو بعدت ايده عنها ..: بعد عني لا تدقرني .. وقوم من هون ..روح لغرفتك هلق بترجع ناديا وبتشوفنا هيك فؤاد : ما رح ترجع هلق .. جومانا : يعني متفق معها .. تمام حسابها عندي فؤاد: اتركينا منها .. ما قلتيلي .. هدول الجوز الروس شو كانو يحكو .. جومانا : قالو انن ما كانو يعرفو انو الشركة لعرب .. ولو كانو بيعرفو ما كانو وقعوا العقد .. فؤاد: لي ما قلتيلن انه هلق عرفنا ولو عرفت من قبل ما كنت وقعت معن من الاساس .. لازم لاقي حل حتى لو بدي الغي العقد جومانا : صرنا ماضيين العقد .. وهاي الصفقة كنا ناطرينها من زمان .. واذا صار ولغينا العقد في شرط جزائي كبير .. وميزانية الشركة ما بتتحمل الشرط شبك ايديه ببعض ..: انا كان ناقصني .. هاي صفقة بملايين ورح ترفع اسمه الشركة كتير حطت ايدها على ايدو ..: اهدا حبيبي .. رح تمرق .. واذا بدن يفسخوا العقد يفسخوا هنن رح يدفعوا الشرط الجزائي بس بتضل مشكلة الخسائر .. اطلع فؤاد من الشباك حطت ايدها على خدو .. : اترك الموضوع عليي .. مع انه بفكر نكمل المشروع .. هدول بس مساهمين لا اكثر .. اطلع عليها بإستغراب ..: هلق انت امك روسية جد جومانا بمقاطعة ..: ايه .. امي روسية فؤاد : وكيف تزوجت ابوكي جومانا : التقوا بالبلاد عنا لما امي كانت مع وفد حقوق الانسان بزيارة لضيعة ابي .. وتعرفت عليه وتزوجو .. لا تسألني كيف بس هدا اللي صار .. وانتقلو للمدينة بس امي ما تحملت العيشة هون وانفصلو بعد ولادتي بكم سنة .. وكان شرط ابي للانفصال انها ما تاخدنا معها انا واخي .. وهي وافقت .. كانت بالاول تيجي زيارات لتشوفنا وبس كبرنا صرنا نروح انا واخي بالصيف عندها .. يعني بالسنة مرة .. هز راسو وما حكى اطلعت عليه ..: لي الموضوع مهم لنحكي فيه فؤاد: لا ما مهم .. بس جد انا ما بعرف عنك شي حطت ايدها على وجهو ولفتو لعندها ..: وهيك موضوع هالقد مهم لنحكي فيه .. شو بهم امي مين وابي مين .. مو المهم انا مين وشو مشاعري اتجاهك فؤاد: اكيد هدا المهم .. هلق نرجع للمهم .. ايمتى بدنا ناخد خطوة جديدة بعلاقتنا .. انا ما بناسبني هالوضع ..وعلاقات المراهقين ما بتناسبني .. اطلعت جومانا فيه وقاطعتو ..: وانا مو صغيرة كمان.. وانت هلق قلت بعظمة لسانك انك لسا ما بتعرف عني شي .. وانا ما بعرف عنك شي .. الشي صعب .. لسا بدنا وقت لنعرف بعض فؤاد: انا ما قلت نتزوج بالوقت الحالي .. ممكن يكون فترة خطوبة انت بتحددي مدتها .. انا ما بناسبني شغل الحرامية .. اطلع معك بدون علم اهلك ولازم تكذبي مشان تروحي لاجتماع او سهرة او حتى عشا عمل جومانا بمقاطعة..: مين حكى هيك .. انا مبسوطة بحياتي وبحب التحديات حتى لو بدها تسببلي مشاكل .. فؤاد .. انا مو مستعدة بالوقت الحالي فؤد بإستغراب : شو يعني مو مستعدة !! جومانا : يعني مو مستعدة ، انا ما بدي لا خطبة ولا زواج بالوقت الحالي التفت عليها وعيونو كلها شك ..: شو يعني مو مستعدة لسا ما فهمت!! جومانا بكل حزم..: فؤاد انا بحبك كتير .. لااا انا بعشقك .. بس انا مو مستعدة لهيك خطوة فؤاد ؛ لسا ما فهمت ! جومانا : فكرة الارتباط والزواج مأجلة حالياً وماني مفكرة فيها بالوقت