❄️ محترف في رمضان ❄️ 2️⃣📜 صيام باحتراف📜 الصيام عبادة ملائكية .. بتخلّيك شبه الملائكة .. يعنى بتتجرد وتترك كل متع الدنيا الأساسية .. مفيش أكل ولا شرب ولا شهوة .. الصيام حرية بيتحرر فيها الإنسان من قبضة الطين اللي بتجذبه لشهوات الأرض ، يعني الصيام بيخلّيك حرّ ، مش أسير ولا عبد لأي شهوة مهما كانت ، بيخلّيك عبد خالص لله . الصيام يعني إمتناع عن كل حاجة تغضب ربنا سواء فعل أو قول أو حتى نيّة لا ترضي الله .. الصيام يعني اخلاص ومراقبة وحب وتعظيم وامتثال وحمد وشكر وقمة العبودية لله .. الصيام يعني تصوم بقلبك قبل جوارحك .. فالقلب الصائم : قلب مُتحرر من حُب الدنيا والتعلق بشهواتها, مُعرض عن الهمم الدنيئة والأفكار التافهه طلباً للنعيم الأعلى والراحة الدايمة في الآخرة .. والقلب الصائم : قلب مشغول بيفكر في الآخرة , وإزاي هيقابل ربنا .. والقلب الصائم : قلب سالم من الأحقاد والضغائن ، مفيش فيه لأي حد من المسلمين غل ولا شر ولا حسد ، بل يعفو ويصفح ويغفر ويتسامح , لأنه لا مش فارق معاه منصب أو جاه أو مال أو حاجة هتزول أو متاع هيفنى وينتهي .. والقلب الصائم : قلب ساكن متواضع مفيش فيه شئ من الكبر والغرور والتعالي في الأرض .. والقلب الصائم : قلب مُخلص مش عايز غير وجه الله , مش بيطلب إلا رضا الله , مش ببيتلذذ بغير محبة الله وذكره وشكره وحسن عبادته . ✍️ وخد شوية النصايح دي لعلها تنفعك بإذن الله : 👈 اتسحر سحور خفيف علشان بطنك متتعبكش أثناء الصيام ، وفي نفس الوقت حاول يكون مُغذي وبيدّيك طاقة علشان تقدر تبذل مجهود في شغلك وعبادتك وإنت صايم .. 👈زي إيه ؟؟ زي الألياف اللي موجوده في أغلب الخضروات والفاكهة وأشهرهم التمر.. وبلاش الحوادق الشديدة زي الجبنة الحادقة والمخللات أو الحاجات اللي فيها سكريات شديدة زي الكنافة والبسبوسة والقطايف علشان جسمك بيحرقها بسرعة وهتعطشك جامد أوووووي !! 👈 بلاش كلام كتير مع أي حد ، علشان اللي بيتكلم كتير لازم هيغلط كتير ، وخلّي لسانك مشغول بالذكر أفضل !! 📚 قال الإمام أحمد رحمه الله : [ ينبغي للصائم أن يتعاهد صومَه من لسانه، ولا يُماري في كلامه، كانوا إذا صاموا قعدوا في المساجد وقالوا: نحفظُ صومنا ولا نغتابُ أحداً. ] 🤕 أي حد ينرفزك أو يحاول يستفزك أو يغضبك إوعى تتكلم وترد عليه واسكت خالص خالص .. زي ما النبي صلى الله عليه وسلم قال: ( إذا غضب أحدكم فليسكت ) ..👌ولو هتردّ تقول "إنى صائم" .. 👈 بلاش خروج كتير إلا للضرورة علشان تحافظ على صيامك من الفتن اللي في كل مكان حواليك ، وكمان علشان متخرجش في الحر فتتعب وتعطش ، وعلشان توفر طاقتك ومجهودك بقدر الامكان للطاعة والعبادة .. 👈 كل ما تحس بجوع أو عطش أو تعب و ارهاق ، افتكر قول الله تعالى في الحديث القدسي : ( يدع شهوته من أجلي ) .. 👈 و بُص للسما وابتسم وقول في سرّك "هستحمل علشانك ياربي ، بس إنت ترضى وتتقبل يا حبيبي يا الله" ..وساعتها هتلاقي كل التعب راح واختفى بفضل الله .. 👈 وكل ما تقابلك فتنة .. أغاني ، أفلام ، مواقع ، بنات ، غيبة ، نميمة ، مال حرام ..إلخ .. قاوم نفسك وشهوتك وافتكر كلمة "من أجلي " .. وقول لنفسك هصبر وهستحمل وكل حاجة هتهون علشانك يا رب .. 👌قبل المغرب تكون في المسجد ، ومعاك تمر تفطر عليه وتفطّر عليه الناس ، وتصلي المغرب الأول طبعاً وبعدين تروح تكمل أكل في البيت .. الحلقة القادمة (صلاة باحتراف) بمشيئة الله تعالى ______________ #محترف_رمضان #حياتي_دعوة