*أنتيڪآ* 📜 *روايات* *قليلٌ من الوقت مع القصص يساوي حياةٌ بأكملها🤎🕰️* *نشر جميع القصص والروايات 🤎🕰️* *قناة خاصة لمحبي القراءة والقصص* _ *ننشر جميع القصص والروايات*🤎🕰️ *حب 🤎🕰️* *حزن 🤎🕰️* *اكشن🤎🕰️* *رعب🤎🕰️* *تـحـت إشـࢪاف: تـيـم*​​​​​​​​​​​​​​​​​​​​​​​​​​​​📜🤎 *ࢪابـط الـقـنـاة:* https://whatsapp.com/channel/0029VamfKJHK0IBbdBbxOc3d *.#لعنة_الفؤاد🤎* #الجزء_التاسع بعد يومين قامت عن تختها بعد ما اخدت قرارها .. توجهت لعند فؤاد عغرفتو ودخلت بدون ما تستأذن وقفت بنص الغرفة ..: انا موافقة .. رفع حالو عن التخت وحكى ..: ثواني يزن برجع بحاكيك شال السماعة من ادنو ..: شو في لي هيك دخلتي لا احم ولا دستور .. ما بتعرفي تطرقي الباب .. اطلعت عليه وكان عاري الصدر .. نزلت عيونها وحاولت تغطي على حالها ..: هلق خلصني بقلك موافقة .. جيبلي ابني عندي عالغرفة .. وما تسمح لامك ترجع تاخدو لعندها .. يلا قوم شو ناطر .. دق للشيخ اطلع عليها وقام عن التخت .. قرب منها بهدوء وحكى بخباثة ..: لهالدرجة مستعجلة لكون معك ابتسمت نص ابتسامة ..: لا .. لا يروح فكرك لبعيد .. انا موافقة اتزوجك بس لحتى كون جنب ابني .. غير هيك ما في .. رح يكون زواج عالورق بس .. لا تحلم خليك تقرب مني غمزها ..: بس انا ما جبت سيرة هالموضوع .. إحمر وجهها ..: خلصني .. مو وقت ظرافتك .. بدي ابني وبدي انقل عهاي الغرفة .. ما بدي ابقى هناك هز راسو وعيونو عليها __ بعد يومين واقفة قدام باب غرفة حماتها عيونها حُمر .. ضربت الباب بكف ايدها ..: افتحي واعطيني ابني .. انا امو .. ومن حقي يبقى معي .. افتحي رجعت ضربت بقوة عالباب وصرخت ..: بقلك افتحي .. بلا ما اعمل مصيبة .. لك افتحي .. طلع فؤاد من غرفة المكتب عصوتها ..: شو عم يصير هون ركضت لعندو وضربت عصدرو ..: قول لامك تعطيني ابني .. حرام اللي بتعملو .. لازم رضعو .. جيبلي ابني هلق.. نحنا اتفقنا وانت اخليت بالاتفاق طبطب على كتفها ..: خلص اهدي .. روحي لغرفتك وانا رح جيبلك ياه توجهت لغرفتو قعدت عالتخت وبعدها قامت تمشي بالغرفة .. رايحة جاية بتوتر دقايق وانفتح الباب دخل فؤاد حامل حسن بين ايديه ..: شوفي مين اجى التفتت لصوتو .. ركضت عليه واخدت ابنها بحضنها وشدت عليه .. راحت للتخت وقعدت ترضع فيه انحرج فؤاد واحمر وجههو ..: انا برجع بعد شوي .. ما اعطت اهتمام لكلامو وصبت كل اهتمامها على حسن. بعد ساعة شالت حسن عن صدرها ونيمتو جنبها عالتخت رفعت راسها بعد ما سمعت الباب بنفتح اطلعت وكان فؤاد كانت رح تحكي بس سكتت بعد ما شافتو داخل ومعو المهد الخاص بحسن تابعتو بنظراتها قطع شرودها صوت فؤاد فؤاد : هدا لازم يكون جنبك صح رفعت حاجبها ..: شو هو! فؤاد: سرير حسن .. لازم يكون جنبك اسهلك صح مشان اذا صحي بالليل ما تتلبكي فيه لسا ما استوعبت كأنو وجود حسن جنبها مو من حقها فؤاد : شبك .. انا وعدتك رجعلك حسن .. ما بدك واخيراً استوعبت ..: رح يبقى جنبي عطول فؤاد: لكن .. مو انت امو قامت من مكانها بسرعة واطلعت جنبها وما كان في مكان لسرير حسن بسبب وجود خزانة دروج جنبها .. سحبت الخزانة الصغيرة مشان تعمل مكان للسرير فؤاد : لك لحظة لحظة انا بشيلها لا تتعبي حالك قرب منها وشال الخزانة ورتب المكان وحط السرير جنبها اطلع عليها ..: نيمي حسن هون احسن بلا ما يتعود ينام جنبك مو منيح مشانو حملتو بهدوء ونيمتو بسريرو وصارت تتأمل فيه فؤاد: ما بدك تشكريني ! جومانا : عشو .. من حقي يكون ابني جنبي .. هدا مو عمل بطولي لحتى اتشكرك .. واجبك تعمل هيك رفع حاجبو ..: تمام .. انا رايح .. سلام طلع من الغرفة وتركها مع ابنها .. ___ بالليل دخل فؤاد للغرفة .. رمى مفاتيحو وتلفونو عالطالولة جنب الكنبة الصغيرة اخد تيابو من الخزانة وراح للحمام .. دخل تحت الدوش وغمض عيونو بقهر .. شي تقيل قاعد على صدرو .. طلع من الحمام بعد ما لبس بنطلون البيحامة ولافف الفوطة حول رقبتو اطلع قدامو وكانت جومانا قاعدة بترضع حسن فؤاد بحرج ..: مسا الخير .. ما كنت بعرف انك هون بدون ما تطلع عليه ..: جيت لرضع حسن .. فؤاد : تمام انا بالمكتب اذا بدك شي جومانا ببرود ..: لا عادي خد راحتك .. اخد بلوزتو وطلع من الغرفة وتوجه لمكتبو .. اطلعت جومانا بالفراغ اللي تركو وبعيونها دمعة .. بعد نص ساعة دخل للغرفة .. دخل للحمام .. غسل ايده ووجهو وطلع .. اطلعت عليه ..: شكرًا سحب غطا ومخدة وتسطح عالكنبة ..: العفو هدا واجبي وحقك وما عملت عمل بطولي لتتشكريني اطلعت عليه جومانا بقهر ..: تعى نام هون عالتخت .. الكنبة مو مريحة هلق ظهرك بصير يوجعك فؤاد : مو مشكلة .. ما بدي ازعجك قامت عن التخت بإصرار وتوجهت لعندو .. سحبت الغطا ..: قوم .. مو مشانك .. اطلع عليها بعدم فهم جومانا : مشان ما يأنبني ضميري عليك ابتسم ..: هيك لكن .. مشان يرتاح ضميرك قلتيلي .. لكن خلي ضميرك يأنبك عليي وانا نايم عالكنبة ومو مرتاح سرحت بإيتسامتو الجذابة ..: عم تتهاضم يعني بحركة سريعة .. سحبها من ايدها وشدها لحضنو ..: اذا بقلك شغلة ما بتعملي مصيبة رفعت راسها والصدمة على وجهها من حركتو ..