- تعرف أم خالد؟ = اه طبعًا؛ أم خالد بتاعت التيك توك وخالد ابنها اللي بيحب البطاطس. - لا، أقصد الصحابية أم خالد وفستانها الأصفر. =مين دي. أم خالد هو كُنية الصحابية أَمَة وهي تبقى بنت الصحابي خالد بن سعيد بن العاص بن أمية، وأمها هي أميمة بنت خلف الخزاعية. أبوها خالد بن سعيد رضي الله عنه كان من أوائل المسلمين اللي سافروا من مكة للحبشة، وهناك خلف أَمَة ، ورجع بيها المدينة وهي طفلة صغيرة. في يوم جت أم خالد ماسكة ايد أبوها سعيد وراحوا لسيدنا النبي، بتحكي أم خالد إنها كانت لابسه فستان أصفر، فسيدنا النبي صلى الله عليه وسلم لما شافها ضحكلها وقالها: "سَناهْ، سَناهْ" والكلمة دي معناها في الحبشة يعني حلو وجميل يعني يقصد يقولها إن فستانها حلو وجميل وعشان هي كانت بتحب سيدنا النبي كانت بتحب تقرب منه وتقعد جنبه وفي المرة دي شافت خاتم النبوة اللي موجود عند كتفه الشمال واللي كان حجمه حجم بيضة اليمام أو الحمام فاستغربته وراحت تكتشفه وتلعب فيه، فأبوها زعقلها عشان ماتزعجش سيدنا النبي فسيدنا النبي زعقله عشان يسيبها على راحتها وقاله:"دعها" وبتحكي كمان إن في يوم سيدنا النبي صلى الله عليه وسلم كان ماسك فستان صغير أسمر مصنوع من الصوف وفيه نقشة بلون أصفر أو أخضر وكان بيفكر هيليق على مين، وبص للصحابة وقالهم: "مَن تَرَوْنَ أنْ نَكْسُوَ هذِه؟"، فماجاش في بالهم حد فسكتوا. لكن سيدنا النبي صلى الله عليه وسلم افتكر أم خالد وقالهم:"ائْتُونِي بأُمِّ خالِدٍ"، ولما جت شالها ولبسها الفستان وبصلها وقالها:"سَناهْ، سَناهْ" وبعد كده دعالها الدعوة اللي بتدعيها الجدات لأحفادها لما يلبسوا حاجة جديدة"تعيش وتلبس يا حبيبي!" سيدنا النبي قالها:"أبْلِي وأَخْلِقِي" وده دعاء بطول العمر - وربنا استجاب؟ =اه، عاشت أم خالد عمر طووويل، لدرجة إن فستانها ده كمان خد نصيبه من دعاء سيدنا النبي وفضل معاها وماحصلهوش حاجة وكإنه جديد زي ماهو!' نسيت أقولك إن أم خالد تزوجت سيدنا الزبير بن العوام وخلفتله ولدين "عمر وخالد " كان رسول الله كريم بالصغار والكبار!' والله أعلم'. #سيرة_سيدنا_النبي🌿🌻 #هبة_شلبي #مواقف_الصحابة_والصحابيات علمنا الله وإياكم♥️.")