*#عكس_التيار《47》* *#بقلم_إيناس_ادم (ننس تمدين)​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​* ‏​​‏​​‏​​‏​​‏​​‏​​‏​​‏​​‏​​‏​​‏ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​ *"لو أننا نرى أنفسنا جيداً من خلال أعيين المٌحبيين لوقعنا في عِشقنا🤎!"* *"على لساني"* _بعد مكالمة هدى طوالي جهزت نفسي..هادي كان لسه نايم،حاولت أصحي بكم حركة..فتح عيونه وقال:-في زول بصحي زول كده !!...خير...قولته ليهو:-طالعة ماشة المستشفى..هدى هناك..قال لي:-أها..طيب ما تتأخري...جريت منه المفرش وأنا بقول:-أتأخر بتاع شنو...قوم معاي ح توصلني...قال لي:-إيناس انا والله امس ما نايم وأنتي عارفة ده...قولته ليهو:-مشكلتك..انا قلت ليك تقعد تحضر افلام للصبح..قوم يلا...أنزل وعشرة دقايق بالضبط وتجي وراي..لانهٌ أنا عاوزة أشتري كم حاجه ومحتارة...قال لي:-خلاص بطلي نقة..دي شنو المرة دي ياخ...قولته ليهو:-مرة في عينك...قوم ياخي والله الزمن فات ...عاين عاين فرح بتتصل...قال:-عملت شنو انا عشان أعرس وأصحى من النجمه..عملت شنو..وجدعني بالمخده🤣...رجعتها في وشه وقولته:-عملت عقد انننن...قال لي:-مسيخه...طيب ح أجهز وأجيك تحت...عاينت ليهو وقولته:-أوعى ارجع وألقاك نايم..ح اندمك...قال لي:-دي كلمتي يا أستاذة...أنزلي بالله أنزلي...شلت شنطتي ونزلت تحت..صبحت على خالتو سٌهير وعمو الجيلاني..قعدت أشرب معاهم الشاي...هادي جاا نازل بتكاسل..لابس قميص بيجي وخاتي جكت جلد بني في راسه وواضح زهجان...قال ليهم:-صباح الخير يا شباب...أمهٌ قالت:-أمممم في زول كده قطعوا ليهو نومتهٌ السمحه...قال ليها وهو بعاين لي:-حصل...قولته ليهو:-اشرب الشاي يلا عشان نتحرك...قال لي بهمس:-ح أندمك...ابوهٌ قال:-تاخد إجازة عشان ترتاح تلقى المدام عندها مشاوير...غايتو مسكين يا ولدي...قولته لعمو:-شنو يا عمو خليك محضر خير...هادي قال لي:-طيب قومي قومي...قدامي....طلعنا وبعد قلة ادبه دي كلها فتح لي باب العربية🥺🤣❤....ونحنا في الطريق صدعته بالافكار اللي في راسي...وقف العربية قدام محل كده...نزل وجاا شايل كيس كبير...ختاهو لي في رجولي وواصل سواقة...الكيس كان فيهو بالونات وعلبة حلويات وأشرطه هدايا وحاجات كده كلها بنوتية وكييوووت...وصلني المستشفى وقبل انزل قال:-بعدين ح ترجعوا معاها ولا ح تجي البيت!!...قولته ليهو:-نسيت ذاتي باللخمه ارجع لفرح..بشوف البحصل شنو وبتصل عليك...قال لي:-طيب...جاني قريب باس راسي وبعدها نزلت... ! *"على لسان فرح"* _إتواصلت مع أم هدى بعد مكالمة هدى..فهمتني أمشي البيت وح القى هناك خالة هدى وبتها اساعدهم في التجهيزات عشان ما ح يقعدوا في المستشفى كتير...كلها ساعات ويخرجوهم بعد تولد إن شاء الله..بالفعل طلعت أشتريت كم علبة حلاوة ومشيت بيتهم..الخالة كانت في المطبخ وأنا وبتها رتبنا البيت كله وفرشنا غرفة الولادة وظبطناها...إتصلت لإيناس ما ردت علي....بعد خلصت من كل حاجه إتصلت لأم هدى برضو ما ردت...قعدتا شوية وبعدين طلعت على المستشفى.... _وصلت المستشفى لقيت إيناس قدامي...سلمت عليها وفهمت منها إنه هدى ولدت♡♡...كنت ح ابكي زي الهبلة...قالت لي:-ما وقتهٌ...عايني هي شوية وينقلوها غرفتها حسب كلام خالتو...