اطلعت بعيونو وسرحت فؤاد بحب ..: اشتقت لجوجو حبيبتي ثواني لاستوعبت وضعها .. نايمة على صدرو وعم تسمع كلامو اللي ادمنت عليه ..: شو عم تعمل لمس خدها بحب ..: عم عبرلك عن مشاعري اللي ما عاد فيني اتحكم فيها تخدرت بين ايديه وما عاد عرفت شو عم تخبص ..: وانا اشتقتلك قرب وجهها من وجهو .. وكان رح يبوسها بس استوعبت اخيراً وضعها .. بعدت عنو بغضب ..: بدك تنام عالتخت نام ما بدك انت حر تركتو وراحت لتختها .. دفنت حالها تحت الغطا لتحاول تخبي مشاعرها اتجاهو .. ابتسم فؤاد وهمس ..: والله اشتقت لجنونك اخد المخدة والغطا وتوجه للتخت .. تسطح وحكى بمزاح ..: ما بدك تحطي حدود جومانا من تحت الغطا ..: فؤاد اختصر احسن لاقلب ليلتك سودا فؤاد: تصبحي على خير ما ردت وراحت بالنوم من التعب ******* واقفة قدام مرايتها عيونها على انعكاس صورتها..: انت يا جومانا عمرك ٢٦ سنة .. كيف صرتي هون .. شو ذنبك .. شو الغلط اللي عملتي لحتى عم تتعاقبي بهاي الطريقة .. ولا هذا ابتلاء وربنا بدو يختبر صبرك .. يا رب انا تعبت .. ما عاد فيي اتحمل اكتر من هيك .. حست بالعطش فجأة .. توجهت للباب فتحتو وطلعت بدون ما نتنبه اصطدمت بشخص رفعت راسها وكان فؤاد بوجهها قرب منها بهدوء ولف ايده على خصرها وعيونو بعيونها وهمس .: اشتقتلك جومانا نزلت ايديه عن خصرها بقوة والتفتت حولها ..: انت مجنون.. شو اللي عم تعملو .. انا زوجة اخوك فؤاد بهمس ..: لا تخافي ما في حدا بالبيت .. دفشتو بعيد عنها ..: شو عم تخبص انت فؤاد بعشق ..: اشتقتلك عم قلك .. ما عم تفهمي حملها من خصرها ودخلها للغرفة .. نيمها عالتخت بهدوء .. قرب منها وشال شعرها عن وجهها .. مسح على خدها بحب .. قرب وهمس..: مستحيل تكوني لحدا غيري .. قرب شفافو من شفافها .. صحيت من النوم مرعوبة .. دقات قلبها مليون والعرق عم يتصبب على جبينها سكرت عيونها بتعب وزفرت ..: حمدلله منام .. استغفر الله العظيم التفتت لشمالها وانصعقت بس شافت فؤاد نايم جنبها وغاطط بالنوم ..: هدا شو عم يعمل جنبي .. معناه مو منام اطلعت على يمينها وشافت مهد حسن جنبها .. اخدت نفس وتذكرت انها صارت زوجة فؤاد التفتت عليه واطلعت عليه بحب ومشاعرها مخربطة .. دقات قلبها سريعة ..: شو هالاحساس هدا مدت ايدها ولمست دقنو ..: لي ما كانت نهاية قصتنا حلوة .. حست بإحساس غريب اجتاح مشاعرها وقلبها .. ما حست على حالها كيف عم تقرب منو بهدوء وعيونها على شفايفو ..: اشتقتلك كتير قربت اكثر بس وقفتها كلماتو العاشقة همس جنب شفافها ..: وانا كمان اشتقتلك فتحت عيونها عالاخر وانربط لسانها قربها منو اكتر ..: مشان الله جومانا شيلي الحاجز اللي بينا وخلينا نعيش كل حلم حلمنا فيه سوا صحيت على حالها وبعدتو عنها بقوة ..: بعد عني .. احلامنا دفنتها من زمان ولا عاد بدي ارجع احلم بشي حلم وانت موجود فيه لفت حالها للجهة التانية ..: بعد عني فؤاد .. ما عاد بدي ياك قرب منها وحضنها ..: انا شو ذنبي لحتى عم تعاقبيني جومانا : انا اللي شو ذنبي لحتى تعملو فيي هيك .. انا بشو غلطت لحتى عم يصير فيي هيك .. ما حدا فكر فيي ولا حدا حس فيي .. فؤاد: مشان الله جومانا انسي .. انسي وخلينا نبدأ صفحة جديدة .. صفحة بيضا نمليها حُب انا وانت وحسن الصغير جومانا بقهر ..: كلو منك انت .. انت اللي تركتني ورحت .. لو ما تركتني ما كان صار هيك .. فؤاد: انا بعترف اني غلطت وبعترف اني السبب .. سامحيني جومانا بقهر كبير ..: لو بوقتها رديت على مكالماتي كان هربنا سوا وما وصلنا لهون لفها عليه ..: خلص انا معك اليوم .. اطلعت عليه وحكت بكل قوتها ..: فؤاد انا قدامك جسد بس .. اذا بدك جسمي خدو هيك غصب عني ..( ابتسمت بقهر ) .. خدني غصب عني متل ما كان يعمل اخوك حس للحظة الدم طلع لراسو وبانت عروقو وصار يرجف.. رفع حالو وحط ايديه على رقبتها ..: لا عاد تجيبي هالسيرة جومانا .. عم نبهك جومانا .. لا تعيديها حست نفسها انقطع .. نزلو دموعها غصب عنها .. حست انو خلص اجت النهاية اطلع عليها وشاف دموعها .. شال ايديه عن رقبتها غمضت عيونها بقهر ..: كمل خليني اخلص .. كمل خليني ارتاح اخدها بحضنو وقلبو مقهور عليها وعليي عملو ..: انا اسف حبيبتي .. انا اسف سامحيني ضمها اكتر لصدرو وما في غير شهقاتها جومنا بقهر ..: تعبت .. فؤاد : ما بدي منك شي من اللي بتفكري فيه .. لو بدنا نبقى متل الاخوة كل العمر ما بتفرق معي .. اللي بدي ياه تنسي كل شي صار .. بدي ترجعي جومانا القديمة اللي عرفتها وحبيتها .. بدي اصحى كل يوم شوف ابتسامتك اللي عشقتها .. روحك الحلوة .. اصرارك ..بدي ترجعي للشركة وتكملي اللي كنتي تحلمي فيه .. ما بدي شي تاني .. وحياتك عندي ما بدي شي تاني من اللي بتفكري فيه اطلعت عليه وعيونها مليانة دموع ..: ماتت من زمان .. جومانا اللي بتعرفها روحها حلوة .. روحها طلعت زمان وما بقي منها غير شوية بقايا عم حاول عيش فيهن شدها لحضنو اكتر … : اعطيني فرصة .. ما بستاهل منك فرصة دفنت حالها اكتر بحضنو بدون ما تجاوب __ بعد ايام واسابيع فتحت عيونها والابتسامة عشفافها على غير العادة.. التفتت لجنبها وشافتو عيونو عليها ومبتسم بلعت ريقها ..: شبك مد ايدو ولمس شفافها بطرف اصبعو ..: اول مرة بشوفك صاحية مع ابتسامة على هالشفاف اللي بعشقهن احمر وجهها وزادت دقات قلبها .. فؤاد : خليكي هيك .. مبتسمة .. اشتقت شوف ابتسامتك اللي بتفرفح قلبي حاولت تتسحب وتبعد عنو .. بس كان اسرع منها وسحبها لحضنو اخد نفس طويل لدرجة تغلغل عطر شعرها لداخل قلبو ..: خليكي هون .. لا تبعدي تحركت لحتى تبعدو عنها بس قبضتو اقوى .. استسلمت لحضنو ودفنت راسها بحضنو همس جنب ادنها ..: بدك عيشك مغامرة ولا بالاحلام رفعت راسها واطلعت عليه ..: شو هالمغامرة فؤاد : انت وافقي واتركي الباقي عليي جومانا : وحسن !! فؤاد: رح نتركو عند امي .. ما رح نتأخر .. يلا قومي جهزي حالك جومانا: وامك رح توافق انه نطلع سوا قام عن التخت وسحبها ..: قومي لسا بتسألي .. سحبها ودخلها للحمام ..: يلا ادوشي وانا رح اعمل قهوة سكر الباب وبقيت واقفة مكانها وما عم تستوعب .. اطلعت عحالها بالمراي وابتسمت ..: سمعتو صح .. راح يعملي قهوة ضحكت بغباء ودخلت تحت الدوش .. بعد وقت .. طلعت لفت حالها بالمنشفة وتوجهت للباب مدت راسها ..: فؤاد .. انت هون ما سمعت رد .. تسحبت على روس اصابعها سحبت تيابها ورجعت ركض عالحمام سمعت من برا صوت ..: ايه اهربي اهربي مني .. لبست تيابها وتوجهت للبلكون قعدت مقابلو ..: لو نحنا متزوجين عادي وطبيعي كان بتعملي قهوة كل صبح هيك مسك الركوة وصب بالفنجان وقدملها ياه ..: اول شي نحنا متزوجين .. وعادي .. لا تضلك تفكري باللي مضى .. خلص اقلبي صفحة وعيشي اللحظة متل ما هي .. وتاني شي .. ايه بعملك قهوة لانه قهوتك ما بتنشرب .. ضحكت ..: هيك لكن .. معناه بدي اصير اعمل كل يوم ركوة قهوة ولازم تشربها غصب .. مسك ايدها وباسها بحب ..: من ايدك بشرب سم وما بقول لاء بس انت ضلك اضحكي هيك رفعت خصلة ورا ادنها ..: وين بدك تاخدني فؤاد : لا هاي خليها مفاجئة .. انت اشربي القهوة وتركيها عليي رشفت رشفة من الفنجان .. فؤاد: كيف!؟ جومانا: زاكية كتير .. شو السر فؤاد: لانه انا بعملها جومانا : شو متواضع .. فؤاد: يلا قومي بدلي تيابك والبسي شي مريح هزت براسها وقامت .. بدلت تيابها ورجعت اطلع عليها من فوق لتحت كانت لابسة جينس فاتح مع بلوزة كم طويل ..: شو هدا .. مو حر عليكي سحبت كم البلوزة ..: لا انا هيك تمام رفع حاجبو ..: كيف بدك .. البسي بوط رياضي .. رح اعمل تلفون وراجع __ طلع من مكتبو والتلفون على اندو ..: فؤاد هلق وقت الاجازات .. اعتلت الصدمة ملامحو ..: شو تزوجت .. انت صاحي .. ايمتى وكيف ومين.. سكت فجأة بس شاف نادبا واقفة مع واحد من الموظفين ..: تمام تمام .. خلص روح انت بحاكيك بوقت تاني قفل الخط مع فؤاد وعيونو على ناديا .. عقد حواجبو وهو شايف الخجل على وجهها وخدودها بلون الوردي .. احمرت عيونو اكتر لما شافها بترفع خصلة من شعرها لورا ادنها بخجل واضح .. بدون مقدمات تقدم منها ..: خير .. شو عم يصير هون تلبكت ناديا ..: استاذ يزن يزن بعصبية..: ايه استاذ يزن .. يا انسة من نص ساعة طلبت منك ملف المجمع السابع .. لازم كل شغلة تاخد وقت لحتى تتنفذ .. ناديا: استاذ حضرتك ما طلبت مني شي .. يزن بعصبية ..: قصدك تقولي اني خرفت !!!! استغربت ناديا طريقتو الهجومية ..: العفو استاذ .. يمكن انت طلبت مني وانا نسيت رفع حاجبو ..: عم تاخديني على قد عقلي يعني !!!! اطلعت بزميلها نظرات استغاثة .. وبعدها وجهت نظرها ليرن ..: ثواني والملف عندك تركتن وتوجهت لمكتبها ركض .. اخدت الملف وكانت رح تطلع بس اصطدمت بيزن وهو داخل عمكتبها ناديا بإرتباك ..