*أنتيڪآ📜روايات* *قليلٌ من الوقت مع القصص يساوي حياةٌ بأكملها🤎🕰️* *ننشر جميع القصص والروايات🤎🕰️* *قناة خاصة لمحبي القراءة والقصص* _ *ننشر جميع القصص والروايات🤎🕰️* *حب🤎🕰️* *حزن🤎🕰️* *اكشن🤎🕰️* *رعب🤎🕰️* *تـحـت إشـࢪاف: تـيـم 📜🤎* *ࢪابـط الـقـنـاة:* https://whatsapp.com/channel/0029VamfKJHKOIBbdBbxOc3d *.#لعنة_الفؤاد🤎* #تتمت الجزء الرابع عشر بعد اسبوع كانت جومانا قاعدة بغرفة القعدة بتقلب بين محطات التلفزيون .. سمعت صوت بنتها من الغرفة .. ما اعطت اهتمام .. للحظة تذكرت انو رائدة نزلت للسوق .. قامت من مكانها وتوجهت لغرفتها .. حملت البنت وقعدت عالتخت لترضعها .. حاولت كتير ترضعها والبنت مو راضية ترضع ولساها بتبكي .. حطت البنت بغضب عالتخت جنبها.. سكرت ادنيها بإيديها وصارت تصرخ ..: لك خلص تبكي .. لك خلص .. تعبت .. تعبت .. بكى بكى بكى .. خلص قربت منها وحطت ايدها على تمها ..: خلص اخرسي .. ما بقى بدي اسمع صوت .. اخرسي اخرسي .. لي جيتي .. جيتي لتعذبيني .. بدك تزديني عذاب فوق عذابي .. خلص .. خلص شالت ايدها عن تم البنت وصارت تحرك حجر عينها بالغرفة .. اجت عينها عالمخدة الي جنبها .. سحبتها بقوة وحطتها على وجه بنتها وصارت تصرخ ..: خلص روحي ما بدي ياكي .. روحي خلص على اخر احظة دخلت رائدة عالغرفة وشافت اللي بتعملو جومانا ركضت لعندها وشالت المخدة عن البنت وحملتها ..: شو بتعملي زحفت جومانا لورا وصارت تصرخ بهستيريا ..: قميها من عندي .. ما بدي ياها .. روحي اعطيها لابوها ما بدي ياها .. بسببها انحرمت من ابني .. خديها من هون ما بدي اسمع صوتها وصرخت بكل صوتها ..: ما بدي اسمع صوتها ركضت رائدة للمطبخ وبإيدها البنت .. عملتلها رضعة وطعمتها .. بدلتلها تيابها ونيمتها بغرفة تانية رجعت لعند جومانا وشافتها لسا عنفس الحالة .. ضامة رجليها لصدها وبتبكي بدون صوت قربت منها والدموع بعيونها .. ضمتها لصدها ..: شو عم يصير معك يا بنتي .. والله ما عارفة شو اعملك .. قومي نطلع نتمشى شوي يمكن تغيري شكل .. قومي بدلي تيابك .. قومي نروح للدكتور يمكن في شي ومانك عارفة جومانا بهستيريا ..: ما بدي .. ما بدي اطلع .. اطلعت عليها وعيونها حُمر متل الدم وهمست ..: هلق فؤاد بياخد بنتي مني متل ما اخد حسن .. ما بدي اطلع.. هلق بعرف اني هون انا وبنتي وبخطفها ضمت راسها لحضنها ..: خلص اهدي اهدي بلا ما نطلع .. رح اطلب دكتور للبيت يمكن يعطيكي دوا يهديكي .. قامت راسها من حضن رائدة ..: لا لا لا لا .. انا منيحة .. ليكي انا منيحة ما فيني شي .. ما بدي دكتور .. خلص رائدة: خلص خلص بلا الدكتور .. يلا نامي وارتاحي نيمتها عالتخت وصارت تمسح على راسها بحب وتقرا عليها ايات من القرآن ____ بعد يومين تكرر نفس الحدث مع جومانا ووضعها كان بصير اسوء من قبل دخلت رائدة لعندها بعد ما لبست البنت تيابها ..: حبيبتي .. ما رح تغيري رأيك وتيجي معي .. جومانا : خالتو .. ضروري هالمشوار رائدة : ايه طبعاً لازم نطمن على البيبي جومانا : انتبهي عليها كتير منيح رائدة : لا تخافي طلعت رائدة من البيت وتوجهت لمركز رعاية الام والطفل ____ بالعيادة دخلت رائدة لعند الدكتورة فحصت الدكتورة البنت ..: لا كل شي تمام .. الوزن ..