فتعالي نظبط الغرفة...اللحظه دي هي بتتمناها ليها زمن...فلازم تكون مميزة...قولته ليها:-نظبطها كيف يعني ،؟...قالت لي:-جايبة معاي كم حاجه بسيطه...تعالي بس...مشينا الغرفة الح تجي فيها هدى...إيناس طلعت من الكيس كذا حاجه...وفهمتني نعمل شنو بالضبط وخلينا واحد من الدكاترة يساعدنا😂❤...بعد خلصنا بخمسة دقايق بس جابوا هدى... !! *"على لسان لميس"* _كنت بجهز نفسي وطالعه على المستشفى...كلمت ديدا تجي وتقعد مع خالد لحدي ما امشي وأجي...خالد جاا لقاني بلبس..قال لي:-على وين !!..قولته ليهو:-هدى ولدت وعاوزة امشي اشوفها..ما ح اتأخر...قال لي:-أنتي اصلاً ما ح تمشي عشان تتأخري...قولته ليهو:-خالد دي هدى صحبتي...كلها ساعة بالكتير وح اكون معاك...قال لي:-لميس كلمتي واحده..ما تعاندي ساي...ماف طلعه..وطلع من الغرفة خلاني...قعدت على طرف السرير....اخدت نفس وقولته لنفسي ما مشكلة♡ ح أمشي ليها في البيت يوم تاني...طلعت ملابسي ومشيت لخالد برة...كان في المطبخ بقطع سلطه...اثناء ما بقطع فيها جرح يدهٌ...جريت عليهٌ ملهوفة وانا بقول:-ده شنو البتعملهٌ ده..كنت تناديني..مسكت يدهٌ وبقيت انضف الدم..مع أنو حاول يجرها مني بس كنت مٌصرة وماسكاها قوي...قولته ليهو:-ما عميقة الحمد لله...قال لي:-لو خلصتي فكي يدي...عاينت ليهو في عيونهٌ وأنا مدمعه...قال لي:-فكيني...فكيتهٌ وزحيت لورا شوية...بعد طلع من المطبخ أنا رجعت وعملت ليهو سلطه...جرس الباب رن..فتحته لقيتها ديدا..قالت لي:-ده شنو انتي لسه ما جهزتي..ح تتأخري...قولته ليها:-لا أنا ما ماشة...قالت لي:-ليه في شنو...خالد تِعب؟؟...قولته ليها:-لا كويس..بس رفض لي أمشي...ما ح اعاندهٌ لما يروق ح أمشي لهدى....قالت لي بأسف:-أنتي اكتر واحدة متضررة من تغيير خالد ده...الله يكون في عونك♡..قولته ليها:-يا بت ضرر شنو...ده راجلي♡...تعالي شيلي السلطة وديهاا ليهو...وقولي عملتيها أنتي عشان لو قلتي أنا يمكن ما ياكلها..قالت لي:-طيب حاضر *لما نفسيتنا تبوظ بنطلِّع عصبيتنا وغضبنا في اللي بنحبهم من ظننا وعشمنا أنهم ما ح يفهمونا غلط مهما كان وح يختوا بدل العذر ألف♡ *"على لسان هدى"* _وأنا بشوف جوير قدامي وكيف كانت بتصرخ حسيت نفسيي أتولدت من جديد♡...كانت بيبي وحِتة صغيرونة...بعدها حسيت بريح باردة لما جسمي قشعر...جاني برد سبقهٌ إحساس حلو أول مرة أحسهٌ....شالو من ماما ملابس البيبي..جوير وقتها اخدوها الحضانه...وأنا على الغرفة....الغرفة كانت مزينة بطريقة ظابطه شديد♡...بوالين في كل حته وتزيينة صغيره شكل فيونكه للسرير من قدام...رقدوني على السرير وكنت طول الوقت بقول ليهم عايزة اشوف بتي♡...قبل يجيبوها لي شالتني نومة غفوة كده...وأنا نايمة حلمت ب أدهم...صحيت مخلوعة..رفعت راسي شوية...فرح وإيناس كانوا قاعدين...قاموا على حليهم وجوو وقفوا قدامي قالوا لي:-حمد لله على السلامة...قولته ليهم:-الله يسلمكم...جات ماما باستني في راسي وقالت:-أسي مشيت شفت جوير...جايبنها ليك...ما عدت دقيقة...وجات بتي الحلوة...ختوها في حضني...كانت بتبكي لسه وشكلها جميل شديد...دموعي ما وقفت لحظه وأنا بعاين ليها ولتفاصيلها...