؛ بعتذر استاذ وقف يزن واطلع عليها نظرات غريبة وحاسس قلبو رح يطلع من مكانو.. حاول يتمالك مشاعرو ويضيع الموضوع ..: حضرتك بشركة محترمة .. ولازم تحترميها ناديا : استاذ انت ما طلبت مني شي اليوم .. وانا ولا مرة قصرت بشغلي صرخ بوجهها بدون وعي ..: ما قصدي عالملف .. قصدي على وقفتك مع.. سكت فجأة لما وعي على حالو وعلى تخبيصو .. اطلعت عليه ناديا بحيرة .. سحب من ايدها الملف وطلع من المكتب .. ____ بعد ساعة وقف سيارتو واطلع عليها ..: يلا انزلي جومانا بإستغراب ..: شو هدا المكان نزلت جومانا وعيونها مفتوحة عالاخر ..: لا تقولا .. رح نركب منطاد هز فؤاد براسو ..: ايـه .. مستعدة جومانا بإنفعال ..: لك انا المستعدة .. قربوا من المنطاد وساعدون المسؤل ليركبو شعلت النار وبلش ينتفخ المنطاد .. دقايق وصار يبعد عن الارض بلش يرتفع لفوق كتير وجومانا واقفة ومعالم الانفعال والحماس واضحة على وجهها قرب منها فؤاد وشدها لصدرو وهمس جنب ادنها ..: شو رأيك التفتت عليه بعد ما استوعبت انها بحضنو وبين ايده ..: عم تعمل هيك لترضيني ولا لترضي غرورك لف ايدو حول خصرها وشدها اكتر لحضنو وسند دقنو على كتفها ..: معك ما بعود عندي غرور .. عم بعمل هيك لعوضك على الغلطة اللي عملتها .. جومانا بإستغراب ..: اي غلطة ركز نظرو بالعدم ..: ما بحب اتذكر الماضي .. بس كلو بسببي صار .. خلص انسي .. انا رح عوضك عن كل شي وبوعدك نسيكي كل اللي صار هزت براسها بلا ما تجاوب قرب منها اكتر..: شبك سرحانة ..ما حبيتي ؟؟ جومانا: بتأمل بالطبيعة .. التفتت عليه ودقات قلبها عالية من قربو ..: عم فكر اذا رح انحرم كمان مرة من حريتي .. فؤاد: انت لسا ما عرفتيني ؟ اطلع بعيونها وحكى بنبرة هادية ..: جومانا .. انت بدك تبقي معي جومانا بتوتر واضح ..: بدي ارجع لحياتي الطبيعية .. فؤاد: ما منعتك من شي .. شو بدك انا حاضر جومانا بقهر ..: انت عملت متلن .. فؤاد: انا بدي كون معك بس .. يمكن التوقيت ما كان صح .. بس انا نيتي كانت واضحة .. بدي تكوني معي لترجعي اللي فقدتي بس جومانا : بس انت غصبتني اتزوجك .. وخيرتني بخيارين صعبين .. مع ان كان بإبدك تعطيني حريتي او عالاقل تخيرني بين اني ابقى او روح حط جبينو على جبينها ..: جومانا .. انا فؤاد .. بلعت ريقها واحمر وجهها .. فؤاد: مستحيل اغصبك تبقي معي اذا انت ما بدك .. بعد عنها شوي ..: بدك تبقي معي !؟ اطلعت بعيونو وهزت براسها بلا وعي قرب منها بهدوء عكس الشوق اللي بقلبو وطبع بوسة عشفافها كانت ثواني كفيلة بهز كيانها من الداخل فؤاد: انا اسعد انسان على وجة الكرة الارضية شدها لحضنو ولف ايده عليها ..: خليكي بحضني .. ما بدي تبعدي عني .. ____ بعد ساعة بالسيارة جومانا بإمتنان ..: شكراً الك .. جد كانت مغامرة حلوة فؤاد: المرة الجاي رح نروح نقفز بالبارشوت جومانا : لااا هيك كتير .. وصلو عالبيت وتوجهو لغرفتن دخلت جومانا ..: رح ادوش بسرعة .. سحبها من ايدها وشدها لحضنو ..: كانت احلا ساعات معك .. بدون مقدمات قربت منو وطبعت بوسة صغيرة على خدو وبعدت عنو ..: شكراً تسحبت بسرعة للحمام بعدما حست باللي عملتو .. وقفت ورا الباب وايدها على قلبها ..: لسا بتنبض بإسمو .. لساتو موجود داخلك .. ____ بعد أيام كان قاعد بغرفة القعدة دخلت امو عليه .. ام فؤاد: قوم ابني وصلني لبيت خالتك اطلع عليها فؤاد..: لشو بيت خالتي هلق .. شو رأيك اعزمك عالغدا بشي مكان ام فؤاد: لا .. وعدت خالتك نتغدا عندها اليوم فؤاد بإستغراب ..: نتغدا !! .. مين نحنا !! ام فؤاد: انا وانت فؤاد: امي انا فاهم عليكي .. الموضوع اللي براسك انسي .. وماني رايح معك .. عندي اجتماع كمان نص ساعة.. ام فواد : لا بدك تبجي .. يلا قوم وبلا تفزلك قام من مكانو ..: انا متزوج وتزوجت غصب .. واكيد ما رح عيد التجربة كمان مرة .. لما افكر اتزوج انا رح اختار زوجتي اطلعت عليه ..: خلصت فزلكتك .. يلا تحرك فؤاد بغضب ..: امي .. ركزي معي .. انا مو حسن لحتى تمشيني كيف بدك.. انا فؤاد .. وفكرة الزواج مو ببالي بالوقت الحالي .. وبنت اختك هاي انا ما بطيقها ودمها تقيل بشكل لا يوصف .. طماعة وجعانة ووصولية .. شو بعد بدك قلك عنها قعدت امو عالكنبة والدموع بعيونها ..: حسن .. الله يرحمك يا حسن .. الله يرحمك يا ابن بطني .. رحت بعز شبابك بدون ما افرح فيك .. اه يا حسن وين رحت وتركتني يا ابني .. قرب منها فؤاد بغصة وقعد عند رجليها ..: امي مشان الله ما تبكي .. ما كان قصدي .. بترجاكي اهدي .. خلص بروح معك بس انسي موضوع الخطبة .. ام فؤاد بحزن ..: بدك تبقى رابط حالك ببنت هالحرام هاي وانت عارف اني رح قلعها بس يكبر حسن فؤاد: امي بترجاكي بكفي .. انا مو