انا لست أنثى ١٤ قال طيب انا عندي ليك خبر عظيم وح يكون فرصة عمرك قلت ليهو خير ي دكتور بشر قال لي تعالي لي بكره فعلا من الصباح سقت درر و مشيت عليهو وأول ما دخلت موظفة الاستقبال قالت لي اتفضلي طوالي الدكتور منتظرك دخلت لقيت معاهو راجل ألماني بتكلمو بالانجليزي قال لي تعالي ي هدى ده دكتور فيليب دكتور ألماني وعامل بحث في نفس موضوع مشكلتك تعالى اتفضلي شاب مني الأوراق وشافاها وبقي بتناقش مع الدكتور طلع ورقه كتب فيها فحوصات واداني ليها الدكتور قال لي تمشي تعملي الفحوصات دي عند أي معمل بتاع ذكوره ولو التقرير قال انك بتحتاجي عمليه الدكتور ده ح يعملها ليك في ألمانيا شرط تسمحي ليهو يستفيد من الاوارق والفحوص ونتائج العمليه في بحوثه فرحت فرح شديد وحسيت انو ربنا اخيرا عايز يعوضني عن كل حاجه شفتها مشينا انا ودرر المعمل درر كان عندها خاتم باعتو وعملت الفحوص كانت غاليه شديد اليوم داك م قدرت امسك دموعي وحسيت انو درر دي امي واختي وكل حاجه في الدنيا النتيجه كانت بتطلع بعد تلاته يوم اتصلت بالدكتور كلمتو ورجعنا البيت لقينا عربية إيهاب واقفه بره اول م جيت داخله امي شافتني وبقت تزغرد الف مبروووك ي بتي الف مبروك جاك عريس م كنتي تحلمي بي ذيو انتي ودرر دي مشيتن للشيخ ولا شنو قلت ليها عريس شنو قالت لي إيهاب جاء هو وابوهو جوه مع عمك نصر الدين وطلبو يدك وعايزين نحدد ليهم مواعيد مع ابوك انا حسيت الدنيا دي لافه بي قلت لي امي والقال ليك انا موافقه منو ي امي: طيب مدام ما موافقه ليه خليتيهو يجي مش هو زميلك وبعدين انتي غاويه جوع وفقر ما تباري درر دي سمحه وبتلقي الف عريس لكن انتي دي ذاتك جاتك بالحظ هدي: انتي ي امي مش عارفه مشكلتي مش انا حكيت ليك كل حاجه امي: اسمعي ي هدى انا م دايره أمور وقلة ادب والكلام الفاضي القلتي لي ده تنسيهو خالص وتاني ما تجيبي سيرتو هدى: يعني اتزوج راجل وانا ذاتي راجل ي امي وبعدين عاجلا أو آجلا هو ح يعرف يتبع بقلم نرجس الشرق انا لست أنثى ١٥ امي قالت لي هدى اسكتي وطيري من وشي الموضوع ده بحسموه الرجال مشيت المطبخ بقيت ببكي وحاسه نفسي مخنوقه درر حاولت تهديني وتتكلم معاي لكن انا خلاص فاض بي من كترت ال شفتو في الدنيا إيهاب اتصل على وقال لي رائك شنو في المفاجأة دي ي هدهد قلت ليهو إيهاب احنا لازم نتقابل بعد بكره وطبعا ده كان يوم النتيجه إيهاب قال لي في شنو فهميني انتي رافضاني يعني قلت ليهو بعد بكره بتفهم كل حاجه يوم النتيجه مشينا انا ودرر وطلبت من إيهاب يجي يلاقيني عند عيادة الدكتور مشيت للدكتور اديتو التقرير ولقينا الدكتور الألماني برضو موجود قال لي برافو انتي كده جاهزه للسفر لي ألمانيا عشان تاخدي جندرك الحقيقي طلبت من الدكتور يشرح لي إيهاب وضعي بالكامل إيهاب بقى مصدوم وما قادر يفتح خشمو الدكتور اداني استماره مفروض املاها وطلب مني اجهز جواز سفري ومسموح لي اخد شخص واحد كمرافق معاي طلعنا كلنا وإيهاب طلع معانا قال لي معناها انتي طول الفتره الفاتت ما معتبراني حاجه ولا خاته لي مكانه لو كان كلمتيني ذي م كلمتي مريم كنت ح اكون واقف جمبك احنا البينا أكبر من كده بكتير انا لي هسي مافي شئ اتغير جواي غير اني زعلت اني كنت خاتي ليك مكانه كبيره وانتي مهمشاني قلت ليهو انت شايف دي حاجه عاديه بتتحكي انا كنت خجلانه ومحرجه وبعدين الزوله الوحيدة الوثقت فيها وكلمتها خذلتني إيهاب وصلنا انا ودرر لحدي البيت مع انو كان شكلو قلبو مكسور لكن انا حسيت انو ارجل زول عرفتو في حياتي واتمنيت اني كان اكون بت عشان اتزوجو اول م دخلنا لقينا ابو درر قاعد في البيت منتظرها عشان يسوقها ايام الوحده والألم ح ترجع تاني بسبب بعد درر عني لكن كنت حاسه اني اسعد واحده في الدنيا ح اعمل العمليه وارتاح كنت زعلانه لفراق درر ومبسوطه اني ح ارتاح من العذاب اول ما ناس درر مشو ناديت امي بكل فرح الدنيا وحكيت ليها القصه كامله واديتها الاستمارة امي قفلت باب المطبخ وقالت لي انتي ي بت م بتفهمي انا مش قلت ليك تصرفي نظر عن الحكايه بقيت اصرخ واقول ليها انا ما بت قلت ليك انا ما بت م تزهجوني ياخ امي بقت تكفت فيني وضربتني بخرطَوش الأنبوبه حقت الغاز نصر الدين لمن سمع المشكله جاء جاري في شنو ي مره امي قالت ليهو دي واحد ما مؤدبه خليني ادبها نصر الدين بقى يضحك وطلع وانا اغمى على من شدة الضرب صحيت بليل لقيت نفسي في الأرض وجسمي كلو يوجعني بدون ما أشعر شلت السكين وقطعت وريدي...... يتبع بقلم نرجس الشرق