*السيرة النبوية الحلقة الرابعة والثلاثون (34)🤍)>* ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‎ #رحلة الإسراء والمعراج #المعراج الجزء الثالث #الجنة ولقاء الله اتكلمنا المرة إللي فاتت عن رسول الله ﷺ لما أخذه جبريل عليه السلام وصعد به فوق السماء السابعة عند سدرة المنتهى، وقلنا إن رسول الله ﷺ رأى جبريل على صورته الحقيقية عند سدرة المنتهى ودي كانت المرة الثانية التى رأى فيها رسول الله ﷺ جبريل على صورته الملائكية، `{وَلَقَدۡ رَءَاهُ نَزۡلَةً أُخۡرَىٰ (13) عِندَ سِدۡرَةِ ٱلۡمُنتَهَىٰ}` المرة الأولى لما جاءه بالوحي بعد فترة الوحي واحنا اتكلمنا عنها قبل كده، وقلنا كمان إن سدرة المنتهى فوق السماء السابعة وعندها جنة المأوى، جبريل عليه السلام أخذ رسول الله ﷺ عشان يقابل ربنا، في الطريق ربنا أهدى رسول الله ﷺ هدية لم يهدها لأي بشر أبدا، وهنشوف هدايا كثيرة ربنا أعطاها لرسول الله ﷺ في الرحلة دي، أول هدية إنه جعله يدخل الجنة، وهو مازال على قيد الحياة فرسول الله ﷺ هوالبشري الوحيد إللي دخل الجنة وهو من أهل الدنيا جبريل عليه السلام أخذ رسول الله ﷺ في جولة داخل الجنة، وعايزكم تتصوروا لما رسول الله ﷺ يقف على باب الجنة قبل ما يدخلها الجنة إللي حكى عنها للصحابة ، الجنة إللي هيدخلها الذين سعدوا `{وَأَمَّا الَّذِينَ سُعِدُوا فَفِي الْجَنَّةِ خَالِدِينَ فِيهَا مَا دَامَتِ السَّمَاوَاتُ وَالأَرْضُ}` تخيلوا موقف رسول اللهﷺ وهو بيستعيد آيات القرآن عن الجنة : `{تِلْكَ الْجَنَّةُ الَّتِي نُورِثُ مِنْ عِبَادِنَا مَن كَانَ تَقِيًّا}` الجنة إللي هيسكنها المؤمنون للأبد، مفيش بعدها موت، الجنة إللي فيها ما لا عين رأت ولاأذن سمعت ولا خطر على قلب بشر، الجنة دي رسول الله ﷺ هيشوفها دلوقتي، ياترى شكلها إيه؟! خلونا نشوف رسول الله ﷺ وهو بيوصف لنا الشكل للعام للجنة، بيقول إنه أدخل الجنة، والجنة لها ثمانية أبواب بالمناسبة، وعرضها كعرض السماوات والأرض، سبع سماوات وسبع أراضين واخدين بالكم أول ما رسول الله ﷺ دخل شاف حبائل لؤلؤ معلقة، عارفين لما بِنُزيّن البيت بشرائط ملونة مدلدلة من السقف في المناسبات كده، أهه حبائل اللؤلؤ نفس الفكرة تقريبا وشاف قباب من اللؤلؤ ، يعني قبة جنب قبة من اللؤلؤ، بص في الأرض لقى الأرض بيضاء ترابها المسك والزعفران وده يدينا انطباع أد إيه ريحة الجنة رائعة البيوت شافها مبنية طوبة من الذهب وطوبة من الفضة والمونة إللي بينهم يعني الأسمنت إللي بين الطوب من المسك، والحصى والرمل الواقع في الأرض من اللؤلؤ والياقوت، ده كان المشهد العام للجنة، ربنا يرزقنا