صغير لتقرري عني كيف عيش حياتي … امي انا كبير وواعي بما فيه الكفاية .. بكفي .. وحياتي رح كفيها مع جومانا .. خلص اكتفيت من الزواج ما رح اتزوج مرة تانية لاني مو مفكر بالموضوع دفشتو من صدرو ..: منيح متذكر انك كبير .. قول لحالك .. سامح لبنت هالكلب تتحكم فيك .. بدك تعمل عليي رجال يا ابن بطني .. روح اعمل عليها وخد حقك الشرعي منها احسن .. انصدم بكلامها ام فؤاد : مفكر ما بعرف انها مو راضية تسمحلك تقرب منها .. روح خد حقك بالغصب .. فؤاد: امي ما بسمحلك .. هاي حياتي الخاصة .. اخد مفاتيحو وتلفونو وكان رح يطلع من البيت بس وقفو حكي امو ام فؤاد: بغضب عليك ليوم الدين اذا ما بتتزوج بنت خالتك .. لا انت ابني ولا انا امك اطلع عليها بحسرة ..: مو جديد الموضوع امي من كل عمري وانا مو ابنك ومعتبرتيني غريب .. ام فؤاد بجبروت ..: جهز حالك مشان نروح نخطب البنت فؤاد : لا ما رح جهز حالي لشي .. ام فؤاد : بدك تعصيني مشان هالكلبة فؤاد : لا امي .. هدا مو عصيان .. بس انا ما عاد فيي اتحمل اوامرك اكتر من هيك .. تحكماتك عم تخنقني دخل ابوه على اصواتن ..: شبكن لي عم تتخانقو فؤاد : ابي انا رجعت مشانك .. بس خلص طفح الكيل ام فؤاد: ما بدو يتزوج جنى بنت اختي ويجيبلي ولد يفرح قلبي أبو فؤاد: هيام نحنا حكينا بالموضوع .. خلص بكفي ام فؤاد : لا ما خلصنا .. بدو يتزوجها غصب عنو .. شو بدي خبر اختي وانا اخدت منها موعد مشان نخطب البنت اطلع عليه أبو بفؤاد ورفع كتافو بمعنى ما طالع بإيدي اعمل شي فؤاد: اعملي اللي بدك ياه .. ما عاد تفرق كتير طلع للغرفة واخد شنطة السفر كانت جومانا قاعدة عالتخت وبترضع ابنها وعيونها عليه فتح الشنطة واخد تياب من الخزانة ورماهن عالشنطة بغضب جومانا: مسافر؟ اطلع عليها بقهر ..: رايح وماني راجع شالت حسن عن صدرها ونيمتو بسريرو .. قربت منو ورجليها برجفو ..: شو .. شو يعني رايح ومو راجع فؤاد : متل ما سمعتي .. رايح .. راجع عامستردام … جومانا: وانا ..! وين اروح ؟؟ لف حالو وما جاوب قربت منو اكتر ولفتو عليها ..:وانا وين اروح !! نزل عيونو بالارض بلا ما يجاوب حطت ايدها على وجهو واطلعت بعيونو ..: جاوبني .. رح تتركني هون لحالي .. رح تتركني بعد ما وعدتني انك رح تساعدني اذا قبلت نتزوج .. شبك .. رد عليي.. بدك تهرب كمان مرة وتتركتيي صارع الحياة لحالي متل المرة الماضية .. جاوب.. بدك تتركني لارجع اتعذب .. لك انت وعدتني تحميني .. ما بدي ابقى هون لحالي .. خدني معك اذا بدك تروح .. بلحظة ضعف وبدون وعي لفت ايديها حول خصرو وحضنتو بقوة ..: لا تتركني فؤاد .. مشان الله شدها لحضنو اكتر ..: خلص .. اهدي .. ما رح اتركك اطلعت عليه نظرات رجاء ..: بتوعدني .. غمض عيونو بقهر .. : وعد .. ______ نيمت حسن بسريرو بهدوء وخايفة ليرجع يصحى .. تسحبت من الغرفة على روس اصابعها.. خفضت الضو وتوجهت للمطبخ دخلت المطبخ وكانت حماتها واقفة عم تعمل ركوة قهوة هيام : وين رحتي وما رجعتي جومانا : حسن مو راضي ينام هيام : الحق عليكي .. كل ما بكي شوي بتحمليه .. بتفتشي على حجج لتهربي من الشغل وهاي نتيجة حيونتك .. ما عاد يهدى الصبي جومانا بغضب ..: ما بسمحلك .. احكي معي بطريقة احسن من هيك .. وانا مو خدامة هون انا متلي متلك بهدا البيت .. انا مرت فؤاد .. مو الخدامة اللي جبتيها قربت منها والغضب بعيونها .. مسكتها من زندها ..: شو حكيتي ست الحُسن .. متلي متلك .. جومانا : متل ما سمعتي.. متلي متلك .. وانا مو خدامة .. اذا عم ساعدك بشغل البيت مو لاني ضعيفة .. لا .. انا بساعدك لاني مرباية ببيت اهلي .. واهلي علموني اني ساعد الكبير .. واذا ما بجاوبك لما تشتميني مو لاني ما فيي جاوب .. بس كمان علموني اني ما رد جواب لحدا كبير .. ما تفكري اني ضعيفة .. لا مو ضعيفة ابداً هجمت عليها هيام وكانت رح تضربها استجمعت جومانا قوتها ومسكت ايدها ..: لا تحلمي من هاي اللحظة تمدي ايدك عليي .. دخل فؤاد للمطبخ وشاف جومانا ماسكة ايد امو ..: شبكن تركت جومانا ايد هيام وانسحبت لورا ..: اسأل امك .. رايحة شوف حسن عم يبكي نزلت هيام دمعتين بالزور ..: عم تتهجم عليي بدها تضربني فؤاد : امي .. كنت واقف برا المطبخ وشايف وسامع كل شي .. شو بدك من المخلوقة .. هيام بغضب ..: بدك تبقى اتدافع عنها تنهد ..: امي .. البنت محترمتك وشايلتك على راسها وبدها تعيش بسلام لتربي ابنها .. لي تخلقي مشاكل من تحت الارض .. ما عملت شي لتعملي كل الدراما هيام : انا بتقلي دراما فؤاد: انا تعبت من كل هالقصص .. عم تضغطي عليها لتطلع اسوء شي عندها.. خلص امي هدا الوضع ما عدت اتحملو .. هيام : ايه