نورت حياتي بحق وحقيقة♡ *"على لسان فرح"* _شكل هدى وجوير مع بعض وكيف كانت بتبتسم ليها وتتكلم معاها كأنها فاهماها...خلاني أبكي..لحظات الأمومة وأنك شايل طفل بين يدينك هو حته منك ده أجمل إحساس على الإطلاق...أبو هدى جاا وبارك ليها...من زمان شديد وأنا مبهورة بعلاقة أمها وأبوها...كانوا بالنسبة لي مثال حي للحب الحقيقي...رغم كل حاجه مروا بيها والحصل معاهم اخر فترة...إلا أنهم اثبتوا مقولة "الخلافات بتقوي العلاقات♡"...خالتو كان بإمكانها تطلب الطلاق بقصاد عزة نفسها...بس عزة النفس والكرامة الحقيقية إنها تعلم زوجها درس ما ينساهٌ...وهي ما بس علمتهٌ براهو...كلنا أتعلمنا الدرس♡..هدى سألت من لميس...قبل اوضح شيء لميس إتصلت فيديو كول...رديت ب:-لولة السمحه...قالت لي:-متصلة اشوف البيبي وبس...ناولي التلفون لهدو...قولته ليها:-طيب ثواني...هدى مسكت مني التلفون وكانت بتعاتب لميس بس لميس وضحت عذرها وعدم جيتها...قالت لهدى:-كيوت حبيبتي..لا شبهك لا حاجه...البت دي بتشبهني أصلوو ما تتلصقو...بقينا نضحك...هدى قالت ليها:-أي أي بتشبهك..لدرجه لو جبتي بيبي ما ح يكون صورة طبق الأصل منك زي جوير كده...قالت ليها:-بالضبط بالضبط....المهم انتي كويسة صح !!..تعيشي وتربي لينا الحلوة♡....قالت ليها:-عقبال نفرح بيك وبي باقي البنات... ♡ _طلعنا من المستشفى على بيت ناس هدى..كانت مٌرهقة وتعبانة...مع إنه جوير عندها سرير خاص بيها..بس هدى رفضت واصرت ترقد في حضنها وبس😂😂...قعدنا معاهم لحدي المغرب...مع طلعتنا جات رزان اخت أدهم....هادي جانا...وصلوني لحدي البيت ومشوا بيتهم... ♡ *"على لسان هدى"* _ماما كانت ما حابة وجود رزان..عشان كده ضايفتها بس ومشت غرفتها طوالي...في الحقيقة انا قبل اصل البيت رسلت وكلمتها إنو ربنا حلاني بالسلامة♡...ما كنت حابة أقطع علاقتي بيهم كلياً عشان خاطر جوير...على الأقل زول واحد بس يكون كويس وسط العيلة دي...وجوير كمان يكون عندها عمة بتحبها...كانت جايبة معاها كم حاجه وقالت لي:-كلمت أمي وأخواتي وقالوا إن شاء الله بحاولوا يجوك...قولته ليها:-كتر خيرهم...مدام انتي جيتي يبقى خلاص...قالت لي:-والله يا هدى الواحد ما عارف يقول ليك شنو...بس ح افصل اردد ليك كل مرة "أعفي لي"..عشان العملناهٌ ما هين ولا بتنسي بسهولة...عارفة نفسي بضغط عليك بمكالماتي وطلب إني أجي كل مرة بس والله غصب عني ومن عشمي فيك وفي إنه البينا يتصلح...قولته ليها:-أنا لو ما حسيت إنك أتغيرتي فعلاً...صدقيني ما بقبل بجيتك دي أبداً...ربنا يصلح الحال♡...قالت لي:-أمين يارب...أتحرك انا بعد كده..وبجيك تاني بإذن الله...باست راس جوير وطلعت...فضلت صاحية وماسكه يد جوير وبتكلم معاها...رغم أنها نايمة بس ما قادرة انوم زيها...فرحانه بيها شديد الحمد لله يارب ♡! *"على لساني"* _وصلنا البيت وطلعنا فوق طوالي...بعد غيرنا ملابسنا وكنا ح ننوم..هادي قال لي:-انتي شكلك ما اكلتي حاجه من الصباح صح ؟؟..قولته ليهو:-ما جعانة..قال لي:-تعالي ننزل تحت...نعمل حلة اندومي ظااابطه...قولته ليهو:-ما بعرف اطبخ...لو نزلت ح اتفرج عليك بس...قال لي:-ما حنك...تعالي تعالي...نزلنا تحت ودخلنا المطبخ...هادي طلع كيسين اندومي وفتح التلاجه طلع جزر وصلصه وفلفية ولحمه مفرومة...