الحالي .. وانا عندي طموح وبدي اتقدم بشغلي اكثر.. لسا في قدامي طريق طويل وعندي احلام واهداف بدي حققها وفكرة اني اتزوج رح تعطلني عن كتير شغلات .. بالعربي الزواج مو هدف من اهدافي الحالية فؤاد: وعلاقتنا تحت اي مُسمى بدك ياها تكون سكتت وما عرفت شو تجاوب فؤاد: لو سمحتي تجاوبيني !!! التفتت عليه ..: ما بدي تزعل مني .. بس انا حالياً مو مستعدة لاعطي اسم لعلاقتنا .. نحنا بحاجة وقت كتير كبير لحتى نقرر .. نحنا يا دوب بنعرف بعض من كم شهر .. وهاي الاشهر غير كافية لحتى قرر ارتبط باي شخص كان .. انا حابة اتعرف عليك اكتر واكتشف شخصيتك اكتر .. فؤاد بنفاذ صبر ..: أيــــه بلشنا شغل محاضرات جومانا : لا مو محاضرات .. بس هدا من حقي .. انا لليوم ما بعرف اهلك .. لليوم ما بعرف لي رجعت عالبلد ولي كنت برا اساساً ..كل حياتك غامضة .. هدا طبيعي بالنسبة الك.. لك لسا ما بعرف شوفي نقاط مشتركة بينا .. ما بعرف شو بتحب شو بتكره ..انت اليوم انصدمت لما عرفت انو امي روسية .. لك نحنا ما في لقاء بينا بنتهي بخير وسلامة .. لازم بعد كل لقاء يكون مشكلة ما ضوا عندك ضو احمر .. مانك حاسس انو في شي مو زابط .. واهم شي انا ما بقبل على حالي يقولو عني بالشركة دخلت موظفة بالواسطة للشركة واول شي عملتو رسمت على مديري فؤاد بقهر..: الخلاصة؟ جومانا بحزم ..: مو جاهزة ولا رح كون جاهزة بالوقت القريب .. وحالياً ما فيني اعطي اسم لعلاقتنا ..وما بعرف شو هاي العلاقة.. تمام بتحبني وبحبك بس ما بعرف .. .. اطلع عليها فؤاد بدون ولا كلمة ..وقف ورتب تيابو جومانا : وين .. عم نحكي فؤاد بكل هدوء عكس النار يلي بقلبو ..: انت معك حق بكل كلمة حكتيها .. انا اسف .. كأني تماديت معك زيادة .. توجه للباب وطلع من الجناح تسطحت عالتخت وحاسة بثقل على صدرها .. دايماً كانت هيك .. تدعس على كل شي لحتى توصل لهدفها .. بس هالمرة دعست على قلبها وقلب فؤاد كانت سرحانة وصافنة بالسقف دخلت ناديا للغرفة وشافتها عوضعها ناديا: مسا الخير بقيت جومانا عوضعها .. ولسا عيونها مسلطة عالسقف ..:كيف بتعطي فؤاد كارت الغرفة وبتسمحيلو يدخل لهون ناديا بفضول ..: شبك.. عملك شي صفنت شوي ..: اتقدملي للزواج توجهت ناديا لعندها .. مسكت ايدها اليمين وصارت تقلب فيها كأنها عم تفتش عشي جومانا: شبك ؟ ناديا : وينو ؟؟؟؟ جومانا بإستغراب ..: شو هو ؟ ناديا ؛ خانم الزواج .. ما تكوني حطتيه بالشنطة .. بتعمليها جومانا بقهر ..: ما وافقت ظهرت علامات الاستفهام على وجه ناديا ..: شو ما وافقتي جومانا : مو مستعدة هزت راس جومانا ..: انت في شي براسك .. ؟ جومانا بغضب..: خلص ناديا قفلي عالسيرة.. ما بدي احكي بالموضوع .. لسا مو جاهزة وخلص ناديا : لتكوني بتتسلي عصبت جومانا ..: ناديا اختصري وروحي نامي .. انا مو فاضية لهاي المسخرة ناديا : حُبك لفؤاد مسخرة .. زورتها جومانا ناديا : انت حرة .. بعتذر جومانا : بالزبط .. انا حُرة 🥀🥀.. بــــــاك. ..