*أنتيڪآ* 📜 *روايات* *قليلٌ من الوقت مع القصص يساوي حياةٌ بأكملها🤎🕰️* *نشر جميع القصص والروايات 🤎🕰️* *قناة خاصة لمحبي القراءة والقصص* _ *ننشر جميع القصص والروايات*🤎🕰️ *حب 🤎🕰️* *حزن 🤎🕰️* *اكشن🤎🕰️* *رعب🤎🕰️* *تـحـت إشـࢪاف: تـيـم*​​​​​​​​​​​​​​​​​​​​​​​​​​​​📜🤎 *ࢪابـط الـقـنـاة:* https://whatsapp.com/channel/0029VamfKJHK0IBbdBbxOc3d *.#لعنة_الفؤاد🤎* #الجزء_الرابع_عشر_والاخير رجعت جنى عالبيت والخوف واضح على وجهها .. حاولت تهدي حالها بس ما قدرت .. دخلت غرفتها ورمت حالها عالتخت بتعب بعد شوي دخلت للحمام بعد دقايق لفت المنشفة حول جسمها ومنشفة على شعرها وطلعت وقفت مصدومة بس شافتو متسطح عالتخت بكل برود التفتت حولها ..: شو عم تعمل هون ؟ اطلع عليها فؤاد بطرف عينه ..: لساتك معصبة .. جيت لاطمن على رفيقتك .. انشالله صارت احسن .. وكمان حسيت اني دايقتك بكلامي مو ؟ شالت المنشفة عن شعرها ورمتها عالتخت بغضب ..: لايمتى بدك تبقي تستهزء بمشاعري.. انا انسان وعندي مشاعر . قام عن التخت .. ومشى لجهة الباب .. قفلو بالمفتاح وتوجه لعندها .. اطلع عليها من فوق لتحت ..: هلق اذا ما رح نتزوج شو رح تعملي ؟.. جنى بعدم فهم ..: شو يعني ؟ فؤاد: يعني المفروض تفتشي ع حدا تاني معو مصاري ضربتو على صدرو ..: ما بسمحلك .. فؤاد ببرود ..: يعني هلق بدك تقنعيني انك بتحبيني !! جنى: شو قصدك من كلامك ! مسكها من ايدها بهدوء عكس النار الشاعلة بصدرو .. قعدها عالتخت وقعد جنبها ..: انا السبب بكل شي صار .. وجود جومانا بحياتي دمرني .. كنت مخدوع فيها .. من اول ما عرفتها وهي لعوب .. بس كان معمي على قلبي جنى بدون ما تحس .. : ما لازم تسامحها على خيانتها رفع حاجبو ..: كيف عرفتي انها خانتني استوعبت اللي حكتو ..: انت قلك ضيق عيونو ..: انا ما قلت جنى بعصبية لحتى اضيع الموضوع ..: مو موضوعنا هلق .. مسك ايدها وشد عليها ..: هدا موضوعنا .. حط ايدو على ظهرها وشدها لعندو ..: هلق شوفي .. موضوعنا كبير .. وتقريباً انا عارف كل القصة بس في خيط ناقص .. يعني عرفت الاطراف وعرفت مين خطط .. بس ناقص فقرة .. مشان هيك هلق انت رح تحكيلي ياه كامل .. وكوني عارفة رح كون منيح معك .. لانك بنت خالتي .. بس طبعاً بشرط واحد .. انك تقولي اسم الكلب الي اشترك معك انت والكلبة التانية.. لانو عم حاول اوصلو .. واذا انت ما اعترفتي وانا وصلتلو وقتها ما رح. ارحمك .. عم اعطيكي فرصة لتكفري عن ذنبك حاولت تسحب ايدها منو ..: فؤاد عم توجعني .. شال ايدو عن ايدها ومسكها من شعرها …: معقول ما عم تفهمي عليي .. لاحظي انك عم تطلعيني عن شعوري وعم تخليني اتصرف معك بطريقة ما بتليق بالقرابة اللي بينا .. وانا لهاي اللحظة محترمها .. فنعيد من الاول .. انا ما رح أذيكي اذا حكتيلي كل القصة من الاول صرخت بكل صوتها ..: ماما الحقيتي رح يموتني فؤاد ببرود الارض حرك راسو يمين شمال ..: تسؤ تسؤ تسؤ.. انا زعلي وحش .. لسا ما تعرفتي عليي ولا لاني محترمك مفكرة اني ما رح أذيكي .. بس اوك رح نزل ايدي عنك شال ايدو ووقف ..: يلا سامعك وقفت وراه ولفتو لعندها وصرخت ..: بشو هي احسن مني فؤاد ببرود ..: كم اصبع عندك لحتى تعدي معي .. ولا اقلك ما رح اجرحك .. بس هي مو طماعة متلك .. جنى بعصبية ..:ايه انا اللي عملت هيك .. بعتلها جيهان لتتقرب منها .. وانا اللي خططت لحتى تسحبها للبيت اللي شفتها فيه وانا اتفقت مع عماد لحتى يعمل عملتو وامرتو يصورها وبعتلك الفيديو .. صح اخد معي وقت طويل لجيب راسها بس مو مهم .. المهم النتيجة.. وانت كمان كنت متعاون معي وصدقت الفلم كلو .. واذا قررت تبقى بحياتي رح اقتلها بإيدي .. انت اللي انا فؤاد مو لحدا تاني اطلع عليها ببرود عكس النار الشاعلة بقلبه ..:بتعرفي .. كل هدا ولساتني بحبها .. وبدي ياها .. ولسا عم لف الدنيا وانا عم فتش عليها .. شو رأيك .. كل مخططاتك بح .. عالفاضي .. لك حتى لما بعتي الفيديو وعرفت كل القصة كنت فتشلها على عذر تصدقي .. يعني خططك فشلت .. سوري بس القلب وما يهوى .. اطلعت حولها وشافت الابجورة اللي جنب التخت .. حملتها ورمتها عليه بس ما اجت فيه اطلع عليها وعوجهو ابتسامة..: لا تحلمي مد ايدي عليكي صرخت ..: انت السبب .. انت اللي عملت فيي هيك .. قرب منها ..: هلق بدي المهم .. مين عماد .. جنى بصراخ ..: ما رح خبرك فؤاد: بتعرفي اني فيني جيبو.. بس بحاول اعطيكي فرصة تصلحي شوي من اللي عملتيه وتكفري عن ذنبك جنى : ما رح خبرك .. واذا كنت رجال عن حق جيبو وعلم عليه متل ما علم عليك وعمل مع حبيبتك علاقة وهي اليوم حامل منو ما وعيت على حالها الا كف على وجهها .. مسكها من شعرها وشدها ..: بوعدك رح كون الك متل عملك الاسود .. رح تتمني اتركك بحالك وما رح اتركك .. رح تيجي تتوسلي لالي اكفيكي شري وما رح ارضى .. اطلع عليها بغُل ..: اسمعي ولي .. اذا بشوف وجهك بالصدفة .. سامعة بالصدفة ما رح تسلمي مني .. وقفت بكل جحود ..: لسا ما عرفت الشي الاهم من هدا كلو .. ما حابة اعملك سسبينس .. لانه بيكفيك الصدمة .. امك .. امك الحنونة اللي خططت لكل شي … نزلت كلماتها على قلبو من الصاعقة .. بس ما نولها اللي ببالها .. دفشها عالارض وطلع من الغرفة ومن البيت كلو _____ طلع من البيت ما حاسس بشي .. قرب من سيارتو بهدوء .. ركب وشغلها ضل واقف يستوعب اخر جملة