بقول لمريض سكر بياخد انسولين عندك جهاز سكر عشان تسجل قياساتك ؟ - بسرعة رد ايوه معايا جهاز سكر طبعا نت عارف يادكتور انا اشتريتله ليه ؟ - بصتله كده و قلتله عشان تتابع سكرك َوجرعات الانسولين = قالي لا ابدا ، عشان خفت لان اخويا كان اكبر مني عنده سكر فلاح جي من الغيط عرقان وبيرتعش وعينه مزغللة وماكانش عنده جهاز سكر افتكر نفسه سكره عالي فحقن جرعة انسولين دخل غيبوبة هبوط شديدة واتوفي بعدها عشان كدا اشتريت جهاز سكر ولما بحس باي اعراض تعب بقيس واعرف سكري عالي ولا واطي. انا في نفس اللحظة افتكرت حالة جاتلنا الاستقبال وكنت يومها مع زمايلي الرعاية قاعدين سوا في اوضتنا في الاطفال في النوبتشية بلغوهم ان في حالة arrest يعني عندها توقف عضلة القلب معاهم في الاستقبال فنزلت معاهم يمكن اساعد بحاجة. نزلنا لقينا طبيب الاستقبال بيشتغل عليها انعاش قلب وهو بيقولنا ان الحالة وصلت متوفية اصلا بس هو اشتغل وبلغنا عشان مراعاة لنفسية زوجها اللي كان واصل معاها ومنهار كل دا طبعا بمصطلحات طبية المهم بعد ماكملنا شغل لعدة دقايق اعلنا الوفاة. الزوج اتحول ونزل سب في الاطباء بلا استثناء. فبعدين زميل ليا اتدخل كدا وقاله هو قبل ماتيجوا ايه اللي حصل ؟ - رد بعصبية قال لقتها بتعرق وترتعش وبتقول ضربات قلبها سريعة ومصدعة وعينها مزغللة اه والله بالظبط كدا قال دا بعدين كدا كلنا بصينا له ومتوقعين اللي هيقوله فسألناه قيستلها السكر ؟ - قال لا انا ماعنديش جهاز بس قولت اكيد يعني سكرها عالي. = فعملت ايه بقي كمل ؟ - جبت قلم الانسولين بتاعها وحقنتها عشرين وحدة. لحد هنا وكلنا اتصعقنا وقلنا للممرضه اللي معانا كلمي السويتش وهاتي الامن في محضر هنا. الواضح انه مش عامل كدا متعمد والا ماكانش حكي بس مافيش نوايا انت بتعمل محضر وجهات التحقيق بتشوف هو للاسف المريضة كانت في نوبة هبوط سكر وهو حقنها انسولين دخلها غيبوبة.، للاسف القصتين حصلوا و نتعلم منهم حاجتين: - اي مريض سكر بياخد انسولين او حتي لو مابياخدش واكثر عرضة لارتفاعات وانخفاضات سكر لازم يبقي عنده جهاز قياس سكر بالمنزل. لازم تعرف المريض اعراض هيوط السكر وارتفاعه وخصوصا الهبوط وهي: ( عرق غزير بارد- رعشة بالاطراف- زغللة بالعين ضربات قلب سريعة- رفرفة بالصدر- بهتان بالشفايف صداع متزايد - شعور بالجوع- تغيير حاد مفاجئ في المزاج - قلة تركيز وضعف ادراك حسي ) احيانا التوعية لا تقل اهمية عن العلاج. Copied,,,,,,,