*أنتيڪآ* 📜 *روايات* *قليلٌ من الوقت مع القصص يساوي حياةٌ بأكملها🤎🕰️* *نشر جميع القصص والروايات 🤎🕰️* *قناة خاصة لمحبي القراءة والقصص* _ *ننشر جميع القصص والروايات*🤎🕰️ *حب 🤎🕰️* *حزن 🤎🕰️* *اكشن🤎🕰️* *رعب🤎🕰️* *تـحـت إشـࢪاف: تـيـم*​​​​​​​​​​​​​​​​​​​​​​​​​​​​📜🤎 *ࢪابـط الـقـنـاة:* https://whatsapp.com/channel/0029VamfKJHK0IBbdBbxOc3d *.#لعنة_الفؤاد🤎* #الجزء_الثالث_عشر اخد مفاتيحو وطلع من المكتب ركض التقى بيزن عند المصعد .. كبس على زر المصعد بقوة اكتر من مرة اطلع عليه يزن يحيرة ..: شبك .. ما رد فؤاد .. ضرب رجلو بالمصعد وتوجه للدرج ركض يزن وراه ونزلو عالدرج بالسرعة توجه فؤاد للمخرج يزن بتفاجئ…: وين رايح .. فؤاد شبك .. لك العميل .. طلع فؤاد من الشركة وركب سيارتو وانطلق للعنوان اللي وصلو بمسح تانية حس بالوقت كانو سنين .. يمشي يمشي وما عم يوصل .. بعد ربع ساعة وقيادة بسرعة جنونية وصل للبناية اطلع عالعنوان وتوجه للشقة .. وقف قدام الباب ودقات قلبو مليون .. احاسيس وافكار مخربطة راسو .. في شي جواتو بكذب اللي شافو وشي تاني مصدق اطلع عالباب وكان مفتوح نص فتحة دخل بهدوء عكس البركان اللي جواه .. فتش كل الغرف وما كان حدا .. حس براحة نفسية .. بس اطلع وراه وكان في غرفة اخيرة انقبض قلبو فجأة .. توجه للغرفة ورجليه برجفو .. حط ايده على مقبض الباب وفتحو بقوة .. غمض عيونو بقهر وهو شايفها قدامو عالتخت نص نايمة وبلا تياب .. يا دوب الغطا ساتر جسمها .. وقف قدام التخت وانفاسو متضاربة..: هاي اخرتك يا واطية .. رفعت راسها بتعب بعد ما سمعت صوتو .. فتحت عيونها وشافتو قدامها واقف متل الوحش بعيون متل الجمر .. اطلعت حولها بعدم فهم .. اخد معها شوية وقت لبلشت تستوعب .. اطلعت على جسمها العاري وشهقت .. شدت الغطا لتستر جسمها منو فؤاد بصراخ ..: هلق عم تستري حالك بعد اللي عملتيه يا محترمة هزت جومانا راسها يمين شمال بهستيريا ..: لا لا .. ما عملت شي قرب لعندها بخطوات ثقيلة ..: ما عملتي شي طلع التلفون من جيبتو .. فتح عالفيديو .. مسكها من شعرها وشدها لعندو لتشوف الفيديو ..: هيك ما عملتي شي فتحت عيونها عالاخر بعد ما شافت حالها بالفيديو بحضن واحد .. تملو عيونها دموع .. اطلعت عليه ..: لا لا مو انا .. مستحيل .. ما صار شي .. مستحيل شد عشعرها بغُل ..: كيف مو انت .. وشو عمل تعملي هون جومانا بوجع ..: صدقني .. ما عملت شي كز على اسنانو ..: وشو جابك لهاي الشقة وبهدا التخت جومانا بقهر ..: ناسية .. ناسية .. دفشها للجهة التانية ..: قومي البسي تيابك بكفي فضايح .. تركها بالغرفة وراح للصالة .. قعد على اول كنباي وحط ايده على راسو … مسك تلفونو وفتح عالفيديو وصار يعيد فييه يدور على ثغرة تبرأها من اللي هي فيه بس ما عم يطلع معو شي .. سمع صوت الباب .. رفع راسو وشافها واقفة مذلولة راسها بالارض اطلع عليها بقرف ..: مشي لرجعك عالبيت وبعدين حسابك .. جومانا بخوف ..: ما عملت شي دفشها قدامو ونزلو للسيارة كل الطريق وهي تبكي وتشهق وما في على لسانها غير كلمة ما عملت شي .. وصلو بيتها فؤاد: انزلي .. التفتت عليه ومسكتو من ايدو ..: فؤاد صدقتي ما عملت شي .. مشان الله صدقني فؤاد: انزلي .. لا تجبريني اتصرف معك تصرف ما يعجبك .. لهاي اللحظة انا ماسك اعصابي رخت ايدها عنو ونزلت من السيارة وراحت لبيتها دخل للبيت عيونو حُمر ومو شايف قدامو .. توجه لغرفتو ودفش الباب وراه .. تقدم من الخزانة وطلع كيس ابيض صغير .. اخدو وقعد عالتخت .. فتح الكيس وحط منو على ايدو واستنشقو بقوة .. اخد نفس وتسطح عالتخت كان بعالم تاني وما حاسس بالعيون المليانة دموع وبتراقب فيه .. فتح عيونو على صوت شهقة امو اللي كانت واقفة عند الباب والصدمة على وجهها .. حست بسكاكين بتقطع بقلبها .. قربت منو بغضب ومو عارفة من وين اجتها القوة .. مسكتو من شعرو .. شدتو وضربتو كف على وجهو ..: بتشرب مخدرات يا كلب .. يا حوينة تعبي فيك .. يا حوينة تربياتي فيك ..