الطول ومحيط الراس كلو ممتاز بالمعدل رائدة بتردد..: دكتورة كنت بدي اسألك عن شي بس خايفة الدكتورة : لا تخافي اسألي رائدة: انت عارفة انا ست كبيرة وما بعرف بهاي الأمور … بس متأكدة انو في شي غلط عم يصير الكتورة : احكي رائدة بتردد..: بس اذا بخبرك بترجاكي ما تخبري الشرطة .. والله البنت بتروح فيها الدكتورة : قلقتيني .. رائدة بهمس ..: بنتي .. يعني امها للصغيرة . . من وقت ولادتها وهي بتتصرف تصرفات غريبة .. كل الوقت صراخ وبكى .. وخاصةً اذا الصغيرة بلشت تبكي .. خفضت صوتها اكتر ..: ومرتين جربت تخنقها بالمخدة لحتى تسكتها الدكتورة : ولي ساكتة عن الموضوع .. بنتك متل كتير امهات بتمرق بإكتئاب ما بعد الولادة .. رائدة بخوف ..: اكتئاب !! الدكتورة : شي طبيعي .. بعض الامهات بمرقو بفترة اكتئاب ما بعد الولادة الشي طبيعي اول ست اسابيع .. من قلة النوم والسهر والتعب .. نحنا بدورنا لازم نعرف كيف نتعامل مع الموضوع لحتى ما يتطور اكتر رائدة : شو لازم اعمل الدكتورة: اول شي يكون حدا يساعدها بالبيبي .. وجودك جنبها كتير ضروري .. خصصي ساعتين بكل يوم لتطلعوا برا البيت .. اعملوا اي شي برا البيت .. دايماً اعرضي عليها تبدل تياب البيت بتيابها القديمة قبل الحمل على حسب جسمها .. هدا الشي بعطيها طاقة ايجابية .. واهم شي دعم زوجها الها .. دايماً لازم يكون الزوج موجود ويتقاسم معها اي متاعب بتمرق فيها .. يعني ما فيها شي اذا صحيت البيبي بالليل والزوج قام وساعد الام فيها .. حتى لو يقعد جنبها وهي عم ترضعها .. هدا الشي بعطيها طاقة وبحسسها بوجود الناس جنبها باصعب الاوقات .. وكمان فيها تحكي مع صديقات لالها مرقو بولادات قبل .. وتحكي عن اللي بصير .. هدا الشي كتير بساعد لما تتشارك مع امهات غيرها تجاربهن .. اي شي بتحب تعملو لازم تعملو .. ما لازم تحس انها ولدت معناه ما عاد فيها تعمل شي .. حتى لو شي بسيط .. واذا هدا كلو ما ساعد فبنصحك تستشيري دكتور مختص او عاملة اجتماعية كتير بفيد رائدة : يا ربي انا الحق عليي ما كان لازم انطر كل هالوقت الدكتورة: اهم شي خلي دايماً عينك عليها .. لا تتركيها لوحدها وحسسيها بالانجازات اللي بتعملها وشوفي كيف رح تتحسن .. اما اذا الوضع استمر لفترة أطول من ست اسابيع فاكيد لازم استشارة طبيب مختص رائدة ؛ حاضر حاضر دكتورة.. شكراً كتير لالك الدكتورة : عليها العافية طلعت رائدة من عند الدكتورة مشوشة .. اخدت تاكسي .. كل الطريق وهو تفكيرها بشي واحد .. بس كانت كل ما توصل لقرارها تحس انو رح يصير شي اكبر .. بس بالاخر حسمت قرارها .. طلبت من الشوفير ياخدها لعنوان تاني ____ وصلت قدام شركة العامري .. وقفت شوي واخدت قرارها .. دخلت لعند موظفة الاستقبال ..: صباح الخير يا انسة .. بدي اقابل فؤاد العامري الموظفةً: في موعد .. رائدة : لا ..بس الشي ضروري الموظفة: بعتذر يا مدام ما فيني دخلك .. الاستاذ فؤاد عندو اجتماع برا الشركة وما في يستقبل حدا بهدا الوقت رائدة : بس احكي معو .. قوليلو من طرف.. قاطعتها الموظفة : بعتذر .. فيكي تاخدي موعد وترجعي بوقت تاني رائدة : يعني هلق عندو اجتماع برا الشركة ؟ الموظفة: يا مدام انت عم تعطليني .. لو سمحتي تفضلي .. تراجعت رائدة لورا .. لفت حالها وطلعت برا الشركة وقفت عند مدخل الشركة ..: يا رب ما يتأخر .. بس ما فيني ابقى واقفة هون اشرت لتاكسي وركبت رائدة : يا اخي بدي استنى شخص هون .. ما تمشي .. ولا تخاف رح حاسبك الشوفير : تمام خالة ضلت بالتاكسي اكتر من عشر دقايق الشرفير : شو خالة رح نستنى كتير اطلعت من الشباك وشافت فؤاد طالع من الشركة ومعو تنين.. طلعت من جزدانها مصاري وحاسبت الشرفير ونزلت بسرعة لحقت فؤاد لعند سيارتو ..: يا ابني .. لحظة شوي اطلع عليها فؤاد بإستغراب ..: خير خالة .. كيف فيني ساعدك ركز بملامحها ..: بعرفك!!! رائدة : ما بعرف اذا متذكرني ...انت شفتني مرة وحدة…. بس انا بعرفك منيح سكر فؤاد باب السيارة وتوجه لعندها ..: وين شايفك رائدة بتردد ..: انا .. انا.. من طرف جومانا .. اطلع عليها بإستغراب ..: جومانا. .. رائدة : انا .. خالتها زوجة ابوها .. وشفتني لما جيت لبيت أمها .. فؤاد : ايه .. تذكرتك .. رائدة برجاء..: بترجاك يا ابني .. جومانا بحاجتك .. حن عليها وخليها تشوف ابنها .. بترجاك .. هدا الشي رح يساعدها لتتحسن رحف قلبه ..: شبها جومانا رائدة : ما تسألني اكتر .. بترجاك .. حاجتها هالقد .. لا تحرمها من ابنها اكتر فؤاد: وينها !؟ رائدة: رح تجبلها ابنها ؟؟ مسك ايدها برجاء ..: قوليلي وينها رائدة بخوف ..: صدقني يا ابني .. بنتي ما عملت شي .. بنتي بريئة من كل شي صار .. اسمعها حط ايده على كتفها وعيونو عالبنت اللي بحضنها ..: انا بدي شوفها .. وين هي هلق .. لسا بنفس البيت رائدة ؛ ايه .. ببيت امها .. بس بترجاك جيب الولد معك .. انا اتأخرت عليها .. لا تخذلني .. املي فيك كبير .. بخاطرك اخدت تاكسي وراحت بقي واقف مكانو .. احساس بالندم والقهر عم ياكلو من جوا .. ركب سيارتو وانطلق ___ ببيت جومانا التفتت على رائدة ..: لي تأخرتي .. في شي رائدة : لا … بس كان مراجعين كتير بالعيادة جومانا: والبيبي منيحة رائدة: حمدلله كل شي تمام .. لك بنتي .. البنت صار عمرها ثلاث اسابيع ولسا ما سمتيها ولا طالعتيلها شهادة ميلاد .. حتى الدكتورة استغربت انو لسا ما في شهادة ميلاد سرحت جومانا بالعدم ..: باسم مين اسجلها .. باسمي .. كيف بدي اطلعلها شهادة وابوها مو موجود .. بدك يسجلو الاب غير معروف .. بدك العالم يفكروها بنت حرام رائدة: بعيد الشر .. سلامة عمر ابوها .. بس عالاقل اعطيها اسم .. نزلت دمعة من عيونها ..: كان نفسو هو يختار اسم البنت .. هيك قلي رائدة بقهر ..: لا حول ولا قوة الا بالله .. حسبي الله ونعم الوكيل .. انا داخلة احممها .. بدك شي قبل ما روح هزت راسها ..: لا دخلت رائدة للحمام ومعها البنت وبقيت جومانا قاعدة قدام التلفزيون بتقلب بالمحطات فجأة رن جرس الباب جومانا : خالتوووو .. خالتوووو .. الباب ..اااووووف .. هلق وقت الحمام .. اكيد طالبة شي من البقالة قامت من مكانها بثقل .. فتحت الباب بدون ما تسأل مين الطارق .. اطلعت قدامها وشافتو .. غمضت عيونها وفتحتون اكتر من مرة .. اخد معها وقت لاستوعبت مين واقف قدامها .. رجف قلبها وبردو اطرافها .. اطلع عليها من فوق لتحت .. ركز نظرو على وجهها التعبان .. الهالات السودا اللي تحت عيونها .. عيونها المنفخين .. بشرتها الباهتة .. تنحنح ..: كيفك جومانا .. انعقد لسانها وما عاد طلع معها الحكي فؤاد : ما في تفضل .. رجعت اطلعت عليه وتجمعوا الدموع بعيونها .. ما حكت ولا كلمة .. لفت ظهرها ودخلت لغرفتها بهدوء تاركتو عالباب تسطحت عالتخت وغطت حالها والدموع بتنزل على خدودها وانفها .. مرق احداث اخر سنتين قدام عيونها خلال ثواني .. واخر شي شو صار فيها ..: ما… ما..