رغم انك مشيتي من مدة بس لسة بشوفك ف كل مكان .. تفتكري هفضل قد ايه وقت حابس نفسي ومش عايز اشوف حد عشان صورتك متغيبش من عينيا .. هفضل قد ايه وقت مسلمش على حد عشان ملمسش حد غيرك .. هفضل قد ايه وقت زي مانا كده عشان افضل حاسس بيكي .. – بحبك . صعب .. كل ده صعب .. وصف الاحساس اللي بحسه وانتِ مش هنا .. العالم اللي بروحله جوه عينيكي مبعرفش احكيه لحد .. او بمعنى اوضح مش عايز اقول لحد حاجة عنك عشان تفضلي اكبر وقت ممكن .. بس اللي اقدر اقوله عنك أنك راحة مش طبيعيه . – مرتاح معاكي . متهيألي الانسان في العموم مش محتاج غير انه يكون مرتاح بالتالي هيكون مبسوط وسعيد في حياته .. لان الراحة هي النتيجه لكل ده مش العكس .. وانتِ النتيجة لكل اللي مشيته ولكل اللي وصلتله دلوقتي كنتي سبب فيه وكنتي نتيجته . – محتاجلك . كل حاجة فيا عايزة كل حاجة فيكي .. الطاقة اللي بتحركني عشان اكمل هي أنتِ .. رغم اننا دايما مكتئبين .. متنكدين .. وبنعيط .. الا ان اللحظة الواحدة اللي بكون فيها قريب منك .. شايفك .. شامم ريحتك وبتنفس منك بتكون غالبا هي دي اللحظة اللي بحسبها من عمري اني عشتها بجد .. وكل الباقي دي وقت ضايع مالوش لازمة . – خليكِ هنا دايما . متمشيش مهما كان الوضع صعب .. مهما كنت سيء او ضعيف .. انا دايما بكون حزين بعد كل اختيار اختاره .. لاني عارف النتيجة .. دي أول مرة محسش بحزن وانا بختارك .. انا دايما على يقين ان اي حاجة في الدنيا لازم تمشي او يمكن استبدالها .. لغاية ما شوفتك . – فاكرة يوم ما شوفتك . حسيت ان الزمن وقف .. واني مينفعش اضيع الفرصة دي لان انتِ الحاجة الوحيدة اللي مينفعش تضيع او تمشي او ابدلها باي حاجة تانيه كعادتي .. من أول يوم عارف قد ايه هنتعب سوا لاننا شبه بعض اوي وانا في الاساس متعب جدا .. بس مقدرتش افكر لثانية اني مجيش اتكلم معاكي . كنتِ طبيعية لدرجة مُلفته ، حلوة لدرجة تخلي كل العيون مركزة معاكي .. ورغم ان بالي طويل جدا مقدرتش اشوف اخرك ايه .. مجازفتش ولأول مرة اتخلى عن كل حاجة عشت بيها وجيت اكلمك .. وزي ما توقعت .. كان الموضوع مش سهل خالص .. نفس طريقتي واسلوبي وصعوبتي . كل اللي عايز اقولهولك : مش عارف ولا هعرف انساكي