قصص || 🧸🎀
February 27, 2025 at 05:57 PM
*_`〖ﯡحــــډي بـــيــטּ اݪـــجــنــﯡډ〗`💗👨🏻✈️ֶָ֢֪𓏲𓄼_*
*_{ الجزء الثاني}_*
*_تم مشارڪة الࢪواية مــטּ قـنــاة `قصص`🕰️💗𖥨. ⊹_*
```https://whatsapp.com/channel/0029VamfKJHK0IBbdBbxOc3d```
﹋﹋﹋﹋﹋﹋﹋﹋﹋﹋﹋﹋﹋﹋﹋﹋﹋
رئيس القسم : اي ....شو عليه الله يهديك بس من هلأ من دون ماتقلا شي يزعلا هالمرة مارح اسمحلك .
امان: .....حاضر سيدي ..وكيف رح تروحي يعني مو معقول نترك المعسكر هيك بلا حراسة .
رئيس القسم: بنروح خمسة خمسة .
امان : لأ سيدي ازا بتسمحلي بتروحو تلاتة تلاتة يعني على تلات دفعات .
رئيس القسم : قصدك تلاتة وبعدين تلاتة واخر شي اربعة .
امان : مافهمت عليي سيدي بتروحو عتلات دفعات (وصار يعد بأسماء اللي بدهن يروحو ).
رئيس القسم: ...اي بس انت مع مين رح تروح .
امان : ههه لحاالي .
رئيس القسم: نعم ...كيف يعني لحالك ...امان قلتلك مارح اسمح انك تزعل البنت اكتر من هيك ..نحنا رايحين نعايد عليها مو نقهرا ونزعجا حاج بقى .
امان : واناكمان رح عايد عليهن متلكن ورح حطلها عيدية كمان .
رئيس القسم: لكان خلص انا بروح معك .
امان: من بعد ازنك سيدي في حساب بدي حاسبو للدكتورة وحابب احكي معها لحالي .
رئيس القسم: ...حساب معناها في مشكلة جديدة ورح تسمعها كلام جديد ماهيك .
امان بثقة: فيك تتأكد منها وقت تشوفها .
رئيس القسم: .....شو بدي قلك المصيبة اني بعرف عقلك ...الله يجيب اللي في الخير .
راحو اول دفعة ومن بينهن كان رئيس القسم.
فرحت دنيا كتييير بشوفتهن وانو ماهان عليهن يمرق العيد عليها وهي لحالها ..وبعدها راحت الدفعة التانية واخر شي الدفعة التالتة .
كل هالشي وامان ناطر عنار ليسير وقت دورو بالروحة وكان محضر كلام وكلام لوقت شاف اخر دفعة راجعة .
وقف امان وزبط تيابو واجى ليروح قام وقفو رئيس القسم : ....امان ...لحظة شوي ...اصدقني الكلام ....متأكد ماحتزعجها لدنيا .
امان : ...سيدي قلتلك فيك تسألها انا بس بدي استفسر منها عن شغلات مو اكتر وعايد عليها .
*~💚قصص بإدارة تيم💚~*
رئيس القسم: ....الله معك .
راح امان وعقلو وفكرو سابقينو ليلتقي فيها ويحكي كل اللي جال بخاطرو من يوم اللي شافها .
وقت اندق الباب الخلفي استغربت دنيا وماكانت بتعرف انو امان رح يجي لعندها لأن ماحدا خبرها وقالو انو بجوز يغير رأيو رغم انو عنيد وقت يصر عشي.
قالت بحالها بجوز نسيو شي او بدهن شي.
فتحت الباب وضلت واقفة وفاتحة تمها خافت تكون عم يتهيألها انو اللي قدامها هو نفس الوحش اللي كان قبل بيوم وماكانت حابة تخوض بأي مواجهة معو هالمرة واكتفت انو اتضل ساكتة .....
قطع صمتها امان : ......صباح الخير .
دنيا : ....صباح النور ....خير الشباب نسيو شي او عاوزين شي .
قرب منها شوي وصار جوا البيت : .....لأ مانسيو شي بس قلت مو حلوة لازم اجي وعايد عليكي.
دنيا: ....وليه مااجيت معهن وقت اجو والا فكرت فيها متأخر.
امان بثقة: ...ههه لا طبعا حبيت اجي لحالي ....ماحتقوليلي تفضل...مابدك تشربيني قهوة مرة .
فتحت ايدها لجوا البيت : تفضل اهلا وسهلا .
دخل عالغرفة اللي جنب الباب ووقت دخلت هي اجت لتقعد وقفها وقت رفعلها ايدو.
دنيا: ....خير في شي .
امان: ...في كتير ...انا جاي لهون لأعطيكي حسابك .
دنيا: ايوااااا انا قلت هيك برضو معقول الضاااابط امان يسكت لهلأ ويبيت شي ناوي عليه .
امان: شكلك سمعانة عني كتير .
دنيا: هو هوهو كتييير بس الفعل سبق الكلام .
امان: اهاا ....واللي سمعتي مخليكي متطمنة هالقد .
دنيا: انا ما عملت شي لخاف منو .
قرب منها ووقف مواجهها مباشرة مابيفصل بيناتهن الا سنتيمترات وبهاللحظة رفعت عينها فيه وحست بلهيب عيونو عم يحرقها بالكامل ونقز البها من نظرات الغضب اللي اجتاحت عيونو وملامحو ...
امان: ....سؤال وبدي جوابو بدون لف ودوران .
دنيا والخوف بلش يمشي ممشاة بألبها الصغير لكن ماحبت تبينلو انها ضعيفة .