ايه خليك دافع عنها .. انسى انها اخت اللي قتل اختك .. انساها لهاي القصة فؤا : انت قلتيها .. اخوها مو هي .. هي ما الها علاقة .. خلص اتركيها بحالها طلعت هيام من المطبخ معصبة وفؤاد توجه لغرفتو دخل للغرفة وكانت جومانا قاعدة وعم تهز برجلها قرب منها وقعد جنبها ..: مساء الخير جومانا : حضرلك العشا فؤاد: ايه اذا ممكن جومانا : دقايق وبكون جاهز توجهت لعند الباب ووقفت …. التفتت عليه ..: بعتذر .. يمكن غلطت لما مسكت ايدها .. بس غصب عني .. هز براسو بلا ما بجاوب جومانا : بوعدك اتحكم بأعصابي اكتر من هيك طلعت من الغرفة بلا ما تسمع ردو دخلت المطبخ وبلشت تجهز العشا وهي اتدندن قبل ما تخلص العشا سمعت صوت ضجة برا المطبخ طلعت لتشوف شو صاير .. كانت هيام جارة شنطتها وراها وبدها تطلع من البيت ومدحت عم يهديها وفؤاد واقف متفرج صامت مدحت : يا مرا استهدي بالله وين بدك تروحي .. هيام : ما الك علاقة بدي اطلع من البيت واتركو للست جومانا مدحت: انت عم تخلقي مشاكل مع البنت وبدك تطلعي حالك مظلومة .. كنتي بدك تضربيها ومنعتك كفرت هيام: المرة هاي منعتني المرة الجاي بتضربني .. اليوم بتقلي متلي متلك بكرا بتطردني من بيتي .. لا حبيبي انا بطلع من بيتي بكرامتي احسن تقدم منها فؤاد .. : اذا بدك ترتاحي نحنا بنطلع من البيت ضحكت هيام ..: شايف يا ابو فؤاد هدا فؤاد .. ابنك الطرطور .. مرتو عملت كل اللي عملتو مشان تسحبو ويطلعوا من البيت فؤاد ببرود ..: لا امي مو طرطور .. بس انا مو ظالم هيام بغضب ..: شايف كيف بجاوبني مدحت بهمس ..: لك خلص استهدي بالله شدت شنطتها وسحبتها وراها ..: انا رايحة لبيت اختي .. يا انا يا هاي الكلبة بالبيت تركها مدحت وطلعت فؤاد: ابي روح معها بلا ما تروح لحالها مدحت : ايه انت اعمل مشاكل وانا حطني بوز مدفع .. هلق بكون بهيام بعد شوي بصير هيام وسهام ضحك فؤاد ..: بميزان حسناتك ابو فؤاد مدحت : ايه تمسخر لقلك .. اعطيني مفتاح سيارتك اخد منو المفتاح وطلع بهالوقت دخلت جومانا للمطبخ وكملت تحضير العشا كانت واقفة وعم تقطع الخضروات للسلطة حست بجسم صلب ورا جسمها همست بتوتر ..: شو بدك قرب تمو من ادنها وهمس ..: ما بدك مساعدة زادت نبضات قلبها ..: لا .. لا .. خـــ .. خلــصـت حط ايدو فوق ايدها وصار يقطع معها ..: بس انا شايف لسا عم تعملي السلطة .. حابب ساعدك نفخت بقوة لتشيل الخصلة اللي نازلة على جبينها رفع ايدو وشالها لورا ادنها ..: هاي مزعجتك لفت حالها واطلعت عليه ..: شو عم تحاول تعمل دبل عيونو ببراءة ..: بدي ساعدك حطت ايدها على صدرو وبعدتو عنها.. : شكراً ما بدي مساعدة رفعت شعرها بنرفزة وعملتو كعكة ..: روح من هون هلق بصحى حسن .. بعد السلطة وبكون العشا جاهز ضربت عيونو على رقبتها المكشوفة ..: لا تتحركي جومانا بخوف..: شو في قرب منها بهدوء وطبع بوسة على رقبتها خلتها ترجف فؤاد : ما في شي .. كملي زادت ضربات قلبها وحست بحرارة بوجهها بسبب عملتو صحيت من صدمتها وما كان موجود .. رجعت للوح التقطيع وصارت تقطع الخضار بغل وتمتم ..: ايه .. صحيح انا لعبة .. ايمت ما بدو بقرب مني وايمت ما بدو بختفي.. اساساً ما بكون فؤاد اذا ما عمل هيك .. مستفز وحقير شهقت بعد ماحست على ايديه حاوطو خصرها ودقنو على كتفها وانفاسو بتلفح برقبتها فؤاد بحب ..: بدك ابقى جنبك وما ابعد .. ببقى .. بس قولي لفت عليه وبإيدها السكينة ولساها باحضانو ..: فؤاد اختصر اطلع عالسكينة ..: لا تتهوري ام الجوج جومانا بغضب ..: روح من هون رفع ايده ..: رايح رايح .. بس بدون عنف رفعت حواجبها بمعنى برا قرب منها وخطف بوسة من خدها وهرب وقف على باب المطبخ ..: هاي لفتح الشهية تسحب ووطلع ضحكت جومانا على جنونو .. كيف بكون رزين وعاقل وفجأة بتحول وبصير عاشق مجنون معها .. تنهدت بقهر بعد ما رجعت لواقعها .. وتذكرت وين هي وشو عم تعمل بهالبيت .. طردت كل الافكار من راسها ورجع سيطر الحقد على قلبها __ بعد اسابيع كانت جومانا قاعدة قدام مرايتها .. رفعت ايدها تتحسس التجاعيد اللي طلعت حول عيونها .. قربت وجهها من المراي والدمعة عالقة بعيونها .. همست بقهر ..: لساتك صغيرة يا جومانا عالتجاعيد .. في صوت من داخلها ..