*Manipur Buaina-President' Rule (Suspended Animation)* ~ BJP MLA-te lak ah kituahna omthei lou ahihziak in, ut leh utlouh thu a President Rule mawk kiak ding dinmun ah Manipur dinglel hi. BJP in Chief Minister thak nei mahleh Assembly Session neih masakpen hun ah, Opposition Party in No-confidence motion a puaklut ngeingei leh solkal bawltheihna dia poimoh seat 60 om lak ah seat 31 bek a chin ngai hi. Himahleh tu dinmun et in Chief Minister thak omtheih chilou a, BJP Manipur In-Charge Sambit Patra in MLA te kimuhpih in, Caretaker Chief Minister N Biren Singh banah Manipur BJP State Unit President A Sharda Devi kimuhpih mahleh gahsuangzou lou hi. Indian Constitution ah Assembly Session neih kal kha guk kan a kigamlathei lou ding chih ahihtoh kiton in, Assembly neih nunungpen apan sim in tuni a khaguk chinna geih hi a, huaiziak in Animated Suspension (President's Rule) i chih uh BJP in a koihlouhtheih louh suakta hi. Himahleh President Rule hong om leh leng kha guk sung kia daih ding a, huai nung a Election Commission of India in Election neihtheih ding dinmun a state sung thoveng lou ahi chia theihsakna abawl leh kha guk sung behlap theih nawn a, President in hoih a sak bang in hunchiam neilou in lakhe thei hi. President Rule a beisakna din Parliament theihpihna leh phalna ngai masa sese lou hi. *The Tribal Post:* https://whatsapp.com/channel/0029VaDguQX0rGiORoPDRc0h