حكتها جنى همس ..: امي سبب هالوجع كلو .. كيف .. لي.. مسح على وجهو وبعدها انطلق ضل يمشي بالسيارة بدون وجهة .. ضايع .. ما عارف شو يعمل .. الف سؤال براسو وما ملاقي ولا جواب على ولا سؤال وصل لمنطقة مقطوعة .. وقف سيارتو ونزل منها سند حالو عالسيارة واطلع بالعدم بقي على هاي الحالة ساعة .. بعدها قرر يرجع عالبيت وصل ونزل من السيارة بثقل دخل البيت وتوجه للصالة كان وجهو شاحب استقبلتو امو بصراخها المعتاد ..: كيف بتعمل هيك ببنت خالتك .. كيف بتروح لعندها عالبيت وبتتهجم عليها اطلع عليها ببرود ..: بس بدي اسألك سؤال .. كيف قدرتي تعملي هيك .. ما شبعتي ظلم اطلعت عليه بإستغراب ..: شو عم تخبص !! فؤاد : انت هلق مرتاحة .. ارتحتي بعد اللي اعملتيه بجومانا انصدمت من كلامو ..: شو عم تحكي ؟ ما قدر يسيطر اكتر على اعصابو .. اطلع فيها وصرخ ..:قولي انك ما عملتي شي .. قولي انه كل كلام جنى كذب بكذب ..قولي انها عم تورطك مشان تنفذ حالها قرب مدحت منن ..: شو عم يصير يا ابني فؤاد بقهر ..: جنى حكت كل شي .. كيف طاوعك قلبك تعملي هيك .. مفكرة هيك هديل رح ترتاح .. لا ما رح ترتاح .. انت عملتي نفس اللي عملو اخو جومانا بهديل .. انت اخدتي روحها متل ما اخد اخوها روح هديل .. اطلع بأبوه والدموع بعيونه ..: امي طعنتني .. امي ذلتني وذلت مرتي .. مسكىو من اكتافه فهمني شو صاير .. نزلت دمعة من عينه .. اتفقت مع الشيطان لتشوه سمعة مرتي .. اتفقت مع الشيطان لحتى تطلع مرتي خاينة .. خطفتها وحطتها بتخت رجال تاني .. غص بكلماته وما عاد لسانو اسعفه .. نار وشعلت بصدرو .. اطلع مدحت بهيام بصدمة ..: كل هالسنين وانا عايش مع شيطان هيام : وبقتل كل واحد بقرب من ولادي .. هاي المجرمة اخدت بنتي وابني وهلق بدها تاخد الولد الوحيد اللي بقيلي فؤاد بغصة ..: ما بقيلك حدا .. انا رايح وما عاد ارجع اعتبرني متت مع اخوتي .. ابي رح كمل بالاتفاق اللي بينا .. وبعدما تخلص السنة ما عاد تشوفو وجههي هيام بصراخ ..: بدك تتركنا مشان وحدة متل هاي اطلع فؤاد بعيونها ..: امي .. انت مو شايفة اللي عملتيه غلط !! هيام بجحود ..: لا .. ولو طلع بايدي اعمل اكتر كنت عملت هز براسو بقهر..: انتبهوا على حسن .. هدا امانة لحتى ترجع امو .. لف ظهرو مشان يمشي .. بس وقف بعدما سمع كلام امو هيام : عم تتركني مشان وحدة كانت تحبك وهي متزوجة اخوك .. ولا يا بكري كنت بعلاقة مع زوجة اخوك وهي على ذمتو اطلع عليها بقهر ..: ما عاد فرقتي الحقيقة من الخيال .. جنى عملتلك غسيل دماغ كامل .. انت امي .. وواجبي ابرك .. بس انت ما خلتيلي مجال .. جومانا اشرف من الشرف .. رمى التلفون من ايدو عالطاولة ..: شوفي مين اللي كانت تعمل متل ما حكيتي .. جومانا مظلومة وانت ظلمتيها .. اطلع مدحت وهيام على التلفون وكانت فيديوهات لجنى باحضان عماد فؤاد بقهر ..: هاي اللي كنتي عم تدافعي عنها .. نفسها اللي كانت بدها تحطكون ببيت العجزة .. نفسها اللي كانت تضرب حسن بحقد .. كل مخططاتها لتدخل عالبيت مشان تاخد الورثة امي .. مشان تاخد تعبك وتعب ابي بغربتو .. كلو حكتو بعظمة لسانها .. انا ما ظلمتها ابداً هي ظلمت حالها بحالها .. واستغلت غضبك وحقدك لحتى تنفذ اللي خططتلو .. ظلمتو انسانة .. انسانة ما الها علاقة بشي .. من اول ما دخلت لهدا البيت وانت تصبي حقدك وغضبك عليها .. تحملت وكابرت مشان تربي ابنها بين عيلتو .. حتى لما قررت تهرب مشان ترتاح من العذاب ما رحمتوها .. ولا رحمتوني معها .. واخر المطاف اتهمتوها انها بعلاقة معي وهي كل غلطتها انها احتمت ووثقت فيي وما كنت اهل بثقتها .. خلص امي .. انا تعبت .. اعتبرني متت مع اخوتي .. او ما جيت من الاساس على هالدنيا مدحت : ابني خلينا نحل الموضوع .. لا تروح فؤاد : سلام ابي طلع من البيت _____ وصل لمنطفة مقطوعة .. وقف السيارة ونزل منها .. كان في شخص ناطرو عالماطور قرب منو بهدوء ..: اهلا معلم فؤاد : شو صار معك .. جبت اسمها وعنوانها الرجال : عنوانها ما قدرت جيبو .. بس اللي عرفتو انها بالبلد فؤاد: ايمت رجعت الرجال: من اسبوعين تقريباً ابتسم فؤاد ..: يعني هي اللي اجت عند بنتها.. وين قاعدة هلق .. الرجال : بالفندق .. انا استغربت صراحة .. لانو متل ما فهمت انو عندها بيت مِلك هون ومو مأجر ولا شي اطلع عليه فؤاد ..: وهدا البيت شفتو اذا في حدا الرجال : لا .. لي بدي شوفو مسكو فؤاد من جاكيتو ..: لك انت حمار .. يعني بتقلي امها عندها بيت هون ومو مأجر .. ما خطر ببالك انها تكون فيه صفن الشب شوي ..: والله معك حق يا معلم .. كيف فاتتني هالشغلة فؤاد بغضب ..: غبي مو بإيدك .. اعطيني العنوان .. طلع ورقة من جيبتو ..: بس يا معلم لو كلامك صح وهي قاعدة ببيت امها لي امها نزلت بالفندق ما راحت عندها .. يعني من اسبوعين وما راحت ولا زيارة لهناك .. فؤاد: كمل شغلك التاني حالياً وتركلي هالموضوع .. ركب سيارتو وانطلق للعنوان بعد نص ساعة وصل .. ركن سيارتو بمكان يقدر منو يكشف البيت والحارة .. ابتسم ابتسامة جانبية بس شاف وحدة من الغرف ضوها شاعل .. نزل من السيارة ومشى بكل ثقة لجهة البيت .. قرب بهدوء وطرق الباب .. فتحت رائدة الباب ..: تفضل يا ابني .. فؤاد : مسا الخير خالة .. مو هدا بيت مدام يولندا ماركرايف اطلعت عليه رائدة بإستغراب ..: ايه .. فؤاد: وهي موجودة رائدة : لا .. انا مستأجرة البيت من اسبوعين .. مين حضرتك ..! فؤاد: فؤاد العامري .. زوج بينتها .. رائدة ببرود ..: اهلا فيك .. صراحة انا استأجرت البيت من اسبوعين .. فؤاد : ممكن رقمها لو سمحتي رائدة : صراحة ما بعرف اذا بنفع اعطيك رقمها او لا فؤاد : بعتذر عالازعاج .. بس سؤال .. انت ساكنة لحالك هون رائدة بإستغراب ..: لا مع ابني .. بس لسا ما رجع عالبيت فؤاد: بعتذر كمان مرة عالازعاج رائدة : ما في ازعاج .. لف حالو ورجع للسيارة سند حالو عالسيارة وعيونو عالبيت _____ دخلت رائدة لعند جومانا لغرفتها اطلعت عليها جومانا ..: شبك .. مين كان عالباب قعدت على حفة التخت ..: زوجك اطلعت عليها جومانا ببرود ..: وينو .. برا !! رائدة : انت بعقلك شي .. لك يا بنت شبك هيك .. جومانا ببرود ..: لي شبني .. بدك ابقى كل عمري خايفة منو .. لولا انك حابستيني انت وامي هون كان من زمان رحت لعندو .. شو بدو يعمل يعني .. وشو رح يصير اكتر من اللي صار .. اذا اخد اللي عايش .. بدك خاف عاللي ببطني ولسا ما انولد .. اهدي اهدي .. اطلعت عليها بإستغراب كملت تسريح شعرها ..: بما انه فؤاد وصل لهون معناه عرف كل شي .. معناه عرف انو امي رجعت وعرف وين قاعدة .. فؤاد مو غبي .. وانت وامي مفكرات انو عاملات انجاز .. ضحكت بقهر ..: لك هدا فؤاد … ما رح يهدى الا ليجيبني رائدة : كلو منك .. انا قلتلك سافري مع امك لروسيا وانت عندتي اطلعت عليها وعوجهها ابتسامة ..: خالتو حبيبتي .. تعي نتفاهم عشي .. هدا البيت اللي انا وانت فيه هلق ما كنا نعرف انو موجود غير من كم شهر وانا بنتها من ٢٦ سنة .. وفؤاد خلال كم يوم عرف فيه .. بدك ما يعرف اني بروسيا .. لك بيجي بزورني ببيت امي اذا بدك .. خلينا نروق .. تمام رائدة : وشو ناوية تعملي .. جومانا : بدي نام .. طفي الضو واذا دقتلك امي لتخبرك انه فؤاد راح عندها لا تقوليلي لانه متأكدة رح يعملها رائدة : كيف كنتي عايشة معو نفسي اعرف اطلعت بالعدم ..: كان احن مخلوق عوجه الكرة الارضية .. بس انا ضيعتو بغبائي .. طفي الضو طلعت من الغرفة وطفت الضو وراها .. توجهت للشباك وفتحت الستارة .. مدت نظرها لبعيد .. شافت فؤاد لسا واقف مقابل البيت وساند حالو عالسيارة والسيجارة بإيدو سكرت الستارة ورجعت لغرفة جومانا دخلت لعندها ..: اذا حابة تشوفي ليكو بعدو برا .. اكيد ما صدقني شالت الغطا عن وجهها ..: وما رح يصدقك .. وين واقف بدي شوفو رائدة : وقفي عالشباك هدا ما رح يشوفك وخلي الضو مطفي قامت عن التخت ووقفت عالشباك ورا الستارة .. مدت نظرها وشافتو .. خفق قلبها .. نزلت دمعة من عيونها .. دمعة قهر ووجع على حالها بس ما طالع بإيدها تعمل شي ____ بالوقت اللي كان واقف وعيون جومانا عليه من بعيد بتراقب كل حركاتو وصلو مسج .. فتح المسج وكان عنوان دق بسرعة لهاشم ..: شو هدا العنوان !؟ هاشم : ما بتعرف تقول مرحبا صرخ ..: هاشم !!! هاشم بخوف..: هدا عنوان اللي بعتلك المسجات .. قفل الخط بوجهو وركب السيارة وانطلق كل هدا تحت انظار جومانا اللي كانت متخبية ورا الستارة شافتو مشى .. سكرت الستارة وراحت لتختها كان ماشي بسرعة عالية ومو شايف شي قدامو عمل اتصال وطلب من رجالو ينطروه عند العنوان بعد وقت وصل كانت بناية عالية .. اطلع عليها وبعدها اشر للثنين اللي ناطرينو ليطلعوا فوق اخد نفس طويل وزفرو ببطئ .. كان حاسس بصخرة على صدرو .. احساس بشع .. ما كان عارف كيف رح يتصرف بهاللحظة .. عاهد حالو انو يتصرف بعقلانية وما يسمح لشي يخليه يتهور طلع للشقة ودخل كان رجالو ماسكين عماد ومربطينو على كرسي بنص الصالة دخل وابتسامة هادية على شفافو توسعو عيون عماد بس شاف فؤاد داخل من الباب .. قرب منو فواد ..: كنت مفكر ما رح اعرف امسكك مو !! حرك عماد راسو يمين شمال اطلع فؤاد على رجالو ..: اتركونا لحالنا هزوا روسهن وطلعوا من البيت قرب فؤاد عليه اكتر وشال اللزقة اللي على تمو بقوة .. : هلق انا وانت لحالنا .. وبدنا نحكي .. اذا حكيت اللي حابب اسمعو رح يكون العقاب بسيط عماد بخوف ..: جنى .. جنى اللي خططت وعملت .. انا كنت عبد المأمور ضربو فؤاد بوكس على وجههو .. هز براسو ..: تسؤ تسؤ مو هدا عماد: والله انا ما دخلني .. اعطتني مصاري وطلبت من جيهان تصورنا انا ما عملت شي .. ولا قربت منها … هي طلبت مني .. سكت وما عرف ينطق الكلمة خوفاً من فؤاد فؤاد: كمل عليك الأمان بلع عماد ريقو ..: هي طلبت اعمل معها علاقة بس جيهان منعتني وزبطت فيديو بالذكاء الاصطناعي لحتى ما انمسك .. فؤاد ببرود ..: وانت اي حدا بعطيك مصاري وبقلك اعمل وساوي بتعمل .. ما فكرت شو رح يصير بعدين عماد : سامحني .. المصاري عمو عيوني .. والله ما قربت منها ولا لمستها .. صدقني .. ما لمستها ... صدقني .. اسأل جيهان .. جيب جيهان واسألها .. كانت شاهدة على كل شي .. وجنى وعدتني اذا عملت اللي طلبتو رح تسلمني البنت وو.. سكت بس شاف النار بتطلع من عيون فؤاد هجم عليه فؤاد بعد ما فقد السيطرة على حالو .. نزل فيه ضرب على وين بيجعك دخلو رجالو وفكو عماد من بين ايدين فؤاد وقف فؤاد ومسح العرق اللي تجمع على جبينو ..: اعملوا الواجب معو وبتسلمو للشرطة مع الكلبة التانية طلع فؤاد من البيت ركب سيارتو وانطلق ___ تاني يوم صحيت رائدة عصوت التلفون الارضي.. قامت من مكانها لعند التلفون .. رائدة : ايوة كانت ام جومانا عالطرف التاني بتحكي عربي مكسر ..: ايواة انت .. وين جومانا .. سخيات من النوم رائدة : لك يولندا .. شوي شوي عليي انا ما بفهم العربي المكسر تبعك .. صرخت ..: جومانا تعي .. امك عالخط قربت جومانا من التلفون وحكت معها بالروسي ..: صباح الخير امي .. كيف حالك يولندا : اخبريني هل انت بخير .. ؟ جومانا : كل شيء على ما يرام .. اخبريني .. هل رأيتي زوجي ليلة امس يولندا : كلا .. لماذا جرمانا : لقد اتى الى هنا .. وسأل عنكِ واعتقدت انه قد اتى اليكِ .. لا تفكري بالامر .. اين ماركوس .. اخبريه ان يكلمني يولندا : حسنًا يا صغيرتي .. انتبهي لنفسك وللجنين قفلت الخط واطلعت على رائدة ..: لساتو برا رائدة : لا ما في حدا … بس اكيد موصي حدا ليراقب البيت جومانا : يراقب شو عليه .. جوعانة رائدة بحب ..: خسا الجوع .. تعي نفطر قعدوا حول الطاولة جومانا بتفكير عميق ..: خالتو .. كيف اتفقتي انتو وامي .. يعني انتو ضراير .. كيف هيك رائدة بمزاح ..: جمعنا شي واحد .. جومانا : شو هو رائدة : العيشة مع ابوكي لا تحتمل ضحكت جومانا ..: ايه لا تحكي على ابي رائدة بحزن ..: بعد اللي عملو جومانا : الله يسامحو .. حطت الخبزة من ايدها ..:حمد لله شبعت .. خالتو .. ما في مجال اطلع بس شوي .. رائدة بحزم ..:هلق بدك تطلعي بعد ما اجى لهون .. لا .. انت بحاجة نقاهة .. ولا تعلقيني مع امك .. اذا عرفت رح تدبحني بالعربي المكسر تبعها جومانا : معناه بدي حاكي ناديا .. لا تخافي .. بفهمها اني برا البلد رائدة : اذا هيك تمام راحت لغرفتها وفتحت فيس .. بعتت لناديا رسالة ( كيفك ناديا .. انا اسفة لاني رحت وما ودعتك .. اشتقتلك كتير .. طمنيني عنك ) ردت عليها ناديا بنفس الدقيقة كأنها ناطرة رسالتها ( وين رحتي وتركتيني .. والله اشتقتلك) ( سافرت لعند امي لريح راسي شوي من المشاكل .. شو اخبارك انت ويزن ) ( حددنا موعد العرس .. ) ( ايمتى) ( كمان شهرين ) ( الف مبروك .. فرحتلك كتير .. ) ( رح تيجي مو ) ( ما بعرف والله .. بس اكيد رح حاول ) بقيو يحكو هيك ساعات .. __ بعد شهرين واقفة قدام مرايتها وعيونها على بطنها .. حسست عليه ودمعة عالقة على طرف عينها دخلت رائدة لعندها ..: الا وبدك تعملي اللي براسك مسحت الدمعة عن عينها ..: هاي رفيقتي الوحيدة ولازم كون جنبها رائدة : لك يا حبيبتي الدكتورة طلبت منك ترتاحي .. ما بصير هيك .. انت عندك مشاكل بالحمل .. وهلق اذا رحتي رح تشوفي فؤاد.. قاطعتها بحدة ..: ما بدي اتناقش .. خلص بقى .. هاي رفيقتي ولازم كون جنبها وودعها قبل ما سافر قربت منها وحضنتها ..: خلص خلص .. كيف بدك .. روحي .. لا تعصبي انت .. ماركوس رح يروح معك جومانا : ايه رح يوصلني بعدت عنها واطلع على حالها اخر نظرة .. حملت جزدان مناسب للفستان طلعت للصالة ..: مارك .. انا جاهزة .. لننطلق .. تقدم منها بهدوء ..: ما هذا الجمال يا صغيرتي .. انت فاتنة رائدة : وبعدين معكن .. انتو رح تبقو تحكو روسي وانا ما عم بفهم شي ضحكت جومانا ..: يعني لو حكو عربي رح تفهمي .. خليكي هيك نيالك ما عم تفهمي شي من شي رائدة بإبتسامة حنونة ..: تسلملي هالضحكة ماحلاها جومانا : هيا مارك .. خالتو ما رح اتأخر .. يلا سلام ___ وقفت السيارة قدام الصالة المقام فيها الحفل اخدت نفس طويل وزفرتو بهدوء اطلع عليها مارك ..: دعيني ارافقك للزفاف .. جومانا : لا سأذهب لوحدي .. عندما انتهي سأكلمك .. الى اللقاء فتحت باب السيارة ونزلت .. تقدمت بهدوء وتوجهت لصالة .. كان اهل ناديا واهل يزن عالباب بستقبلو بالمدعوين قربت جومانا من ام ناديا وسلمت عليها وحضنتها .. والتانية رحبت فيها بحرارة .. سألتها عن ناديا وخبرتها انا بغرفة التبديل لسا توجهت ناديا لغرفة التبديل وقفت قدام الباب ودقت بهدوء دخلت وعيونها على ناديا .. قربت منها وعيونها كلها دموع ..: الف مبروك يا عمري حضنتها ناديا بقوة ..: كنت عارفة انك ما رح تتركيني بهيك يوم جومانا : مستحيل .. ما بقيلي بهالحياة غيرك ناديا : يخليلي ياكي يا رب .. تعي ارتاحي هون بلا ما تبقي واقفة .. بعد ربع ساعة اطلعت جومانا بناديا ..: لك ناديا كأنو تأخرتي عالعريس .. النا حصة نازلات تبربر وچر .. روحي لعريسك هلق اكيد بكون خلل ناديا : والله بشوفتك نسيت كل شي دخلت امها لعندها ..: لك بنتي شو صار معك .. يزن برا بسأل عنك ضحكت جومانا وناديا ..: يلا جيت عصوت الاغاني والطبول دخلو العرسان بزفة ملوكية كانت العيون كلها على العرسان والزفة .. الا عيون واحد من الحضور كانت عليها متل الصقر بتراقبها .. التفتت حولها وشافتو واقف بعيد عنها وعيونو عليها .. تسارعت نبضات قلبها وحست ببرود باطرافها اخدت تلفونها من الجزدان ودقت لمارك ليجي ياخدها بقيت واقفة مكانها وتتحاشى تتطلع عليه .. بس كانت حاسة بنظراتو عم تاكلها وتاكل جسمها خلصت الزفة وقعدوا العرسان بالمكان المخصص الن .. توجهت جومانا لعندن قربت من ناديا وحضنتها بقوة.. :الف مبروك حبيبتي .. ناديا : الله يبارك فيكي يا عمري التفتت لعند يزن اللي ضربو عيونو على بطنها المنتفخة جومانا : مبروك استاذ يزن .. انتبه عليها هاي غالية عليي .. دير بالك تزعلها يزن بصدمة ..: الله يبارك فيكي جومانا : انا صار لازم امشي .. انتبهي على حالك تركتن ومشت اطلعت ناديا بيزن ..: يزن شبك يزن : رفيقتك حامل !!!! ناديا : ايه ، شو فيها