❄️ محترف في رمضان ❄️ 1️⃣📜 قراءة قرآن بإحتراف📜 📌رمضان هو شهر القرآن ، وكتيير مننا لما بيسمع إن فيه ناس بتختم القرآن أكتر من مرة في رمضان بيبقى عايز يعمل زيهم وأكتر منهم كمان .. 👈ولكن للأسف حرصه على الختم بيخلّيه يقرأ بسرعة الصاروخ ، وياكل الحروف ، ويضيع التجويد ، ويعطل العقل عن إنه يفهم والقلب عن إنه يتدبر ولو آية واحدة !!! 👈لأن كل همّه وقتها بيبقى نهاية الصفحة أو نهاية السورة أو نهاية الجزء اللي عايز يخلصه !!! تسمعه وهو بيقرأ وكأن حد بيجري وراه !!! 📢 يا حبيب قلبي ده إنت لو بتقرأ خبر في جريدة هتركّز فيه وتقرأه باهتمام وتمعن أكتر من قراءتك للقرآن بالطريقة دي !!! 👈لو بتقرأ مُذكرات الدراسة مش هتقراها بالشكل ده !!! يا شباب .. لازم نعرف إن ختم القرآن مش مطلوب لذاته !! يعني مش هو الهدف !! 📢 مش مطلوب إني اقعد ساعة واتنين وتلاتة كل اللي بعمله إني بقلّب في صفحات ورا بعض ، وبعدين اقفل المصحف وأقول الحمد لله ختمت القرآن !! 👈الهدف يا حبيب قلبي هو إنك تقرأ بتركيز وخشوع وتحاول تفهم وتتدبر وتعمل باللي فهمته فيأثر فيك ويغير حياتك للأفضل طبعاً .. 🔊 كما قال الله تعالى : (كِتَابٌ أَنزَلْنَاهُ إِلَيْكَ مُبَارَكٌ لِّيَدَّبَّرُوا آيَاتِهِ وَلِيَتَذَكَّرَ أُولُو الْأَلْبَابِ) 📌 يعني إنك تقرأ آية واحدة بتدبر وتأمل وفهم وتعمل بها ، أفضل 1000 مرة من إنك تختم القرآن كله من غير ما تكون فاهم ولا واعي أي شئ من اللي بتقرأه !! 📌ولذلك كان بعض الصالحين يقول : [ آية لا أتفهمها ولا يكون قلبي فيها ، لا أعدّ لها ثوابًا !] 👈 فمتخليش تفكيرك وهمّك كله في عدد الختمات، مش مهم هتختم كام مرة ، المهم هو قلبك هيدخل فيه كام آية من القرآن ويتعلق بيها ؟؟؟ المهم هو هتقرّب من ربنا قد إيه بسبب القرآن ؟؟؟ المهم هو حياتك كام حاجة هتتغير فيها بسبب القرآن ؟؟ 📚👌 وخد شوية النصايح دي لعلها تنفعك بإذن الله : لو عرفت تخلّي القرآن هو رقم واحد في أولوياتك في رمضان قبل أي شئ تاني فافعل .. خلّيه هو شغلك الشاغل أطول وقت ممكن في الشهر ده .. خلّيه صاحبك ورفيق دربك في كل زمان ومكان .. أكتر حاجة تركّز عليها طول رمضان هي القرآن.. 👌و ياريت لو تشتري مصحف جيب صغير يكون معاك في شنطتك على طول ، لأن عن تجربة ناس كتير ، إحساسك وإنت ماسك المصحف في إيدك وبتقرأ فيه غير وإنت ماسك الموبايل وبتقرأ منه خاااااااااااااالص !! ❄️ولو اضطررت وهتقرأ من الموبايل ، فاقفل الشبكة والنت زي ما قولنا قبل كده علشان تعرف تركز في الآيات ومفيش حاجة تقطع قراءتك .. ❄️ لازم تخصص وقت ثابت يومياً تقرأ فيه في التفسير علشان تفهم اللي إنت هتقرأه واللي هتسمعه في التراويح ..وأوصيك بكتاب (زبدة التفاسير) من أروع الكتب المُيسَّرة في التفسير .. او مصحف (التفسير الميسر).. ▫️جرّب كده وإنت بتقرأ القرآن يكون جنبك ورقة وقلم ، وكل خاطرة تجيلك أو حاجة تفهمها من الآيات تسجّلها ..سجّل كل أمر وكل نَهىّ وشوف إنت هتلتزم به ولا لأ ..؟؟!! ▫️جرّب تكتب عن إحساسك ناحية الآيات .. الآية دي فرحتك وبشّرتك ، والآية دي خوفتك ، والآية دي زودت يقينك ، ودي رجعت لك الأمل .. وهكذا .. 