ماما فتحت عيونها عالاخر بعد ما سمعت هالكلمة .. ..: ما.. ماما .. شالت الغطا عن وجهها .. لفت حالها بهدوء .. خايفة يكون حلم متل الاحلام اللي بتجيها بس تنام ورح تصحى منو .. اطلعت جنبها وشافت وجه الملاك واقف جنبها .. اطلعت عليه بدون ولا اي كلمة .. مدت ايدها بهدوء ولمست وجههو الناعم .. ابتسمت ابتسامة ساحرة شقت الحزن اللي هي فيه وانرسمت على ملامحها الحزينة وهمست ..: انت حقيقة فؤاد: ايه حقيقة .. ما بدك تحضني ابنك وجهت نظرها لفؤاد وكأنها بتطلب منه يأكدها انها مو حلم فؤاد: حسن عمو قرب بوس الماما قرب حسن منها وطبع بوسة على خدها نزلو دموعها متل الشلال .. قامت من مكانها بسرعة واخدتو بحضنها .. ضمتو بقوة وكأنها بدها تحبسو جوا قلبها وما في غير شهقاتها انسحب فؤاد بعد ما شافها بهاي الحالة .. وجعو قلبو عليها وانبو ضميرو عاللي عملو فيها بلحظة غضب .. قعد بغرفة القعدة طلعت رائدة من الحمام ومعها البيبي .. شافتو قاعد .. ابتسمت وراحت لعندو ..: ما خيبت املي فيك اطلع عليها فؤاد..: لي ما جيتي من زمان .. رائدة : انا غلطت وانت غلطت .. فؤاد : بعرف .. وندمان قربت منو اكتر ومدت البنت ..: امسك البنت.. صار لازم تسميها .. اطلع عليها بإستغراب رائدة : هاي بنتك.. وقف فؤاد بصدمة ..: جومانا جابت بنت .. رائدة : عمرها ثلاث أسابيع .. لسا جومانا ما سمتها ولا طلعت شهادة ميلاد حطت البنت بحضنو اطلع عالبنت وحس بنبضات قلبو تسارعت .. احساس داخلو ما عرف يفسرو .. قطع تفكيرو صوت حسن حسن : عمو عمو .. سوف لئبة ( شوف لعبة) التفت لعند حسن وكانت جومانا جنبو اطلعت عليه جومانا وشافت البنت بحضنو ..: طبعاً انت مو متأكد انها بنتك فؤاد: لي بعدتي عني وتركتيني .. نزلت دمعة من عيونها ..: انا !! اعطى الصغيرة لرائدة وقرب منها .. حط ايدو على خدها ومسح الدمعة ..: سامحيني جومانا بقهر ..: بهالسهولة فؤاد : كان لازم يصير هيك .. انا انسان طببعي ... الصدمة كانت كبير بالبداية .. حطي حالك مكاني .. شو رح تكون ردة فعلك بالبداية .. ولهيك حاولت امسك اعصابي لانو ما كان بدي اعمل شي اندم عليه ..بس خبرتني رفيقتك بهاي البنت اللي ظهرت بحياتك فجأة ..فتشت عليها وعرفت عنها كل شي بس ما كان في دافع لتعمل هيك .. شكيت بكل اللي حولي .. وصلت لمرحلة شكيت بحالي وانو انا المقصود .... اخدت ابنك وبعدتك عنو وعني .. خليتك توقعي على كل اوراق التنازل من قهري .. صدقي كان رد فعل طبيعي .. ولما رجعتي خبرتيني بحملك كانت صدمتي كبيرة وما قدرت اتحمل كنت مشوش وعقلي مو معي .. التفكير دبحني لانو ما كان لسا انكشف كل شي .. انا ندمان على كل كلمة حكتلك ياها وجرحتك .. وبعدين عرفت اللي عمل هيك فيكي .. بس لما رجعت طرقت بابك كان فات الأوان وما بلومك على شي لاني كنت سبب متلي مثل اللي عمل فيكي هيك .. كنت غلطان وقت حكيت معك بأسلوب وقح .. لمت حالي كتير .. وحملت حالي المسؤولية اني خذلتك عند اول مطب .. انا ندمان كتير وتحملت العقاب ببعادك عني .. بكفي بعاد يا جومانا .. انا تعبت وما عاد عندي قدرة اتحمل .. خلال هالاشهر اللي كنتي بعيدة عني فيهن كنت متل العاجز وانا ما بعرف عنك شي ..كنت عايش بس متل الاوموات .. واليوم ردتلي الروح بس شفتك اطلعت عليه بعيون دبلانة وقهر واضح فؤاد: خلص جومانا .. خلينا نرجع ونربي الاولاد مع بعض .. جومانا : يعني انت مصدق انو البنت بنتك فؤاد بندم واضح ..: كانت غلطة مني وندمان.. انت لسا زوجتي وانا بدي ياكي اطلعت عليه بإستغراب ..: كيف وانت طلقتني فؤاد : استلمتي ورقة طلاقك شي ؟ هزت راسها يمين شمال بمعنى لا حط ايدو ورا راسها وشدها لحضن بقوة ..: معنا انت لسا عاسمي .. انا ما فيني بعد اسمك عن اسمي .. انت روحي .. انت الهوا اللي بتنفسو .. انتفض جسمها وهي بحضنو .. بس كانت بحاجة هالحضن من زمان .. شبعت قهر وظلم وما عاد فيها تتحمل اكتر .. حست حالها وهي بحضنو .. كأنو اول مرة بتوصل لبر الامان .. بعد راسها عن حضنو وحط جبينو على جبينها ..: فكري .. وخدي راحتك بالتفكير واتدللي قد ما بدك ما رح امنعك .. بس رح ترجعيلي وترجعي لحضني لانو انا ما بستغني عنك .. وحسن رح يبقى معك على طول .. والبنوتة الصغيرة رح سميها انا دبلت عيونها والبسمة عشفافها ..: تركني بحضنك .. تنفس الصعداء وضمها لحضنو بقوة دخلت رائدة للصالة ..: ماخدين راحتكون وتاركين الصغيرة بعد فؤاد عن جومانا بخجل ..: بعتذر رائدة بمزاح ..: لا حبيبي ارجع احضنها خلي بسمتها تنور وجهها جومانا بغيظ..: خالتو رائدة : خلص خلص .. شو مع الصغيرة ما بدكن تسموها !! جومانا: اسألي فؤاد اطلع عليها بحب ..: روح .. رح سميها روح جومانا بغيرة واضحة ..: مشان تندهلها روحي .. شدها لحضنو..: وانت ام روحي ابتسمت برضى __ بعد اسبوع كانت جومانا قاعدة وعم تلعب حسن بغرفة القعدة .. سمعت رائدة من المطبخ رائدة : يلا الغدا جاهز .. حملت روح ونيمتها بسريرها ومسكت حسن من ايدو..: يلا ماما تعى تنغدا توجهو للمطبخ .. قعدت حسن بحضنها وصارت تأكلو رائدة : كلي بنتي .. ما بصير هيك جرمانا : مو جعانة .. حاسة حالي تعبانة .. ما نمت منيح ليلة مبارح رائدة : ارحمي حالك بنتي .. حاج تفكير .. الرجال شاريكي .. ومتعلق فيكي .. خلص ارجعي لمي شمل عيلتك ولا تكابري عحالك جومانا : بصير خير مسحت لحسن تمو وغسلتلو ..: خالتي .. خلي حسن معك بدي روح نام قبل ما تصحى روح رائدة : لك بنتي ما لقيتو غير اسم روح جومانا : هيك فؤاد حابب .. روح رائدة : تعى يا عمري .. روحي بنتي ارتاحي دخلت لغرفتها وتسطحت عالتخت .. حاولت تنام وما قدرت بعد وقت انفتح باب غرفتها غمضت عيونها ..: خالتو والله مو جوعانة .. حست على ايدين انلفت حول خصرها وجسم صلب خلفها لفت راسها وشافتو وراها حاضنها ..: فؤاد .. فؤاد : مين بدو يكون غيري .. انا جوعان لسا ما تغديت ولا افطرت .. من الصبح بس بشرب قهوة رفعت حالها ..: يلا هلق بحضرلك الغدا اتسطح جنبها وشدها لحضنو اكتر وهمس بادنها بنبرة حب ..: لا .. ما بدي غدا .. بدي اشبع من شوفتك لفت راسها عليه واطلعت ..: بس لهدا السبب بدك ترجعلي فؤاد بحب ..: لا طبعاً .. بس انا ما عاد فيي عيش بدونك ..انا عايش بدونك متل الاموات .. جسد بلا روح .. بلا هدف .. حياتي سودا بدونك.. بدي تنوريلي حياتي .. بدي عيش الحياة اللي نفسي فيها من زمان وتكوني انت موجودة بكل تفاصيلها غمضت عيونها بقهر ..: واذا اجى اي حدا حكى عني اي كلمة ولفقلي اي تهمة بتصدقو وبترميني وبتحرمني من ولادي غمضت عيونها بالزور ونزلت دمعة غصب عنها ..: ما رح اشعر بالامان معك فؤاد رجع شدها لصدرو ..: اغفريلي جومانا .. اغفريلي لفت راسها لعندو ..: موافقة ابتسمت عيون فؤاد .. طبع بوسة عخدها ..: جد ابتسمت بخباثة ..: بس بشرط فؤاد بفرح ..: كل شروطك مُجابة قامت من مكانها وبعدت عنو .. وقفت قدام الشباك وابتسامة صفرا عوجهها ..: بدي البس الفستان الابيض ويزفوني الك انصدم فؤاد ..: شو !! بدك يزفوكي مع ولدين جومانا : ايه .. هدا شرطي .. اذا مو موافق خلص بنفضها سيرة قام من مكانو وراح لعندها .. لف ايديه حول خصرها وشدها لعندو ..: كل هالفلم مشان تعلميي زفاف .. وعاملة حالك حزينة ونزلتي دمعة بالغصب هزت راسها بفرح .: ايه ايه .. بدي البس فستان ابيض ..