*أنتيڪآ* 📜 *روايات* *قليلٌ من الوقت مع القصص يساوي حياةٌ بأكملها🤎🕰️* *نشر جميع القصص والروايات 🤎🕰️* *قناة خاصة لمحبي القراءة والقصص* _ *ننشر جميع القصص والروايات*🤎🕰️ *حب 🤎🕰️* *حزن 🤎🕰️* *اكشن🤎🕰️* *رعب🤎🕰️* *تـحـت إشـࢪاف: تـيـم*​​​​​​​​​​​​​​​​​​​​​​​​​​​​📜🤎 *ࢪابـط الـقـنـاة:* https://whatsapp.com/channel/0029VamfKJHK0IBbdBbxOc3d *.#لعنة_الفؤاد🤎* #الجزء_الثامن دخل لغرفتو وطرق الباب وراه بقوة .. رمى حالو عالتخت بتعب .. ركز عيونو على السقف وشد بإديه على راسو ..: وبعديـــــــن .. اخد نفس وزفرو ببطئ .. قام عن التخت ودخل للحمام .. اخد دوش دافي لعل وعسى يريح اعصابو ويخف وجع راسو .. بس عبث .. بعد وقت .. طلع من الحمام لبس تيابو ونزل للمطبخ فؤاد : سونا تعي لهون اطلعت عليه سونا بخوف ..: بابا .. انا كنت بدي خبر انت .. فؤاد بعصبية ..: انا لشو جايبك لهون .. سونا بخوف اكبر ..: بابا .. والله ماما قالت بتقلع انا من هون اذا بخبر بابا بشي .. والله خفت انا كتير .. فؤاد : امي هيك قلتلك هزت راسها ..: نعم بابا .. حسن وماما دايما بضرب جومانا وانت مو موجود بابا .. وماما ما بسمح اتصل فيك شد على قبضة ايدو .. : كملي شغلك طلع من البيت حاط التلفون على ادنو بعدما دق ليزن ..: وينك انت .. ايه تمام .. جاييك .. ركب سيارتو وانطلق بعد ربع ساعة وصل نزل من السيارة وتوجه لبيت يزن .. فتح يزن الباب ..: اهلا ابو الفوف .. اطلع عليه يزن وكان ساند ايدو عالباب ووجهو تعبان يزن : شبك فؤاد.. انشالله ما صاير شي غمض عيونو بقهر ..: انا تعبت يزن بخوف ..: فوت فوت .. بدك تحكي عالباب دخلوا للصالة رمى فؤاد حالو عالكنبة وتنهد بقهر يزن: فؤاد خوفتني .. شو صاير .. الك فترة طويلة متغير وحاسس عليك مانك على طبيعتك.. شو صاير معك احكي .. حط ايده على راسو وسندن على رجليه ..: جومانا تزوجت ضحك يزن بصوت عالي ..: تزوجت .. ايه الف مبروك .. الله يجعلها اكبر المصايب يا صاحبي .. وبدها هالقد .. عشو قاهر حالك .. تتزوج للهفى..شو هي اخر قطعة بالكوكب.. قاطعو فؤاد ..: تزوجت حسن اخي تشنج وجه يزن فجأة .. نزل على ركبو مقابل فؤاد..: انت شارب شي !!! رفع فؤاد راسو ..: ايه تزوجت حسن .. وساكنة معنا بنفس البيت يزن والصدمة واضحة على وجههو .. : شو هالتخبيص هدا .. جاي تتسلى عليي اخر الليل .. لي تتزوج حسن .. ومن وين عرفتو .. شو كانت ترسم عليك وبعدها طبقت اخوك .. شو هالمسخرة هاي فؤاد بقهر ..: رجعت من السفر ولقيتها ببيتي .. بصفتها مرت اخي .. شايف مأحلى هالشي وقف يزن ..: لا لحظة شوي .. رح اعمل قهوة لحتى صحصح معك .. حاسس حالي تهت منك حط يزن الفنجان من ايده بصدمة بعدما سمع القصة من فؤاد ..: لك فؤاد قول وغير .. نحنا بأي زمن .. لسا في ناس بتفكر هدا التفكير فؤاد: كنت قول متلك .. لحتى شفت هالشي بعيوني يزن: لك عمو مدحت كيف وافق على هالشي.. ما بعلمي متعلم ومثقف .. كيف يوافق يعمل هيك شي ببنت ما الها ذنب تنهد فؤاد بقهر..: اخخخ من ابي .. ابي من وقت ما مرض وهو رامي الدنيا كلها ورا ظهرو .. وما عم يتدخل بشي .. كأنو بقلنا فنيت حياتي وعمري وصحتي مشانكن وهلق ما عاد اللي هم غير صحتي .. يزن: يا ربي .. وانت شو عامل بهالمصيبة رجع ظهرو لورا وشبك ايده فوق راسو..: انا بين نارين .. ويلي امي واخي وعمايلن .. وويلي جومانا اللي بتقتلني بنظرات التوسل والقهر كل ما شوفها .. متمني هربها بس خايف .. اول مرة بخاف .. خايف عليها .. حاسس حالي ضعيف .. حاسس حالي انسان واطي لما وعدتها احميها وما عم اعرف اوفي بوعدي .. اطلع فيه يزن ..: لسا بتحبها اطلع عليه بنظرات نارية ..: احفظ لسانك .. المخلوقة ما عادت تعنيلي شي غير انها مرت اخي وبس .. واذا عم ساعدها او فكر بأمرها بس من منطلق انساني وتكفير عن الذنب اللي عملتو معها لما تركت كلشي ورجعت على امستردام .. عم حاول صلح الغلط اللي عملتو من شهور .. ولو كانت أي وحدة تانية مكانها كنت عملت نفس الشي يزن : خلص روق روق .. ما كان قصدي شي .. طلع معي السؤال بالغلط .. شو ناوي تعمل غطى وجهو بإيديه ..: ما بعرف ما بعرف .. امي واخي قدامي ما بعملو شي .. وبس اطلع من البيت بقلبو عليها يزن: بس انت واجبك تتصدى لتصرفاتن فؤاد بقهر ..: يزن افهمني .. لك انا مقيد .. ايدي مربطة .. هاي ما عادت حبيبتي .. لك افهم عليي صارت مرت اخي .. مرت اخي يا عالم .. حاسس حالي عم اغلط .. ما عم استرجي احكي معها كلمة مشان ما تفهمني غلط .. ما عم استرجي قرب منها شوف طلباتها