❄️ محترف في رمضان ❄️ 4️⃣📜 تراويح وقيام ليل باحتراف📜 🌺 صلاة التراويح في رمضان من أروع الحاجات اللي بتسعد القلوب وتصلحها .. وهما 30 يوم في السنة كلها اللي بنتصليها فيهم .. 👌فاجتهد إنك تحافظ عليها علشان تكون من المغفور لهم ، اللي النبي ﷺ قال فيهم : (من قام رمضان إيمانًا واحتسابًا غُفِر له ما تَقَدَم من ذنبه) متفق عليه 👈📜 وخد شوية النصايح دي لعلها تنفعك بإذن الله : 📌 خلى أكلك خفيف على الفطار .. علشان متتعبش ، وشوية وتلاقي الحموضة اشتغلت والقولون اشتغل ، وتضيع الليلة منك !! 📌وكمان علشان تعرف تركز في الصلاة ، لأنك لو تقّلت فى الأكل هتهبط ويجيلك خمول وغالباً هتنام أو أكيد هتنام حتى وإنت بتصلي !!! 📌وحاول متخليش أكلك كله على مرة واحدة، يعني في الفترة ما بعد المغرب لحد السحور ممكن تاكل أكتر من وجبة .. ده هيريحك جامد بإذن الله .. 📌وبلاش تشرب ميه كتير بعد الأكل مباشرة .. مش هتعرف تهضم وهتلاقي نفسك تقييييل جداً ومش قادر حتى تاخد نَفَسَك !! اشرب ميه قبل الفطار براحتك وكذلك طول الليل ، اشرب مياه كتير علشان تعوّض كمية السوائل اللي بتفقدها بالنهار .. 📌 لازم تكون واخد قسط كويس من النوم ، علشان متنمش وإنت بتصلي زي ما بنشوفه بيحصل لناس كتير ! 👈 اختار مسجد هادي تصلي فيه ، حتى لو بعيد ، حتى لو في بلد تاني .. المسجد من أهم عوامل الخشوع في الصلاة .. لأنك لو هتصلّي في مسجد فيه أطفال بتلعب طول الصلاة ، أو ناس كبار بتتكلم وتتخانق على الكبيرة والصغيرة ، أو شباب بيعمل دوشة ؛ صدقني مش هتعرف تخشع أبداً ! 👈ويا سلام بقى لو الإمام كمان صوته هادي وخاشع وبيقرأ بمقدار آيات مناسب .. يبقى كده تمام أوي .. 👈 لاااااااااااازم تكون عارف الجزء اللي هيتقرأ في التراويح ، وتكون محضرّه كويس ومجهز تفسيره ، وتركز مع الشيخ وهو بيقرأ ، ومتبقاش قاعد مستني امتى هتخلص السورة وامتى الإمام هيركع ؟ 👈📌حاول تركّز مع كل آية ، ركّز مع القرآن واسمعه بقلبك وتدبّر الكلام اللي بتسمعه ، علشان تعرف تستمتع بالتراويح ومتحسش بالتعب . علشان تطلع من الصلاة بقلب عاش مع آيات الله وارتوى من معانيها وارتقى في درجات الإيمان .. 👈ويا ريت لو تقدر تستغل الوقت اللي معظم الناس بتضيّعه بعد الفطار ، ما بين المغرب والعشاء في إنك تقرأ الجزء ده وتراجعه .. 🌿 تفاعل مع الآيات زي ما حبيبك النبي صلى الله عليه وسلم كان بيتفاعل .. الرسول صلى الله عليه وسلم كان عندما يقرأ آيه عن العذاب، يقول أعوذ بك من عذابك .. آية عن النعيم يقول اللهم ارزقني من فضلك .. آيه عن الصادقين، يقول اللهم اجعلني من الصادقين .. 📌 بالنسبة لصلاة القيام أو التهجّد : فدي صلاة خاصة بينك وبين الله سبحانه وتعالى ، محدش بيشوفك فيها .. 👈 صلاة بتصلّيها في وقت خاص ، وقت تنزل الملك للسماء الدنيا وهو يقول : (هل من سائل فأعطيه ؟ هل من مستغفر فأغفر له ؟ هل من تائب فأتوب عليه ؟ ) 👈ركعتين القيام دول شرفك .. كما قال الرسول صلى الله عليه وسلم : (شرف المؤمن قيامه بالليل ) .. 👈 ركعتين تطفي النور وتقف فيهم وإنت خاشع بين يدى الله سبحانه وتعالى .. وتحاول ترتل القرآن بتجويده وإحسان قراءته وتحسين الصوت به .. 👈 ركعتين تعيش بقلبك فيهم مع القرآن ولو هتقرأ بآية واحدة وتكررها ، ولو هتقرأ بسورة صغيرة زي سورة ق أو يس أو الملك أو الحاقة أو النازعات أو الفجر أو الزلزلة، أهم شئ تحاول تزلزل قلبك وتخلي عنيك تدمع من خشية الله فيهم.. 👈 ركعتين تطوّل في سجودك فيهم وتناجي ربك حبيبك وتفضفضله وتدعو الله بما شئت وبما تريد وبما تتمنى .. تسجد وتقترب وتعيش بقلبك مع معاني المناجاة .. 📌 يآآآآآآآآآآآآآآآآآه .. الركعتين دول دنيا غير الدنيا.. لما تجرّب الكلام ده وتعيشه بقلبك ، هتتمنى إن الفجر ميطلعش علشان تفضل في الجنة اللي إنت عايشها دي ! 👈 ومش شرط يكونوا ركعتين بس،ممكن تزود؛ قال :(صلاة الليل مثنى مثنى) ولو مش هتقدر تصليهم آخر الليل ؛ يبقى تصلّيهم قبل ما تنام على طول ، وتجعل آخر عهدك بالدنيا قبل النوم الصلاة . الحلقة القادمة (مذاكرة باحتراف) بمشيئة الله تعالى 🌟🌟🌟🌟🌟 #محترف_رمضان #حياتي_دعوة