ويزفوني الك متل كل البنات .. يعني صح رح يكون عالضيق بس مو مهم المهم بنفسي طبع بوسة على جبينها ..: موافق .. يلا تعي نجيب الفستان وتنزفيلي نزلت ايديه عن خصرها ..: لا مو هلق .. كمان اسبوعين عقد حواحبو ..: اسبوعين .. بدك اتحمل كمان اسبوعين .. لا حبيبتي جومانا : تحملت كل هالوقت اتحمل كمان اسبوعين .. واساساً انا لسا ولدانة حك راسو بغباء ..: شو دخل !! قلبت عيونها ..: لا انت بطل فيك عقل .. خلص اجرتو للفوقاني سكت شوي وهو بحاول يفهم جومانا : يلا .. فارقنا .. ما لازم تشوفني من هلق لاسبوعين اطلع عليها بإستغراب ..: ما عم تفكري تهربي مني .. صح جومانا بحب ..: على قد ما هربت .. ما عاد فيي ابعد عنك .. طبع بوسة عجبينها ..: رح اشتقلك دفشتو بخفة ..: يلا فرجيني عرض اكتافك .. فؤاد بخباثة ..: رح يخلصو الاسبوعين ورح تقعي تحت ضراسي .. اتذكري منيح جومانا بغيظ ..: هدا اللي شاطر فيه .. يلا يا عمي روح .. قبل ما انسى انا بكرا نازلة عالسوق .. اذا .. حست بتوتر فؤاد : شبك اذا شو جومانا : فؤاد انا قررت ابدأ حياة جديدة .. فؤاد: يعني!! جومانا بتوتر ..: اذا امك بدها تشوف روح .. انا ما عندي مانع قرب منها وحضنها ..: يخليلي ياكي ويخليلي قلبك الكبير للحظة حس بقهر بداخلو بس قرر ما يظهر شي لجومانا جومانا : انا قررت اتخطى الماضي .. ما بعرف اذا بنسى بس رح حاول .. فؤاد: ان شاء الله .. يلا سلام _____ طلع من بيتها والفرحة مو واسعتو .. فجأة عبس لما اتذكر امو واللي عملتو .. اطلع جنبو على بنتو اللي نايمة بالسلة وابتسم .. : انت اللي رح ترجعي الروح لقلب ابوكي شغل السيارة وانطلق بعد وقت وقف سيارتو قدام الفيلا .. نزل وقلبو بخفق بشدة .. من اخر موقف بينو وبين امو ما رجع عالبيت .. حس انو اجى الوقت لينسى اللي صار ويصفح وليرجع كل شي متل الاول نزل من السيارة واخد السلة وتوجه لمدخل الفيلا وقف قدام الباب بتوتر .. اخد نفس ودق الجرس فتحت الخادمة الباب ..: تفضل فؤاد : وين ام فؤاد الخادمة : نزلت للسوق مع البيك دخل فؤاد للصالة الخادمة : وين يا استاذ ؟ ضحك فؤاد..: ايه صحيح انت ما بتعرفيني .. سكتت الخادمة شوي وفجأة نطقت بعدما تذكرتو من الصور..: حضرتك الاستاذ فؤاد .. اسفة اسفة يا بيك .. فؤاد: بلاها بيك .. لا بيك ولا شي.. شو اسمك انت ! الخادمة: يُسر .. اسمي يُسر فؤاد: بتعرفي تعملي فنجان قهوة بلا سكر يا يُسر ..! يُسر : امرك يا بيك قعد فؤاد على اول كنبة شافها وحط السلة جنبو .. اطلع حولو .. ذكريات .. ندم .. شوق .. وجع ..حنين .. قهر .. مشاعر مخربطة .. تذكر اخر مرة طلع فيها من البيت وبعدها ما رجع من اشهر .. قلبو وجعوا على اهلو .. ندم على ردة فعلو القاسية بوقتها .. طلع من ذكرياتو على صوت شهقة من قلب مفطور التفتت بعيونو لمدخل الغرفة وقفت واطلع على امو بشوق نزلت دمعة من عيونها ..: سامحني .. الحقد عمى على قلبي .. سامحني يا ابني .. قرب منها بهدوء .. مسك ايدها وباسها ..: خلص امي .. انا نسيت كل شي وما عاد بدي ارجع افتح الدفاتر القديمة مدحت : كل الحب لامك فؤاد بخباثة ..: شو ابي .. لسا الصبح كنا مع بعض اطلعت عليه هيام بغضب ..: يعني بتشوف ابوك وحارمني من شوفتك فؤاد بخجل ..: انا اسف امي .. سامحيني .. هيام بحب..: الله يرضى عليك .. فجأة طلعت روح صوت صغيرة كأنها بتخبرهن انها موجودة التفتت هيام