🥀🥀 قربت منو بهدوء .. حطت ايدها على وجهو ونفس الابتسامة عشفافها .. : فؤاد .. هدا انت .. نزلت ايدها عن وجهو وحطتها على صدرو .. تحسست جسمو وابتسامة امل على وجهها شقت دربها من بين الكدامات .. توسعوا عيونو ودخل بصدمة قوية .. حبيبتو واقفة قدام عيونو بهالحالة .. حبيبتو اليوم زوجة اخوه رجفوا اطرافه وعقلو وقف عن التفكير .. كيف وليش .. ليش هي بالذات .. ركز بملامحها التعبانة والكدامات على وجهها والدم النازل من شفافها غمض عيونو بقهر .. اطلعت عليه اخر نظرة .. قلبت عيونها ووقعت عالارض مغمى عليها .. ___ بغرفة فارغة باردة .. كانت نايمة عالتخت مثل الملاك .. شعرها مفرود على المخدة وجسمها موصل بالاجهزة .. بلشت تفتح عيونها بتعب .. اخد معها شوي وقت لحتى استوعبت وين هي .. التفتت حولها وما كان حدا بالغرفة .. اتذكرت اخر مشهد شافتو قبل ما يغمى عليها .. فؤاد.. استغفرت كثير .. لامت حالها كتير .. كيف هي ست متزوجة وبتفكر وبتحلم بحبيبها السابق .. بقيت تستغفر لحتى دخلت الممرضة قربت منها الممرضة: صحيتي مدام .. لحظة لخبر الدكتورة .. بعد شوي دخلت الدكتورة وفحصت مؤشراتها الحيوية وطلعت بعد دقايق انفتح الباب اطلعت على الباب وشافتو قبالها .. كانت صدمتها قوية .. استجمعت قوتها وحاولت ترفع حالها .. : لك انت شو جابك لهون .. ؟؟ قرب منها واطلع عليها بأسف ..: انا بعتذر منك .. ما كنت بتمنى شوفك بهاي الحالة .. جومانا بهجومية..: روح من هون .. رح تسببلي مشكلة .. اذا دخل زوجي وشافك هون رح يعملي مصيبة .. روح من هون .. اطلع برا .. قرب منها اكثر وحط ايده على ايدها ..: جومانا اهدي .. انا هون مشانك دفشت ايده عن ايدها ..: انت مجنون كيف بتلمسني … انا ست متزوجة حكى بنبرة كلها حزن ..: بعرف .. حسن بكون اخي نزلت كلماتو على مسامعها متل الصاعقة ..تحجرت الدموع بعيونها ..: انت شو بتخبص .. استرجعت الاحداث براسها .. واستوعبت اخيراً انها اللي شافتو ما كان منام .. اللي شافتو كان واقع مر .. اخو زوجها اللي استنجدت فيه بكون فؤاد فؤاد: خلص اهدي .. انا عرفت باللي عملو حسن .. ورح ساعدك .. حطت ايديها على رقبتها وصرخت بهستيريا.: كان رح يموتني .. صرخت بكل صوتها ..: اطلع برا .. اطلع برا تفهم فؤاد وضعها وطلع من الغرفة .. توجه لغرفة الدكتورة لحتى يطمن على وضعها فؤاد: طمنيني دكتورة الدكتورة: وضعها كثير صعب .. متعرضة لتعنيف جسدي .. اعتداء جنسي ادى الى تهتك بجدار الرحم .. واضح انو اعتداء جنسي من مدة طويلة.. قدرنا نحافظ عالجنين بس رح تكون بفترة الحمل بمتابعة خاصة واكيد ولادة مبكرة.. لازم راحة تامة.. انا قدمت تقرير للشرطة توسعت عيونو بس سمع كلمة اعتداء جنسي .. كان عارف ومتوقع حقد امو واخو يسطر على عقلهن بس توصل لاعتداء جنسي تمالك حالو وحكى بنبرة هادية : دكتورة خلينا نأجل موضوع الشرطة حالياً الدكتورة بإمتناع ..: انا ما فيي اتحمل هيك مسؤولية .. من العلامات اللي على رقبتها وكل جسمها واضح انها محاولة قتل .. بعتذر منك .. تفهم فؤاد الوضع ..: يعطيكي العافية دكتورة طلع من عندها ومن المشفى كلو ركب سيارتو وانطلق وصل الفيلا ونزل منها متل الاعصار .. دخل للصالة وشاف امه قاعدة عالكنبة ولافة راسها اطلع عليها ..: هيك انت مبسوطة امي .. رفعت عيونها ..: وين اخوك ابتسم