👈 لازم تتيقين وإنت بتقرأ إن القرآن هو طريق التغيير وفيه الحل لكل مشاكل حياتك .. ▫️جرب تُسقِط الآيات على حياتك واللى بيحصلك وتشوف فيها الحل لمشاكلك أو لشئ ما مُتعسر قدامك .. ربنا قال عن القرآن إنه شفاء لما في الصدور، فابحث وإنت بتقرأ عن أمراض قلبك وهتلاقي دواها وشفاءها في آيات القرآن .. ربنا قال عن القرآن إنه نور وهدى ، فحاول تخلي آياته تنور لك قلبك وتهديك وترشدك للطريق الصح في حياتك .. ▫️جرّب كده تعمل الحاجات دي وبإذن الله هتستمتع بكل آية وكل لحظة مع القرآن .. 👌جرّب واصبر على الفهم والتدبر .. الموضوع مش هييجي من أول مرة بسهولة .. اصبر وبإذن الله هتلاقى أثر القرآن في قلبك في القرب من ربنا والحياة بمعانى إيمانية رهيييبة إنت مكنتش حاسس بيها قبل كده .. 👈اعمل كده في كل مرة تقرأ فيها القرآن وشوف النتيجة هتبقى رااااااااائعة إزاى ! هتدوق حـــــــــلاوة القرآن بجد .. هتعرف ساعتها إن القرآن ميتشبعش منه .. 📌 كما قال أمير المؤمنين عثمان رضي الله عنه : [ والله لو طهُرت قلوبُكم ، لَمَا شبِعَت من كلام ربكم ] 📢 ادعي ربنا وألِحّ في الدعاء إنه بنور قلبك بنور القرآن ، زي ما سيدنا النبي صلى الله عليه وسلم كان بيدعي ويقول : ( أَسْأَلُكَ أنْ تَجْعَلَ الْقُرْآنَ رَبِيعَ قلبي وَنُورَ صدري وَجَلاَءَ حزني وَذَهَابَ همي ) 👈 خصص وقت مناسب للقراءة ، وليكن مثلاً بعد كل صلاة .. المهم تحاول إنه يكون وقت ذهنك فيه صافي ومهيئ نفسياً زي ما قولنا قبل كده .. 👈وقبل ما تبدأ جدد وضؤك لو تقدر ، واستخدم السواك وحاول تستقبل القبلة ، وابدأ بالاستعاذة ثم البسملة، واستحضر في نيتك فضل وثواب قراءة القرآن .. 👈واستحضر في قلبك إن ده كلام الله .. يعني ربنا الملك الجليل بيكلمك وبيخاطبك إنت .. يا ترى هتسمتع لكلامه بقلبك ولا هتغفل عنه وتلتفت لغيره ؟؟؟!! 👈 حرّك لسانك أثناء القراءة، لأن قراءة العين لا تُجزئ ، وخلّي صوتك وسط ، لا عالي أوي فتتعب وتشوّش على اللي حواليك ، ولا منخفض أوي فتملّ وتنام ، وكذلك سرعتك وسط لا سريعة أوي ولا بطيئةً أوي .. 🌟 للقرآن هيبة ووقار، ومن تعظيم القرآن في قلبك إنك إذا بدأت قراءة فمتحاولش تلتفت لأي حد، ولا تقطع قراءتك بالكلام مع فلان وفلان .. 👈ولو حد عايز يكلّمك شارور له بإيدك واعتذر له، وده من تعظيمك لكتاب الله .. ومن عدم احترامك لكلام ربك إنك تقرأ آيتين وبعدين تبص على الفيس والتويتر والتليجرام و... و... و ... بعدين ترجع تقرأ آيتين ، وبعدها تتصفح وهكذا ..عظّم كلام ربك اللي بتقرأه علشان تجد له تأثير في قلبك .. 📌 أثناء القراءة هتعدي عليك آيات رحمة ..آيات نعيم وفضل .. اقف عندها .. اقف عندها وارفع يديك واسأل ربك من فضله .. 👌وهتعدي عليك آيات وعيد وعذاب ..اقف عندها واسألك ربك النجاة والسلامة ..تدبر في آيات الصفات التي تصف الله تعالى وعظمته وقدرته ورحمته وكرمه .. وكرّر الآيات اللي تلاقيها لامست قلبك مرة واتنين وعشرة .. 👈 كرّر الآيات اللي بتأثر فيك لحد ما قلبك يلين ، ويا سلام لو عصرت عينك علشان تبكي وتخشع لكلام الله اللي خشعت منه الجبال ! 🔈الحلقة القادمة (صيام باحتراف) بمشيئة الله تعالى 💚 __________ #محترف_رمضان #حياتي_دعوة