اذا ناقصها شي .. اخخخخخ يا ربي يزن : خلص اهدا لا تعمل بحالك هيك.. انا فاهم وعارف انه الشي فوق طاقتك .. هدا اللي بطلع بإيدك .. وانت ما عم تقصر .. تركها على ربك .. تنهد بقهر ..: تعبت يزن : انا عتبان عليك .. لي حابس كل هدا بقلبك وما بتحكي .. مو انا صاحبك ومتل اخوك .. فؤاد : هدا اللي صار __. مرقوا أسابيع متل بعضها ما فيها أي جديد بيوم دخل لمكتبو وما كان على بعضو .. رفع سماعة التلفون ..: جبيلي قهوة ودوا لوجع الراس .. رجع السماعة مكانها وزفر بضيق ..: شبني اليوم.. اففف .. رجع رفع السماعة ودق لفؤاد ..: صباح الخير .. شو وضعك اليوم فؤاد : نشكر الله .. شو عم تعمل بالمكتب .. المفروض تروح على موقع البناء .. يزن: قمت من النوم مصدع .. اذا ما عليك شي روح انت فؤاد: تمام .. يلا بشوفك بعد الظهر .. واذا حاسس حالك مو منيح روح عالبيت وانا باجي عندك ما في شي مهم اليوم يزن: بشوف .. يلا سلام حط السماعة مكانها وزفر دخلت لعندو السكريترة .. قدمت القهوة وبعدها اعطتو حبة الدواء قبل ما تطلع يزن : ابعتيلي ناديا لو سمحتي هزت براسها وطلعت ابتسم نص ابتسامة وتمتم ..: خليني اتسلى بناديا والعب بأعصابها شوي .. دقايق وكانت ناديا بالمكتب واقفة بنص الغرفة ضيق يزن عيونو واطلع عليه ..: انا ما حذرتك يا انسة اطلعت ناديا عليه بإستغراب ..: بخصوص شو .. خلصت مراجعة للمشروع وكنت رح ابعتو .. ضرب عالطاولة وقاطعها ..: ما قصدي عالمشروع رجف جسمها بقوة ..: استاذ ما عم افهم عليك .. انا شو عملت .. ما يكون قصدك عاللي عملتو مع العميل من يومين .. تجمعت الدموع بعيونها وانخنق صوتها ..: استاذ مو معناه اني موظفة هون اسمح لاي عميل يتمادى معي عقد يزن حواجبو ..: اي عميل وشو يعني تمادى معك .. عن مين عم بتحكي نزلوا دموعها بدون مقدمات ..: الاستاد منتصر .. اللي كان هون من اسبوع .. حاول يتمادى معي ومفكر اني سهلة ورح اسمحلو يعمل اي شي بيخطر ببالو وقف بغضب وضرب عالطاولة بعد ما وصلو مغزى كلامها .. : عم اسألك شو يعني تمادى معك .. شو عمل شهقت ناديا ..: انا خبرت الاستاذ فؤاد … ونحلت تقدم منها بغضب .. مسكها من اكتافها ..: شو عملك .. نزلوا دموعها بغزارة وما عاد فيها تحكي اطلع عليها وشاف الحزن والخوف الي اكتسوا ملامحها سحبها من ايدها وقعدها عالكرسي ونزل على ركبو قدامها ..: اهدي .. اهدي .. ما قصدي صرخ والله .. قوليلي شو اللي صار بس .. مد ايدو عليكي .. تحر… سكت وما قدر يكمل الكلمة.. قام من مكانو وطلع من المكتب ومن الشركة كلها ركب سيارتو وانطلق .. اخد تلفونو ودق لفؤاد ..: وين انت فؤاد: شبك .. صاير شي يزن بغضب ..: عم اسألك وين انت فؤاد : بالطريق للموقع .. بدي عشر دقايق بوصل .. شو صاير معك يزن: جاييك مسافة الطريق فؤاد: شبك .. صاير.. قفل الخط معو وكمل طريقة لموقع البناء بعد عشر دقايق وصل للموقع .. نزل من السيارة وصار يفتش على سيارة فؤاد بعد دقايق وصل فؤاد .. شاف يزن واقف وواضح عليه العصبية قرب منو ..: شبك معصب .. صاير شي بالشركة ؟؟ يزن بغضب ..: منتصر شو عامل مع ناديا !! عقد فؤاد حواجبو ..: شو عامل يزن بصراخ ..: لا تلف وادور .. ناديا حكت انه متمادي عليها ومتح.. فؤاد: ايه وانا حليت الموضوع من عندي .. يزن: وكيف حليتو بالله ؟؟ فؤاد: يزن شو قصتك .. لي عم تنكش شغلات خلصت .. وانت شو الك علاقة من الاساس .. موظفة عندي بالشركة وصار معها موقف .. وانا حليت الموضوع .. انت شو الك علاقة ما عم افهم توتر يزن ..: مساعدتي !! رفع فؤاد حاجبو …: مساعدتك .. بس حاول يزن يغطي على حالو ..: قلي شو عملت .. فؤاد : يزن اهدا .. الموضوع انتهى والموظفة رجعلها حقها وزيادة وخلصنا يزن بغضب ..: ناديا مو اي موظفة فؤاد بخباثة..: لكن !! عصب يزن اكتر بعدما حس حالو انزنق ..: انا ماشي مسكو فؤاد من ايدو وابتسامة صفرا عشفافو ..: ما تكون طبست انت كمان نتر ايدو عنو ومشى .. ركب سيارتو وانطلق بسرعة عالية مشى كتير بلا وجهة .. اخر شي وقف جنب الطريق سند راسو على المقود وكلام فؤاد بتكرر بذهنو همس ..: معقول !! حبيتها رفع راسو وهزو بقوة ليطرد هالافكار من عقلو .. شغل السيارة وانطلق للشركة بعد وقت دخل لمكتبو .. دقايق وكانت ناديا بمكتبو .. وقفت جنب مكتبو ..: بعتذر بدون ما يطلع عليها ..: عن شو بتعتذري !! انا اللي بعتذر .. المفروض انك مساعدتي واول واحد اعرف باللي صار معك .. بس واضح انك ما عم تلاقي الامان معي كمساعدة لحتى تشاركيه بمشاكلك ناديا : لا ابداً .. الموقف صار بنفس الفترة