الله لا يوفقك .. الله ياخدك وقع الارض ومو حاسس على شي وبعدو تحت تأثير المخدر .. نزلت لعندو وصارت تضرب فيه بجنون .. كانت مفكرة هيك بتخليه يبعد عن هالطريق صحي شوي على حالو .. حط ايدي على صدرها ودفشها بعيد عنو سندت ظهرها عالتخت وصارت تلطم بقهر ..: بتضربني يا ابن بطني .. بتضربني يا يامن .. الله لا يوفقك .. الله ياخدك يا يامن وارتاح منك .. دخل رياض على صوت بكاها وصراخها ..: شو في رائدة بصراخ هستيري ..: اخوك بشرب مخدرات يا رياض .. قام يامن من مكانو وهجم على رائدة وصار يضرب فيها بلا وعي ..: كذابة .. كذابة هجم عيه رياض وشالو عنها وضربو كف عوجهو..: بتضرب امك يا واطي .. نزل فيه ضرب على جنب وطرف .. ضلو يضرب فيه لحتى تعب قام عنو وصرخ فيه ..: كل شي صار فينا بسببك وبسبب وساختك .. خسرنا اختي بسبب وساختك .. العيلة كلها تشردت بسببك قرب عليه وسحبو من بلوزتو ..: هاي اخرتك .. كل شي عملتو وما استكفيت ... دفشو وتوجه لرائدة .. ساعدها تقوم واخدها لبرا رائدة: برضاي عليك عالجو.. خدو عالمشفى عالمصح .. عالجو هز براسو بدون ما يجاوب ___ دخلت للبيت منهارة .. رجليها مو قادرات يشلوها .. رمت حالها على اول كنبة شافتها .. ضمت رجليها لصدرها ودموعها شلالات بحرقو خدودها .. مرق شريط حياتها قدام عيونها .. شو بعد في احداث بدها تصير معها تقهرها بالحياة .. شو اللي صار لوصلت لهون .. هاي اخرتها جوزها يمسكها ببيت شخص ومصورة فيديو .. الف سؤال براسها وما في اي اجابة لولا سؤال اطلعت على جسمها بقرف .. قامت غصب عنها وتوجهت للحمام .. وقفت تحت المي السخنة وصارت تفرك بجسمها بقوة لدرجة حست انو جلدها رح ينمحى من الفرك .. بعد وقت طلعت من الحمام وسمعت صوت جرس الباب .. انقبض قلبها وحست برجفة بكل جسمها .. توجهت للباب وهي لسا بروب الحمام والفوطة على شعرها فتحت الباب بخوف وشافت فؤاد بوجهها .. ملامحو ما بتبشر بالخير نزلت راسها دفشها من قدامو ودخل اطلع عليها بقرف ..: البسي شي شغلة عليكي وتعالي في جوز كلام بدي قولن وروح لبست تيابها بسرعة وقعدت مقابلو رمى ملف قدامها..: وقعي عالاوراق بسرعة مسكت جومانا الملف ..: اوراق شو .. فؤاد ببرود ..: حضانة حسن .. بردو اطرافها وردت بصوت مخنوق..: حضانة شو!! فؤاد ببرود عكس النار الشاعلة بصدرو ..: حضانة حسن لامي .. حسن رح يبقى مع امي .. وقعي بدون مشاكل لانو ما حابب سببك فضايح بالمحكمة وبالاخر اخدو .. لانك انسانة غير مسؤولة واخلاقك غير سوية جومانا بصدمة ..: اخلاقي غير سوية فؤاد: ما لقيك كلمة تانية غير هاي .. ما حابب اجرحك بكلامي .. وقعي وخلص .. جومانا بقهر ..: بس هدا ابني قام من مكانو بغضب وقرب عليها ..: بدك تربيه هون وانت بهدا الرُخص .. بدك تربيه هون وكل يوم تجيبي رجال غريب عالبيت .. اختصري احسن قلتلك ما حابب اجرحك اكتر من هيك.. اذا حابة تضلي تشوفي ابنك من بعيد وقعي وخلص .. لانو اذا قدمت الفيديو للمحكمة القصة ما رح تنتهي باخد حضانة حسن .. القصة رح تكبر وتصير قضية زنا يا فهمانة .. فبلاها الفضايح … وقعي لمصلحتك .. والمحامي بخبرك بموعد جلسة التنازل عن حسن وبعدها رح طلقك ونخلص بهدوء .. نزلو دموعها على خدودها وما في شي تحكيه بعد كلماتو المسمومة مسكت القلم ووقعت عالاوراق اخد فؤاد الملف ..: انا اخدتو من الحضانة .. رح تشوفيه يوم بالاسبوع .. واذا كنت فاضي .. ومن بعيد .. ما بدي الولد يعرف انك امو يا.. تقدم خطوطين لقدام ..: يا رخيصة وقعت هالكلمة على مسامعها متل القنبلة .. حست الارض فتلت فيها..: رخيصة .. ___ تاني يوم فتحت عيونها بتعب بعد ليلة صعبة .. قامت عن الكنبة مكان ما نامت ليلة الماضية .. حاسة باوجاع بجسمها .. جلست قعدتها وضمت رجليها لصدرها وسرحت بالعدم نزلو دموعها بغزارة ..: كيف صار هيك .. انا شو اللي خالاني انضرب على قلبي وروح مع جيهان عالبيت .. صفنت شوي ..: جيهان .. ركضت لغرفتها جابت التلفون ودقت لجيهان .. دقت كتير وكان يعطي خارج الخدمة .. ما استسلمت ودقت مرة وتنين وعشرة بس بدون فايدة توجهت للحمام اخدت دوش سريع .. لبست تيابها وطلعت من البيت بسرعة اخدت تاكسي وتوجهت للشركة دخلت لمكتبها وما كان في حدا توجهت للاستقبال جومانا : جيهان داومت اليوم موظفة الاستقبال ..: جيهان من ١٥ يوم قدمت استقالتها ومبارح كان اخر يوم الها بالشركة بعد ما سلمت شغلها انصدمت جومانا ..: من ١٥ يوم .. لي استقالت الموظفة: متل ما سمعت اجاها عقد عمل برا البلاد .. هزت جومانا براسها ورجعت لمكتبها اخدت استقالتها وتوجت لمكتب امير دخلت المكتب وقدمتلو الاستقالة امير بإستغراب ..: خير جومانا .. لي تقدمي استقالتك .. في شي زاعجك بالشغل .. اذا في شي خبريني جومانا : ابداً استاذ .. بس ابني بحاجتي وما عاد فيي وفق بين شغلي وحياتي الخاصة .. وكمان طلب .. انا صعب عليي سلمك الشغل ب ١٥ يوم .. يا ريت توافق عالاستقالة وتخصم ال ١٥ يوم من الراتب ومن المستحقات امير : تمام .. ما رح اضغط عليكي .. رح وافق عالاستقالة .. بس اتأكدي انك اذا حبيتي ترجعي للشركة .. باب الشركة مفتوحلك بأي وقت جومانا بإمتنان ..: شكراً استاذ امير : يا ريت تسلمي المشروع لرامز جومانا : تمام استاذ طلعت جومانا من عندو خلصت كل امورها بالشركة ورجعت عالبيت قعدت عالبلكون وهي هم تحاول تراجع شو اللي صار مبارح ..