الجنة وإياكم رسول الله ﷺ هيبدأ يشرح لنا تفاصيل أدق عن بعض أجزاء الجنة إللي جبريل عليه السلام هيأخذه فيها ثواني كده، هو إزاي الجنة فيها ما لاعين رأت ورسول الله ﷺ شافها؟! المقصود هو إن محدش شاف مثلها أبدا ، مش إن مفيش حد شافها، يعني مش المعنى إن الجنة مقفول عليها ولم ترها الأعين أبدا، لأ... المقصود إن محدش شاف زيها ، وإلا فآدم عليه السلام كان عايش فيها قبل نزوله للأرض ، ورسول الله ﷺ دخلها وشافها مشي رسول الله ﷺ مع جبريل عليه السلام فشاف نهر، لكن النهر ده مش بيتحرك في مجرى مائي زي الأنهار العادية، ده بيتحرك على أرض الجنة يعني رسول الله ﷺ شايف أرض النهر القاع يعني لدرجة إن رسول الله ﷺ مسك الطين إللي في أرض النهر لقاه مسك، والحصى إللي في قعر النهر ده من اللؤلؤ والياقوت، والنهر كان لونه أبيض من الثلج وطعمه أحلى من العسل، على حافتين النهر يعني على جوانبه في قصور جميلة على شكل قباب، كل قبة عبارة عن لؤلؤة ضخمة مجوفة، المنظر رائع جدا رسول الله ﷺ سأل جبريل عليه السلام قال له: إيه ده يا جبريل؟!! قال له جبريل عليه السلام هذا نهر الكوثر! النهر إللي ربنا أعطاه لرسول الله ﷺ، والعرب بتستعمل كلمة الكوثر لما يكونوا عايزين يعبروا عن الشيء الكثير، فنهر الكوثر ده ميته كثيرة وأكوابه كثيرة بعدد نجوم السماء ونهر الكوثر رآه رسول الله ﷺ في السماء الدنيا مع نهر النيل والفرات فهو منبعه من الجنة وبيجري عبر السماوات ، لكنه لا ينزل إلى الأرض زي النيل والفرات إللي اتكلمنا عنهم المرة إللي فاتت ونهر الكوثر هو إللي هيُمِد حوض رسول الله ﷺ بالماء إللي هيشرب منه المؤمنون يوم القيامة، وإللي هيشرب منه مش هيعطش تاني أبدا إيه قصة الحوض ده؟! يوم القيامة الشمس هتقرب جدا من الرؤوس والناس هتكون عطشانة جدا ومفيش مية غير إللي موجودة في أحواض الأنبياء ومنهم حوض النبي محمد ﷺ ، والحوض ده حجمه كبير جدا مسيرة شهر، مليان مية من نهر الكوثر إللي لونه أبيض من الثلج وطعمه أحلى من العسل، عدد الأكواب بتاعته بعدد نجوم السماء زي ما قلنا من شوية، هيبقى موجود على الأرض المُبدلة `{يوْمَ تُبَدَّلُ الْأَرْضُ غَيْرَ الْأَرْضِ}` الناس بقى هتروح لرسول الله ﷺ عشان يشربوا من الحوض بتاعه، فهيشرب منه المؤمنون المتبعين لرسول الله ﷺ فقط، وفي ناس هييجوا يشربوا فهتمنعهم الملائكة فرسول الله ﷺ هيقول: أُمّتي أُمّتي!!! يعني الناس دي من أمتي!!! فيُقال لرسول الله ﷺ إنت متعرفش هم عملوا إيه بعدك ، دول لم يتبعوا سنتك وغيروا فيها فساعتها رسول الله ﷺ هيقول سُحْقا يعني بُعداً لمن بدّل بعدي وغيّر، يعني ابعدوا أي أحد