❄️ محترف في رمضان ❄️ 3️⃣📜 صلاة باحتراف📜👌 الصلاة هي حياتك ، هي راحتك ، هي سعادتك ، هي قرّة عينك ، هي صلتك بربّك ، وعلشان كده لازم تكون محافظ عليها وعلى أكمل وجه علشان تقربك من ربك حبيبك .. وفي رمضان عندك صلوات تقدر تكون بيها من السابقين إلى الله .. عندك صلوات الفرائض ، والنوافل الراتبة ، والنوافل غير الراتبة ، والنوافل المطلقة ، وصلاة التراويح ، وصلاة القيام ، وصلاة الضحى .. وغيرها كتير .. 📜وخد النصايح دي علشان تصلّي صح وتستمتع بالصلاة وتتقرب بها إلى الله : 🌻 لازم تحب الصلاة ، وتعرف قيمتها وفضلها وثوابها ، وتعظم قدرها في قلبك ، لو حبيت الصلاة مش هتبطل صلاة !! 👈وياريت لو تقرأ كتابي ( جــــــرّب تقــرّب ) هيفيدك جدا في الموضوع ده بإذن الله .. 🌻 الخشوع في الصلاة هو روح الصلاة ، ولكنه موضوع كبير يطول شرحه هنا ، فأنصحك بكتابي ( جنّة الدنيا ) هتلاقي فيها شرح لكيفية الخشوع و 16 وسيلة عملية للوصول للذة الخشوع في الصلاة .. 👈 أهم نقطة بقى على الاطلاق في موضوع الصلاة هي إنك تستعد للصلاة من قبل الأذان .. 🌻 يعني حاول تظبط 5 منبهات في الموبايل على قبل معاد كل صلاة بربع ساعة أو 10 دقايق ، أو ممكن تستخدم أي برنامج على الموبايل زي "إلى صلاتي" أو غيره كتير من البرامج اللي بتذكرك قبل معاد الصلاة بفترة .. وأول ما تسمع المنبه تتوضا أو تجدد وضوءك وتلبس أحسن هدومك وتحط عطر. وبالنسبة للنساء هتتوضي وتلبسي أحسن لبس فضفاض وتكوني مستعدة على سجادة الصلاة في مكان هادي مناسب في البيت بعيد عن الملهيات زي التلفزيون والأطفال والحاجات اللي تشتت انتباهك .. وبعدها تستحضر النيّة وتنزل للمسجد اللي بتستريح فيه ، وتدخل تصلّي ركعتين خفيفتين ، وتقعد في الصف الأول على يمين الإمام ، وتذكر ربنا لحد الأذان ، وبعدين تردّد الأذان ، وتقول دعاء ما بعده ، وبعدين تصلّي ركعتين ، ولما تخلّص تفضل تدعي ما بين الأذان والاقامة ، وبعدها تصلي الفرض ، وتقول أذكار ما بعد الصلاة .. ويبقى إنت كده فزت بغنيمة كبرى متتفوتش في كل صلاة .. 👈 كل الفضل ده، ومعاه كمان حديث النبي صلى الله عليه وسلم : (إنْ العبد إذا جلَس ينتظرُ الصلاةَ ، صلّتْ عليه الملائكةُ ، وصلاتُهم عليه : اللهمَّ اغفرْ له اللهم ارحمْه ) رواه البخاري 🌷جرّب كده هتلاقي موضوع الاستعداد للصلاة ده هيفرق معاك بشكل لا تتخيله .. وهيساعدك على الخشوع جداً .. وأيضاَ من الحاجات اللي هتخلّيك تصلّي بشكل مختلف وتخشع في صلاتك وتحس بها ، التنويع في الأذكار وسور القرآن اللي بتقرأها .. 👈 لأن بدون التنويع إنت أصبحت عبارة عن آلة مُبرمجة إنها تقول كلام معين وتعمل حركات معينة ثابتة !! فأصبحت حتى لو إنت سرحان ودماغك في حتة تانية بتلاقيك بتقول الفاتحة وبعدها "قل هو الله أحد" وتركع وتسجد عادي جداً مع إن دماغك في حتة تانية خالص !! 👈ولو حد سألك بعد الصلاة إنت قرأت بسورة إيه ممكن تكون مش عارف !!!! وده لأنك اتعودت خلاص على كده وبقيت تعمل حركات الصلاة لا إرادياً !! 📢 التنويع في الأذكار هيخلّيك مركّز وإنت بتقول كل ذكر ، وهتحاول تفهم اللي بتقوله وتتدبر معناه وتخشع .. نوّع من أول أذكار الاستفتاح وصيغ الاستعاذة وأذكار الركوع والرفع من الركوع لحد أذكار ما قبل السلام .. وكل الأذكار دي هتلاقيها موجودة في حصن المسلم أو مختصر النصيحة أو ابحث عنها على النت وهتلاقيها بسهولة جداً، وكل يوم حاول تحفظ ذكر جديد منها وتقوله في صلاتك لحد ما تحفظها كلها.. وكذلك سور القرآن لازم تنوّع فيها .. مينفعش كل الصلاوات اللي بتصليها بسورة الاخلاص وسورة الكوثر !! نوّع في السور القصيرة حتى لو مش حافظ غيرها.. وإبدأ احفظ ولو كل يوم 5 آيات واعرف معناهم وكرّرهم في كل صلاواتك.. 👈 فوصيّتي لك بالتنويع ثم التنويع في أذكار الصلاة والقرآن.. الحلقة القادمة (تراويح وقيام باحتراف) بمشيئة الله تعالى 🌟🌟🌟🌟🌟 #محترف_رمضان #حياتي_دعوة