🥀🥀فــــــــلاش بـــــــــاك🥀🥀.. حطت جومانا القلم من ايدها بعدما انهت كتابة استقالتها اطلعت عليها جيهان ..: خلص رح تتركينا جومانا : ايه خلص .. ما عرفت وفق بين الشغل وابني .. والشغل عم يستنفذ طاقاتي ثواني كان تلفون جيهان برن ردت ..: ايه ماما .. تغيرت نبرة صوتها للخوف ..: شبو صوتك .. ماما .. كيف صار هيك .. يلا يلا .. انا طالعة حالا .. انت لا تتحركي مشان ما يزيد .. انا رح حاكي الإسعاف .. اطلعت عليها جومانا وشافت دموعها على خدوها..: شبك جيهان شو صاير جيهان بصوت مبحوح ..: امي وقعت على ظهرها .. شو كان رقم الإسعاف .. لقيتو حملت شنطتها ..: جومانا مشان الله تعي معي ترددت جومانا بعدها قامت معها اخدوا تاكسي وتوجهوا لبيت جيهان وصلوا للبيت .. نزلت جيهان تركض ووراها جومانا دخلت جيهان للبيت تصرخ بكلمة وحدة ..( ماما ماما) دخلت جومانا وراها ووقفت فجأة مصدومة لما سمعت الباب تقفل وراها ..: اخيراً تجمعنا بمكان واحد انا وانت والشيطان تالتنا رجفوا رجليها والتفتت لورا بصعوبة شهقت بس شافت عماد عماد: لا .. ما تزعليني .. هيك بكون الترحيب طلعت جيهان من الغرفة ..: لا تضغط عليها .. لساها مصدومة تجمعوا الدموع بعيونها ..: لي جيهان : شو اللي لي .. عجبتي للرجال وانا عملت معو معروف .. رجعت بخطوات ثقيلة للباب وحاولت تفتحو عماد: هيك رح ازعل .. يعني دفعت مصاري كتير لاقضي ليلة معك وانت بدك تهربي قرب منها ببطئ ..: سامحيني .. كنت بفضل اقضي معك ليلة وانت صاحية بس هاي الأوامر طلع من جيبتو بخاخ ورش على وجهها اطلعت عليه بنظرة توسل واغمى عليها 🥀🥀 بــــــــــاك 🥀🥀 نزلو دموعها بقهر على حالها .. رفعت رجليها وضمتن لصدها وهمست ..: شو عملت لاتعاقب كل هالعقاب .. شو عملت انا لحتى ما عم ينتهي العقاب .. اطلعت حولها ..: حسن راح .. ما بقيلي حدا بهالدنيا .. لي عايشة انا .. كنت عايشة مشانو .. وهلق راح .. فؤاد اخدو وراح حطت ايدها على بطنها وحسست بلطف ..: وانت رح تتركني متل اخوك .. غمضت عيونها بتعب .. _____ بعد أسبوع دخل يامن لغرفة القعدة .. كان ابوه وامو قاعدين يشوفو تلفزيون قرب يامن من ابوه وباس ايدو ..: كيفك حج رمضان : بخير يامن : ابي .. كنت بدي حاكيك بموضوع رمضان : احكي.. خير انشالله يامن : بدي اتزوج ابتسم رمضان ..: ايه والله هدا يوم المُنى صرخت رائدة ..: تتزوج شو يا حبيب امك رمضان بعصبية ..: من ايمتى صوتك بعلى وانا موجود صرخت بوجهو ..: لانكن عيلة ما عندها دم قام بعصبية ..: انت ما عاد استحيتي على حالك قربت منو ..: انا ولا انتو .. لك بدك تبلي بنات العالم بابنك الناقص .. لك بنتك من لحمك ودمك رميتها هالرمية مشان هالواطي وبدك تكملها تجيب بنات الناس تعذبون معو .. على جثتي يتزوج .. بدن يفرحو وبنتون مدفونة ما منعرف عنا شي .. روح لملم لحمك بالاول .. سكتت بعد ما نزل كف على وجهها رمضان بغضب ..: صوتك ما بقى بدي اسمعو واذا تكرر هالشي بتعتبري حالك طالق حطت ايدها مكان الكف والدموع بعيونها..: انا الحق عليي .. كيف لساتني على ذمتك .. دخل رياض ..: شبكن يا جماعة صواتكون واصلة اخر الشارع رمضان بغضب ..: تعى خد خالتك من وجهي بلا ما ارتكب فيها جريمة .. صحيح انها ما عادت استحت على حالها اطلعت فيه بغضب ..: صحيح انا ما عدت استحي ولا خاف منك .. انا غلطانة من الاول ما بعرف كيف لساتني مأمنة على حالي معك .. وانت لحمك رميتو ولا سألت فيه كان رح يهجم عليها بس رياض وقفو رياض : ابي طول بالك .. خالتي خلص ادخلي جوا رائدة : لا ما رح ادخل جوا .. انا ما عاد اللي قعدة هون .. تاركتلو البيت لابوك .. تركت الغرفة ودخلت لغرفتها .. نزلت شنطة وبلشت تحط تيابها دخل رياض لعندها ..: خالتي طولي بالك .. والله ما مستاهلة رائدة : بدك طول بالي .. انا بتحمل كل شي .. بس انو ابوك يجوز يامن هاي ما برضاها .. انا ما برضى احمل خطية بنت تانية غير اختك جومانا .. يروح يعالجو من الادمان احسنلو رياض: خالتي وطي صوتك هلق بسمع وبدبحو رائدة بغضب..: انا اللي لازمني دبح على هيك خلفة وترباي .. انا رايحة وما عاد ارجع .. سكرت الشنطة وسحبتها وطلعت من البيت رياض: خالتي خلص روحي .. (قرب منها بعدوء وهمس).. رح اعطيكي عنوان جومانا .. روحي عندها تجمعوا الدموع بعيونها ..: انت بتعرف وين هي وساكت .. رياض: روحي وبعدين بخبرك بكل شي .. طلعت من الغرفة ساحبة الشنطة وراها .. وقف