*#فِي _ حُب _الإسلام ..(11)🩷🩷🩷🩷🌷* بواسطه /٭٭عآشــــ♡ـــقهہ‏‏ آلـقــࢪآטּ٭٭🦋♥ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏يوم الأحد ... عملنا روتينا المُعتاد وأبوي حكى لينا قِصة الصحابي عبد اللَّه بن عمرو بن حرام وكيف الملائكة ظللتو بِأجنحتها يوم مات و الأعظم مِن كِدا أنو.. ربنا كلمو كفاحاً أيَّ مِنْ غير حجاب ! يا اللَّه ! ولاء: أبوي كيف الزول يتخلص مِنْ الفتور و الأنتكاسة و جفاف المشاعر فِي العبادات ؟ . صِديق: الأنتكاسة والفتور ديل حاجات طبيعية بِنمر بيها كُلنا لـٰكِن.. بِنختلف في المُدة فِي زول بِنتكس أسبوع و في زول بِنتكس بِالشهور و في زول سنة و يمكن أكتر الشطارة تجي فِي أنك تتخلصي منهُ سريع الأنتكاسة بِتكون بسبب.. الذنوب كُل ما تلتزمي بِحاجة و خليتيها طوالي راجعي نفسك وشوفي الذنب العملتيهُ مثلاً.. قاعدة تصلي قيام الليل في يوم ما صحيتِ القيام طوالي فتشي عملتِ ياتو ذنب و قيسي على كُل العبادات بِالطريقة دي و توبي مِنْ الذنب و طبعاً الانتكاسة تنبيه مِن ربنا ليكِ ؛ عشان يقول ليكِ : أرجعي لي و توبي و ينبهك أنو.. عملتِ ذنب لازم تتوبي مِنهُ أول حاجة.. في فِترة الفتور دي ما تشدي على نفسك شديد يعني.. قاعدة تقري صفحتين بقيها صفحة واحدة المُهم قللي مِن الحاجة الـ بِتعمليها أحسن مِنْ أنو.. ما تعمليها نهائي أما وقت يكون عِندك حماس و نشيطة لِلعبادة و نفسك تقري قرأن أقري كتير و أستغلي فِترة نشاطك أسمعي مُحاضرات عن الجنة و فضل العبادة الكسلتِ منها كِدا بِتنشطي و عليكِ بِالدعاء و الإستغفار .. كوني قاعدة بِالمرصاد لي أوقات الاستجابة " أخر ساعة من يوم الجمعة، وقت قيام الليل، لمن إنتِ صايمة، بين الأذان و الأقامة و غيره.. " و مُمكن عادي ما ترجعي ذي ما كُنتِ فِي يوم ولا يومين ولا أسبوع ولا شهر الحكاية مُحتاجة.. صبر وأستمراااااررر ومُعافرة ومجاهد النفس و الشيطان لـٰكِن.. لمِن ترجعي حـ ترجعي أقوى مِنْ أول أمسكي في الاستغفار بِالصيغة دي.. " أستغفر الله الذي لا إله إلا هو الحي القيوم وأتوب إليه " كرريها كتير كل ما تكوني فاضية قاعدة تنضفي البيت، فِي المواصلات ما توقفي لسانك مِن الذكر الضيق، الهم، الإكتئاب، الانتكاسة والفتور وغيرهُم كُلهم بي سببنا و سبب ذنوبنا فـ الأستغفار بِمحي ليكِ الذنوب دي و بِترجعي لي عباداتك و تنبيه مُهم.. حتى لو.. ما حاسة بِلذة فِي العبادة ما توقفيها أنحنا قاعدين نعبُد ربنا ؛ لانو أمرنا بِكِدا ما عشان نحس بِلذة فِي العبادة لو عايزة اللِذة أدعي ربنا يرزقك ليها . ولاء: جزاك اللَّه خير الجزاء . صِديق: وجزاكِ . قُمتَ ؛ عشان أتجهز لِلمدرسة جهزتَ و بقيتْ أقرا.. قريت شوية الباب ضرب سلمتَ لي أمي وأبوي فِي راسهم و طلعتَ بعد دعوا لي دعواتهم الحِلوة طلعتَ لي ناس سمر سلمتَ عليهم و أتحركنا على المدرسة وصلنا ... بنات الجِمعية جوني سمعوا لي و لقيتهم مُسمعين الثنائيات اللهم بارك قريتْ ليهم الوجهين بتاعين اليوم و التفسير قُلتَ ليهم ساعة الفطور جرس الحصة ضرب.. أخدنا حصصنا و طلعنا بعد فطرنا.. مشينا البوفي ؛ عشان نشتري تحلية أشترينا و ماشين على الفصل أثناء و أنحنا ماشين فجأة !.. سمر ختفت الشيبسي بتاعي و جرت دخلت الفصل و لا كذبتَ طوالي جريتْ وراها مع دخلتِ الفصل كِدا وانا جارية و طبعاً سراميك المدرسة النوع الناعم داك المُهم أنا جارية ؛ عشان أقبضها بس.. وصلت بداية الفصل كِدا أتزلقتَ وقعتَ مِنْ بداية الفصل لقيتْ نفسي فِي النُص رفعتَ راسي لقيتْ نص البنات موجودين و لقيتهُم قاعدين يعاينوا لي قُلتَ ليهم : بِتعرفوا الحركة دي كُلهم فكوا الضحكة بِصوت واحد أنا ذاتي ضحكتَ معاهم و قُمتَ أما ناس سمر ديل شمتوا فيني شماتة بعدهُ كُل زول أكل الشيبسي بتاعو أية عندها حلاوة كِدا طويلة حِلوة شديد بتجيبها مِنْ بقالة جنبهم أها بقوا يتشاكلوا فيها و كُل واحدة عايزة تقسمها وجن: ثواني.. أنا عندي ليكُم حل . كُلهم: أها . وجن: نقيسها بِالمسطرة حقت يارا . سمر: مع وبِشدة . يارا: أتفق . أها شلناها قسمناها و كُل واحدة شالتْ خمسة سنتمترات و البنات الموجودين فِي الفصل قاعدين يضحكوا فينا ضِحك ! غايتو حالتنا صعبة بعدهُ مشيتْ لِبنات الجِمعية فسرتْ ليهم الوجهين و قُلتَ أديهم مُحاضرة.. وجن: عايزين أتكلم ليكم عن شنو ؟ . مُزدلفة: لو مُمكِن عن الرياء . وجن: طيب الرّياءُ واحد مِنْ أمراض القلوب . أية"بِأستغراب": القلب عِندو أمراض ؟! . وجن: أي و أمراضو أكعب مِنْ الأمراض الجسدية ! . يلا يا جميلات الرياء هو القيامُ بأداءِ العباداتِ للّٰهِ عَزَّ وَجَلَّ معَ تعمُّدِ إظهارها للنّاسِ ليحمدوهُ عليها ويُعجبوا بها و القصدُ مِن الرّياءِ طلبُ تعظيمِ النّاسِ أو الرغبةِ في إعجابهم بهِ أو رهبةً مِن النّاسِ وخوفاً منهم و عكسو الأخلاص أما قرينُ الرّياءِ العُجْب؛ وهو أن ينظرَ العبدُ لنفسهِ بعينِ الإعجابِ لِصلاحهِ أو لِعبادته . أية: حُكم الرياء شنو ؟ . وجن: الرّياء محرّم، والعمل المصاحب للرّياء مردود وغير مقبول و الرّياء نوع من أنواع الشّرك بالله عَزَّ وجَلَّ والعياذ بالله . تسابيح: خلاص خطورتهُ شنو ؟ . وجن: خطره أنو.. عُدّ الرّياء من صفات المنافقين فهم يراءون النّاس في أعمالهم و عباداتهم و لا يذكرون الله إلا قليلاً همّهم كيف ينظر النّاس إليهم و لا يهمّهم نظر الله إليهم ● قال تعالى في وصفهم: ﴿ یُرَاۤءُونَ ٱلنَّاسَ وَلَا یَذۡكُرُونَ ٱللَّهَ إِلَّا قَلِیلَا ﴾ سيدة: كيف أعرف أنو.. أنا قاعدة أعمل العمل رياء ؟ . وجن: عـلامـات الــريــاء.. ⒈● حبّ الظهورِ في المجتمع ⒉● الرغبةُ في الشهرة ⒊● العلو على الأقران ⒋● العملُ لأجلِ ما عند الناس أو خوفَ ما عندهم. ⒌● الجرأةُ على الفتوى و تَعَجُّلُ التدريسِ والتصدرُ لذلك ⒍● حبُّ المناظرةِ مع الأخرين و حبُّ الجدلِ وكثرةُ الكلام ⒎● محاولةُ الشخصِ إظهارَ نفسه و نِسبَة نفسه دائما إلى الكمال و نسيان عيوبها ⒏● الولع بالغرائب من المسائل والبحث عن المهجور من الأقوال الشاذة ⒐● أن يَنشَط الشخص في العمل إذا كان يراه الناس، وإذا كانوا لا يرونه ترك العمل‏ ⒑ ● يطبق مقولة: ( يهرف بما لا يعرف). قال بعض السلف : إذا رأيت الرجل لجوجاً ممارياًً معجباً برأيه فقد تمَّت خسارته . مُزدلفة: لو عرفتَ أنو أنا قاعدة أعمل العمل رياء وعايزة أتعالج منهُ أعمل شنو ؟ . وجن: تكثري مِنْ قول : « اللَّهُمَّ إني أعوذُ بكَ أن أشركَ بكَ وأنا أعلم، وأستغفركَ لِما لا أعلم » و تعملي العمل فِي الخفاء و تدعي كتير و تسمعي عن الأخلاص و خطورة الرياء . اية: تاني زِي شنو مِنْ أمراض القلوب ؟ . وجن: العُجب، الحِقد والحسد، الغفلة سؤء الظن بالله والناس، الكِبر.. الخ كُتار هُم . البنات: جزاك اللَّه خيرًا . وجن: وجزاكُم . خلصنا بعدهُ رجعت لي ناس سسمر و مشينا قعدنا فِي الحوش.. الباب بتاع المدرسة ضرب.. و المُشرفة بعيدة ؛ عشان تفتح أترددتَ أمشي أفتح و لالا فِي النهاية مشيتْ فتحتَ لقيتو ولد دنقرتَ راسي و غضيتْ بصري سالني مِنْ مكتب المُديرة وصفت ليهو و دخل مشى على المكتب .. لـٰكِن.. حصلت حاجة غاظتني شديد ! فِي شلة بنات واقفين و بقوا يعلقوا فِي الولد و يمكن هو سِمعهُم عديل! يلا هُم أصلاً كان قاعدين يتونسوا مِنْ دخل فِي واحدة لفتتهُم و قالت ليهُم : عاينوا لِلولد داك كُلهُم التفتوا.. و الـ بِتقول بقى كراشي و الـ بِتقول بعلن أنبراشي و غايتو كلام خارم بارم عجبتني واحدة فيهُم قالت ليهُم : غضوا بصركُم و بعدين يا السمحات كِلمة " كراش و أنبراش" الألفاظ دي ما حِلوة نهائي! « {قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ۚ ذَٰلِكَ أَزْكَىٰ لَهُمْ ۗ إِنَّ اللَّهَ خَبِيرٌ بِمَا يَصْنَعُونَ} يمكن غض البصر مِن أصّعب العِبادات ومِن أصّعب أنواع الجِهاد، بألاخص في زمنا الحالي، نسبةً لأنو زمن "الفِتنه". فـ أغلب النَّاس مُتجاهله غضَّ البصر وتلقاهم بِعاينوا وحتى لو بنات بيّن بعضِيهم فحتلقيها بتقول عان ليهو سمح كيف!! وبعد ماهي ما غضَّت بصّرها خلت وحده تانيه تنظر!! وهُنا عليها إثمَّ نظّراتِها وإثمَّ نظرات تِلك الفتاة. "واللهُ أعلم" هو صح صعّب بس مُستحيل!؟ لا والله مامُستحيل، يمكن يِستصّعب عليك ألأمر في البِداية بس أكيّد حتقدري في يوم تغُّضِّي بصرك!! يُستحب تجنُب ألإختلاط بسبب الفِتن! بس حاليًا كُلنا مجبورين ننزل الشارع سواءً لعمل، أو وظيفة، أو حوجات، أو غيرها كثير. من الأسباب الرئيسية البتخليك تغُضَّ البصر إنك تجاهد نفسك فعليك "بجِهادِ نفسِك" "فاللهُمّ إننا نُجاهِد أنفُسنا والدُّنيا والشَّيطانُ والهوى، فأعِنا يالله". جاهِدوا أنفُسكُم وأدِبُوها فأدبُ النفسِ بالصِيام.. عن سيد العابدين علي بن الحسين بن علي بن ابي طالب : [ .. وحقّ الصَّوم أنْ تعلم أنَّه حجابٌ ضربه الله _عزوجل_ على لسانك وسمعك وبصرك وبطنك وفرجك يسترك به من النّار ، فإنْ تركت الصَّوم خرقت ستر الله عليك ] في الصوم تضعف النفس الأمارة بالسُوء، فالجُوع والعطش يُهلكان النَّفس من الناحِيه البدنية، وتُقوى النَّفس من النّاحِيه الرُوحيه فالصوم عن الطعامِ والشراب يعني صوم اللسان عن الناس وإنشغالهُ بالذِكر تعني صون الآذان من الموسيقى والمعازِف وإنشغالِها بالقُرآن والترتِيل... هو أنا الشيطان أغواني وضعفني أعمل شنو؟! قال تعالى (إنَّ كَيْدَ الشَّيْطَانِ كَانَ ضَعِيفًا) قال تعالى ( إِنَّهُ لَيْسَ لَهُ سُلْطَانٌ عَلَى الَّذِينَ آمَنُواْ وَعَلَى رَبِّهِمْ يَتَوَكَّلُونَ) إستدرِك معنى ألآيتين الفاتوا أول شئ ثاني شيء مُقاومة الوساوِيس الشيطانِيه بالذِكر