غيّر في سنتي ولم يتبعنِ يبقى نستنتج إن إللي عايز يشرب من حوض رسول الله ﷺ يَلزم سنته وميبدلش ولا يغير فيها ، وميقعدش يخترع في عبادات واحتفالات رسول الله ﷺ مقلش عليها محدش يا جماعة يعمل أي عبادة غير لما يكون عنده حديث صحيح إن رسول الله ﷺ عمل العبادة دي عارفين ليه لأن عشان ربنا يتقبل مننا أعمالنا لازم نكون محققين شرطين الإخلاص يعني إننا نعمل العمل الصالح ده عشان نرضي به ربنا بس والشرط الثاني هو إننا نتبع طريقة رسول الله ﷺ في عمل العمل ده...قال لك صلي الظهر أربع ركعات تصليها أربعة رسول الله ﷺ كان من سنته إنه يصوم اثنين وخميس من كل أسبوع يبقى نعمل زيه، مش من سنته إنه يصوم أول رجب، يبقى منخترعش بقى ونصوم أول رجب رسول الله ﷺ كان بيحتفل بعيد الفطر وعيد الأضحى فقط ،مكنش بيحتفل لا بعيد أم ولا عيد ميلاد ولا أي عيد تاني سامعك ياللي بتقول ماهو رسول الله ﷺ قال إنه بيصوم يوم الإثنين عشان هو يوم اتولد فيه يبقى رسول الله ﷺ احتفل أهو أولا : السبب الرئيسي لصيام رسول الله ﷺ يوم الاثنين والخميس إن الأعمال بتتعرض على ربنا في اليومين دول فهو بيصومهم عشان فضلهم ثانيا : هو بيصومه شكرا لله إنه اتولد فيه، يعني صيامه ده سبب من الأسباب، ده غير إن صيام رسول الله ﷺ كان كل أسبوع مش أسبوع أه وأسبوع لأ، ومش شهر أه وشهر لأ، ولا كل سنة مرة زي الاحتفال بعيد الميلاد ولا عيد الأم ولا عيد زواج ولا أي عيد ثاني وإللي بيكون يوم مخصص من كل سنة، وده هو إللي مينفعش ممكن واحد يقول وفيها إيه يعني لما أقول لأمي كل سنة وانتي طيبة وأجيب لها هدية ولا أجيب تورتاية اتبسط بها أنا و زوجتي في عيد زواجنا ، يعني من باب البر وإدخال السرور على مسلم ياشيخ عقدتونا يا حبيبي هو احنا مينفعش نعمل كده في عيد الفطر وعيد الأضحى هو الدين بيقولك متبريش أمك ومتدخليش السرور على مسلم بالعكس، عندك أيام السنة كلها اعمل إللي إنت عايزه فيها، خلاص يعني محبكتش في الأيام المخصصة دي، هو احنا يعني ينفع نقرأ الفاتحة بدل التشهد، هتقول لأ، هقولك ليه هي الفاتحة وحشة لا سمح الله دي فضلها عظيم جدا، هتقول لي عشان الدين قال لنا إننا نقرأ الفاتحة واحنا واقفين في بداية الصلاة، والتشهد بعد كل ركعتين وأنا بقولك أهو الدين ده هو هو الدين إللي قال لك إن إنت معندكش غير عيدين بس تحتفل وتعمل فيهم كل إللي إنت عايزه وشوف كده الموقف ده لما رسول الله ﷺ هيهاجر للمدينة زي ما هنشوف بعدين، هيلاقي أهل المدينة عندهم يومين عيد من أيام الجاهلية بيلعبوا فيهم ويستمتعوا، بيعملوا حاجات مباحة يعني، فرسول الله ﷺ قالهم لأ ربنا أبدلكم بأحسن منهما