أبو رياض ..: اذا طلعتي من هدا البيت بتكوني طالق .. اطلعت عليه بقرف ..: بكون احسن .. كانت رح تمشي ..: بما انك فرحان بإبنك .. انتبه عليه منيح وعالجو من الإدمان قبل ما تخسرو.. انصدم رمضان من كلامها .. مشت والدموع بعيونها وقلبها موجوع على ابنها وحيدها .. بس كان هدا الحل الوحيد ليتعالج .. ____ بالمقابل كانت جومانا ببيتها .. الغضب بتطاير من عيونها .. عم تتحرك بالغرفة بلا هدف .. حاملة التلفون بإيدها وعم تحاول تتصل لفؤاد رن كتير وما في رد .. دقت مرة وتنين وعشرة وما في رد صرخت بكل صوتها ..: رد يا حيوان .. رد وقفت فجأة ..: تمام يا فؤاد .. رمت التلفون من ايدها وتوجهت للخزانة .. اخدت تياب بدلتهن بسرعة .. اخدت تلفونها وطلعت من البيت نزلت من التاكسي وعيونها متل الجمر .. توجهت لمدخل الشركة وقفها الحارس ..: وين وين !!! صرخت بوجهو ودفشتو بقوة ..: بعد من وجهي دفشتو وركضت لعند المصعد وهو وراها دخلت للمصعد وصارت تضغط عالزر بسرعة لحتى يسكر اخدت نفس بعد ما سكر الباب وطلعت للطابق الثالث دخلت لمكتب السكريترة ..: فؤاد جوا اطلعت عليها السكرتيرة من فوق لتحت ..: فؤاد .. كزت جومانا على اسنانها ..: وانت لسا رح تستغربي تركتها وتوجهت لمكتب فؤاد .. دفشت الباب ودخلت ..: انا بدي شوف ابني هلق .. ما رح اسمحلك تتمادى معي اكتر من هيك اطلع فؤاد فيها بصدمة ووجه نظرو للعميل اللي قاعد مقابلو ..: انطريني برا .. بخلص الاجتماع .. قاطعتو بصراخ ..: عم قلك بدي شوف ابني هلق .. حضرتك ما بترد عالمكالماتي .. لا تخليني جن وروح عبيتك اعمل مشاكل قام من مكتبو لعندها .. مسكها من معصمها وهمس..: عندي اجتماع .. روحي هلق وبنحكي دفشت ايده عنها ..: لا تخليني طلع جناني عليك .. التفت فؤاد للعميل اللي كان واقف وببكل زر الجاكيت العميل : استاذ فؤاد .. انا صار لازم امشي .. بنحكي بعدين فؤاد: عامر بيك انا رح اطلب من يزن يرافقك للمشروع .. لا تواخذني .. عامر: ما في اي مشكلة طلع فؤاد مع العميل وتوجهو لمكتب يزن بعد دقايق دخل لمكتبو والشرر بتطاير من عيون قرب عليها ببطئ وانفاسو بتضارب ..: شو هدا اللي عملتيه جومانا بصراخ ..: بدي شوف ابني .. نحنا في بينا اتفاق وانت عم تخل بالاتفاق .. قلتلي لما بدي شوفو حاكيك .. بس من مبارح بدقلك وانت عم تفصلني .. بدي شوف ابني هلق هلق مسكها من اكتافها ..: وجاي لهون لتعملي فضايح جومانا بعصبية ..: فضايح بفضايح .. روح اعمل اللي بدك ياه ابني بدي اخدو .. ما عاد يناسبني هالوضع .. روح قدم الفيديو لمين بدك ما عاد يفرق .. بدي ابني مسكها من معصمها وجرها وراه جومانا بصراخ ..: لك تركني سحبها وراه قدام كل الموظفين والعمال وما فرق معو حدا اخدها للسيارة .. فتح الباب ودفشها لجواتها ..: اركبي وما بدي اسمع صوتك ركب السيارة وانطلق مسك تلفونو ودق لامو ..: ايه امي .. خدي حسن للحديقة .. لا تروحي لحالك خدي المربية معك.. تمام .. انتبهي لحالك جومانا : لي شوف ابني بالحديقة .. بدي اخدو لعندي عالبيت فؤاد: اخرسي ما بدي اسمع صوتك قلت بعد دقايق وصل لعند الحديقة اطلعت من الشباك وشافت حسن مع ام فؤاد .. ابتسمت ابتسامة دافية وحطت ايدها على مقبض الباب ميل فؤاد جسمو عليها وحط ايدو على ايدها ..: وين!!! اطلعت عليه بإستغراب ..: نازلة .. شوف ابني فؤاد: من بعيد فتحت عيونها بإستغراب ..: شو من بعيد فؤاد: شوفي ابنك من بعيد .. من هون من ورا الشباك رخت ايدها عن المقبض .. اطلعت عليه بعيون مليانة دموع ..: بدك شوف ابني من بعيد متل الحرامية .. فؤاد بجمود..: هدا اللي عندي .. عاجبك اهلاً وسهلاً مو عاجبك بلا .. وجهت عيونها لجهة ابنها .. شافتو عم يمشي خطوات قليلة لحالو .. نزلو دموعها على خدودها بغزارة ..: مشى .. ايمتى مشى .. مشى وهو بعيد عن حضني .. لحظة ووقع حسن بحضن جدتو انتفضت جومانا وفتحت الباب لتنزل ..: وقع .. وقع مسكها فؤاد بقوة من ايدها وسحبها ..: ارجعي .. قلتلك من بعيد جومانا بقهر ..: لك وقع .. فؤاد: ما رح يصرلو شي .. امي والمربية معو جومانا بقهر..: من وين جايب هالقساوة هاي فؤاد: انت اللي عملتي بحالك هيك وما احترمي حالك واحترمي ابنك وامومتتك .. حطت ايدها على وجهها وصارت تبكي بحرقة ..: ما عملت شي .. ما عملت شي فؤاد بلامبالاة ..: خلصتي.. شفتي ابنك .. انا عندي شغل ومو فاضي .. سكتت وعيونها على ابنها حرك السيارة وانطلق ____ وقف السيارة تحت بيتها التفتت عليها وحكى بجمود..: اخر مرة بتيجي عالشركة بهاي الطريقة .. يوم واحد بالاسبوع بس بتشوفي ابنك .. اختاري انت يوم وخبريني