للصوت وشافت السلة .. قربت بهدوء منها وكشفت الغطا عنها وجهت نظرها لفؤاد..: مين هاي قرب منها فؤاد ..: روح .. بنتي تجمعوا الدموع بعيونها وانربط لسانها مدحت : جومانا جابت بنت .. ايمتى فؤاد : من كم اسبوع .. وطلبت مني جيبها لهون لحتى نفتح صفحة جديدة .. امي .. جومانا بنت حلال .. بس انت ما اعطتيها فرصة .. وهي هلق طالبة هالفرصة وبدها تبدأ من جديد اطلعت عليه ودموعها على خدودها قرب منها وحضنها ..: امي .. جومانا ما الها ذنب .. خلص انسي .. حسن وهديل عند اللي احسن من ومنك .. ما عم اطلب منك تنسي اخوتي .. بس بطلب منك تصفحي عن الانسانة اللي بحبها .. ما بدي ابدأ حياتي معها ولسا في حقد وكره بقلبك مدحت : خلص ابني .. امك مسامحة .. الله يرحم هديل وحسن .. الحي ابقى من الميت فؤاد برجاء..: امي .. حملت الصغيرة وضمتها لصدها واستنشقت ريحتها ..: الله يحميكي يا روحي فؤاد: بعد اسبوعين زفافي على جومانا .. وانا متمني تكونو جنبي اطلعت عليه بحنية ..: الف مبروك يا ابني قرب منها وباس راسها ..: الله يباركلي بعمرك يا عمري مدحت : الف مبروك .. هيام اعطيني هالروح لشوفها فؤاد: الله يطول بعمركن __ بعد اسبوعين واقفة قدام مرايتها وعيونها على انعكاس صورتها قربت عليها رائدة والدموع بعيونها ..: حمدلله .. شفتك بالفستان الابيض جومانا : لا تبكي .. رح تبكيني لفتها لعندها وحضنتها ..: انتبهي على حالك وعلى ولادك .. وانتبهي على زوجك .. فؤاد ابن حلال وبحبك .. نزلت دموعها غصب عنها ..: خالتو انت احن حدا شفتو بحياتي دخلت يولندا وهي عم تزلغط رائدة بمسخرة ..: ليكي ليكي .. امك الروسية بتزلغط رن جرس الباب مسحت رائدة دموعها عن خدها ..: هدا اكيد فؤاد .. قبل شوي حاكني ومو صابر راحت رائدة لتفتح الباب اتمسمرت مكانها بس شافت مين عالباب .. كان اخر شخص بتتخيل تشوفو بهدا اليوم ..: شو .. ما في تفضل رائدة : شو جابك لهون .. مُصر تنزع فرحة البنت كمان بهاليوم .. روح من وين ما اجيت بعدها من طريقو ودخل للبيت .. التفت عليها ..: بدك تعلميني شغلي مع بنتي رائدة : بترجاك رمضان .. بلاها اليوم ..: خالتي ما اشتقتيلي .. انت زعلانة من ابي وانا شو ذنبي تجمعت الدموع بعيونها ..: رياض ..يا حبيب قلبي تعى لحضني رمضان : كملوا احضان .. بأي غرفة جومانا رائدة : رياض خد ابوك وروحو من هون .. مسك رياض ايدها وباسها ..: لا تخافي خالتي .. وينها جومانا اشرت رائدة باصبعها على غرفة جومانا توجه رمضان للغرفة وشاف يولندا طالعة من الغرفة وبتسكر الباب وراها اطلع عليها ..: شو الضراير كلها مجتمعة هون يولندا : رمادان .. شو جاب انت لهون ( رمضان شو جابك لهون ) رمضان : بعدي من وجهي يولندا: ما في انت تدخل جوا ( ما رح تدخل لجوا) بعدها من طريقو ودق الباب وما نطر جواب ودخل شاف جومانا واقفة قدام الشباك ومعطيتو ظهرها .. دخل وقفل الباب وراه تنحنح ..: بدك تطلعي لبيت زوجك لحالك .. بدون اب يسلمك لزوجك نشف الدم بعروقها بس سمعت صوتو لفت حالها ببطئ ..