Tuni Social Media lam ah Pu Thenkholal Baite, Under Secretary, Government of India thu a hung kisua vengvung leh Inn lam boruak ah ama mimal ngaidan ka hiat kham kham hung gen ka. Ama hi ICP Manager, Moreh a hung a ki posting sung akhan a office ngei in le thumvei ka va khawlai leng kha. Ka ki holim na'u apat ka hung hiatdaw chu, ama hi nam ngaina leh gunchu takah a nasep sem mi ahi ti ka hun he dawk ah, Zillai leh a officer chanpi te a ding ah le ettawn tak mama mi ahi. A chanau leh a suapite tamtak Moreh in um ma leu, chen den na ding leh inn mun lo mun det nei na ding in Kuki factor ziak in a la dawi kha him him puai. A gen te lak ah ka hiatmil theilo khat chu, *"Kuki pau insungin ki thaw ziang leh le Kuki area in vang chenglo him him ding ka hi"* ti'n ala holim sek ahi. Chun, Vaiphei te damna pen leh zalen tak ah Vaiphei culture leh rights i preserve thei na'u um sun chu Lamka (Zogam) ahi ti in ala gen sek ahi. A gen gual ma chun, aman le kum 10 val vingveng govt. na a hung sep nung in in mun haw a hung chaw, a sungkuan un chawmkhat Vaiphei Zomi area in a hung cheng  man u'i. I Zo Khawpi uh Lamka (Zogam) in um den nuam ma leh a sepna apat deputation a chai nung in Delhi lam in *Under Secretary, Ministry of Power, Government of India* ah join ding in Delhi lam a la zuan kit tai. Pu T. Baite, Central Secretariat Service (CSS) hi Delhi ah Zillai te leh Vaiphei te a ding ah mi kisuanpi um mama ahi. Zillai te ama gual ah officer lian i hung hithei chiat na ding un, pan ha lak thak hi tin un, ti takna tawh kalsuan zel hi ti'u.