اللي حضرتك كنت مسافر فيها .. وانجبرت احكي للاستاذ فؤاد مشان يوقفو عند حدو يزن : حصل خير .. بعتذر كمان مرة .. اخيرا رفع عيونو واطلع فيها .. شاف ملف بإيدها ..: شو هدا ناديا : عنا اجتماع مع رائد بيك .. هو هلق بغرفة الاجتماع ناطرنا يزن : وهلق جاي تقوليلي ناديا: انا كنت رح خبرك من ساعة بس حضرتك شفت اللي صار وبعدها طلعت .. هدا الملف والمخطوطات .. دققتها وكل شي جاهز .. يزن : تمام .. استقبليه انا شوي وبنظم للاجتماع .. هزت ناديا راسها ..: بالاذن طلعت ناديا من المكتب شد يزن على راسو ..: شو عم خبص انا .. شو امان وشو حماية .. انا بشت انجن .. شبك يا يزن كلها موظفة .. ولا خايف يكون كلام فؤاد صح .. افففف من وين اجت هالشغلة .. كل اللي كان بدي ياه اعمل مقلب .. كيف وصلت لهون ما بعرف .. ____ بعد انتهاء الدوام .. طلع يزن من مكتبو وتوجه لمكتب فؤاد دخل ..: تعال عازمك على العشا اطلع فيه فؤاد ..: لا تقولها يزن : فؤاد لا تخليني عصب .. قوم من تم ساكت .. فؤاد : هلق لا .. عندي اجتماع ضروري .. اسبقني عالبيت بخلص الاجتماع وباجي عندك يزن: سلام .. لا تتأخر اطلع عليه فؤاد بإستغراب ..: شبك !! يزن: خلص ما في شي .. بشوفك طلع يزن من الشركة وتوجه لبيتو ______ بعد ساعتين فتح يزن باب بيتو وكان فؤاد اطلع عليه وكانو عيونو حُمر ..: يزن .. رجعت للشرب !! يزن : انا قلتلك تيجي لاحكي معك .. ما بدي اسمع محاضرات .. قعد فؤاد عالكنبة ..: وشو هالموضوع الكبير اللي عم تغضب ربك وترجع للحرام مشانو رمى حالو عالكرسي الهزاز بتعب ..: ما بعرف .. انا كذبت عليك ما بطلتو لارجعلو فؤاد : انت عم تكذب على حالك .. انا ما رح حاسبك لتكذب عليي .. انا موجود بحياتك لانصحك بس .. وانت فيك العقل الكافي لتحدد شو لازم تعمل وتعرف الحلال من الحرام يزن: قلتلك ما بدي اسمع محاضرات .. انا بحبها لناديا ضحك فؤاد..: حلو قطعت نص الطريق يزن: شو يعني ؟ فؤاد : انك تعترف لحالك .. باقي نص الطريق الثاني .. تعترفلها يزن: ما بدي اعترفلها وما بدي احبها .. ما بعرف كيف دخلت على قلبي .. انا ما سمحتلها فؤاد : بالحب ما فيك تتحكم بقلبك .. وما فيك ترسم الخطط وتنفذ شي .. لما توقع بالحب فجأة بتلاقي حالك بمتاهة عشبية ..وحسب الطريق اللي بتسلكها رح تعيش .. يا اما بتشوف جمال المتاهة والخضار والورود اللي فيها وبتعيش كل درب بحلوه ومره ويكون على قلبك متل العسل .. يا اما رح توقع بين الشوك وتشوف كل شي مر حتى لو كان غير هيك .. اطلع عليه يزن ..: وانا ما بدي هالحُب فؤاد: وانت جبتني لهون مشان اعطيك طريقة تطلع فيها من هالحب .. ايــه يا سيدي ما في .. اذا انت مالك سيطرة على قلبك شو بدك مني .. يزن : شو اعمل .. ما بدي ياها قريبة مني لهالدرجة .. انت فيك تبعدها عني فؤاد: البنت بتحبك ؟ يزن: ما بعرف ولا بدي اعرف فؤاد: ليش شبها البنت .. طيوبة وعفوية وشخصيتها بتجنن .. وحلوة .. يزن : وضيف مستهترة وما في براسها عقل ومفكرة الدنيا كلها ضحك ولعب فؤلد: وشو بدك احسن من هيك .. بدك النكدة والمكتأبة .. تنكد عليك حياتك يزن : ما بدي شي .. ولا بدي ياها .. انقلها من عندي .. ما عاد بدي تكون جنبي فؤاد: تمام براحتك رفع يزن حالو ..: شو رح تعمل !! بدك تقلعها رفع فؤاد حاجبو ..: لا طبعاً .. انت طلبت ابعدها عنك وبس .. ما الك علاقة بأي شي تاني .. انا صار لازم روح .. بدك شي مني يزن: شو صار معك انت .. ! فؤاد: لسا الوضع متل الاول ما تغير شي .. متل ما اتفقنا بكرا قرار نقل ناديا لقسم تاني رح يكون عندك يزن : وانت خبرها فيه .. وما تقلها اني انا اللي طلبت نقلها .. ما بدي تكرهني فؤاد : لا تخاف .. انا بخبرها.. يلا سلام ____ وصل الفيلا .. وقف سيارتو ونزل منها .. رفع راسو لفوق .. اجو عيونو بعيون جومانا اللي كانت واقفة على البلكون .. كانت نظراتها كلها لوم وعتب .. رجف قلبو .. وبردت اطرافو .. إحساس غريب اجتاح قلبو .. ثواني وكانت جومانا داخلة لغرفتا بقي حصة واقف وعبونو بنفس المكان وغصة بقلبو .. اخد نفس ودخل __ تاني يوم بنص الدوام طلع فؤاد من مكتبو وحامل بإيده ورقة .. توجه لمكتب ناديا وقف عند الباب وعيونو عمكتب جومانا رفعت ناديا راسها وشافتو عيونو مسلطة بنقطة وحدة وقفت وتنحنحت ..: اححم .. اهلا استاذ فؤاد طلع من شرودو وتقدم من مكتب ناديا اعطى الورقة لناديا ..: تفضلي استغربت ناديا ..: استاذ كنت طلبت مني انا باجي لمكتبك اخدت الورقة وقرأتها وبانت على وجهها علامات الصدمة رفعت عيونها ..: ليش استاذ انا عملت شي غلط؟؟ فؤاد : ما بعرف .. بس مبارح يزن طلب مني انقلك لعند اسامة .. اذا بدك راجعيه تركها بصدمتها وطلع وابتسامة صفرا على شفافو ..: يلا القى يا يزن .. على مزاجك ما تحب خلال ثواني كانت ناديا بمكتب يزن وبإيدها الورقة تقدمت من مكتبو وجسمها برجف .. قدمتلو الورقة ..: هدا قرار تعسفي اخد ورقة القرار منها وعقد حواجبو ..: تعسفي!!! يزن؛ استاذ فؤاد قلي انك طلبت نقلي لمكتب الاستاذ اسامة .. ممكن اعرف السبب همس يزن ..: الله لا يوفقك يا فؤاد اطلع فيها ..: لا انت غلطانة .. انا ما طلبت من فؤاد .. ناديا : من شوي كان بمكتبي وبلغني بالقرار .. انا عملت شي غلط .. عملت مشكلة مع عميل .. سكتت فجأة وبلحظة دموعو عيونها ..: مشان الاستاذ منتصر !! وقف يزن وهز براسو بنفي ..: لا لا لا ابدا همس بقلبو ..( يخرب بيتك يا فؤاد ) قرب منها ومسك ايدها ..: تعي معي عند فؤاد بقيت واقفة وعيونها على ايده اللي ماسك فيها ايدها ترك ايدها ..: بعتذر .. تعالي معي دخلوا مكتب فؤاد يزن بعصبية ..: انا ايمتى طلبت منك نقل ناديا فؤاد بخباثة ..: مبارح لما كنا سهرنين .. ما تكون نسيت كز يزن على اسنانو ..: فؤاد بدك تجنني .. عقد فؤاد حواجبو ..: معقول فهمت غلط .. ايه اكيد فهمت غلط .. خلص بعتذر .. اعتبري القرار لاغي .. تفضلي كملي شغلك .. وانت يزن المخطوطات لمجمع التيران جهزلي ياه ناديا بإبتسامة ..: بالاذن استاذ بقي يزن واقف ويتوعد افؤاد فؤاد بمسخرة ..: المخطوطات لو سمحت يزن: انا بربيك يا فؤاد ال * فؤاد: روح روح .. روح راضيها احسن .. ____ وقف السيارة مقابل البيت ونزل منها بتعب .. على صوت السيارة طلعت رائدة ركض ..: رياض طمني.. شفتها نزل عيونو بالأرض والدمعة عالقة عطرفها ..: لا .. زوجها رجع قلعني وما سمحلي شوفها رائدة بقهر ..: لي عم يعمل هيك .. ما بدنا منو شي غير نشوفها مسح الدمعة اللي نزلت على خدو..: رح ارجع حاول كمان يومين .. الا ما المحها من بعيد مسكتو من جاكيتو ..: قلبي واجعني يا رياض .. ما عم نام الليل .. حاسة صايرلها شي .. مو مطمنة .. شدها لحضنو وسمح لدموعى بالنزول ..: رح ضل حاول .. لاخر يوم بعمري رح ضل اطرق بابها _____ بعد مرور شهرين فتحت عيونها بتعب بعد ما دخلت اشعة الشمس بعيونها اطلعت جنبها وشافتو نايم طب على وجهو .. مسحت على وجهها بتعب وقامت بصعوبة وتوجهت للحمام .. اطلعت بالمراي على ملامح وجهها التعبانة .. سواد تحت عيونها .. لون بشرتها الباهت .. اخدت نفس بصعوبة .. غسلت وجهها وحطت شوية مرطبات على وجهها .. بدلت تيابها وطلعت من الغرفة وقفت فجأة بعد ما شافت فؤاد واقف ناطرها اول الدرج .. كملت طريقها ببرود ولا كأنه موجود .. مسكها من ايدها وشدها عليه وهمس جنب ادنها ..: عم فكر بطريقة لهربك .. بدي بس يومين اطلعت عليه نظرة لأول مرة بشوفها نظرة كلها امل ..: بتجكي جد !! فؤاد : ايه .. يومين بالزبط وبتكوني طالعة من هون .. ابتسمت ابتسامتها اللي تعود عليها ..: تمام .. انا رح جهر الفطور توجهت للمطبخ وباشرت بتحضير الفطور .. كانت تتحرك بالمطبخ بتعب وارهاق لدرجة صوت انفاسها مسموع .. قربت منها سونا ..: انا بعمل الفطور بابا قال انت ارتاح جومانا : ما ناقصني مشاكل .. خلص انا بحضرو دخلت حماتها ووجهها ما ببشر بالخير .. ضربتها على كتفها ..: لي لسا الفطور مو جاهز.. حماكي صحي جومانا بتعب ..: يلا عشر دقايق بكون جاهز هيام : لسا بدي استنى عشر دقايق شدتها من شعرها ..: لو انك صاحية ابكر كان لحقتي تخلصي كل شي جومانا بتعب ..: مرت عمي مشان الله .. راسي رح يتفجر .. اذا مستعجلة سونا بتعملو هيام : وبدك خدامة تخدم عليكي يا بنت الذوات .. ارتفع صوت جومانا غصب عنها ..: ما بدي شي صرخت بوجهها ..: لك عم ترفعي صوتك بوجههي .. ارتفع صوتها اكتر ..: الحق يا سيد حسن .. الست جومانا عم ترفع صوتها عليي.. عم تعطيني اوامر .. صحي حسن على صوتها وتوجه بسرعة للمطبخ ..: خير امي شو في .. اطلع على جومانا وشاف الخوف بعيونها ..: بس ما يكون بنت الحرام عملت شي هيام بحقد ..: عم ترفع صوتها بوجهي .. مو عاجبها شي .. قرب حسن من امو وهمس جنب ادنها ..: فؤاد مو بالبيت !! رفعت حواجبها بمعنى لا ابتسم بشر وكأنو لاقى كنز .. سحبها من شعرها وكأنو ناطر هالفرصة لحتى يفرغ حقدو فيها هيام بجبروت ..: ربيها يا امي .. ربيها جرها من شعرها واخدها للغرفة ..