كان يسوع ماشي بين الناس، بيبص لهم بحب مالوش حدود، حب هما نفسهم مش قادرين يفهموه. عينيه مليانة رحمة، لكن شافت برضه قسوة قلوبهم، جحودهم، ونكرانهم للجميل. جه علشان يشفي القلوب المكسورة، لكنهم كسروا قلبه. جه علشان يحررهم، فاتهموه. جه علشان يحبهم، فبصقوا في وشه. وفي بستان الزيتون، كان لوحده بيصلي، متألم لدرجة إن عرقه بقى زي قطرات دم. مش الألم الجسدي بس، لكن كمان ألم الخيانة، ألم الوحدة، وألم إنه شايل خطايا العالم كله على كتفه الطاهر. أقرب صحابه ناموا لما طلب منهم يسهروا معاه، وواحد منهم، اللي كان عايش معاه وأكل من إيده، خانه وسلمه بقبلة. ووقف قدام الناس، متقيد، واللي كانوا بيمجدوه امبارح، النهاردة بيصرخوا بأعلى صوتهم: "اصْلِبْهُ! اصْلِبْهُ!"، وفضلوا عليه لص، وهو البريء الطاهر. جلدوه لحد ما جلده اتقطع، وحطوا على راسه تاج من الشوك، مش بس علشان يهينوه، لكن علشان يسخروا منه كملك للآلام. حمل صليبه بصمت في سكوت غريب، وقع أكتر من مرة تحت ثقله، لكنه لم يتراجع. طلع الجلجثة وهو عارف اللي مستنيه، لكنه لم يستسلم، مع إنه كان عارف إن كل خطوة بتقربه من الألم الأخير. دقوا المسامير في إيديه ورجليه، ورفعوه بين السما والأرض، وهو لسه بيحبهم وبيصلي علشانهم: "يَا أَبَتَاهُ، اغْفِرْ لَهُمْ، لأَنَّهُمْ لاَ يَعْلَمُونَ مَاذَا يَفْعَلُونَ." ولما مات، الأرض اهتزت، الحجاب اتشق، والشمس انطفأت، وكأن الخليقة كلها بكت على خالقها. اتساب لوحده، حتى الآب حجب وجهه عنه للحظة، فصرخ: "إِيلِي، إِيلِي، لِمَا شَبَقْتَنِي؟" أَيْ: "إِلهِي، إِلهِي، لِمَاذَا تَرَكْتَنِي؟" وبعدين أسلم الروح علشانهم، وعلشانا، وعلشان العالم اللي رفضه. بس هو راجع، ومرة تانية المسامير مش هتمسكه، لكنه هيجي بمجد ملهوش نهاية، وساعتها مش هيبقى فيه دموع تاني. Martin Hany