بإستهزاء ..: والله ما بعرف .. اسألي حالك .. هيك انت مرتاحة بعد اللي عملتي انت واخي حسن .. هلق انت هيك اخدتي بتار هديل .. وقفت على رجليها وعيونها بنقطو سم ..: اسمعني منيح .. اخوك بترجعو للبيت .. وبنت الكلب بترميها بأول حاوية بتشوفها فؤاد: لا ما رح يطلع بإيدي ارجعو صراحة .. اسمو صار عند الشرطة وبأي لحظة رح يمسكوه .. قرب منها …: عم تعملي منو نسخة طبق الأصل من اخو مرتو اللي قتل هديل .. هيام بصراخ ..: اخرس وصوتك ما بدي اسمعو فؤاد: هاي الحقيقة امي .. شبعتي حسن حقد وطلعو على مرتو اللي ما الها ذنب بشي .. يلا روحي استعطفيها وتوسليلها .. شوفي اذا بتعفي عنو التفت لابوه ..: انا كنت بقبل أي شي .. بس انه انت يا ابي تكون موجود وساكت عن هاي المهزلة اللي عم تصير .. يا.. سكت بعد ما شاف ابوه نزل راسه بخجل قربت هيام منو اكتر ومسكتو من ياقة القميص ..: بدك ترجعلي ابني .. فاهم عليي ابني رح يرجع نزل ايديها عنو وطلع من الصالة ومن البيت كله ركب سيارته واطلق مشى كتير بلا هدف ولا وجهة .. نار وشاعلة بصدرو .. احاسيس مخربطة .. بقي ماشي لوصل لمكان بعيد عن المدينة عالجبل وقف السيارة ونزل منها سلط نظرو بالعدم .. ..🥀🥀.. فــــــــلاش بــــــاك..🥀🥀.. بعد اسبوع من سفرو لامستردام كان قاعد بمكتبو .. بإيدو ورق لمخطوطات عم ويقارنها بالممخطوطات عن اللابتوب .. رن تلفونو ترك الاوراق وجاوب ..: اهلا يزن .. كيفك وكيف الشغل يزن : انا تمام والشغل تمام حمدلله .. المهم انت كيفك فؤاد: بخير نشكر الله .. حكو بكل امور الشغل يزن : بدك شي .. عاوز شي .. قلي لا تخجل فؤاد بقهر ..: انتبه عالشركة .. يزن: ما بدك شي تاني فؤاد بإرتباك …: بدي اسألك سؤال يزن: قول فؤاد : كيف الموظفين ؟ ضحك يزن ..: حابب تسأل عن موظفة معينة او موظف معين ؟ فؤاد بعصبية ..: اختصر يزن: صراحة ما بعرف فؤاد:كيف ما بتعرف يعني ؟ يرن: من اسبوعين او ثلاث ما داومت .. من وقت ما رجعنا من دبي ما رجعت عالدوام .. ما شفتها فؤاد: اجازة يعني ؟ يزن : ما بعرف .. متل ما بتعرف انا كنت برا البلد من بعد سفرة دبي ..ولما رجعت قالو انها ما رجعت داومت ابداً وما حد بعرف عنها شي فؤاد: ورفيقتها اللي كانت معها شو كان اسمها يزن: ناديا فؤاد: ايه ناديا .. ما سألتها عنها .. اكيد بتعرف يزن بنفي ..: ما بتعرف هي كمان .. لي بتسال انت ما بتحكي معها .. فؤاد: ما بعرف شو صار .. كان اخر لقاء مو لطيف وبعدها افترقنا وصار اللي صار .. وما عاد تحاكينا يزن: انا هلق بشوف وبردلك خبر فؤاد؛ لا تشد ايدك . .. يلا بحاكيك .. سلام سكر التلفون مع يزن بدون ما يسمع ردو وعمل تلفون تاني .. : كيفك .. رح ابعتلك اسم وعنوان .. شوفلي شغلك.. بعت اسمها كامل والعنوان.. كز على اسنانو ..: هيك يعني يا خانوم .. اعملي وكتري.. شرب فنجان القهوة وكمل شغل . _____ تاني يوم صحي على رنة التلفون فتح نص عين وشاف اسم المتصل جلّس قعدتو ورد ..: ايه شو صار معك .. عالطرف التاني ..: كل الحارة بقولو تركو البيت من فترة فؤاد: شو يعني تركو البيت .. وين راحوا عالطرف التاني: بقولو رجعوا للضيعة .. ما حدا عارف شي .. فجأة تركوا البيت ومحدا بعرف عنن شي .. بس في واحد كان يشتغل عند اخوها بقول انو البنت تزوجت لواحد من الضيعة قرابة لالها … سكت وما رد عالطرف التاني : معلم انت معي.. فؤاد: معك عالطرف التاني : انا بطريقي للضيعة لاعرف لمين تزوجت وجيب كل اخبارها فؤاد: لا .. ما في داعي .. خلص ارجع عالمدينة .. قفل الخط ونزل تللفونو ..: تزوجت .. ابتسم بمسخرة ..: وكانت سايقة الطموح عليي .. يلا بالتوفيق .. حاول يكابر على حالو كأنو ما صار شي .. قام عن التخت وتوجه للحمام .. اطلع عإنعكاس صورتو .. مسح على دقنو وابتسم … تزوجتي يا جومانا .. دخل اخد دوش ورجع للتخت اخد تلفونو وقلب بالرسائل .. وصل للرسالة اللي بفتش عليها فتحها وقرأها مرة وتنين وتلاثة (تعال خدني .. رح يجوزوني .. تعال خدني ونهرب سوا ) تمتم : معقول غصبوها لتتزوج .. ضحك بقهر ..: جومانا بغصبوها .. لي بعتتلي .. لي ما هربت لحالها شو كانت ناطرة مني موافقة يعني بلش الغضب يظهر على ملامحو وبانت عروقو .. شد عالتلفون وضربو بالارض ..🥀🥀بـــــــــــاك🥀🥀.. .. ضرب رجلو بدولاب السيارة وصرخ بكل صوتو ..: غبي .. غبي .. انت السبب .. دايماً كنت انت السبب .. انت اللي هربت .. عندك الهروب اسهل طريق لحل مشاكلك .. كلو صار بسببك .. ما بتعرف تحل مشاكلك بالعقل .. وما بتتعلم من اخطائك .. سند حالو عالسيارة وصفن بالعدم ..: هلق انت هيك مبسوط .. مبسوط بإنجازاتك اللي عملتها .. كل شي راح بسببك .. لك حتى اختك دلولتك الصغيرة اللي كانت مالية عليك حياتك راحت .. تركتها وهي بأمس الحاجة الك بسبب هروبك من واقعك .. بتستاهل اكتر من هيك .. شد على راسو وصرخ بقهر ووجع ____ ثاني يوم دخل فؤاد لغرفة جومانا كانت نايمة .. دخل بهدوء حط الاكياس اللي بإيده عالطاولة وقعد اطلع عليها وشاف وجهها مليان كدمات وعلامات زرقة .. وعلامات على رقبتها .. شعر بأحاسيس مختلطة .. غضب وسخط على نفسو .. وشفقة واسف عليها مرق بمخيلتو ذكرياتو معها .. كيف كانت وكيف صارت .. طلع من ذكرياتو على انين واضح من جومانا كانت تتألم بسرعة قام ورن الجرس اجت الممرضة فؤاد: عم تتوجع كثير .. اعطتها الممرضة ابرة مسكن بالسيروم وطلعت فتحت جومانا عيونها وشافتو فوق راسها ..: انت شو رجعك فؤاد: الشرطة برا حست جومانا انو طاقة القدر انفتحتلها فؤاد برجاء ..: بترجاكي جومانا .. اخي بقسم الشرطة .. الدكتورة قدمت تقرير بحالتك للشرطة لحتى تخلي مسؤوليتها .. بترجاكي جومانا بعدم فهم ..: وشو المطلوب مني .. اخوك لازم يتعاقب فؤاد برجاء …: بترجاكي .. بوعدك ما رح خليه يرجع يمد ايده عليكي .. بوعدك .. رح احميكي منو ومن اي حدا جومانا بغضب ..: بدك اسقط حقي مشان ما يعرفو انو بتعاطي مو هيك قرب منها وحط ايدو على تمها ..: مشان الله جومانا .. امي بتروح فيها اذا اخدوه شالت ايدو عن تمها ومسكتها بقوة والدموع بعيونها..: وانا .. مو حرام فؤاد برجاء..: بوعدك .. حاولت كتير ترفض طلبو بس رجائو كان اقوى فؤاد : شو قلتي .. رح تتنازلي جومانا : بس !! فؤاد: بوعدك .. نزلت راسها وهي عارفة انه ما في قدامها حل غير تصدقو .. دخل لعندها الشرطي وتنازلت عن حقها فؤاد : بتشكرك كثير .. جومانا بخوف ..: رح يرجع عالبيت ؟ فؤاد : اهدي ولا تخافي .. رح يبعدوه عن البيت شهر او شهرين .. جومانا بإرتياح ..: حمدلله فؤاد: بدي منك تنتبهي عحالك بهاي الفترة منيح .. جبتلك معي اكل وعصير لحتى تتغذي لفت راسها للجهة التانية ..: ماني جوعاني فؤاد: لازم تنتبهي عحالك وعلى غذائك .. انت من هلق مسؤولة عن الجنين اللي ببطنك وقعت هالكلمتين على مسامعها متل الصاعقة… اطلعت عليه برجاء وكانها بتطلب منو يكذب الكلمتين الاخيرات اللي سمعتن .. : لا مشان الله .. انت شو بتخبص .. انا حامل ..لا كذب .. لا لا يا ربي .. ما لازم احمل .. لا ما بدي شي يربطني فيه فؤاد : هدا روح.. جومانا بقهر شديد..: وانا مو روح .. كل العذاب اللي عم يصيرلي مو حرام .. عم بتعاقب على ذنب ما عملتو .. اخوك بعذبني كل يوم كل ليلة وانا ما اللي ذنب .. مفكر انو رح يعاقب اخي واهلي .. قلو انو اهلي عايشيين حياة عادية وما حدا مهتم لشو بصيرلي .. ماحدا عم بذوق العذاب غيري.. مفكر هيك يرجع حق اختك نزلو دموعها بحرقة على خدها وجعت قلبو عليها .. قرب منها واخدها بحضنو وعيت على حالها وهو ضاممها لصدرو .. دفشتو بكل قوتها وصرخت فيه..: انت مجنون .. كيف بتضمني هيك..بعد عني استوعب فؤاد الغلط اللي عملو ..: خلص بعتذر .. اهدي رفعت اصبعها بوجهو ..: لا تسمح لمخيلتك ترسملك اني ضعيفة وممكن اقبل بأي وضع مريب .. غمض عيونو بقهر ..: رح اتركك ترتاحي .. انتبهي عحالك ولا تعملي شي يغضب ربك طلع من الغرفة تارك وراه جومانا تلملم جراحها اللي سببتلها ياه هاي الحياة الصعبة .. ____ بعد ثلاث أيام صحيت من النوم وكان قلبها ناقزها .. حاسة في صخرة كبيرة على صدرها دخلت لعندها الدكتورة ..: كيفك اليوم جومانا بتعب ..: نشكر الله الدكتورة بروتينية ..: رح اكتبلك خروج اليوم .. لازم تنتبهي على حالك .. حسب كلام طبيبة النساء وضع الجنين مو مستقر تماماً وكتبتلك على مثبتات حمل .. لازم راحة تامة.. جومانا : شكراً دكتورة كانت رح تطلع من الغرفة بس رجعت ..: ما كان لازم تتنازلي عن حقك .. اذا مو مشانك مشان ابنك اللي ببطنك ..كان لازم تفكري فيه كيف بدو يجيي على هالدنيا وعندو اب متل هيك .. بلشت جومانا تشهق وتبكي بحرقة .. قربت منها الدكتورة ..: انا اسفة ما كان قصدي .. عارفة انو ضغطوا عليكي .. لا تزعلي مني .. هدتها الدكتورة .. طلعت كرت من جاكيتها ..: هدا كرتي وفي ارقامي اذا بدك اي مساعدة انا جاهزة غمضت جومانا عيونها وغرقت بالامها… ____ بعد دقايق دخل لعندها فؤاد عالغرفة قرب من التخت وشافها سارحة بالسقف وايدها بتحسس على بطنها .. وقف شوي يطلع عليها وعلى ملامحها التعبانة فؤاد: تصريح الخروج جاهز .. انت جاهزة اطلعت عليه بعتب ..: رح تاخدني بإيدك للقبر كمان مرة فؤاد: انا وعدتك جومانا .. ما رح اسمح لحدا يأذيكي .. جومانا : رح تمنع امك من ضربي واهانتي كمان غمض عيونو بقهر …: خلينا نمشي .. جومانا : حسن اذا شافني رح يرجع يضربني فؤاد: حالياً ما رح تشوفيه .. ما رح يتواجد بالبيت.. الشرطة ابعدتو عن البيت شهرين .. واذا رجع لا تخافي انا موجود ضحكوا