بمسج .. ما الك عندي غير هيك .. اطلعت عليه بعيون حمرا دبلانة وهزت براسها كانت رح تنزل بس سحبها من ايدها ورجعها فؤاد: اذا بتعيدي التصرف اللي عملتيه اليوم بالشركة لا تلومي الا حالك .. فاهمة هزت راسها ونزلت من السيارة وطلعت لبيتها بدون ولا اي كلمة حط ايده على راسو وشد عليه ..: انت اللي جبرتيني اعمل هيك .. من كُبر راسك ومعاندتك عملتي مني شخص تاني .. قاسي وجاحد .. يا رب مرق هالفترة على خير انطلق بالسيارة __ نزلت من الباص بعدما وصل للمدينة .. وقفت وعيونها عالسيارات .. اشرت بإيدها لتاكسي .. ركبت واعطتو عنوان بيت جومانا كانت قاعدة عالكنبة ببيتها .. قدامها فنجان قهوة بتعملو للمرة الخامسة وما بتشربو .. سمعت الجرس .. انتفض جسمها وقلبها مرة وحدة .. حست للحظة انو فؤاد قامت بسرعة وفتحت الباب .. وقفت مصدومة من الشخص اللي قدامها .. نزلو دموعها على خدودها بغزارة وهمست ..: خالتو رائدة رمت حالها بحضنها بدون وعي وصارت تشهق بقهر وغصة مسحت رائدة على راسها ..: سامحيني يا بنتي .. جومانا من بين شهقاتها ..: لا تتركيني .. مشان الله اخدتها رائدة لجوا البيت وقعدتها عالكنبة واخدتها بحضنها .. بقيوا على هدا الوضع نص ساعة .. جومانا تبكي وتشهق ورائدة اطبطب عليها ارتاحت جومانا بوجود رائدة .. قعدوا وحكتلها جومانا شو صار معها بكل هالفترة .. وما في غير دموع رائدة تنزل رائدة بقهر ..: الله لا يوفقك يا يامن كلو بسببك بعد فترة اندق الباب .. راحت رائدة تفتح وكانت ناديا .. توسعت ابتسامتها واخدتها بحضنها .. ركضت ناديا لعند جومانا واخدتها بحضنها بقوة ..: اشتقتلك كتير اطلعت عليها جومانا بحزن ..: سامحيني .. كل اللي بصير فيي بسبب اللي عملتو فيكي .. سامحيني ناديا : انا نسيت .. خلص انسي انت كمان بعد عشر دقايق بكى واحضان طلعت رائدة من المطبخ وبإيدها صنية وعليها قهوة ..: بنتي .. وين الصغير .. من اول ما وصلت ما شفتو غصت جومانا ..: عند عمو رائدة : حاكيه يجيبو .. والله ناطف قلبي على ما شوفو جومانا بحزن ..: ما فيي ناديا: لي شو المشكلة .. يعني بدو ينام عندو اليوم جومانا: لا اخدو على طول استغربت ناديا من كلامها ..: على طول .. كيف يعني قررت جومانا تحكي لرائدة وناديا كل القصة … شو صار معها ليقدرو يساعدوها تلاقي حل ___ بعد ثلاث ساعات قامت ناديا عن الكنبة ..: تأخر الوقت .. انا صار لازم امشي.. بدك شي حبيبتي .. جومانا : خليكي الليلة هون .. والله اشتقت اسهر معك ناديا: خليها لنهاية الاسبوع .. بكرا عندي شغل بكير .. جومانا : تمام حبيبتي ناديا : جومانا اذا بتسمحيلي انا عم فكر خبر فؤاد عن هاي الكلبة جيهان .. هو بطريقتو بعرف يجيبها جومانا بحزم ..: لا ما تخبريه بشي .. من الاساس هو ما بدو يصدقني .. واستغل اللي صار لحتى يسحب حسن مني .. انا بعرف رتب اموري وحلها اطلعت ناديا على رائدة اللي هزتلها راسها ..: خلص متل ما بدك قامت رائدة ..: انا رح وصلك للباب مشت رائدة مع ناديا وهمستلها ..: خبريه بكل شي.. واكيد رح يصدقك ويساعدها .. لا تردي عليها .. جومانا لساتها تحت تأثير الصدمة ناديا : هيك رح اعمل .. يلا تصبحي على خير خالة.. انتبهي عليها ودعتها وطلعت رجعت رائدة لعند جومانا ..: قومي بنتي نامي .. اطلعت جومانا على رائدة..: في شي ما خبرتك ياه .. رائدة؛ شو!! نزلت راسها بحزن ..: انا حامل استغربت من كلامها ..: حامل .. مسكتها من ادنها بمزاح ..: كيف حامل مو قلتيلي زواج عالورق !! جومانا بخجل .. : مو ورق ورق ضحكت رائدة ..:بدك تجلطيني يا بنت يولاندا.. احكي لشوف قعدت جنبها وخبرتها بكل التفاصيل الناقصة رائدة : يعني كنتي تعرفي من قبل حومانا بخجل ..: تقريباً .. كان مديري بالشغل ضيقت رائدة عيونها ..: مديرك بس .. توردوا خدودها ..: اكتر شوي ضحكت رائدة على خجلها ..: بعد في شي حابة تصددميني فيه يا بنت يولاندا جومانا بخجل ..: لا رائدة : حمدلله على كل شي .. اولاً مبروك .. وان شاء الله تقومي بالسلامة ..