- مين دي؟ = دي الشهيدة. - شهيدة إزاي وهي عايشة وبتاكل وبتشرب وبتتحرك قدامنا! = ماعرفش، سيدنا النبي هو اللي قالها كده. -غريبة! كان اسمها أم ورقة بنت نوفل، فضلت طول عمرها تحفظ القرآن وتحاول تعرف وتفهم معانيه، لدرجة إنها بدأت تجمعه وتكتبه على الجلد والرقائق. عاشت طول عمرها عابدة وزاهدة في الدنيا وكانت سيرتها وسمعتها في المدينة عظيمة جدًا وعشان كده كان سيدنا النبي صلى الله عليه وسلم بيعزها. وكانت معروفة في المدينة بلقب الشهيدة وده لإن سيدنا النبي كان بيناديها دايمًا بيه، لدرجة إنه لما كان بيقرر يزورها كان بيبص للصحابة ويقولهم:"انطلقوا بنا نزور الشهيدة" - وليه سيدنا النبي لقبها باللقب ده؟ = عشان سيدنا النبي كان يعلم إنها هتموت شهيدة فعلًا. - ليه هتتقتل في حرب أو غزوة؟ = هي افتكرت كده زيك إنها طالما هتموت شهيدة يبقى هتتقتل في غزوة، وعشان كده لما سيدنا النبي والجيش كانوا بيستعدوا لغزوة بدر طلبت منه صلى الله عليه وسلم واستأذنته إنها تروح معاهم تداوي الجرحى والمرضى هناك لعل نبؤته تتحقق وتستشهد هناك، لكن سيدنا النبي رفض وقالها جملة غريبة أوي. -قالها إيه؟ = قالها:"قرِّي في بيتِكِ فإنَّ اللَّهَ تعالى يرزقُكِ الشَّهادةَ" يعني هتستشهد في بيتها! -!؟ ومات سيدنا النبي صلى الله عليه وسلم وهي لسه عايشة، وبعد كده تولى الخلافة سيدنا أبو بكر ومات وهي لسه عايشة، ولما تولى سيدنا عمر الخلافة كانت عايشة وكان دايمًا بيسمع صوتها كل ليلة وهي بتقيم الليل وبتقرأ القرآن. وفي ليلة ماسمعش صوت قرأتها للقرآن فقرر يزورها ويطمن عليها وأول لما دخل حُجرتها لقاها مقتولة وملفوفة في قماشة جنب الحيط! -مين اللي عمل فيها كده؟ = كان عندها ولد وبنت بيخدموها، وكانت موصية إنهم يُعتقوا وياخدوا حريتهم لما تموت، وللأسف استعجلوا موتها وفي يوم اتفقوا مع بعض يقتلوها ويهربوا، وفعلًا نفذوا خطتهم وجابوا قماشة وكتموا بيها نفسها لحد لما ماتت وهربوا! لما سيدنا عمر شافها كده طلع وخطب في الناس وأمر إن اللي يشوف اللي قتلوها يقبض عليهم . وفعلًا شافوهم وقبضوا عليهم، واتصلبوا يعني اتربطوا في شجرة أو خشبة واتضربوا وبعد كده اتسابوا على الوضع ده لحد لما ماتوا! وكانوا أول حالة يتم صلبها في المدينة. وسبحان الله صدقت نبؤة سيدنا النبي صلى الله عليه وسلم واستشهدت في بيتها زي ماقالها! صدق من لا ينطق عن الهوى!'♥️ والله أعلم'. #سيرة_سيدنا_النبي 🌻🌱.') #مواقف_الصحابة_والصحابيات #هبة_شلبي علمنا الله وإياكم♥️.")