عيونها بدون ما تحس وكأنها ربحت جائزة تقدم منها ومد ايده ..: قومي اساعدك رفعت حالها وقامت ..: مو بحاجة مساعدة من حدا وقفت بتعب مد ايده التانية ..: هاي تياب جبتلك ياها .. انا برا خدي راحتك طلع من الغرفة وطلب من الممرضة تدخل تساعدها بعد دقايق طلعت __ بالسيارة كانت ساندة راسها عالشباك وسارحة بالعدم .. بدون مقدمات ووعي نطقت ..: لي ما كنت انت مكان اخوك اطلع عليها بإستغراب رفعت راسها ووجهت نظرها عليه ..: انت الكبير صح.. المفروض انت تتزوجني .. لي ما كنت مكان اخوك .. كان ممكن نكون عايشين مع بعض حياة حلوة وتاركين كل الدنيا وبنحقق احلامنا حس بقشعريرة سرت بجسمو فجأة صارت تبكي بهستيريا ..: شو هالتخابيص .. شو هدا .. فؤاد بتوتر ..: جومانا اهدي مشان الله .. بكفي جومانا بهستيريا ..: انا عم موت ومحد حاسس فيني .. تعبت ..تعبت.. ما عاد عندي قدرة اتحمل .. انا بشر .. غمض عيونو بقهر عليها .. ما قادر يعمل شي ولا عارف كيف رح يتصرف .. بعد وقت وصلو البيت .. نزلوا من السيارة ودخلوا .. استقبلتن ام فؤاد..: شرفتي ست الحُسن .. وجهت نظرها لفؤاد..: هيك انت مبسوط .. اخوك بالسجن وهالكلبة هون اطلعت عليها جومانا بحقد ..: لو ما ابنك توسلي كان ما تنازلت .. احمدي ربك بس شهرين كانت رح تضربها بس فؤاد مسك ايدها ..: امي .. اطلعت عليه بصدمة ..: بتدافع عنها يا ابن بطني .. وجه كلامو لجومانا : روحي لغرفتك ارتاحي اطلعت عليها جومانا بنظرة نصر بمعنى صار اللي ظهر بهالبيت وما عاد حد يقدر يتمادى معها هيام : عم تحاميلها يا فؤاد فؤاد: امي شو سبب زواج حسن منها وتنازلك عن حق اختي .. مو لحتى يختلط الدم .. زوجة اخي حامل .. ولازم .. قاطعتو بحدة ..: شو ما تكون .. ما في شي بشفعلها .. تركتو واقف وتوجهت للمطبخ مسح على وجهو بتعب وتوجه لغرفتو ____ بعد شهر وقف سيارتو قدام الفيلا .. اطلع جنبو على البنت الفليبنية اللي كانت جنبو ..: يلا انزلي نزل من السيارة ووراه البنت .. دخل للصالة .. اطلعت عليه هيام وعلى البنت اللي معو ..: فؤاد مين هاي ؟ فؤاد: هاي سونا .. جبتها لتساعدك بالبيت هيام : نعم .. وانا ايمتى قلتلك اني بحاجة لخدامة فؤاد : مرت اخي حامل .. ولازم ترتاح قاطعتو بحدة..: القطط بتحمل وبتخلف .. شو مرت اخوك معجزة انها حامل يعني حط مدحت ايده على ايدها ..: خلص هيام .. فؤاد معو حق .. البنت لازم ترتاح .. اذا مو مشانها .. مشان حفيدك اللي ببطنها فؤاد: سونا .. المطبخ من هون .. اعمليلي فنجان قهوة وجبيه لغرفتي.. بالطابق الثاني اخر الممر سونا بعربي مكسر ..: حاضر بابا تقدم فؤاد لنص الصالة ووجه كلامو لامو بشكل واضح وصريح ..: امي .. حسن شهر ورح يرجع للبيت .. ان شاء الله يكون هدا درس لالو لحتى ما يرجع يضرب مرتو .. قاطعتو هيام ..: شو يا عيون امك .. مين عينك محامي دفاع عن الخانوم!! فؤاد : مو محامي ولا شي .. البنت طلعت من بيتها لبيتنا غصب عنها .. وتحملت ذنب مو ذنبها .. وحملت خطيئة ما الها علاقة فيها .. وسكتت وتحملت .. كلو هدا لتنقذو اللي براسكون .. وتجيب ولد .. وانا لهاي اللحظة معارض هدا التصرف المتخلف اللي صار .. بس صار وما في رجعة تقدم اكثر من امو والشرر بعيونو ..: امي .. ابي .. رح كون واضح معكن .. اذا بعرف او بخبر انو حسن رجع اعتدى على مرتو رح يكون اللي تصرف ثاني معو .. توسعت عيون هيام ..: عم تهددنا يا ابن بطني مشان بنت الحرام هاي فؤاد: اللي حسن عم يعملو اوسخ من اللي اخوها عملو .. انا عرفت كل شي .. وعرفت بعمايل حسن من المشفى .. امي .. انا حكيت اللي عندي .. انهى حديثو بدون ما يسمع رد او تعليق من امو وطلع من غرفة القعدة وتوجه لغرفتو .. اطلع مدحت بهيام ..: ابنك معو حق بكل كلمة حكاها .. اللي عم تعمليه انت وحسن ما بجوز .. وهدا كلو رح تتحاسبو عليه .. اتركي البنت تعيش بسلام .. هيام بصدمة..: وانت كمان .. سحرتك انت وابنك .. مدحت : ما في منك خواص .. تصبحي على خير .. رايح نام احسن شي .. بعد دقايق دخلت سونا على غرفتو قام عن التخت وقرب منها..: سونا تعي شوي سونا: نعم بابا .. فؤاد : اسمعي شو بدي منك .. سونا : اكيد بابا .. تفضل .. فؤاد : عيونك تبقى على مرت اخي .. شفتيها مو سونا: ايه بابا شفت هي قاعد بالمطبخ .. كان عم يبكي كتير غمض عيونو بقهر وكمل …: تمام .. خليكي دايماً جنبها .. اي شي بتطلبو بتنفذي عطول .. واذا حدا حكى معها بتخبريني على طول .. ولا تخليها تشتغل شي بالبيت .. لو بدها كاسة مي .. انت بتجبيلها .. واهم شي تبقي معها وانا مو بالبيت .. فاهمة .. سونا: حاضر حاضر بابا فؤاد: واذا امي حكت معها شي بتخبريني على طول .. انتبهي عليها منيح .. انا رايح .. سونا : الله معك بابا ____ بعد مرور كم شهر بعد نهار طويل متعب بالشغل .. وصل البيت .. وقف السيارة قدام الفيلا .. سند راسه عالمقود بتعب .. كان الرجوع عالبيت كل اخر نهار من اصعب الامور عليه .. كان يستقصد يشغل حالو بالشغل اكتر من المعتاد لحتى يأخر رجعته عالبيت .. بس ما كان في مفر من الرجعة .. نزل من السيارة وتوجه للبيت وقف عند باب البيت .. طلع المفتاح من جبيه وفتح الباب دخل والارهاق واضح على وجههو وقف فجأة وعيونو على اعلى الدرج .. توسعت عيونو هو شايف جومانا نازلة بسرعة عالدرج شكلها مبهدل وحسن وراها .. قربت منو وتخبت وراه ..: مشان الله ساعدني .. قلو يبعد عني بدو يضربني وقف حسن بعد ما شاف فؤاد وطلعت هيام على اصواتهن اطلع فؤاد بحسن نظرة خلتو ينزل عيونو بالارض هيام : شبكن فؤاد : عم فكر ابعت حسن ليرجع بعيد ابتدائية .. لانه واضح ما عندو فهم مسموع عضت هيام على شفافها وهي شايفة جومانا واقفة ورا فؤاد وفهمت اللي صاير ..: فؤاد ابني .. اكيد انت فاهم غلط قرب من حسن بهدوء ..: انت ما بتفهم عربي !!! حسن بتأتأة ..: اخي .. انا صرخ فؤاد بكل صوتو ارعب كل الموجودين ..: ما بتفهم !!!!! ركضت هيام لعندو …: ابني برضاي عليك اهدا .. لا تفرجي العالم علينا .. اطلع فؤاد بإمو ..: ما بدي ارجع اكرر اللي حكيتو .. ومرة تانية انا اللي رح اطلب الشرطة .. فهمتوا تركن واقفين مجمدين بأرضن وطلع لغرفتو وعيون جومانا عليه قربت منها هيام ..: الله لا يوفقك وقعتي بين الاخوة .. اطلعت جومانا عليها بشماتة واضحة والابتسامة على شفافها وطلعت لغرفتها يتبع ..🥀🥀