ما فهمت لي مصدوم اطلع عليها ..: من مين ناديا بعصبية ..: شو من مين يعني .. من رفيقك من مين بدو يكون يعني .. مو زوجها يزن: شبك عصبتي .. ما قصدي شي حبيبتي .. انا بسأل لانو بعرف انن منفصلين ناديا بعصبية..: من قبل ما ينفصلو يزن : وفؤاد بعرف بالموضوع ناديا : لي هيك موضوع بتخبى .. يزن: خلص بعتذر ما قصدي شي .. لا تعصبي ناديا : انتبه لكلامك المرة الجاي قرب منها وهمس بإدنها ..: يسلملي المعصب انا .. هلق بعد شوي رح نسيكي كل شي خجلت من كلامو ..: يزن ابعد عني احسن يزن بمزاح ..: خلص خلص بعدت بلا فضايح طلعت من الصالة ووقفت عند المخرج حست بانفاسو جنب ادنها ..: لابقلك الحمل حست برعشة بكل جسمها سحبها من ايدها واخدها للحديقة ورا الصالة .. وقفها عالحيط وحاوطها بإيديه ..: اشتقتلك اطلعت عليه بعيون دبلانة ..: سهلة مو فؤاد : شو هي السهلة جومانا : انا .. سهلة .. ايمت ما بدك بطلع خاينة وعاهرة وكل كلامك الجميل اللي قلتلي ياه باخر مرة .. وايمت ما بدك اشتقتلك وما بقى فيي عيش بدونك .. لي .. لي انا .. فؤاد: انا اسف جومانا : وانا قبلت اعتذارك .. جد بحكي .. مو زعلانة منك ابدا .. فؤاد : جد جومانا : ايه .. عارف لي .. لانك ما عاد تعنيلي شي .. فؤاد : ما عاد اعنيلك شي .. انا ابو اللي ببطنك رفعت حاجبها فؤاد بادلها نفس نظرات الاستغراب جومانا : كيف عرفت .. انت ما كنت متأكد ..كيف فجأة تأكدت لا وواثق كمان فؤاد بغضب ..: جومانا لا تخبصي اطلعت عليه ببرود عكس النار الشاعلة بقلبها ..: سبحان الله اول ما تعرف عليك كنت مبين عاقل ورزين وحكيم .. بس ظروف الحياة والازمات اللي مرقت فيها اظهرت كل امراضك النفسية بدون سابق انذار .. قرب عليها والتهم شفافها .. بعد عندها وحط جبينو على جبينها وهمس بين انفاسو المخربطة ..: ما رح اتنازل عندك مهما يصير بعدتو عندها بالقوة ..: بنصحك تقعد مع حالك .. جمع كل ذكرياتنا مع بعض من اول لحظة شفنا بعض فيها .. فكر فيها مزبوط وتعمق بعلاقتنا .. وشوف كيف كانت غلط من اساسها .. كلها كانت مبنية غلط .. واساسها مو قوي .. وشوف كل الظروف الي مرينا فيها رح تلاحظ انو الفراق نهايتها .. ما كنا لبعض من الاساس .. القدر ما رح يجمعنا ابداً مشت خطوتين لقدام ورجعت التفتت عليه وحكت بنبرة كلها قهر ووجع ..: تركني عيش ايامي براحة .. خلص ما عاد اتحمل اكتر من هيك قهر .. شبعت الم وقهر .. لا تراقبني ولا تسأل عني .. الليلة طيارتي لروسيا .. خلص تركني عيش بسلام نفسي .. وجودك بحياتي غضب عليها .. انا تعبت .. انتبه لحسن ولا تكرهو فيي .. قلو انو كل شي كان غصب عني .. ولو يرجع فيي الزمن ما راح اتركو.. بس الوضع كان غصب عني .. قولو اني راجعة بس استجمع قوتي رمت هالكلمتين ومشت بدون ما تلتفت لورا كلامها نزل على قلبو متل الاسهم .. فعلاً كل كلمة حكتها صح .. وجودو بحياتها الم وقسى ولعنة .. بهاي اللحظة قرر يدعس على قلبو ويمشي مشان راحتها ___ بعد اشهر بعد رحلة ساعات طويلة وصلت لبلاد .. وقفت بتعب عند باب الخروج واخدت نفس طويل التفتت لورا بعدما حست على ايد على كتفها ..: ما في بعد البلاد خالتو رائدة رائدة بعتب ..: لازم بقينا هناك جومانا .. لحتى تولدي .. بس يباسة الراس ورثتيها عن ابوكي جومانا : خلص تعبت .. بدي شوف ابني .. حاسة رح يصير شي رائدة: متل ما اتقفنا .. انا بحل الموضوع انت لا تدخلي .. ما بدي تحتكي مع فؤاد بهاي الفترة هزت براسها بدون ما تجاوب وصل التاكسي ونزل السائق حط الشنطات بالسيارة فجأة بلشت تحس بأوجاع اسفل بطنها .. اوجاع قوية اطلعت عليها رائدة ..: يلا يا بنتي .. اركبي جومانا بوجع ..: خالتو .. شكلي رح ولّد اطلعت عليها بعدم فهم جومانا : وجع خالتو وجع مسكتها من ايدها وركبتها بالتاكسي رائدة : اخي روح لمشفى ال **** انطلق السائق للمشفى رائدة: ما بتسمعي الكلام انت .. هيك مبسوطة حومانا بالم ..: خالتو هلق وقتو .. حاكي الدكتورة رقمها بالتلفون اخدت التلفون ودقت للدكتورة بعد وقت وصلو المشفى .. دخلوها للكشف وبعد فحوصات دخلت للعملية .. __ بعد ثلاث أيام فتحت عيونها بتعب بعد ما سمعت صوت نقرات خفيفة عالباب ابتسمت بحُب لما شافت الممرضة داخلة لعندها الممرضة بإبتسامة ..: صباح الخير حبيبتي .. كيف اصبحتي رفعت حالها ببطئ..: لسا موجوعة قربت منها الممرضة ..: شي طبيعي .. كانت ولادة رائعة وانت كنت رائعة .. بس هدا الوجع رح يخف تدريجياً .. ممكن اخدلك ضغط وحرارة مدت ايدها لحتى الممرضة تقيسلها الضغط بعد ما خلصت الممرضة ..: لا كل شي تمام .. بس بقي اخد عينة دم للفحص .. ان شاء الله بنكتبلك على خروج بكرا اذا كل شي تمام انمحت الابتسامة عن وجهها ..: بكرا رح اتخرج .. حاسة حالي مو منيحة مسحت الممرضة على شعرها ..: البيت اريحلك .. ولا تقلقي اذا حسيتي بشي وجع فيكي ترجعي لهون .. نحنا معك .. بتحبي ساعدك لتقومي تمشي شوي هزت راسها بالنفي الممرضة : تمام .. بس كمان ساعة رح ارجع مشان نمشي شوي .. تمام ..