مثل أذكار الصباح والمساء، ووِرد القُرآن الثابت، والتحصين عقب كُل صلاة لاتتركوا لِلشيطان ثغرات... فالثغرات تبدأ بترك النوافِل، والأذكار والتحصِين، إنتركت النوافِل فخّفَّ علي الفُروض. _سلسلة_تأديب_النفس _التْرتِيل + لمِنْ تقولي كِدا ده عدم حياء و البت زينتها حياءها » غايتو موقف البنات ديل زعلني شديد حسيت شوية و حـ أطرشق مِنْ الزعل و دخلتَ جوا ضفوري كأنو.. أنا الأتكلمتَ و هو سمعني! سمعنا الجرس مشينا الفصل أخدنا حِصصنا كُلهم و طلعنا على البيوت.. سمر و أية كانوا ماشين ورانا وأنا و يارا قِدام.. يارا: عايزة أسألك . وجن: احكي . يارا: أعمل شنو عشان أنسى صالِح ؟ يعني بعد مرات بفكر فيهو و كِدا . وجن: قاعدة تفكري فيهو وقت تكوني فاضية مُش؟ . يارا: حرفياً . وجن: اصلاً الفراغ ده سبب كُل مصائبنا المُهم أول حاجة الاستعانة بالله تاني حاجة.. أتخلصي مِنْ الفراغ ما تقعدي براكِ و تفكري حاولي خلي يومك ملان و ما يكون عندك وقت فاضي تفكري فيهو اتقربي مِنْ ربنا و طوري مِنْ نفسك و تالت حاجة.. أمسحي رقمو وأحظريهو مِنْ كُل المواقع و ما تتابعي أخبارو . و رابع حاجة.. أكثري مِنْ الدعاء وأنو ربنا ينزع حبو مِنْ قلبك و أنتبهي بعد فِترة ربنا حـ يختبرك يعني.. تشوفيهُ فِي الشارع أو يجي يحاول عايز يتكلم معاكِ يلا أعرفي فِي اللحظة دي أنو.. ده اختبار مِنْ ربنا ؛ عشان عايزة يشوفك هل صادقة فِي توبتك و لا لا فـ أثبتِ فِي اللحظة دي . يارا: أن شاء اللَّه . وجن: أها ما حكيتِ لي أمبارح حصل شنو ؟ . يارا: وقت طلعنا مِنكم و مشينا البيت مُنذر بقى يتكلم معي وشاكلني بعدين أعتذر مني بِسبب أنو.. بعيد مني و كِدا يعني و سبحان الله مُعاملتو معي أتغيرتْ شديد حتى أمي وأبوي أتكلم معاهم لـٰكِن.. بِدون يجيب ليهم سيرة موضوع صالِح و سالني ليه ما جيت أنا و كلمتو وريتو أني كُنتَ خايفة منو و كِدا.. ياخ زعل مِن نفسو شديد وأنو كيف هو بعيد مني لِدرجة ما بقدر أحكي ليهو و هسه الحمد للَّه مُعاملتهُم معي أتصلحتْ . وجن: الحمد للَّه الحمد اللَّه . يارا: ياخ أنا أمبارح كُنت خايفة خوف وقت مُنذر قال لي يلا أرح البيت . وجن: ما بِتلحقيني أنا قُلتَ حـ يبقيكِ لحمة مفرومة عديل . يارا: غايتو الليلة كان قاعدين تبكوا علَّي . وجن: ما لِدرجة دي، صح حـ يعصب لـٰكِن.. ما بِصل لِلمرحلة دي . يارا: غايتو الحمد للَّه عدت على خير . وجن: الحمد للَّه . بعدهُ ناس أية وصلونا بقينا ماشين و نتونس وصلنا و كُل واحدة دخلتْ بيتهم مشيتْ سلمتَ على أمي و أكلتَ بديتْ أقرأ.. أثناء ما أنا قاعدة أقرأ جاتني ولاء و هي قاعدة تبكي أتخلعتْ! ولاء: ............................ #على_ الهامِشْ: إنَ رأس مال المرأة المُسلمة هو.. حياءَها فيهُ عِزها.. و بِهُ تحفظُ كرامتْها و شرفِ أهلْها فلا و اللَّه ما في العيش خيرٌ.. ولا الدُنيا إذا ذهب الحياءُ. أسأل الله أن يجملنا بِالحياء و يجعلنا فتيَّات، نقيَّات ، تقيَّات عفيفَات ، طاهراَت ، مُحتشِمَات ثابتَات ، رغمَ الذنوبِ أوّابات♡ #هللوا 💛🌻. .*يتبــــــــــــــــــــــــــــــــــــــــــع*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