سلام عليكم، لو لسه ماعملتش خطة شهر شَعبان (اللي هيَّ تمهيد لشهر رمضان) فـ أنا جيالك بخطّة مُناسبة بإذن الله : ١) نبدأ بالصيام.. ليه؟ علشان عن عائشة -رضي الله عنها- قالت : لم يَكُن النبي -صلَّ الله عليه وسلّم- يصومُ من شهرٍ أكثرَ من شعبان، فإنه كانَ يَصوم شعبانَ كلَّه وفي رواية : كانَ يصومُ شعبانَ إلا قليلًا. - مُتفقٌ عليه طب لو مش عارف اصوم تطوُّع بسبب الشُّغل/الدراسة/ بصحى بدري/ التمرين؟ كده كده داخل عليك شهر رمضان هاتصوم أثناء تأديَتك مسئولياتك كلها، بالعكس في رمضان نومك هايقلّ كمان عن دلوقتي فمادام عندك فُرصة دلوقتي اغتنمها بالإضافة لإن صيام الشِّتا خفيف زي ما احنا عارفين ٢) تصدَّق.. انت لسه فـ أول الشَّهر، ومش طبيعي يكون كل مُرتبك/مصروفك خلص.. تصدَّق علشان الأجر وعلشان تربّي نفسك على إخراج الصدقة في رمضان بسهولة.. ماتبقاش لسه هتبدأ في رمضان لأ تدخل رمضان أوريدي جاهز.. ٣) قراءة القرءآن بقى.. علشان ماتتفاجئش في تالت ورابع يوم رمضان ان فيه ناس بفضل الله ختَمت اللي هو بتلحقوا تقرأوا إمتا ياجماعة؟ دي ناس مدرّبة نفسها وجاهزة للسباق ده من بدري جدًا وماصدّقِت شهر رمضان ييجي علشان تنطلِق.. عايزاك تكون منهم ومش ضروري تشارك ده، لكن من باب التشجيع ممكن تذكيرات كل كام يوم لناسك واصحابك (بالمُناسبة.. مش كل العبادات خصوصًا في رمضان يصح تتشارك، فـ نقسِم البلد نُصّين عبادات تنطلق فيها لوحدك وعبادات تتشارك فيها وتتشجع عن طريق التحدّيات مع اصحابك وناسك وهكذا) ٤) أرجوك، أرجوك، أرجوك بلاش الغلطة بتاعة كل سنة وهيَّ انك تشترك في ١٠٠ دورة لتجهيزات رمضان.. وزيهم برامج هيبدأوا في رمضان، ده غير الكام شخص اللي متفق انك هاتعتكف معاهم طبعًا، ده غير وغير وغير وفي النهاية بنبُص على جدول رمضان نلقى نفسنا ماحققناش نص المطلوب حتى! طب والعمل؟ نخفّ شوية من الأمر ده، بكفاية دورتين تلاتة بالكتير في شعبان وزيهم في رمضان مع أورادك الخاصّة ومسئولياتك وروتين يومك، وفضل من الله علينا إن أتمَمناهُم.. أكتر من كده لأ. ٥) آخر حاجة هنتكلم فيها وهيَّ الفنّيات صلوات محتاج تصلّيها في ميعادها وتضبطها (تصلّي بخشوع) تبدأ تمنع نفسك عن الكلام اللغو اللي بدون داعي تبدأ تقلل سَماع أغاني (ومشاركتها) تبدأي توسّعي لبسك وهكذا.. بنمشيها خطوات علشان نوصل الهدف الأكبر وهو إن رمضان الجاي يكون بإذن الله هو رمضان اللي غيّرك وكان نقطة تحوُّل في حياتك.. وعلشان نكون صادقين سوا، فمافيش تأكيد اننا كلنا هنبدأ رمضان سوا، وعلشان الأعمار بيَدِ الله -عزوجل- لكن تخطيطك وحُسن نيّتك وصدقها بإذن الله يضمنوا لك الأجر صافي سواء كنت عايش أو لأ.. اللهمَّ بلّغنا رمضان ولا تحرِمنا أجرَه ولا تفتِنا بعدهُ ولا ترُدّنا منه خائبين ياربّ العالمين..