أعطاكم يوم الفطر ويوم الأضحى، "إن الله قد أبدلكم بهما خيرا منهما: يوم الأضحى، ويوم الفطر" الصحابة مقلوش يا رسول الله هو احنا بنعمل حاجة حرام، ده احنا بنرَفّه عن نفسنا بالحلال، هو ليه التعقيد والتشدد ده الصحابة قالوا سمعنا وأطعنا ومحدش فيهم عمل أي مظهر من مظاهر الإحتفال في اليومين دول تاني، لا تهنئة ولا جابوا تورتة ولا جابوا هدايا ولا أي حاجة طبعا إللي مش مقتنع بالكلام ومش عايز ينفذ هو حر بس ميجيش يزعل لما الملائكة تمنعه من الشرب من حوض رسول الله ﷺ، ولا يتقهر لما رسول الله ﷺ يقول له سُحقا لمن بدّل بعدي وغيّر وساعتها مش هيبقى في رجوع تاني للدنيا عشان يصلح غلطه، احنا لسه فيها أهه وعندنا فرصة لاتباع سنة رسول الله ﷺ بالضبط خليكم فاكرين كلامي عشان لما نتقابل على الحوض إن شاء الله ونشرب منه ونشوف الناس إللي مسمعتش الكلام والملائكة أبعدتها ،ساعتها نقول الحمد لله إن ربنا هدانا لاتباع سنة رسول الله ﷺ استمر رسول الله ﷺ يمشي في الجنة مع جبريل لحد ما شاف قصر من ذهب ، فرسول الله ﷺ ظن إن القصر ده بتاعه فسأل جبريل عليه السلام : هو القصر ده بتاع مين؟! فقال جبريل: لفتى من قريش قال رسول الله ﷺ أنا من قريش، لمين القصر ده؟! قال : لعمر بن الخطاب ربنا جهز لعمر قصر في الجنة وهو لسه في الدنيا طيب احنا كمان عايزين يكون لنا بيت في الجنة واحنا لسه في الدنيا نعمل إيه بكل بساطة نصلي السنن الإثنا عشرة ركعة وربنا هيبني لنا بيت في الجنة، وطبعا بعد بناء البيت محتاجين شوية زرع وشجر ونخيل حول البيت فهنقول وصية إبراهيم عليه السلام : سبحان الله والحمد لله ولا إله إلا الله والله أكبر، وعندنا من قال: سبحان الله وبحمده غُرست له نخلة في الجنة، وعندنا لا حول ولا قوة إلا بالله كنز من كنوز الجنة ،يبقى بنينا البيت وزرعنا حوله الحديقة وحطينا فيها الكنوز شوفتم الموضوع سهل إزاي ورسول الله ﷺ ماشي مع جبريل عليه السلام شم رائحة جميلة، احنا قلنا إن الجنة ريحتها رائعة فتخيلوا الرائحة إللي رسول الله ﷺ شمها وغطت على ريحة الجنة عاملة إزاي فسأل رسول الله ﷺ سأل جبريل إيه الريحة دي؟! فقال له جبريل عليه السلام: هذه رائحة ماشطة بنت فرعون وأبنائها! أنا مجربتهوش بس أكيد إحساس رائع إن الإنسان يكون عنده صديق من الملائكة، ويجاوبه على كل أسئلته كده رسول الله ﷺ سأل جبريل وإيه حكاية ماشطة بنت فرعون وأبنائها دي؟!! فحكى له جبريل عليه السلام حكاية الماشطة لما كان رسول الله ﷺ في الجنة جاؤه جبريل عليه السلام بثلاثة كؤوس واحد فيه لبن وواحد فيه خمر وواحد فيه عسل، والمرة دي الوضع مختلف المرة الأولى لما