( خلص انسي .. عيشي شبابك ولا عاد تبكي عالماضي .. حبيبك جنبك وعم بعمل اي شي لحتى بس ترضي عنو ويرضيكي.. لي بدك تبقي تبكي عاللي راح من حياتك .. اللي جاي اكيد احلى .. خلص بكفيكي قهر .. اركبي الموجة وعيشي اللحظة ).. همست ..: صح بكفي .. رح ابدأ حياة جديدة مع فؤاد .. وكل اللي راح لازم امحاه .. قامت من مكانها وطلعت من الغرفة .. توجهت لغرفة القعدة كان حماها وحماتها قاعدين دخلت بهدوء ..: صباح الخير ردت هيام ..: أمر !!! مدحت: اهدي .. صباح النور يا بنتي.. تعي اقعدي معنا جومانا بتوتر ..: عمي .. بدي انزل عالسوق هيام: روحي وين بدك بس لحالك .. حسن ببقى هون جومانا : عارفة .. كنت بدي اطلب منك يبقى معك لحتى ارجع وقفت هيام ..: شو ست الحُسن والجمال .. بدك تعطيني اوامر كمان .. انقلعي وين بدك ماحدا سائل فيكي نزلت راسها ..: بالاذن مدحت : بعدين معك انت.. بدك اطفشي المخلوقة .. هيام بغضب ..: انت متل ابنك مدحت: لي بتزعلي من الحق .. المخلوقة ما عاملتلك شي .. مطيعة وصوتها مو مسموع .. شو بدك منها .. بدك تعمل معك مشاكل لحتى تبيني حالك مظلومة .. خلص بكفي ولا ما بترتاحي غير ما اطفشيها هي وابنك قامت هيام بغضب وتركت الغرفة دخلت جومانا لغرفتها بدلت تيابها وطلعت من البيت اخدت تاكسي واعطتو عنوان شركة فؤاد .. وصلت للشركة .. توجهت لمكتب فؤاد شافها فؤاد بالممر ..: جومانا .. شو عم تعملي هون جومانا : جيت لشوفك فؤاد : تعالي للمكتب جومانا : مو ضروري هون بنفع سحبها من ايدها واخدها للمكتب فؤاد : تشربي شي جومانا : لا مالو لزوم .. كنت بدي خبرك بشي فؤاد: قولي جومانا : حابة ارجع للشغل رفع فؤاد حاجبو ..: بتحكي جد .. احلى خبر .. فيكي تبلشي ايمتى ما بدك جومانا بتوتر ..: بس انا بحاجة مصاري .. بدي جيب كم قطعة تياب وهيك اشياء طلع محفظتو ..: خدي هاي الكريدت كارد .. جيبي شو بدك .. اخدتها منو بخجل ..: بس اقبض راتبي رح رجعلك المصاري اطلع عليها ..: بس بدك توقعي على وصل امانة استغربت كلامو ..: ليش وقع .. خلص انت بتخصمون من راتبي ضحك بصوت عالي ..: بربي مجنونة .. لك انت زوجتي .. يعني انا مجبور فيكي .. انت مسؤولة مني .. بلاه الكلام الفاضي .. جيبي شو بنفسك .. وجيبي تياب لحسن على ذوقك .. جومانا : شكراً الك .. انا بدي انزل عالسوق هلق .. ما بتأخر .. لانو حسن عند امك ما بدي اتأخر عليه قام من مكانو ..: لحظة في شي جبتك ياه من مدة وما اجت مناسبة اعطيكي ياه طلع بوكس واعطاها ياه ..: هدا تلفون الك وفي شريحة .. اذا بتحتاجي شي حاكيني قامت من مكانها لحتى تطلع وابتسمتلو بحب ..: صار لازم روح .. ما بدي اتأخر على حسن .. بشوفك مسكها من ايدها وسحبها لعندو ..: سامحيني .. ابتسمتلو بحب ..: مسامحتك .. قررت غير حياتي .. ويمكن مع رجعتي للدوام يتغير كل شي .. بوعدك فؤاد: لكن لحظة بعد عنها وراح لمكتبو ..طلع كتاب من الدُرج ..: هاي كمان جبتها .. لسا بتعشقي الروايات مو هزت براسها بحماس اخدتها منو ..: هاي العشق … قلبت الرواية ..: كيف لسا متذكر اني بدي هالرواية فؤاد: ما بنسى شي بخصك .. كل شي موجود هون اشر بإصبعو على قلبو نزلت راسها بخجل بدون ما تجاوب حط ايدو على دقنها ورفع راسها .: شبك مو على طبيعتك في شي ما بعرفو ؟؟ حركت راسها يمين شمال ..: لا .. بس في مفاجئة صغيرة الليلة فؤاد بإنفعال ..: لااا .. ما بحب المفاجئات جومانا : ما بصير .. انا صار لازم روح .. سلام هربت منو و طلعت من المكتب وعلى وجهها ابتسامة رضى من اللي عملتو .. طلعت من الشركة اخدت تاكسي وراحت للمول .. اشترت تياب للشغل وشوية اغراض وتياب لحسن .. طلعت من متجر الملابس مشت شوي وبعدها وقفت جنب متجر للملابس الداخلية واللنجري .. ترددت شوي بس دخلت .. تفتلت شوي ..: ساعدك بشي مدام التفتت جومانا وكانت صبية .. تنحنحت ..: ايه .. بدي .. بدي تياب داخلية الصبية : اكيد تفضلي مدام اعطتها الصبية طلبها جومانا بتوتر ..: بدي من هدا كمان اشرت على ببيي دول اسود .. ابتسمتلها الصبية .. :يلا تواني لجبلك مقاسك .. وفي عنا كمان كولكشن جديد اذا بتحبي تشوفي هزت جومانا براسها بالموافقة .. اشترت كل شي كانت جاية مشانو .. طلعت من المول وراحت لعند الكوافير .. قصت شعرها ورجعت للبيت وصلت البيت ومش عاطية فرحتها لحدا .. احساس داخلها كان حلو .. حست للحظة انها عروس وعم تجهز لليلة العمر .. دخلت لغرفتها ورتبت التياب بالخزانة .. شالت بيبي دول من اللي جابتون وحطتو على جنب .. خلص اخدت قرارها .. الليل رح تغير مسار حياتها .. اطلعت عالساعة وكانت سبعة .. ابتسمت ..: هدا موعد رجعتو عالبيت .. دخلت اخدت دش دافي .. رتبت شعرها وعملت مكياج ناعم .. لبست من التياب الجداد وقعدت قدام المراي ابتسمت لحالها برضى ..: ولاو شوية مكياج بعملو فرق .. ____ وصل بسيارتو لمدخل الفيلا .. نزل من السيارة والتفت لورا بعد ما سمع صوت سيارة داخلة من مدخل الفيلا .. زفر بغيظ ..: شو جابها هاي هلق توجه للباب وتاركها وراه .. سمع اسمو من بعيد ..: فؤاد .. فؤاد لحظة اطلع للخلف ..: خير جنى شو جابك .. جنى بزعل مصتنع ..: هيك بتستقبل خطيبتك فؤاد بغيظ ..: جنى اختصري .. ما نافصني غيرك .. تعبان ومو شايف قدامي .. اذا مرة تانية حابة تيجي لهون تعي بوقت الدوام .. وشو هاي خطيبتي .. مخططاتك انت وامي بتنسيها كتمت غيظها من معاملتو الجافة اطلعت عليه وشافتو عم يطلع المفتاح .. مسكت ايدو ..: انا عاملة مفاجئة لخالتو هيام .. دقت عالجرس ونطرت *** سمعت جومانا صوت الجرس انرسمت ابتسامة على شفافها .. طلعت من غرفتها بسرعة وصرخت ..: مرت عمي انا بفتح وصلت لعند الباب ووقفت فجأة وحكت بقلبها ..