كنت بعاين ليهو وانا النعاس غالبني...شغل أغنية "طالعة من بيت ابوها رايحه لبيت الجيران"..بغنيها وبتفنن في الحلة....قال لي حسب إيقاع الاغنية:-يا حلوة اروني عطشان مية اسقيني...قولته ليهو وأنا بضحك:-روح يا مسكين..مينا ما تروي العطشان...جضمني وواصل:-يا حلوة اروني على عيونك فرجييني...قولته ليهو وانا برفع حواجبي:-روح يا مسكين..عيوني عيون الغزال....بعدها بقينا نغني ونضرب الكمش مع بعض لزيادة الموسيقى والإيقاع ونحنا ما منتبهين أنو الدنيا ليل اصلاً🤦‍♂️ واصل في طبخه...بعد خلص قدمهٌ لي في صحن مع شوكة وقال:-بالهناء على معدة حبيبتي♡...كنت باكل وهو بس بونس فيني...خلصت صحني وصحنه..وانا بشيل اخر شوكة...قال لي:-في واحده كده قالت ما جعانه وأكلت صحنيين...ما عرفت ابلع اللقمة ولا اتفها في وشهٌ...بقى يضحك وطلع فوق بخطوات سريعة وأنا وراهو على امل اصلو... ♡ *"بعد مرور اسبوع على ولادة هدى"* *"على لسان عمار"* _كنت مع ديدا جاتني في الشركة وزعلانه على حالة خالد...قولته ليها:-لميس جنبه♡ وهي الوحيدة الح تطلعه من اللي هو فيهٌ...خالد محتاج شوية وقت بس...قالت لي:-ماما شهرين أو ازيد مما أتوفت وهو زيو ما هو...أنا بقيت حانه على لميس شديد والله...قولته ليها:-لو أنا محل خالد وأنتي محل لميس...ح تعملي اكتر من كده♡...لميس بتعمل واجبها وبكل حب ورضى ونفس طيبة♡...ما تشيلي همهم...كل حاجه ح تظبط...قالت لي:-إن شاء الله يارب...طالعة أنا بعد كده...قولته ليها:-ح أوصلك...قالت:-لا أنت وراك شغل...وبعدين البيت ما بعيد...قولته ليها:-قدامي بس بالله بدون كلام كتييير...عاينت لي وأبتسمت♡... *"على لسان لميس"* _خلصت يدوب من النضافة وكنت كل دقيقتين اشوف خالد في الغرفة التانية...من وقت الحصل وهو بنوم هناك..وأنا عيني ما بتشوف النوم..براقبهٌ الليل كلهٌ وعيني ما غفلت عنهٌ..بس يوم أنعس شديد بستودعه ربنا وبنوم مطمنه♡...في اليوم ده كنت سامعه همهمه وصوت بكى خفيف...إتسحبت لحدي ما وصلت غرفته...كان قاعد في الأرض وماسك صورة خالتو حواء وبقول بكل طفولة:-يوم أبوي مات قلتي شنو!!..مش قلتي لي خليك ابونا وكون راجل وأنا معاك...أنتي وين اسي...كذبتي علي يا امي وأنتي عمرك ما كذبتي..مشيتي وخليتيني براي...أنا ح أقعد في الدنيا دي كيف بدونك...مش أنا أخوك وصحبك وولدك...ليه عملتي فيني العملة دي...ما كان أتفاقنا والله ما أتفقنا تمشي قدامي...كسرتيني يا أمي...ما قادر أعمل شيء وأنتي ما هنا...ليه تخليني براي...أنا ما كبير كفاية عشان أكون براي..والله يا أمي ما بقدر أقعد بلاك...مسح دموعه وواصل:-يوم عرس نون لما حضنتك وقعدت أبكي...دي اللحظه الوحيدة السمحت لنفسي فيها بالبكى...فقدت أبوي وأنا صغير...لقيتك انتي معاي...وأسي فقدتك أنتي...أمشي وين انا يا أمي...قولي لي أمشي وين يا أمي....ما قدرت أتحمل...دخلت وقعدت جنبه...أول ما رفع راسه وعاين لي زاد بكى...حضنته طوالي مسك فيني قوي وكورك بصوت عالي:-أمي ماتت يا لمييييس....أنا أمي ماتت... !! -------------------------------------- --------------------- *☆نتلاقي💙☆☆* *بــــــــــــــيــــــــــــــــــــجــــــــــــــة*