رماها عالارض ونزل فيها ضرب .. كانها فريسة بين ايده .. انقض عليها بكل وحشية وفرغ كل حقدو وغُلو فيها وقف وبعد عنها لما حس انها بطلت تقاوم .. دخل الحمام تاركها وراه عالارض .. شالت شعراتها عن وجهها ومسحت الدم عن تمها .. قامت بصعوبة ورمت حالها عالتخت .. بعد مرور وقت فتحت عيونها على صوت حماتها بتنده لحسن لحتى يروحو مشوار .. تنفست الصعداء وقامت للحمام.. اخدت دوش طويل لحتى تخفف الوجع عن جسمها خلصت حمام وقعدت قدام التسريحة تمشط شعرها .. فجأة سمعت صوت الباب الرئيسي .. نقزها قلبها .. قامت بهدوء وطلعت من الغرفة بس ما كان حدا بالبيت .. فهمت بسرعة انو الي رجع عالبيت فؤاد توجهت للمطبخ اخدت سكينة لحمة كبيرة وراحت لعندو عالغرفة .. دخلت بدو استأذان .. كان واقف بنص الغرفة ببدل بتيابو سكرت الباب وراها بهدوء وايدها ورا ظهرها وحكت بصوت مبحوح …: كنت ناطرة هاللحظة من زمان حاول فؤاد يستوعب اللي بتحكيه ..: شبك !! تحركت لعندو شوي شوي وطلعت السكين من ورا ظهرها ..: وعدتني من شهور انك تحميني من ظلم حسن وامك .. جبرتني انتازل بشرط عيش انا وابني حياة كريمة .. وعدتني وعود كثير .. وانا صدقتك .. بس انت ما وفيت بوعدك واخرهازاليوم انك تهربني .. بس انت كت تخدرني لحتى ما حس بالايام كيف بتمرق فؤاد بخوف ..: جومانا لا تعملي شي تندمي عليه .. ضحكت ضحكة حزينة ..: لا .. ما رح يكون في وقت للندم.. خلص انا اخدت قراري .. ما رح نبقى انا وابني على هالدنيا حطت السكينة تحت دقنها ..: ما عاد فيي اتحمل اكثر من هيك .. جسمي ما عاد يتحمل ضرب اكثر من هيك .. اخوك ما عم يعمل حساب لشي .. انت كل الوقت برا البيت وما عم تعرف شو بعمل معي .. انا وحامل عم يضربني ويعتدي عليي بلا رحمة .. امك بتكتب السيناريو واخوك بنفذ .. كل نقطة بجسمي ذاقت الوجع منو وشبعت .. ما عاد بدي ابقى على هالدنيا ولا عاد بدي جيب ابني على هالحياة القاسية .. قرب منها بهدوء ..: جومانا اعطيني السكينة .. جومانا بتعب ..: تعبت .. كل يوم قبل ما انام ولما بصحى بدعي الله يوخدو لحسن .. بدعي عليه بالموت مشان ارتاح من هالعذاب .. انا تعبت خلص ما فيي اتحمل اكتر من هيك اطلع على رقبتها وشاف دم .. قرب عليها بسرعة وسحب السكين من بين ايديها ورماها لبعيد انهارت عالارض وصوت شهقاتها بكل الغرفة وقف قدامها وايديه مربطين ما عم يقدر يعمل شي ..: لا تعملي هيك .. عم تعذبيني معك اطلعت عليه بعيون حُمر ..: ارحمني بترجاك .. ارحمني صارت تضرب عالارض بإيديها ..: مشان الله تعبت .. تعبت لف حالو عنها وقلبو متل النار عليها .. ما طالع بإيدو يعمل شي .. مسح على وجههو بقهر ..: خلص روحيي لغرفتك .. مو منيح تبقي هون حاولت توقف على رجليها .. حست بشي سخن على رجليها .. نزلت نظرها لتحت وشافت دم على رجليها ..: فؤاد.. اطلع عليها بصدمة وعيونو عالدم ..: شو عم بصير ضحكت متل المجنونة ..: ابني فؤاد .. ابني راح ركض فؤاد لعند تلفونو واتصل بالاسعاف .. حاول يهديها ويطمنها انها رح تكون بخير ____ بالمشفى واقف قدام غرفة الكشف رايح جاي بتوتر والعرق عم يتصبب من جبينو رن تلفونو ..: ايه امي .. اخدتها بالاسعاف عالمشفى .. لسا ما حدا طلع من عندها ..( صرخ ).. ايه امي شو كان مطلوب مني اعمل .. كانت عم تنزف .. طبعاً كلو من ايد ابنك .. رح يخسر ابنو بسبب تحريضك لالو .. خلص امي خلص .. انا طلبت الشرطة امي .. اسف متير بس انا حذرت حسن .. لا.. لا تيجو .. الشرطة هون . قفل الخط معها ورجع يتحرك رايح جاي قدام الغرفة .. في شي ناقزو .. قلبو مو مطمن .. حاسس رح يصير شي طلعت الدكتورة ووجهها ما بيتفسر .. قرب منها فؤاد بخوف ..: طمنيني دكتورة .. الدكتورة: ولادة مستعجلة .. وين زوجها .. وضعها صعب ووضع الجنين بخطر .. عندها نزيف حاد بسبب انفصال المشيمة .. لحقتها على اخر لحظة .. لازم تدخل عملية .. فؤاد بخوف ..: رح حاكيه هلق الدكتورة: ما في وقت ووضع الجنين مو مستقر .. تعال معي لحتى توقع على الاوراق اللازمة وقع فؤاد على كل الاوراق اللازمة ودخلوها عالعملية.. ___ بعد مرور ساعتين دق تلفون فؤاد برقم غريب .. اطلع عالرقم وما ابدا اي اهتمام .. رجع رن مرة ومرتين وثلاث .. حس انو في شي .. فتح الخط ..: نعم .. ايوا انا فؤاد العامري .. نعم .. انت شو عم تقول .. بأي مستشفى .. تمام تمام مسافة الطريق .. وقف على رجليه ودقات قلبو سريعة .. اجتاح قلبو شعور بالندم بعدما تذكر المكالمة الاخيرة مع امو ،، وقف متل العاجز عين على غرفة العمليات وعين على مخرج القسم .. اخد نفس واتخذ قرارو .. وركض للمخرج .. ركب سيارتو وانطلق باقصى سرعة .. وصل للعنوان الي اعطاه ياه المتصل .. نزل من السيارة ودخل المشفى .. وقف عند موظف الاستقبال وهو عم يلهث ..: من كم ساعة وصل لهون ثنين بحادث سير .. الموظف .: شو الاسم ؟ فؤاد: حسن وهيام العامري .. الموظف : بغرفة العمليات بالطابق الثالث ركض فؤاد لعند المصعد وصار يكبس بقوة على الزر ..: يلا يلا يلا ترك المصعد وتوجه لدرج الطوارئ .. ركض بكل سرعتو وسال الممرضة عن امو واخوه الممرضة : تفضل استاذ هدا الدكتور المسؤول الدكتور : السائق حالتو خطيرة جداً .. وهو حالياً بالعمليات .. الي كانت معو من شوي طلعت من العملية .. لساتها تحت تأثير البنج بس وضعها ما كان خطر .. رح نحطها تحت المراقبة ٢٤ ساعة .. الله يعافيها فؤاد: واخي شو وضعو؟ الكتور: السائق كان تحت تأثير المخدرات .. والاصابة كلها بالراس وضعو خطير .. فؤاد : ممكن شوف امي!؟ الدكتور: حالياً لا .. سند فؤاد ظهرو عالحيط بتعب وتمتم ..: شو اللي عم يصير .. لي هيك نقلبت حياتنا .. ____ بعد ساعات طلع الدكتور من غرفة العمليات ووجهو ما ببشر بالخير قرب منو فؤاد بثقل ..: طمني دكتور .. الدكتور بروتينية ..: البقاء لله .. نزل جواب الدكتور على فؤاد مثل الصاعقة .. اخوه الصغير راح .. ما بقي الو حدا بهالدنيا غير امو وابوه .. رجليه ما عاد حملوه .. رجع لورا وانهار عالكرسي والدموع بعيونو ..: ياااااه يا اخي .. انت كمان رحت وتركتني وحيد بهالدنيا .. يا رب يا رب .. غمض عيونو بقهر ودموعو نزلت عخدو .. بعد مرور ساعتين سمع رنة تلفونو .. حمله وكان المشفى اللي فيه جومانا ..: نعم .. ولدت .. كيف صحتها .. حمدلله .. سلام نزل التلفون عن اذنو ونزلت دمعة فرح .. بنفس الوقت غصة كبيرة بقلبو _____ مرق أسبوع هادي .. جومانا كانت لسا بالمشفى بسبب مضاعفات الولادة وابنها بالحضّانة .. فؤاد مقسم حالو بين الشغل وحياتو الخاصة .. كان عم يحاول يتقرب من امو لحتى يعوضها عن غياب اخوتو … إحساس الندم والالم ما فارقوه ابداً .. كانت اصعب لحظات تمر عليه لما يكون لوحده بالليل .. ما كان يروح من بالو نواياه بتسليم اخوه للشرطة .. وحاول كتير يتخطى اللي صار بس كان من سابع المستحيلات .. ******** طلع من غرفتو .. وقف عند باب غرفتها .. حرك عيونو يمين شمال .. تأكد انه ما في حدا شايفو .. فتح الباب بهدوء ودخل .. ابتسم وهو شايفها نايمة بكل هدوء .. قفل الباب بالمفتاح وتقدم لعندها .. قعد جنبها عالتخت ومسح على شعرها بحب .. وهمس ..: لو تعرفي قدي اشتقتلك واشتقت لعيونك وريحتك .. اهــه .. لو تحسي فيني .. فتحت عيونها وشافتو فوق راسها .. توسعت عيونها ..: فؤاد !!!! شو عم تعمل هون .. كيف دخلت .. ابتسم بخباثة ..: انت بتعرفيني منيح .. ما في اي باب مقفول بوقف بوجههي .. رفعت حالها..: قوم .. روح من هون .. هلق حدا بشوفك عندي فؤاد : لا تخافي جومانا .. ما حدا شافني .. قامت عن التخت بسرعة وتوجهت للباب لتهرب منو .. كان اسرع منها .. مسكها ودفشها عالحيط ..: انت اللي انا جومانا .. انا لسا بحبك وما نسيتك بيوم .. جومانا بخوف ..: انت عم تخبص .. انا مرت اخوك فؤاد ابتسم ..: تسؤ تسؤ .. ما عدتي مرت اخي.. اخي مات .. وانت من حقي هلق كانت رح تصرخ بس حط ايده على تمها وكتم صرختها ..: اهدي جوج .. ما بدها هالقد .. انا بحبك وانت بتحبيني بعد ايدو عن تمها بهدوء وبلش يقرب وجهو من وجهها .. ما عاد في فاصل بينو وبينها .. جومانا بخوف ..: فؤاد … فؤاد: هُــــــــش قرب منها اكتر …. فجأة صحي من النوم .. نفسو طالع نازل .. العرق متجمع على جبينو ووجهو .. رفع حالو ..: استغفر الله .. استغفر الله .. شو هدا .. شرب كاسة المي اللي جنبو .. حاول يرجع ينام بس ما قدر .. قام عن التخت وتوجه للبلكون .. اخد سيجارة وشعلها وبعدها همس ..: لازم ارجع لامستردام .. ما لازم ابقى ولا يوم هون .. اذا رح ضل هون اكيد رح اعمل مصايب انا بغنى عنها ____ بعد شهر وشوي .. ما كانت تعد الايام والاسابيع .. كانت ما بدها يخلصو .. حاسة باحاسيس غريبة .. في فرحة داخلية .. لامت حالها بلحظات .. الموت ما في شماتة .. بس بموتو حمل ونشال عن صدرها وقفت قدام المراي ورتبت تيابها وفي نظرة خباثة على وجهها .. افكار شيطانية عم تلعب بعقلها .. حطت الشنطة على كتفها وطلعت من الغرفة .. نزلت للصالة وما كان في حدا .. وقفت بنص الصالة بإستغراب ..: وين راحت هاي كمان دخل مدحت للصالة ..: شبك يا بنتي جومانا : عمي وين راحت مرت عمي .. المفروض نروح عالمشفى مدحت : راحت لعند اختها ابتسمت جومانا ..: تمام .. انا رايحة عالمشفى .. ما رح اتأخر طلعت