ايمت ما بدك فيكي ترني الجرس ____ بعد أيام عالساعة تنتين بعد نص اللليل .. صوت صراخ البيبي بكل الغرفة صحيت والدموع على خدودها .. صرخت بكل صوتها ..: تعالو خدوها من هــــــون دخلت رائدة لعندها بسرعة ..: بسم الله عليكي .. شبك لك بنتي شدت شعرها ..: خديها من هون .. ما عاد اتحمل .. رائدة : اهدي اهدي .. رح اخدها .. والله ما سمعتها .. حملت البنت ..: نامي انت .. انا رح اعطيها الرضعة .. ارتاحي انت اخدت رائدة البنت وطلعت من الغرفة قعدت جومانا عالتخت وحطت ايديها على راسها وصارت تبكي بعد عشر دقايق دخلت رائدة لعندها ومعها البنت ..: نامت .. بدك انيمها عندي لتعرفي تنامي اطلعت عليها جومانا والدموع بعيونها ..: بدكن تاخدوا هاي كمان .. بدكن تحرموني من ولادي .. نيمت رائدة البنت بتختها وراحت لعند حومانا .. اخدتها بحضنها ..: بسم الله عليكي .. شو هالحكي .. انا قلت هيك لتعرفي تنامي .. خلص انا رح نام عندك هون وهيك بسمعها لما تبكي وانت بتبقي نايمة .. هزت جومانا براسها وشدت على حضنها ..: ايه ايه خليكي جنبي طبعت بوسة على راسسها ..: من عيوني .. يلا نامي انت .. انا جنبك غمضت جومانا عيونها وراحت بسابع نومة ___ تاني يوم صحيت من النوم .. قامت من تختها .. توجهت لمهد الصغيرة .. اطلعت عليها وصارت تتأمل ملامحها .. بعدت عالمهد وتوجهت للحمام .. اخدت دوش سريع وطلعت .. لبست تيابها .. بهاللحظة بلشت الصغيرة تبكي وصراخها يعلى .. راحت لعندها وحملتها بين ايديها وعيونها عم تتفحص ملامحها .. اخدتها بحضنها وقعدت عالتخت .. صارت تهزها بهدوء .. بس البنت لساها بتبكي .. نزلت دمعة من عين جومانا ..: اهدي ماما .. ليكها الماما جنبك .. اهدي حبيبتي .. حاولت ترضعها بس البنت لساها بتبكي وبتصرخ حطتها جنبها عالتخت وبعدت عنها .. شدت رجليها لصدرها وصارت تصرخ ..: تعالو قيموها من هون .. تعالو خدوها دخلت رائدة لعندها بخوف وشافت جومانا بهالوضع اخدت البنت بسرعة ..: شبك يا امي ..شو صابك يا عمري جومانا بهستيريا ..: ما بتحبني .. ما بتحبني .. بس احملها بتبكي .. ما بتحبني رائدة بحسرة ..: لا حول ولا قوة الا بالله .. اهدي يا عمري .. لسا البنت صغيرة .. شو هاي ما بتحبني جومانا ودموعها على خدها ..: ما بدها ترضع .. بدها تبعد عني متل ما اخوها راح رائدة : استهدي بالله .. خدي جربي رضعيها وانا جنبك حطت البنت بحضنها ومسحتلها الدموع عن وجهها ..: يلا جربي شوي شوي بصير كل شي تمام وما عاد تقدري تبعدي عنها .. بدك احكي مع الممرضة اللي كانت معك بالمشفى .. اعطتني رقمها هزت راسها يمين شمال ..: ما بدي حدا رائدة : متل ما بدك .. شوفي ليكها بترضع .. شوي شوي بصير الموضوع اسهل .. بس بدك صبر .. انت بترضعيها بالنهار وانا بعطيها رضعة بالليل وهيك بتنحل القصة .. يلا كملي رضاعة وانا رح حضر الفطور جومانا وعيونها عبنتها ..: ماني جعانة رائدة : لا حبيبتي لازم تتغذي لحتى يدر فيكي الحليب .. يلا خلصي والحقيني .. واذا بدك بجيب الاكل لعندك ___ بشركة العامري كان فؤاد قاعد ورا مكتبو وعيونو عالاوراق وبقلب فيهن بدون هدف .. وصلو اشعار عالتلفون من معرض الصور .. ترك الأوراق وحمل التلفون .. فتح الاشعار وكانت صورة الو ولجومانا من سنتين بالزبط متل هدا التاريخ .. فتح الصورة وصار يتمعن فيها .. لاحت ذكرة ببالو من ذكرياتو معها بهدا اليوم اللي اخدو فيه صورة مع بعض ..🥀🥀فــــــــــلاش بــــــــاك🥀🥀.. انهى فؤاد الاجتماع وتوجهوا كل الموظفين للمكاتب بقي فؤاد قاعد عالكرسي وعيونو عاللابتوب .. وبدون ما يرفع راسو حكى ..: جومانا لو سمحتي خليكي هون وقفت جومانا وعلامات الاستغراب على وجهها ..: خير استاذ في شي عندي شغل مهم لازم سلمو للاستاذ يزن فؤاد وهو لسا بنفس الوضعية ..: قولي لزميلتك تتفضل عمكتبها اطلعت بناديا بإستغراب ورفعت حواجبها طلعت ناديا وسكرت باب غرفة الاجتماع وراها وقف فؤاد وعلى وجههو ابتسامة ..: عم تتهربي مني حضرتك .. يعني ما رح اعرف جيبك اطلعت عليه بشر ..: فؤاد .. شو بدك قول .. مفكر انك تحرجني قدام الموظفين .. المرة الجاي بحرجك وما برد عليك قرب منها بهدوء ولسا الابتسامة عوجه ..: نفسي اعرف كيف قلبتي الادوار .. انا اللي كنت زعلان .. كيف فجأة صرتي انت اللي زعلانة وانا براضي فيكي ابتسمت بنصر ..: سر المهنة لف ايدو على خصرها وقربها منو ..: هالابتسامة اعتبرها علامة صلح هزت براسها ..: وانت لسا زعلان فؤاد : انا نسيت لي كنت زعلان من الاساس جومانا : يعني لسا بتحبني قرب وجهو منها اكتر..: بموت فيكي .. هلق اذا .. سكت بس سمع صوت كعب نسائي برا الغرفة معلن عن قدوم حدا لغرفة الاجتماع .. بعد عن جومانا وعيونو على الباب انفتح الباب وانتشرت ريحة عطر بأرجاء الغرفة ولسا عيون فؤاد عالشخص اللي داخل توسعت ابتسامتو بس شاف اللي دخل اطلعت عليه جومانا وعلى ابتسامتو ..: قلولي انك هون وحبيت اعملك مفاجئة كان صوت انثوي ناعم شافت فؤاد تحرك وتخطاها متوجه للضيفة التفتت خلفها وشافت صبية حلوة وجذابة واقفة عند الباب بكامل اناقتها توسعت عيون جومانا وهي شايفتها ماخدة فؤاد بأحضانها وعم تسلم عليه بحرارة شعلت نار الغيرة بقلبها دخل يزن من الباب عم يلهث ..: الانسة كريستينا هلق وصلت وطلبت تقابلك .. اجت عينو بعين جومانا اللي كانت واقفة والنار شاعلة من حولها وعيونها على فؤاد ..: انا .. انا قلتلها انه عندك اجتماع .. بس هي اصرت تفاجئك كرستينا: اشتقتلك فؤاد فؤاد: لي ما قلتيلي انك جاية كنت جيت استقبلك بالمطار حطت كرستينا ايدها على وجههو ..: حبيت فاجئك فؤاد: احلى مفاجئة .. اطلع يزن على فؤاد اللي كان بعالم تاني لكشو من ايدو ليصحى للبركان الشاعل وراه ..: فؤاد .. الاجتماع