( فؤاد لي بدق عالجرس .. ).. حطت ايدها عمقبض الباب وايدها بترجف وفتحت الباب اطلعت قدامها ورجف قلبها كان فؤاد واقف وجنى جنبو بلمح البصر لفت جنى ايدها على زند فؤاد وقربت منو كتير ..: حبيبتي خالتو موجودة حركت حجر عينها بين فؤاد وجنى وسلطت نظرها على ايدها اللي لافة ايد فؤاد دفش فؤاد ايد جنى ..: مساء الخير بعدت من قدامن وعملت طريق ..: مساء النور ابتسمت جنى وحكت بصوت ناعم ودلع ..: فؤادي .. مين هاي .. الخدامة اطلعت جومانا بفؤاد وفي دمعة عالقة عطرف عينها زورها وحكى بغضب ..: جنى الزمي حدودك .. واذا بتغلطي بزوجتي مرة تانية بتشوفي وجهي التاني تخطى جومانا ودخل ولحقتو جنى بقيت جومانا مكانها وموو عارفة شو بدها تعمل .. سكرت الباب ودخلت .. كانت رح تطلع على غرفتها بس وقفها كلام ام فؤاد اللي سمعتو بدون قصد ام فؤاد: اهلا اهلا بجنى بحبيبة قلبي وعروسة الغالي ..عروسة ابن قلبي فؤاد التفتت خلفها وشافتها حاضنة ام فؤاد اخدت نفس وكملت طريقها لغرفتها .. قعدت عالتخت وهمست ..: عروستو .. يــــاه شو غبية .. غبية وبتتأثري من كلمتين معسولات .. لسا من كم يوم كان يبيعني كلام معسول واشعار .. غبية .. صدقتي بسرعة .. حياة جديدة بدك .. لك انت بدك ضرب الصرامي على راسك .. ما بتتعلمي من غلطك .. نسيتي كيف باعك عند اول مطب .. بسرعة ركضتي بدك تسامحي .. بهاي الكلمات عاتبت حالها على غبائها .. بس رجعت حمدت ربها انها لسا عالبر وما رجعت غرقت كمان مرة اطلعت جنبها وشافت التلفون .. طلع براسها خطة وما اعطت لحالها مجال لتدرسها .. بالعكس قررت تنفيذها .. فتحت التلفون .. شتمت حالها لانها كانت ناسية كل ارقام التلفونات .. ما استسلمت ونزلت تطبيق الفيس وحاولت كتير لقدرت تفتح حسابها .. ابتسمت ابتسامة نصر لما فتحت الحساب .. دخلت للماسنجر وطلعت اسم ناديا .. بعتتلها مسج ( كيفك .. بس تشوفي المسج حاكيني هون .. ما فيني حاكيكي تلفون .. ضروري .. واشتقتلك كتير ) مرق دقايق بس وكانت ناديا باعتلها ( وين انت .. انا اشتقتلك اكتر .. شو اللي صار .. وين رحتي انت واهلك .. بيوم وليلة اختفيتو .. رحت للضيعة واهلك ما قبلو يستقبلوني .. شو اللي صار ..) جومانا ( ما فيني احكيلك كل شي هلق .. رح حاكيكي بالليل متأخر .. ) ناديا ( لك جاوبيني عالاقل وين انت هلق ) جومانا ( ببيت زوجي ) ناديا( تزوجتي.. كيف ايمتى .. اك جومانا فهميني ) جومانا ( لك ناديا بقلك ما فيني احكي هلق .. بس كوني عالساعة وحدة بعد نص الليل وبحاكيكي .. ابعتيلي رقمك مشان ابعتلك رسالة عادية من رقمي .. احفظيه عندك ما فيي افتح فيس رح نحكي رسائل .. يلا سلام ) ناديا ( ناطرتك لا تتأخري ) حذفت جومانا التطبيق ورمت التلفون ابتسمت نص ابتسامة ..؛ انا عملت اللي عليي بس انت يا فؤاد ما اعطيتني فرصة .. توجهت للتسريحة طلعت مزيل مكياج ومحت المكياج عن وجهها .. بدلت تيابها وتسطحت عالتخت .. تقلبت كتير وما كانت تعرف تنام .. بعد وقت سمعت الباب انفتح .. غمضت عيونها وعملت حالها نايمة دخل فؤاد للغرفة .. شلح جاكيتو وقرب من التخت .. اطلع عليها وشافها عم تتنفس بسرعة ..: قومي .. بعرف انك مو نايمة فتحت عيونها واطلعت عليه ..: بحاول انام .. بس ما قدرت من التفكير فؤاد: بشو بتفكري .. جومانا : بقراري اللي اخدتو اليوم .. مشان رجعتي عالشركة.. حاسة انو استعجلت .. ولغيت الفكرة .. حسن لسا بحاجتي .. استغرب منها ومن برود اعصابها .. جومانا : شبك بتطلع فيني هيك .. شو كنت متخيل .. ترجع عالغرفة تلاقيني بكسر وبصرخ .. انا خلص رضيت بالامر الواقع .. هيك مكتوبلي عيش .. واذا بدي ابقى معترضة على حياتي رح اتعب .. وانا قررت عيش وربي ابني بسلام .. فؤاد انا اسفة ما فيني كون زوجة الك .. ما عم يطلع بإيدي اعمل شي .. انا هون خدامة وبس كان رح يحكي بس لفت حالها وما اعطتو مجال غمضت عيونها وهي ماسكة دمعتها .. ما كانت حزينة على خيانتو .. ابداً.. كانت حزينة على حالها .. وعلى مستقبلها اللي ضاع بسبب ذنب ما ارتكبتو .. يتبع ..🥀🥀