من البيت والابتسامة على وجهها .. ابتسامة عريضة للفرج القريب اخدت تاكسي وتوجهت للمشفى بعد وقت وصلت المشفى وتوجهت لقسم الخُدج وقفت عند الكاونتر واعطت اوراقها للممرضة الممرضة : عم يجهزو البيبي للخروج وفحصو طبيب الاطفال .. بس تعي معي لتوقعي عالاوراق جومانا : تمام .. بس بسرعة وحياتك انهت المعاملات وتوجهت لغرفة الخُدج دخلت للغرفة وحركت حجر عينها .. حست بقبضة قوية بقلبها قربت من الممرضة المناوبة ..: صباح الخير .. اشرت بإيدها عالمكان اللي كان موجود فيه ابنها ..: البيبي اللي كان هون وين راح .. خبرتني الممرضة انه الدكتور فحصو وكل شي تمام اطلعت عليها الممرضة بإستغراب ..: لسا من شي دقيقتين اعطينا تصريح الخروج وجدتو اخدتو .. توسعت عيونها ..: انت شو بتخبصي .. اي تصريح خروج .. انا من شوي وقعت عالاوراق .. وكيف بتسلمو لجدتو وانا امو موجودة شعرت الممرضة بالخوف .. وكأنها ارتكبت جريمة ..: مدام .. انا شفت التصريح بعيوني .. مداااام انا ما اللي علاقة صرخت جومانا ..: والله لاخرب بيتك وبيت صاحب المشفى طلعت من غرفة الرضع ومن المشفى كلو عم تهددد وتتوعد اخدت تاكسي ورجعت للبيت وقفت عند الباب وصارت تخبط بكل قوتها ..: افتحوا يا مجرمين .. افتحوا يا خطافين الاطفال .. افتحوا الباب بلا ما اعمل فضايح فتحت هيام الباب بكل جبروت وحكت بكل جحود ..: بدك تطلعي من هدا البيت بتطلعي متل ما دخلتي .. بدون اي شي .. دخلتي لهون حشرة وبتطلعي منو حشرة .. حابة تربي ابنك تحت عيوني .. ادخلي .. ولا تحلمي تطلعي من هون ومعك الولد ما دام انا عايشة انهارت على الارض ..: بكفي ظلم .. بكفي قهر .. انا تعبت هيام بغضب كبير ..: كنتي بدك تهربي فيه .. مفكرة انك الوحيدة الذكية والباقي جدبان .. جومانا بقهر ..: لي عم تعملي هيك هيام : اللي عندي قلتو .. بدك تدخلي .. هلق بتدخلي وبتنقلعي على غرفتك .. وكوني عارفة ووجودك هون بس لترضعي الصبي .. ما بدك مع الف قلعة .. ما الك شي عندي اطلعت عليها بكل حقد ..: لو ببقى بعمري يوم واحد .. رح اخد ابني واطلع من هون __ بعد شهر استلم جواز سفرو واخد الشنطة وتوجه لبباب الخروج كان يزن ناطرو عند بواب الخروج .. قرب منو ..: حمدلله على السلامة .. طولت الغيبة فؤاد: الله يسلمك .. توجهو للسيارة يزن: ما بدك تقلي شو صاير معك .. فؤاد: .بعدين يزن: لسا ما عم افهم .. يعني بهاي الظروف ووفاة حسن ووضع الشركة المو مستقر .. تركت كلشي ورحت فؤاد : تركها على الله .. بس انت ما كنت تخبي عليي شي من اوضاع الشركة .. وحسب اخر تقارير الوضع عم يتحسن عن الاول يزن : بمراحل .. هز راسو وسلط نظرو للخارج .. يزن : فضفض يا صاحبي .. لا تخلي شي بقلبك .. ما بسوى هيك غمض عيونو بقهر ..: هاي حكمة الله .. اللهم لا اعتراض .. يزن : ونعمَ بالله .. انتبه فؤاد للطريق ..: وين رايح يزن : عالبيت فؤاد : لا روح عالشركة ما طالبة معي نكد بالبيت .. يزن.: يا رجال روح ارتاح .. نام خد دوش لاحق عالشغل فؤاد : لا روح عالشركة .. والمسا بنحكي ____ بعد ثلاث ساعات دخل يزن عند فؤاد عالمكتب ومعو ملف حط الملف عالمكتب ..: شوف هالمصيبة اخد فؤاد الملف وفتحو وقرأ اللي بداخلو ..: بسيطة .. انا رح احكي مع مدير البنك وحدد جلسة .. يزن : شو رح تعمل .. لا تقول بدك ترجع تجدول القروض .. ما بصير .. الفوائد رح تكون عالية .. ونحنا مو ناقصنا الفوائد لحالها ب.. قاطعو ..: خلص اترك الموضوع عليي .. يزن : تمام متل ما بدك.. ما بدك ترجع عالبيت .. خلص روح هاي اطمنت على الشغل حمل تلفونو..: السيارة بموقف الشركة طلع يزن المفتاح من جيبو ..: ايه وهدا المفتاح.. اخد منو المفتاح ..: انت مخبي شي .. قول لا تخجل .. يزن بإحراجً..: عندي موعد .. وبدي افركها .. هيك مبسوط ابتسم فؤاد ..: قول من الصبح... التفت عليه ..: شكلو موعد مهم ها .. لازم نحكي .. خلص موعدك وحاكيني طلع من المكتب وتوجه لموقف السيارات .. ركب سيارتو وانطلق … كل الطريق وقلبو قابضو .. وما بعرف شو السبب .. وصل البيت وركن السيارة مقابل المدخل .. بقي شوي بالسيارة وافكار تاخدو وافكار تجيبو .. من بعد اخر اتصال من امو رجعت تخربطت كل حساباتو اخد نفس عميق وزفرو بهدوء .. نزل من السيارة وتوجه للبيت فتح الباب ودخل من بعيد صوت امو ..: تعى لهون نحنا بالصالة دخل لصالة وشاف ابوه قاعد ..:كنت عارف انو صحتك منيحة .. وهاي حجة لحتى ارجع هيام : وشو كنت مستني مني اعمل .. اللي قلتو رح تنفذو .. فؤاد : يا امي بكفي خلص .. الموضوع زاد عن حدو بكفي