فؤاد وعيونو على كرستينا ..: اي اجتماع .. انتهى الاجتماع من شوي يزن .: فؤاد فجأة حس فؤاد بجسم ضرب فيه وبعدو عن كرستينا بهاي اللحظة تذكر انو جومانا موجود معو بنفس الغرفة اطلع عليها وهي ماشية ..: جومانا .. لحظة اطلعت جومانا بيزن بدون ما تلتفت لفؤاد ..: استاد ممكن كلمة على جنب قرب منها يزن حطت الملف بإيدو بغضب ..: انا اجازة .. يزن : لايمتى .. جومانا بغضب وعيونها على فؤاد..: يوم يومين شهر سنة لسا ما بعرف لفت حالها ومشت وهي عم تشتم وتتوعد اطلع يزن على فؤاد ..: يلا تفضل استاذ حلها لشوف حاوطت كرستينا وجهو ..: ما رح تعزمني على شي .. مو انا ضيفتك يزن: فؤاد !! كرستينا: يلا فؤاد لفت ايدها على زندو وسحبتو وراها وجه فؤاد كلامو ليزن ..: حلها يزن بمعرفتك مشى فؤاد ومعو كرستينا يزن : طبعاً انت خبص ويزن حلها طلع يزن لمكتب جومانا دخل وشاف جومانا بترتب بأغراضها ..: جومانا .. ما بنفع تاخدي اجازة هدا الاسبوع .. بكرا عنا اجتماع مهم ولازم تكوني موجودة كانت رح تصرخ بس مسكت حالها ..: استاذ .. قاطعها ..: وكمان عندك زيارة تفقدية بالمشروع .. بعتذر منك حكى هالكلمتين وطلع ..: والله لتشوف ايام سودا يا فؤاد بعد ساعتين رن تلفون المكتب .. ردت جومانا ..: نعم .. اي ملف .. سلمتو للاستاذ يزن .. اطلعت جنبها ..: تمام تمام .. موجود عندي .. تمام اطلعت عليها ناديا وشافتها بتضرب السماعة بغضب ..: شو في جومانا بنرفزة ..: عم يخلق حجج مشان روح لمكتبو .. ايه تمام شو عليه .. هلق بشوف مين جومانا ناديا : لك جومانا روقي شوي .. انت رح تفضحي حالك بالشركة .. هلق اذا عملتي شي شغلة بتصير الشركة كلها تجيب سيرتك .. روقي .. ما تتهوري اخدت نفس وزفرتو ببطئ..: صح معك حق .. لازم اهدى .. هلق بشوف ضربت ناديا ايديها ..: عليه العوض ومنو العوض اخدت الملف وتوجهت لمكتبو دخلت بكل هدوء ..: نعم استاذ .. طلبتني فؤاد : ارتاحي تقدمت من مكتبو ..: هدا الملف اللي طلبلتو لمشروع المركز التجاري فؤاد : تمام .. وهدا الملف فيه كافة التعديلات عالمخططات .. ارتاحي لناقشها سوا رفعت حاجبها ..: سوا اطلع عليها وعوجهو ابتسامة ..: ثواني ورح كون معك قام من مكانو تحت نظرات جومانا توجه لمكتب السكريترة ..: لو سمحتي بدي تروحي عاالارشيف تجيبي كل مشاريع المجمعات التجارية بعام ٢٠١٤ .. اطلعت عليه السكريترة بحيرة فؤاد: بعرف رح ياخد وقت .. فيكي تطلبي المساعدة من اي موظف .. شكراً سلف دخل للمكتب بعد ما تأكد انو السكريترة راحت .. قفل الباب بالمفتاح والتفت لعند جومانا وقف بنص المكتب اطلع على جومانا اللي كانت لسا عم تستوعب شو عمل فؤاد : وهي فضيت المكتب لافهم شبك جومانا بصدمة ..: لي قفلت الباب .. قرب منها بهدوء وعلى وجهو نظرات خباثة ..؛ بدي اصلح غلطتي رمت الملف من ايدها بعد ما فهمت نواياه وقامت عن الكرسي وصارت تتراجع للخلف ..: فؤاد انا بحذرك .. ما بعرف شو رح تكون ردة فعلي .. تراجع احسن لالك ولالي فؤاد بخباثة ..: حابب شوف شو رح تعملي قرب منها اكتر وحاصرها بين ايده ..: انا بعتذر .. بس كريستينا رفيقتي من زمان قاطعتو بحدة ..: قصدك حبيبتك مو رفيقتك فؤاد وعيونو بتتنقل بين عيونها وشفافها ..: بس من زمان .. يعني ماضي .. مو مهم بالنسبة اللي جومانا بغضب ..: فؤاد بعد عني احسن .. ما بدي اتصرف معك تصرف يزعجك .. روح عند حبيبتك واتركني بحالي فؤاد : لا تخافي رفيقتي بالفندق بترتاح المسا رح شوفا .. بس حالياً انا مع حبيبتي هلق وهي بين ايدي .. دفشتو من صدرو .. واخدت كاسة المي عن الطاولة وكبتها على راسو ..: بس قبل ما تروح لازمك حمام .. بعدت عنو وهربت لجهة الباب .. اطلعت وما لقت المفتاح ..صرخت ..:،اعطيني المفتاح حالاً لفت حالها وتوسعت عيونها وهي شايفة فؤاد عم يفك ازرار قميصو بلعت ريقها ..: شو عم تعمل فؤاد ونفس الابتسامة عشفافو ..: ببدل تيابي بعد الحمام .. ما بدك تساعديني خلع القميص وبقي عاري الصدر قلبو عيونها لقلوب وهي عم تشوفو بهالمنظر وعيت على حالها وهزت راسها بسرعة ..: افتح الباب عم قلك .. لا تخليني اعملك فضيحة قرب منها بسرعة .. مسكها من ايديها وسحبها للكنبة ..: لكل فعل رد فعل يا حلوة بلعت ريقها وهي عم تشوف نواياه وفاهمتها..: لا تتهور حبيبي .. انا غلطت والمسامح كريم .. وانت ابو الكرم فؤاد بخباثة..: هلق صرت حبيبك قرب وجهو من وجهها .. وكان رح يخطف بوسة من شفافها بس توسعت عيونو بعد ما حس بكف ايدها نزل على خدو بعد عنها على مضض .. هربت منو وسحبت المفتاح من جيبة الجاكيت وهربت من المكتب بقي مكانو شوي وهو عم يستوعب اللي عملتو .. ضربتو عوجهو .. انرسمت ابتسامة عشفافو .. حط ايدو مكان الكف .. بسرعة لبس قميص تاني ورجع لشغلو دخلت لمكتبها وانفاسها مخربطة .. قعدت ورا المكتب ولسا عم تستوعب اللي صار .. ابتسمت بحب والقلوب انتشرت حولها ..: كان رح يعملها فؤاد بلحظة تذكرت شو كان ردة فعلها .. تمتمت ..: الله يستر دخلت عليها ناديا ..: شبك عم تتبسمي لحالك هيك دبلت عيونها ..: ما شي ناديا : لكن شبك هيك هزت راسها وعبست : ما شي .. بدي انهي هالشغلة وارجع عالبيت ____ تاني يوم وصلت جومانا وناديا للشركة بالممر وقفها يزن .. يزن : جومانا .. المدام فيروز حكت مع فؤاد وطلبت تروحي عندها عالفيلا .. في كم ملاحظة بدها تقلك عليهن قبل ما تسافر جومانا : تمام استاذ .. اي ساعة يزن : عالساعة وحدة ونص هزت براسها وكملت لمكتبها بعد ساعات حطت القلم من ايدها والتفتت لناديا ..: ندوش .. صار لازم اطلع بلا ما اتأخر .. رح حاكيكي اذا ما خلصت اموري قبل نهاية الدوام ناديا بحب ..: انتبهي لحالك اخدت شنطتها واللابتوب وطلعت من المكتب مشت بالممر لوصلت لمكتب فؤاد اطلعت عالمكتب وابتسامة على وجهها فجأة نقزت لما سمعت همس جنب ادنها فؤاد: ساعدك بشي التففت عليه وكان صعب عليها تخفي ابتسامة الحب المرسومة على شفاها ..: رح روح لموعدي مع مدام فيروز .. فؤاد وعيونو عشفافها ..: بتحبي رافقك حكت بدون وعي ..: ايه فؤاد: لكن مشي قبل ما نتأخر طلعوا من الشركة وانطلقو لفيلا مدام فيروز اطلعت جومانا بفؤاد..: فؤاد في سؤال من الصبح بفكر فيه .. نحنا لي ما اجتمعنا بمدام فيروز .. انو كل طلباتها عم تبعتن للايميل او لالك مو المفروض نجتمع فيها من الاول فؤاد : ما صار شي .. هلق بنجتمع فيها جومانا: بتصدق اني حبيتها بلا ما شوفها.. وكتير ارتحت بالشغل ببيتها فؤاد: حبيبتي انت اللي بتخلي اي عميل يرتاح معك .. انت اللي اسلوبك لبق ومريح اطلعت عليه بطرف عينها ..: ما كان رأيك فيي اول ما عرفنا بعض مسك ايدها وباسها ..: كنت احب استفزك مشان شوف ردة فعلك اللي بعشقها بعد وقت وصلو للفيلا فؤاد: يلا انزلي نزلت جومانا من السيارة واطلعت عالفيلا بإعجاب بس سرعان ما تحولت نظراتها للاستغراب التفتت لفؤاد..: لي ما في عمال .. ايمت خلصوا .. ما حد اعطاني خبر لف ايدو على خصرها ومشاها ..: تعي .. دخلوا للفيلا ولسا علامات الاستغراب على وجهها ..: شو هدا .. فؤاد: شبك حبيبتي جومانا: فؤاد.. في حد تاني بشتغل بالفيلا .. انا ما اعطيت تعليمات للعمال ولا مهندس الديكور نسق معي شي بعد عنها وتوجه للباب الرئيسي .. قفلو بالمفتاح ورجع لعندها توسعت عيون جومانا وزادات ضربات قلبها ..: وشو هاي الحركة .. شو الو لزوم تقفل الباب .. ووين مدام فيروز قرب منها بهدوء وعلى وجههو ابتسامة صفرا ..: ما في حدا بهالاسم زادت ضربات قلبها ..: كيف .. شو هالابتسامة اللي عوجهك .. شو رح تعمل حط ايدو على خدو ..: جبتك لهون لحتى نصفي هيك شوية حسابات مع بعض بلحظة تسلل الخوف لقلبها وبلش التوتر يظهر على ملامحها ..:فــ .. فــ .. فـــؤاد.. انا اســـفة .. مـــ .. مــا كان قــصدي .. بعتـــذر قرب منها اكتر وسحبها من خصرها لعندو ..: شبك هيك توترتي .. لفها لصار ظهرها على صدرو .. لف ايده على خصرها وسند دقنو على كتفها ..: شايفة هاي الفيلا .. قرب وهمس بإدنها بكل بحب ..: رح تشهد على حبنا رجفوا اطرافها وما عاد فيها توقف على رجليها بعد ما ترجم عقلها عبارات فؤاد المليانة حب لسيناريوهات نهايتها وخيمة ما عاد قدرت تحكي .. انربط لسانها شدها لصدرو اكتر ..: واليوم رح يكون اول يوم النا سوا فيها .. التفتت عليه وبعيونها الف سؤال والف رجاء .. قرب منها ومسك دقنها وطبع بوسة على شفافها ... بعد عنها وحط جبينو على جبينها ..: هاي الفيلا اللي .. وانا طلبت منك تعملي المخططات على ذوقك .. لانو رح تكوني انت سيدتها اطلعت عليه بعدم فهم وهي لسا مخدرة .. بس بعدها استوعبت كلامو .. حركت حجر عينها بكل زوايا الفيلا .. ابتسمت وهي عم تشوف كل فكرة من افكارها مجسدة على ارض الواقع طلعت من افكارها على صوت فؤاد فؤاد: وهلق بعد ما فرحتي بالمفاجئة او انصدمتي .. رح نرجع لموضوعنا حمرو عيونو فجأة ..: شو هدا اللي عملتي مبارح .. توسعت عيونها ..: ما عملت شي .. انت تماديت بالاول مسكها من ايدها ..: وكاسة المي سحبت ايدها منو بالقوة وبلمح البصر ركضت عالدرج وطلعت للطابق التاني دخلت لوحدة من الغرف .. سكرت الباب وراها .. اطلعت عالقفل وشافت ما في مفتاح .. شتمت حالها بأفضع الشتايم عليي عملتو وهي عم تتخيل نهايتها سمعت خبط فؤاد على الباب رجف قلبها..: فؤاد.. اللي بتعملو عيب فؤاد: افتحي بالزوق جومانا جومانا: خلص المسامح كريم قلنا فؤاد: تمام المسامح كريم .. افتحي مشان نرجع للشركة رح تتأخري جومانا: تمام بفتح بس روح لسيارتك وانا بلحقك وبدون سابق انذار .. دفش فؤاد الباب ودخل للغرفة تحت نظرات جومانا المصدومة اطلع فيها من فوق لتحت ..: هيك مبسوطة عم نلعب متل الاطفال رفعت ايديها بوضعية الدفاع ..: لا تتمادى .. والله بأذيك ضحك على هبلها ..: شو رح تعملي يعني بلمح البصر سحبها من ايدها واخدها بحضنو وحاوط خصرها ..: اشوف شو رح تعملي رفعت نظرها لعيونو وقلبها عم يخفق بسرعة ..: ما شي لمس رقبتها وعيونو على شفافها ..: بحبك جومانا ما حست على حالها غير عم تقرب منو وتطبع بوسة على شفافو بعدت عنو ..: وانا بحبك ابتسملها بحب ..: يعني ضحكتي عليي هزت براسها بفرحة ..: صافي يا لبن فؤاد : حليب يا قشطة .. يلا خلينا نمشي .. اطلعت عليه بإستغراب فؤاد بخباثة واضحة… يعني .. انا وانت بحضني .. ولحالنا .. وهلق بيجي الشيطان بعد شوي .. وانا ما عاد امسك حالي اكتر من هيك بعد عنها على مضض ومشى ..: يلاااااا سحبتو من ايدو ..: لك لحظة تعال وقفت جنبو وسحبت تلفونو ..: حابة ناخد صورة للذكرى .. حطت التلفون على حفة الشباك وشغلت العداد .. رجعت لعند فؤاد .. لفت ايدها على خصرو ..: يلا فؤش .. تشييبيز اطلع بالتلفون وهي حطت شفافها عخدو .. وتصوروا .. ..🥀🥀بـــــــــاك🥀🥀.. ابتسم بحب وهمس ..: اشتقتلك يا عمري ..