خلص ادخلي نامي وبكرا بنشوف شو رح نتصرف __ تاني يوم وصلت ناديا للشركة مستعجلة .. دخلت لمكتبها حطت اغراضها وتوجهت لعند يزن دخلت لعندو ..: صباح الخير استاذ يزن : تعالي ناديا .. هدا التقرير بدي ياه يكون جاهز قبل الظهر .. في عنا اجتماع ولازم نقدمو للمدير اخدت الملف ..: يزن .. ممكن سؤال بعيد عن الشغل يزن : مدام فيها يزن بلا أستاذ معنا في مصيبة هزت ناديا راسها يمين شمال ..: لا لا ما في مصيبة .. بس اذا بروح بحكي مع الاستاذ فؤاد موضوع شخصي شوي بسمعني .. ولا بقلعني يزن بإستغراب ..: شخصي .. شو هالموضوع اللي بينك وبين فؤاد وشخصي ناديا : صعب احكيلك يزن : ما بعرف .. روحي جربي بدك اجي معك ناديا: لا ما في داعي .. بالاذن طلعت من مكتبو وتوجهت لمكتب فؤاد وقفت قدام السكرتيرة..: صباحك .. المدير وصل السكرتيرة : جوا .. لحظة لخبرو رفعت سماعة التلفون ..: استاذ الانسة ناديا طالبة تشوفك .. تمام اشرتلها بإيدها لتدخل دخلت المكتب لعند فؤاد اطلع عليها فؤاد..: تفضلي يا انسة ناديا بتوتر ..: ممكن اقعد فؤاد : اكيد قعدت ناديا عالكرسي مقابيلو ..: استاذ اذا بتسمحلي .. في موضوع شخصي وحابة احكي معك فيه استغرب فؤاد..: شخصي ناديا : بخصوص جومانا وقف فؤاد بغضب ..: هون مكان شغل يا انسة .. مو مكان للعلاقات الشخصية ناديا بتوتر ..: بس استاذ لازم تسمعني .. اللي صار مع جومانا مخطط ومدبر .. صح ما بعرف مين اللي خطط .. بس عالاقل بنعرف مين اللي نفذ ..وحضرتك لازم تعرف مين اللي خطط فؤاد بعصبية ..: تفضلي عمكتبك وهدا الموضوع اياكي تفتحيه معي او مع اي حدا كان ..او حتى تفكري فيه بينك وبين حالك .. تفضلي وقفت ناديا وهي مقررة تكب كل الحكي بوجهو حتى لو ما بدو يسمعها ..: استاذ بترجاك .. من مدة قصيرة تعرفت جومانا على بنت معها بالشغل .. وهاي البنت حاولت تتقرب منها باي طريقة .. وكل طرقها كانت مريبة … ومثلت عليها دور الصديقة لحتى تستدرجها لهداك البيت ..وعملت تمثلية أمها وقعت لحتى تاخد جومانا معها .. استاذ هاي البنت بعد اللي صار قدمت استقالتها .. اساساً كانت مقدمة استقالتها من وقت ما تقربت من جومانا .. وطلبت اسبوعين لتنهي فيهن اعمالها .. الشي مريب .. وواضح انو في حدا مخطط لكل هدا .. ولازم تعرف انو البنت بلشت تتقربلها من وقت ما اجت جومانا لهون وطلبت ترجعلك .. استاذ بترجاك فكر بالموضوع منيح ورح تتأكد انو ملعوب ومخططلو بدقة اطلع عليها فؤاد ببرود ..: خلصتي !! تفضلي على مكتبك .. وخبري رفيقتك ما في داعي لهاي الالاعيب .. وانت اذا حابة تكملي معنا هون لا ترجعي تفتحي الموضوع مع حالك حتى .. تفضلي عمكتبك والتقرير اللي طلبتو يكون جاهز خلال ساعتين انصدمت ناديا بردة فعلو الباردة .. كانت متوقعة كل شي الا هدا التصرف .. مشت ناح الباب ..: بالاذن قعد على كرسيه بتعب .. كلام ناديا لسا بدور براسو .. في شي مو زابط .. مسك تلفونو وكتب مسج لشخص .. اطلع بالعدم وفكر بجملة وحدة ..( اتقربت منها بعد ما طلبت نرجع لبعض) للحظة خطر ببالو شخص .. بس سرعان ما نفض الفكرة من راسو .. همس بقهر ..: امي مستحيل تأذي بهاي الطريقة .. مسح على وجهو بتعب ..: بس مين الرجال .. هدا اللي لازم اعرفو .. فتح عالفيديو وشغلو .. سكاكين بتقطع قلبو .. بس كان مجبور .. بس ما في امل .. جومانا بس اللي واضحة بالفيديو .. ما في أي شي تاني خطرت ببالو فكرة .. اخد تلفونو ومفتاح سيارتو وطلع من المكتب ركب السيارة وانطلق .. بعد ما مشى مسافة .. وقف سيارتو جنب الطريق همس ..: كيف بدي اسألها .. مجنون انا .. اكيد رح ترمي اللوم على حدا تاني .. بس انا لازم اعرف كيف وصلت لهناك مرقو دقايق كأنن ساعات فجأة وصلتو مسج بعدة صور اطلع عالرقم وكان نفس الرقم اللي بعتلو الفيديو فتح الصور وكانت صور لجومانا وجنبها شخص لافف ايدو حول اكتافها .. كانت صورتها واضحة بس صورت اللي جنبها مغبشة غمض عيونو بقهر وصل تسجيل صوتي مُعدل ( بالوقت اللي انت كنت تجهز لرجعتها هي كانت عايشة حياتها من رجال لرجال .. هدا الشخص اللي بالصورة نفسو اللي كانت معو بهديك الليلة ) تسجيل تاني ( هاي الصور باليوم اللي كذبت عليك وقلتلك بعيد رفيقتها .. وهي كانت معو ) تسجيل تاني ( انا عملت اللي عليي والباقي عليك ) كان تسجيل بصوت معدل .. سمعو مرة وتنين وعشرة راجع ذاكرتو لليوم المقصود .. فعلا هي حكت بعيد ميلاد رفيقتها وكان رفضها قاطع لما عرض عليها يروحها .. وتفاجئت فيه لما كان تحت بيتها والتوتر كان واضح على ملامحها كل شي وضح وما في مبررات بس في سؤال كان براسو .. ( لي طلبت ترجع تعيش معو وهي عايشة حياتها بالطول والعرض وعم تخونو ).. فضل هالسؤال يتكرر براسو بدو إجابة شغل السيارة ورجع للشركة ___ فتحت عيونها بتعب بعد ما حست على بوسة رائدة على خدها ابتسمتلها بحب ..: لو تعرفي شو مشتاقة لصراخك الصبح رائدة بإبتسامة ..: هلق انا كنت صرخ عليكي .. الله يسامحك تعلقت برقبتها ..: احلى صراخ رائدة : يلا قومي جهزت الفطور جومانا : ما الي نفس بدي قهوة رائدة : لا .. انت حامل ولازم تتغذي مشان ابنك اللي ببطنك قامت جومانا عن التخت وتوجهت للحمام غسلت وجهها وراحت للمطبخ وقفت عند