اللي صار .. ولا انت بدك تخسري كل ولادك مدحت : بعيد الشر عنك .. انت اللي باقيلنا من بعد اخوتك .. انت اللي رح تشيلنا فؤاد : ابي كلامك على عيني وراسي واطاعتكن واجب عليي ليوم الدين بس انت هيك عم تلغوني .. هدا القرار انا باخدو لما شوف حالي جاهز وانا بختار شريكة حياتي .. اما انو اتزوج زوجة اخي الله يرحمو بعد كل اللي صار مستحيل .. مو زابطة .. من اسبوعين وانتو بنفس الموضوع تعبت من الزن .. خلص اتركو البنت تعيش حياتها وهي تحدد مصيرها .. هيام : على جثتي .. ما بتطلع من البيت ومعها ابن ابني .. بدها تنقلع من هون للهفى بس ابن ابني ببقى هون .. ولهيك رح تتزوجها غصب عنك .. والله اذا ما بتوافق لا انت ابني ولا انا امك .. بتتزوجها سنتين لحتى يكبر حسن وبعدها انا براسي بقلعها من هون واي بنت بدك ياها بجوزك ياها .. انصدم من كلام امو ومن كمية الحقد اللي بقلها ..: امي لي كل هالحقد .. قاطعتو بغضب ..: متل ما الكلب اخوها اخد روح اختك بدون رحمة انا بدي عذبها بحياتها قرب منها وباس راسها ..: يا امي هدا قدر من ربنا بعدتو عنها بقوة ..: بدك تتزوجها ولا لا .. فؤاد بحسرة ..: متل ما بدك هيام: روح احكي معها لاني مو طايقة شوف وجهها قام من مكانو وعلى قلبو جبل .. كان يحلم يكون معها ويعيش كل العمر جنبها بس مو بهاي الطريقة ولا بهدا التوقيت وقف قدام باب غرفتها .. دق الباب ودخل كانت قاعدة عالتخت عم ترضع حسن .. لف حالو بإحراج ..: بعتذر .. ما كنت بعرف .. ثواني وكانت داخلة هيام لعندها ..: خلصتي .. جومانا : ايه .. قربت منها واخدت الولد جومانا : خليه عندي مشان الله هيام : لا ..مشان تاخدي وتهربي وجومانا بقهر ..: مشان الله بكفي .. ما رح اهرب .. خلص خليه جنبي ضمت هيام الولد لصدرها ..: قلت لا .. توسعت عيونو بس شاف انو اخدت الولد من جومانا قربت منه وضربت عصدرو وهمست ..: انهيلي الموضوع اليوم طلعت وسكرت الباب وراها قربت منو جومانا وعيونها مليانة دموع ..: شوف شو عم يعملو فيي .. مشان الله ارحمني من هالعذاب .. من وقت ما ولدت ومو حسنانة شوف ابني .. بس برضعو وبتاخدو مني .. ابني عم يكبر بعيد عن حضني .. مشان الله خليني اهرب من هون .. انا عم موت ما عاد فيي اتحمل اكتر من هيك حط ايدو على اكتافها ..: خلص اهدي دفشت ايدو عنها ..: شيل ايدك انت مين مفكر حالك لحتى تلمسني .. لاقيلي حل ما عاد اتحمل اكتر من هيك قعد فؤاد عالكنبة واشرلها تقعد جنبو ..: تعالي شوي خلينا نحكي قعدت جنو فؤاد : عندي حل .. بس بدو شوية وقت جومانا برجاء …: موافقة بس اطلع من هون فؤاد : نتزوج جومانا بعدم فهم ..: نعم!!! فؤاد: نتزوج انا وانت .. هيك انت بتكوني عاسمي وما رح اسمح لحدا يقرب منك وبتكوني مسؤولة مني اطلعت بعيونو وعلامة الصدمة على وجهها .. اخد معها وقت لحتى استوعبت شو حكى..: شو عم تخبص .. انا عم قلك طلعني من هون وانت عم تقترح تعلقني بهاي العيلة اكتر .. انت في شي براسك !! اسمع انا عارفة انك مو مقتنع بهدا الحكي واكيد ما بتقبل تتزوج وحدة ما بدها ياك .. خلص انت هربني من هون ووعد ما عاد خليك تشوف وجهي بعمرك .. اطلع عليها بعدك فهم .. جومانا : شبك .. انت متخيل اني وافق ارجع اربط حالي فيك وبعيلتك .. انا اذا ببقي هون اكتر من هيك بموت .. افهم عليي مشان الله .. انا عايشة بجهنم وما عاد اتحمل اكتر من هيك لف وجهو للجهة التانية..: ما في حل تاني … بردت اطرافها وحست برعشة بكل جسمها فؤاد : شو قلتي! حطت ايدها على دقنو ولفت وجههو عليها ..: انت موافق ؟؟ فؤاد بغصة بعد ما حس بالرفض الواضح بعيونها ..: ما عندي حل تاني .. يمكن مع الايام الامور تنحل بس حالياً ما في حلول تانية.. متل ما انت مغصوبة انا كمان مغصوب وما عندي حل تاني وقفت قدامو ..: فؤاد العامري مغصوب !!! سكت وما رد عليها ابتسمت نص ابتسامة ..: ولا ليكون عندك اطماع تانية ضحكت بكل صوتها ..: انت من عقلك بتحكي .. ما تكون مفكر اذا تزوجتك رح عيش معك الحياة اللي كنا نحلم فيها .. ورح كون الك الزوجة اللي بتحبك .. كزت على اسنانها ..: لك انا بكرهك .. وبكره عيلتك ونفسي ادفنكون بالحيا متل ما دفنتوني فؤاد: هدا اللي عندي .. فكري بالموضوع منيح وانا بالغرفة باخر الممر بس بدك ياني بتلاقيني .. طلع من غرفتها تاركها متل البركان شاعلة وقفت مكانها وعيونها على الفراغ اللي تركو .. ابتسمت ببلاهة وعدم تصديق ..: هدا جد بحكي .. بدو يرجع يربطني فيه من جديد .. تجمعوا الدموع بعيونها وإنهارت عالارض ..: يا رب .. يا رب .. يتبع …🥀🥀