انا لست أنثى ١١ بقلم نرجس الشرق الدكتور بقى بعاين لي وما قادر يتكلم بعد شويه قال بتنهيده ما عارف اقول ليك شنو لكن الاشعه وتحليل الهرمونات القدامى ده بوضح لي انو مافي جهاز انثوي لا رحم لا مبايض بس في جهاز تناسلي ذكوري مكتمل جدا بالداخل صورتو واضحه في الاشعه وهرمون التيسترون عندك أعلى بكتير من المعدل الطبيعي وبالمقابل البروجسترون عندك أقل من الطبيعي يعني التحليل القدامى معدل مقبول لي راجل لكن لي مره مستحيل مريم بقت منططه عيونها وحسيت بيها ح تقوم تجري وانا اتمالكت اعصابي شويه وقلت ليهو طيب ي دكتور انا في حالتي دي مفروض اعمل شنو قال لي انا طبيب نساء انتي حاليا محتاجه طبيب ذكوره انا من جهتي ح اكتب ليك تقرير مبدئي بس طبيب الذكوره ممكن يكتب ليك تقرير وتشخيص كامل بناء عليهو يكون عندك الحق تعملي عملية تصحيح عشان تكملي حياتك بصورة طبيعية وتقدري تتزوجي وتنجبي انا عارف انو الكلام السمعتيهو ده صعب عليك جدا لكن دي الحقيقة شلت أوراقي وطلعت وبقينا انا ومريم ساكتين بعد مسافه قلت ليها لو عاوزه تقطعي علاقتك معاي ده حقك لكن عليك الله م تكلمي زول في الجامعة بالحاجه دي مريم ما ردت على وركبت المواصلات خلتني رجعت البيت وبقيت بفكر اعمل شنو اقول لي امي ولا أنسى البرنامج ده من اساسو واعمل رايحه تميت اسبوع ما بمشي الكليه مريم ما اتصلت بي خالص وإيهاب اتصل كم مره ودرر برضو بس ما رديت عليهم كنت ما قادره اتكلم مع زول امي كانت مستغربه من عدم مشيتي للجامعه وفي يوم لمن عصرت على شديد حكيت لي امي كل حاجه وصارحتها بموضوع العمليه وقعت فيني كفيت وقالت لي انا كنت واثقه انك ح تفضحيني في النهايه انا من ولدتك ما شفت خير شينه وقبيحه ذي ابوك وكمان هسي بكل وقاحه تقولي لي عايزه اقلب راجل انتي مش عامله فيها بتصلي في الصلاه دي ما وروك انو كلامك ده حرام غلبني البقولو ودموعو جرو مشيت صليت وبقيت ادعي ربنا واقول ي رب خفف على انا عارفه ده ابتلاء بس فوق طاقة تحملي الباب ضرب امي جات قالت لي في ناس بره دايرينك دخلتهم الغرفه طيري ليهم مشيت لقيت إيهاب ومريم قلبي بقى يضرب شديد وقلت ي ربي مريم كلمتو ولا شنو مريم جات مسكت يدي وقالت لي في اضاني...... يتبع....