كان في بيت المقدس كان عشان رسول الله ﷺ عطشان وكان عايز يشرب فجاءه رسول الله ﷺ بكأس لبن وكأس خمر، المرة دي جبريل عليه السلام جاءه بالكؤوس على سبيل الضيافة يعني، فاختار رسول الله ﷺ اللبن ، فقال جبريل عليه السلام: هُديت إلى الفطرة خرج رسول الله ﷺ من الجنة عشان يروح يقابل ربنا عز وجل، في الطريق شاف تاني سدرة المنتهى إللي اتكلمنا عنها المرة إللى فاتت وقلنا إن غطتها فراشات من ذهب فتحول شكلها لمنظر لا يستطيع أي مخلوق وصفه من شدة جماله المرة دي شافها رسول الله ﷺ وهي بيغطيها ألوان، لكن مش الألوان بتاعتنا المعروفة، رسول الله ﷺ قال إنه ميعرفش إيه الألوان دي وطبعا من شدة جمالها ملهاش وصف، والحاجات إللي بتغطي سدرة المنتهى متغيرة ، يعني ربنا بيقول : `{إِذْ يَغْشَى السِّدْرَةَ مَا يَغْشَىٰ}` يعني كل شوية حاجة جديدة بتغطيها ، عارفين زي إيه كمثال تقريبي للمعنى عارفين الأضواء إللي بتتعلق عالشجر أو على البنايات أو الأضواء إللي بتتعلق كزينة في رمضان وكل شوية الأضواء تتغير بشكل معين شكله حلو، أهه سدرة المنتهى بتتغير كل شوية بما يريد الله، وطبعا مفيش مقارنة بقى في الجمال ، ربنا يرزقنا جميعا الجنة يارب رسول الله ﷺ رايح دلوقتي لمقابلة رب العالمين، فأخذه جبريل عليه السلام لفوق سدرة المنتهى لمكان لم يصله بشر أبدا، وبعدين توقف جبريل عليه السلام وقال لرسول الله ﷺ إنه يتقدم لوحده 🚫في هنا رواية بتقول إن رسول الله ﷺ قال لجبريل أَهُنا يترك الخليل خليله، فقال جبريل لكل منا مقام معلوم ولو تقدمت خطوة لاحترقت، فرسول الله ﷺ تقدم وقال التحيات لله والصلوات والطيبات فربنا قال له السلام عليك أيها النبي إلى آخر الرواية... الرواية دي مكذوبة لا تصح عن رسول الله ﷺ إطلاقا ولو حد بعت لكم رسالة بالكلام ده قولوا إنه مكذوب لا يصح عن رسول الله ﷺ ❌ الصحيح بقى إن جبريل توقف في مكان معين من الرحلة لأنه مش مسموح له إنه يتخطى المكان ده، وسمح لرسول الله ﷺ إنه يتقدم للقاء الله في مكان لم يصل إليه أحد حتى من الملائكة فين المكان ده... الله أعلم، هل احنا في محيط السماء السابعة ولا محيط سدرة المنهى؟ الله أعلم وصل رسول الله ﷺ لمكان لم يصل إليه ملك ولا بشر قبله، وفي وسط كل الأحداث دي والآيات العظيمة لم يزغ بصر رسول الله ﷺ ، بمعنى مش احنا لما بنشوف حاجة جديدة جميلة أو بنروح مكان جديد لأول مرة بنقعد نبص يمين وشمال نستكشف المكان رسول الله ﷺ معملش كده، كان مركز في لقائه مع الله ، وإللي بيقول كده ربنا عز وجل : `{مَا زَاغَ ٱلۡبَصَرُ وَمَا طَغَىٰ (17) لَقَدۡ رَأَىٰ مِنۡ ءَايَٰتِ رَبِّهِ ٱلۡكُبۡرَىٰٓ}` شوفوا، احنا بنوصف موقف، لكن رسول الله ﷺ إللي كان في الموقف نفسه مشاعره كانت إيه، قلبه كان بيدق إزاي كان بيفكر في إيه محدش يقدر يتخيل الموقف ده أبدا لو دخلنا على ملك ولا رئيس من رؤساء الدنيا ولا بس بيبقى عندنا مقابلة مع حد مهم بيبقى شعورنا إيه، رسول الله ﷺ واقف هيكلم رب العالمين في مكان لم يصل له بشر ولا ملك، مفيش أي كلمات تقدر توصف الموقف ده كلم رب العالمين رسول الله ﷺ، وربنا بيتكلم يا جماعة عادي ، واحنا ونثبت له صفة الكلام زي ماهو قال عن نفسه، لكن منعرفش هو بيتكلم إزاي ولا صوته إيه، هنعرف في الجنة إن شاء الله كل الترحيب ده وتقريب رسول الله ﷺ لمكان لم يصل إليه بشر ولا ملك عشان كلمة رسول الله ﷺ قالها، وهو في شدة همه وألمه وبكاؤه والدم بينزف منه: "إن لم يكن بك غضب علي فلا أبالي" يعني يارب لو إنت راضي عني و مش غضبان علي فأنا معنديش مشكلة أهم حاجة إنك تكون راضي عني واحنا عندنا في قوانين البشر بنقول إن الأفعال أصدق من الأقوال، ولله المثل الأعلى في السماوات والأرض ربنا أراد إنه يُرِي رسول الله ﷺ بطريقة عملية أد إيه هو راضي عنه، فقربه إليه في المكان ده ربنا كلم رسول الله ﷺ وأعطاه هديتين وأمره بأمر، الهدية الأولى إللي ربنا أهداها لرسول الله ﷺ كانت خواتيم سورة البقرة إللي هي: `{ءَامَنَ ٱلرَّسُولُ بِمَآ أُنزِلَ إِلَيۡهِ مِن رَّبِّهِۦ وَٱلۡمُؤۡمِنُونَۚ كُلٌّ ءَامَنَ بِٱللَّهِ وَمَلَٰٓئِكَتِهِۦ وَكُتُبِهِۦ وَرُسُلِهِۦ لَا نُفَرِّقُ بَيۡنَ أَحَدٖ مِّن رُّسُلِهِۦۚ وَقَالُواْ سَمِعۡنَا وَأَطَعۡنَاۖ غُفۡرَانَكَ رَبَّنَا وَإِلَيۡكَ ٱلۡمَصِيرُ (285) لَا يُكَلِّفُ ٱللَّهُ نَفۡسًا إِلَّا وُسۡعَهَاۚ لَهَا مَا كَسَبَتۡ وَعَلَيۡهَا مَا ٱكۡتَسَبَتۡۗ رَبَّنَا لَا تُؤَاخِذۡنَآ إِن نَّسِينَآ أَوۡ أَخۡطَأۡنَاۚ رَبَّنَا وَلَا تَحۡمِلۡ عَلَيۡنَآ إِصۡرٗا كَمَا حَمَلۡتَهُۥ عَلَى ٱلَّذِينَ مِن قَبۡلِنَاۚ رَبَّنَا وَلَا تُحَمِّلۡنَا مَا لَا طَاقَةَ لَنَا بِهِۦۖ وَٱعۡفُ عَنَّا وَٱغۡفِرۡ لَنَا وَٱرۡحَمۡنَآۚ أَنتَ مَوۡلَىٰنَا فَٱنصُرۡنَا عَلَى ٱلۡقَوۡمِ ٱلۡكَٰفِرِينَ (286)}` قبل ما نقول فضل الآيتين دول خلينا نوضح نقطة مهمة وهي إن ربنا أه أعطى رسول الله ﷺ خواتيم سورة البقرة لكن هي لسه مش هتنزل على المؤمنين دلوقتي يعني ربنا قال لرسول الله ﷺ إنه أعطاه خواتيم سورة البقرة، إيه هي الآيات دي وتفصيلها إيه؟ لسه مش هتنزل دلوقتي ، هتنزل على رسول الله ﷺ لما ييجي وقتها أو يحصل سبب نزولها وهنعرفه إن شاء الله بعدين نشوف إيه فضل الآيات دس مع رسول الله ﷺ من يقرأ خواتيم سورة البقرة في كل ليلة قبل ما ينام كَفَتَاه، يعني: تُجزئه عن قيام الليل تجزئه عن قراءة القرآن بشكل عام تكفيان الإنسان من كل سوء تكفيان من الثواب، يعني تحقق لنا من الثواب إللي يعادل سيئات اليوم كل ده تفسير العلماء لحديث رسول الله ﷺ : `{منْ قَرَأَ بالآيتَيْنِ مِنْ آخِرِ سُورةِ البقَرةِ فِي لَيْلَةٍ كَفَتَاهُ}` وشوفوا الحديث ده: `{إِنَّ اللَّهَ كَتَبَ كِتَابًا قَبْلَ أَنْ يَخْلُقَ السَّمَوَاتِ وَالْأَرْضَ بِأَلْفَيْ عَامٍ ، فَأَنْزَلَ مِنْهُ آيَتَيْنِ فَخَتَمَ بِهِمَا سُورَةَ ‏ ‏الْبَقَرَةِ ‏ ‏وَلَا يُقْرَآنِ فِي دَارٍ ثَلَاثَ لَيَالٍ فَيَقْرَبَهَا الشَّيْطَانُ}` الأجر ده كله بآيتين فقط، يا جماعة دين ربنا سهل بس احنا إللي بنصعب على نفسنا، الشيطان ييجي يقولك لازم تقراء سورة البقرة كلها كل يوم، ولا لازم أقرأ ثلاثة أجزاء ولا جزئين في اليوم والموضوع صعب عليك، فتلاقي نفسك سيبت قراءة القرآن خالص طيب ليه مناخدش الحاجات السهلة البسيطة إللي أجرها عالي لحد نثبت نفسنا عليها وتبقى جزء من حياتنا اليومية وبعدين نزود يعني النهاردة عرفنا إزاي نبني بيت في الجنة وعرفنا إزاي نزرع نخل وشجر ويكون عندنا كنوز في الجنة وعرفنا خواتيم سورة البقرة، منقدرش نعمل الحاجات البسيطة دي كل يوم ونداوم عليها ؟ نقدر إن شاء الله، فضل ربنا واسع والأعمال سهلة بس احنا نبدأ قبل ما نشوف الهدية الثانية في سؤال مهم لازم نجاوب عليه، هو رسول الله ﷺ شاف ربنا باختصار القول الراجح من أقوال العلماء بالاعتماد على الدليل الشرعي، هو إن لا رسول الله ﷺ ولا حتى الملائكة شافوا ربنا، ومحدش هيشوف ربنا قبل يوم القيامة ، و الدليل لما سُئل رسول الله ﷺ : هل رأيت ربك؟ قال : نور أنّى أراه" أما الملائكة فمفيش أي دليل على إنه في حد فيهم رأى الله عز وجل، بالعكس الأدلة بتقول إنهم لم يروه في الحديث: "إِنَّ اللهَ عَزَّ وَجَلَّ لَا يَنَامُ، وَلَا يَنْبَغِي لَهُ أَنْ يَنَامَ، يَخْفِضُ الْقِسْطَ وَيَرْفَعُهُ، يُرْفَعُ إِلَيْهِ عَمَلُ اللَّيْلِ قَبْلَ عَمَلِ النَّهَارِ، وَعَمَلُ النَّهَارِ قَبْلَ عَمَلِ اللَّيْلِ، حِجَابُهُ النُّورُ - وَفِي رِوَايَةِ أَبِي بَكْرٍ: النَّارُ - لَوْ كَشَفَهُ لَأَحْرَقَتْ سُبُحَاتُ وَجْهِهِ مَا انْتَهَى إِلَيْهِ بَصَرُهُ مِنْ خَلْقِهِ" فالمؤمنين هيشوفوا ربنا في الجنة ، الهدية الثانية إللي أعطاها ربنا لرسول الله ﷺ هنعرف إن شاء الله الحلقة الجاية بكرا في تمام الساعه 8:00م موعد نزول الحلقه الخامسة والثلاثون (35) `كونوا علي الموعد و انتظروا` والسلام عليكم ورحمة الله وبركاته Eman_Shalapy