ما عاد حست برجليها واطرافها …: ابي قرب منها رمضان بهدوء ..: سامحيني يا بنتي وقعت هالكلمتين على مسامعها متل الصاعقة .. حست في عاصفة رح تيجي بعد هالهدوء .. قرب منها اكثر ..: الحياة ظلمتك وقهرتك .. وانا ما كنت الاب الحنون الك .. ظلمتك اكتر واكتر .. سامحيني .. صدقيني الحياة اخدت بتارك مني لما مرضت وما لقيت جنبي حدا جومانا وكل جسمها برجف ..: كيف عرفت رمضان : زوجك اجى من يومين وطلبك مني .. بعرف انكن متزوجين بس هو عمل بالاصول .. نزلت الدموع على خدودها فتح رمضان ايديه ..: تعالي لحضني .. قربت منو بهدوء ورجليها برجفو .. اخدها رمضان بحضنو وباس راسها ..: انا السبب بكل شي .. لو من الاول ما وافقت ما كان صار شي .. بس انا صلحت غلطتي .. واللي كان لازم اعملو من يومها .. عملتو من شهرين .. يامن بالمصحة وبعدها رح يسجنوه .. لا تخافي .. انت الك ظهر وعزوة .. دفنت حالها بحضنو وما في غير شهقاتها برا الغرفة رائدة قاعدة وعم تهز برجلها بتوتر ..: قوم شوفو .. هلق بعملها شي حط رياض ايدو على ايدها ..: لا تخافي هاي بنتو رائدة بعصبية ..: بنتو .. كل اللي عملو وبتقلي بنتو رياض: خلص اهدي انفتح الباب وطلع رمضان وجنبو جومانا والابتسامة عوجهها ركضت رائدة لعندها وصارت تتفحصها ..: عملك شي .. ضربك صرخ رمضان ..: رياض تعى خدها من هون بلا ما اطلع جناني عليها ركض رياض لعند ابوه ..: ابي دخيلك بلاها اليوم الخناق .. خالتي خلص اهدي شوي .. شوفي مأحلاها متل القمر ترك رائدة وقرب من جومانا وحضنتها والدموع بعيونو ..: الف مبروك اختي .. اطلعت فيه بحزن رياض : سامحيني شدت على حضنو اكتر ..: اشتقتلك رمضان : روحي تحركي جيبي الصغار بلا مانك قاعدة بتعملي مشاكل .. واعملي حسابك اليوم راجعة معي عالبيت خلص لوت بتمها وراحت تقدمت يولاندا من رياض وضربتو على كتفو ..: انت ولد ما شوفت انا موجود.( يا ولد مانك شايفني ) قرب منها وحضنها بعد دقايق اندق الباب فتح رياض الباب ..: اهلا نسيب .. تفضل تفضل دخل فؤاد ..: معي ضيوف رمضان : اهلا فيك وبضيوفك دخل ابو فؤاد ووراه امو وابوه تقدمت هيام وقربت من جومانا ..: سامحيني يا بنتي .. انا ظلمتك اطلعت عليها جومانا تجاهلت فؤاد وقربت منها .. : مرت عمي .. خلينا ننسى كل شي صار ونفتح صفحة جديدة سوا .. لا انا اللي ذنب باللي صار ولا انت .. خلينا ننسى كل الحقد والكره ونصير عيلة .. هزت ام فؤاد راسها . قربت عليها وباست راسها ..:الله يوفقكن قرب فؤاد منن ..: امي بستأذنك شوي بعروستي .. قربها منو وصار يتمايز فيها ..: هدا كلو اللي .. واخيراً عضت جومانا على شفافها بغل وهمست ..: ابي هون اختصر .. بلا ما يكون فرح ويصير تمساية .. اختصر مشان الله مو وقت رومنسيتك عض على شفافو ..: صح نسيت .. عمي اسمحلي بهالشغلة حملها بين ايده ..: انتو انتبهو عالولاد .. كم يوم وبنرجع ان شاء الله .. سلام يجماعة نزل فيها عالدرج بسرعة .. حطها بالسيارة وركب شغل السيارة واطلع عليها .. : حطي حزام الامان غمزها وانطلق بعد مشي بالسيارة وصل الفندق .. دخلو سوا واخدها للجناح اللي حاجزو وقف قدام الباب ..: اخيراً رح حققلك شغلة من الروايات اللي بتقرأيها ومتأثرة فيهن وجننتيني فيها من اول ما عرفتك ما فهمت قصدو فتح الباب وحملها .. دخل للجناح وطرق الباب بإجرو اطلع عليها وكز على اسنانو ..: قلتلك .. اخرتك توقعي تحت ضرسي اخيراً استوعبت قصدو .. صارت تحرك برجليها وتحاول تلفت حالها منو ..: فؤاد اللي بتعملو غلط .. نزلني فؤاد: غلط قلتيلي .. انزلك .. اكيد رح نزلك سطحها عالتخت واطلع عليها ..: هلق هدا كلو لالي .. والله وامي داعيتلي بليلة القدر غمضت عيونها بخوف ..: فؤاد .. انا.. قاطعها ببوسة طويلة على شفافها .. بعد عنها ..: اليوم رح نبدأ حياتنا مع بعض .. وقبل ما تحكي اطلع فيها بكل حب واخدها معو لعالم ما في غير هو وهي الـــنـــهـــايــــة