الباب ..: انا صعب اتعود عالدلال هدا .. اخد معي وقت كتير لتعودت صير خدامة عند بيت الما بيتسمو رائدة : لا تقولي هيك .. انا وعدتك رح تبدي حياة جديدة .. اقعدي لحكيلك شو رح تعملي .. بس اول انت عندك باسبورت جومانا : ايه عملت واحد من فترة قريبة .. لي رائدة : اقعدي وهلق بخبرك .. ____ بعد وقت قامت جومانا من مكانها بغضب ..: كيف بدك اترك ابني واهرب مسكتها من ايدها ..: يا بنتي افهمي عليي .. انت لازم تحمي اللي ببطنك .. لك حسن مو ابن فؤاد وقدر يحرمك منو .. بدك لما يعرف انك حامل بابنو من صلبو يخليه معك .. افهمي عليي مشان الله .. ما رح تتركيه .. كلها فترة تسع اشهر سنة بالكتير وبترجعي مع ابنك التاني وبتكون الامور هديت هون شوي .. واكيد ما رح يعرف انك كنتي حامل منو .. متل ما خبرتك.. بترجعي انت وابنك كأنك تزوجتي برا ورجعتي .. كلو هدا لمصلحة ولادك .. وابنك حسن انا رح حل مشكلتو مع فؤاد .. انا ما عاد بدي ارجع لابوكي .. خلص ما عاد تحملت العيشة معو .. رح ابقى هون وبصير شوف حسن وطمنك عنو لا تخافي عليي اخدت نفس وزفرتو بقوة ..: مو مقتنعة .. الفكرة ما عم تركب براسي رائدة : اهدي هلق .. وفكري .. لا تستعجلي .. معنا اسبوعين .. لسا في وقت جومانا : مستحيل اترك ابني هون واهرب .. ___ مرقوا أسبوعين هاديات ما فيهن أي جديد جومانا حابسة حالها بالبيت وكلامها قليل .. ما قدرت رائدة تقنعها بالسفر لروسيا عند أمها .. كانت تروح تشوف ابنها من بعيد بالحديقة متل ما اتفقت مع فؤاد ____ بيوم دخلت رائدة لعند جومانا بعد ما كانت مجهزة الشنطات رائدة: يلا قومي لازم نمشي فتحت عيونها بتعب ..: لسا مصرة رائدة : امك وصلت مع اخوكي وناطرينا بالفندق .. وقالت ما لازم تبقي هون ابتسمت جومانا ..: وكيف فهمتي عليها رائدة بنرفزة ..: لا تذكريني .. امك لازمها مترجم او انا لازمني دورة روسي .. قومي هلق .. لا تضيعي الموضوع جومانا : والله ما بعرف شو الها لزوم هالمتاهات .. اول عاخر فؤاد رح يعرف اني حامل .. قدي رح خبي .. اخرتها بطني رح يكبر رائدة بغضب ..: وبعدين معك .. قومي جومانا : قمت .. والله ولقيتي انت وامي شي تتفقوا عليه بعد هالعُمر ____ بعد ساعات كانت جومانا ورائدة بالفندق كانت قاعدة وسارحة بالعدم طلعت من شرودها على صوت أمها يولاندا : ماذا هناك يا صغيرتي .. لما كل هذا التفكير جومانا : انني افكر بإخبار فؤاد بحملي .. يولاندا: لا اوافقك الرأي .. إن علم بحملك ستصبح الاموار اكثر تعقيداً جومانا : لماذا يا امي .. فؤاد يملك قلباً مرهف وغير قاسي .. يولاندا : قلتي انهُ يملك قلب مرهف .. وماذا تسمين التصرف الذي تصرف بهِ جومانا : انها ردة فعل طبيعية يا أُمي .. انا لا الومهُ .. ما حدث أمر صعب.. وفؤاد رجل شرقي الطباع .. لم يحتمل ما حدث وتصرفهُ كان طبيعي يولاندا : يجب ان تفكري جيداً بالموضوع جومانا : حسناً .. سأفكر ____ بعد ليلة صعبة مرقت عليها من كثر التفكير .. تفكير ما سمح للنوم يزورها .. اطلعت عالشباك وشافت الشمس عم تشرق .. قامت عن التخت .. توجهت للحمام .. اخدت دوش ولبست تيابها عالهدا .... تأكدت انه رائدة وامها رايحات بالنوم .. فتحت الخزانة وفتشت على تلفونها .. ابتسمت بخباثة بس لقتو .. حطتو بجيبتها حملت بوتها ومشت على روس اصابعها وطلعت من الجناح .. لبست البوت وطلعت من الفندق.. كان الوقت كتير بكير وما كان ناس كتيرة بالشارع .. لا ناس ولا سيارات همست ..: اكيد ما رح لاقي تاكسي من وجه الصبح .. يلا بمشي شو عليي .. رياضة صباحية بعد نص ساعة مشي وصلت للشركة .. اطلعت على ساعتها وضحكت ..: مين بدو يفتح شركة عالستة الصبح بقيت واقفة عشر دقايق وتتحرك من مكان لمكان .. اخدت التلفون من جيبتها ودقت لفؤاد .. رن كتير وما رد مدت نظرها لبعيد وشافت الكافي الي جنبها بفتح ابوابو .. توجهت للكافي وطلبت قهوة وقعدت جنب الشباك لتراقب لحظة وصولو مرق ساعتين لمعو عيونها بس شافتو .. قامت بسرعة وتوجهت لعندو وقفت قدامو ..: بدي احكي معك بموضوع مهم اطلع عليها .. اتغيرت ملامحو للغضب ..: خلص الكلام بينا مسكت ايدو ..: لازم نحكي سحب ايدو منها ..: احكي هون اطلعت حولها ..: هون ما بصير .. تعى معي لمكان بعيد عن الناس فؤاد : مو فاضيلك جومانا .. عندك شي احكي هون تركتو ودخلت للسيارة ..: اطلع استسلم للامر الواقع وركب .. مشى بالسيارة لوصلو للشارع الرئيسي جومانا : خلص وقف هون جنب الشارع وقف السيارة وبدون ما يطلع عليها ..: احكي اطلعت عليه وحكت بكل هدوء ..: انا حامل للحظة ما استوعب شو حكت .. جومانا بإستغراب ..: شبك .. ما سمعت .. انا حامل ابتسم نص ابتسامة والتفت عليها .. اطلعت بعيونو ..: حامل بابنك او بنتك بلش الغضب يبان على ملامح وجهو .. احمرت عيونو .. قرب منها ومسكها من شعرها وشدها عليه ..:مبين عليي اهبل صح جومانا بوجع ..: شبك فؤاد .. اترك شعري شدها اكتر وكز على اسنانو ..: جاية بعد شهر من المسخرة اللي كنتي فيها تقوليلي حامل بأبنك او بنتك .. في براسك شي نزلو دموعها بدون ما تحس بعد ما وصلها معنى كلامو فؤاد بغضب ..: لك يا محترمة انا جبتك بإيدي من شقة رجال تاني كنتي باحضانو .. وما حدا قلي شفتك بعيوني .. جومانا بوجع ..: اتركني .. عم توجعني كز على اسنانو ..:انت لسا شفتي وجع .. كنت بالاول فتشلك على مبررات .. ووصلت لمرحلة صدق انك مظلومة وحدا تاني خطط لهالمصيبة .. بس اليوم اثبتيلي انك عاهرة ورخيصة .. جاي بكل عين وقحة تلبسيني ابن حرام يا رخيصة .. حطت ايدها على ايدو ..: خلص .. بكفي .. بعد عني شد قبضة ايدو على شعرها وقرب وجهو من وجهها ..: اسمعيني منيح .. رجليكي التنتين بكسرن اذا عاد بتهوبي ناح الشركة .. صوتك بمحيه اذا عاد بتسمعيني ياه .. وجهك ما بدي شوفو من هلق لتموتي .. اللي متلك لازم تدفن حالها بالحياة .. وما الك ولد عندي .. ابنك بتنسيه ميل حالو لجهتها وفتح الباب ..: بتنقلعي من هون ولا عاد تفرجيني صورة وجهك .. دفشها لوقعت برا السيارة شد الباب لعندو وانطلق باقصى سرعة بقيت مكانها تبكي بصوت عالي وتشهق .. قربو منها ست ورجال كبار بالعمر .. الست : شبك يا بنتي .. اطلعت عليها جومانا بعيون حُمر .. وفجأة اغمى عليها ___ بالمشفى كانت نايمة ومو حاسة بشي بلشت تفتح عيونها بتعب .. اطلعت حولها وشافتو رايح جاي بالغرفة بتوتر وعصبية جومانا بصوت مخنوق ..: وين انا صرخ بوجهها ..: لا تسمعيني صوت .. انا هون لحتى يجي حدا من اهلك .. كتمت شهقتها وهي شايفة الغضب والكره بعيونو ونبرة صوتو .. ايمتى انخلق هالكره بقلبو لالها .. غمضت عيونها وحاولت ترجع تنام دخلت الدكتورة ..: حمدلله على السلامة .. هزت جومانا راسها بدون ما تحكي اطلعت الدكتورة عالمؤشرات الحيوية ..: كل شي تمام .. بس رح ناخدك لطبيبة النسائية لنطمن عالجنين ووضعو دخلت الممرضة ومعها كرسي متحرك .. ساعدتها لتقعد عالكرسي وجرتها .. اطلعت الممرضة على فؤاد..: تفضل معنا .. فؤاد بإستغراب ..: انا لي .. الممرضة : يمكن يحتاجوك فؤاد بعصبية .. : يحتاجوني بشو .. الممرضة بعفوية ..: مو انت زوج المدام .. ما بدك تطمن عالجنين فؤاد بغضب ..: لا مو زوجها ولا هدا ابني .. انا ما بعرف لي دقولي من الاساس الممرضة : بعتذر عالخطأ .. المدام ما كان معها بطاقة وكان مغمى عليها وبتلفونها كان اخر رقم بسجل الهاتف رقمك لهيك حاكيناك .. بنعتذر مشت الممرضة وجرت الكرسي المتحرك لغرفة الاولتراساوند بقي واقف مكانو وعلامات الغضب عوجهو فجأة دخلت يولندا وماركوس للغرفة .. انصدمت بس شافتو واقف قدامها ماركوس بالانجليزي ..: من انت واين جومانا ؟ اطلع فؤاد عليهن وتوقع انها أمها من مظهرها وملامحها الروسية والشيه الواضح بينها وبين جومانا قرب فؤاد من يولندا وبعيونو نظرة قرف واشمئزاز ..: من الواضح من نظراتك انكِ تعرفينني .. اصغي لكلامي بشكل جيد .. لا تدعي ابنتك تقترب مني مرة اخرى .. وهذا الحمل الذي تدعي انهُ مني .. قاطعتو بحده ..: اخرس .. لا تنطق بأي كلمة اخرى .. انا قلت لها ان تلد ابنها وتربيه بعيداً عن امراضك النفسية .. لا تدعني ارى وجهك مرة اخرى تخطاها بعد ما رمقها بنظرة قرف وطلع من الغرفة بالممر قربت منو الممرضة ..: استاذ لو سمحت ممكن تيجي معي لتوقع على اوراق الخروج فؤاد: اهلها معها الممرضة : بس انت وقعت على دخولها .. تفضل لو سمحت مشى ورا الممرضة .. وقفت الممرضة ورا الكاونتر وطلعت الاوراق التفت بعيونو وشاف جومانا وامها والدكتورة ماشيين من جنبو وسمع حديثن الدكتورة : متل ما شفتي الجنين بالاسبوع العاشر واجهاضو في خطر عليكي .. وكمان جدار الرحم ضعيف .. واذا عملنا عملية اجهاض احتمال عدم قدرتك عالانجاب رح تكون كبيرة.. انا كتبت كلشي بالتقرير لازم اتابعي عند طبيبتك النسائية بشكل دوري .. هزت قلبو كلمة اجهاض .. لا ارادي حس باحاسيس غريبة بس بسرعة طردها .. وقع عالاوراق ومشى بدون ما يطلع وراه وصل سيارتو .. ركب وشغلها .. سند راسو عالمقود بتعب .. وما في براسو غير جملة عمر الجنين عشر اسابيع .. همس ..: عشر اسابيع يعني شهرين وشوي .. كيف هيك .. حاول يحسب كتير وما طلع معو شي .. ولا عارف حتى شو عم يحسب بالزبط .. ترك كل التفكير وانطلق _____