دنيا:..... تفضل .
امان وهو ثابت بدون ولا حركة وايدي بجيابو: ....من وين جبتي الجرأة لتبقي عنا بالمعسكر وتلبسي لباسنا واتضلي يومين بين الرجال.
دنيا: ...بجوز نسيت اني دارسة طب وواجبي كطبيبة بحتم عليي ابقى مع المريض اللي اشرفت على علاجو وهالشي انا بعتبرو واجب ومالو علاقة بالشجاعة .
امان وزادت حدة صوتو: ومين طلب منك تبقي عندي شفتيني ضعيف مثلا وماعم اتحمل ...والا سمعتني عم اتوجع وشفقتي علي .
دنيا: الموضوع مو موضوع شفقة ولا شفتك ضعيف بالعكس شفتك رجال ومستحمل كل اللي صار معك رغم انو الامك كانت فظيعة ..بس الموضوع انساني وانو انا اللي اسعفتك وكنت بدي اتطمن عليك وعوضعك لأن ماكان في طبيب فوق راسي وعم يشرف عاللي عم اعملو لهيك خفت عليك .
امان وزاد صراخو: وليش لتخافي عليي مو طلبتي من رفقاتي ينقلوني للمعسكر لتتأكدي انو ماعندي نزيف وعملتولي الصور وتأكدتي ليش لتبقي عنااااا جاوبي ...لو اجى حدا من المسؤولين او حدا بدو يتطمن عالوضع اللي صار قبل بيوم وشافك عنا وبين كل هالرجال شو رح يقول وفينا المتجوز الغايب عن مرتو ومنا العزابي اللي متلهف ليتزوج ويصير عندو زوجة شو موقفك وقتها ..انتي كيف زبطت معك وسمحتي لحالك تبقي يومين بين الرجال .
دنيا وبلش صوتها يتغير والرجفة كانت واضحة فيه: انا ماكان همي الا سلامتك وكان بدي بس اتطمن عليك مو اكتر ..واللي خلاني صر اكتر عوجودي قريب منك اني شفتك وانت عم تتصاوب عباب بيتي ونقلتك عالغرفة هي وماكنت قدرانة احملك هالخطوتين لحتى احملك واخدك للمعسكر لهيك ناديت لأمي لتساعدني بنقلك .
امان: ليش امك بتعرف عنا الظاهر انو ستك ماعرفت بمين وثقت .
دنيا: امي جديد عرفت يوم الحادث تبعك اضطريت خبرها لأن شافتك معي وانت متصاوب وعانتني لقدرت اسعفك ...هلأ ليه منزعج اني خبرتا امي و بوثق فيها ...وين المشكلة .
*~💚قصص بإدارة تيم💚~*
امان : امك مو مشكلتي ...مشكلتي معك انتي .
دنيا: ليه مصر تعمل منها مشكلة انا مو شايفة حالي عملت شي غلط .
امان بعصبية: كل اللي عملتي غلط بغلط ليكي انا بس كرامةً لستك رح مرق هالغلطة بس شي تاني يادنيا حسابك معي رح يكون عسير لحد هون حسابك بكفي لليوم ، والباقيات حسابن بعدين .
دنيا: .....ليش في حساب تاني .
امان : هو هو هو المشكلة انو غلطاتك كتيرة ولازم تتحاسبي عليها اول بأول .
دنيا: طيب تفضل حاسبني لشوف بشو غلطت كمان .
امان : ..مو بكيفك بكيفي ايمت مابدي وبيجي عبالي بجي وبحاسبك ....وكل ماغلطتي رح تلاقيني بالمرصاد وعأتفه الأسباب رح حاسبك.
دنيا: بصفتك مين بدك تحاسبني مين انت لتعمل لحالك قيمة ووزن وبدك تحاسبني عالشاردة والواردة .
امان بصوت جهوري مرعب: بصفتي امااان... انا المقدم امان فاخوري ومارح احكي اكتر من هيك .
كان واقف قريب منها كتير لدرجة انوحس عليها وحس بخوفها منو وشاف هالشي بعيونها....ومانكر انو عجبو هالشي .
امان عم يضحك بطرف تمو😏.
دنيا: وشو اللي بضحك هلأ .
امان: .... عليكي... لأنك خايفة .
دنيا حست انو كشفها وحاولت تتماسك وتكزبو وتعمل حالها قوية : غلطان انا مو خايفة بنوب .
مسكها من ايدها بقوة وحس عليها انو عم ترجف وصار يضحك بصوت عالي: ......هههههههههههه لكان ليه عم ترجفي .
*~💚قصص بإدارة تيم💚~*
دنيا مزبوط كانت خايفة منو ومن حدة نظراتو ومن صوتو العميق الجهوري اللي هز البيت وقت صرخ فيها ورجفت اكتر وقت مسكها من ايدها وحست بقوة ايدو .
تركها واجى ليروح رجع التفتلها وحطلها مبلغ بسيط عالطاولة وقلها: صحيح نسيت قلك كل عام وانتي بخير .
دنيا : ....ليش انت جاي تعايد عليي .
رجع قرب منها اكتر : ....انتي شو شايفة ليكني عم عايد عليكي متل البقية .
دنيا: وهيك شايف انو البقية عايدو علي .
امان: ....كيف بدي كون مميز ازا عايدت عليكي متلهن انا معايدتي غير لون ...بس ماتقولي ها ...العيد معي مميز ماهيك ...هلأ بربك في حدا عايدك متلي .
دنيا والدمعة بعينها عم تحارب لتنزل : .....مزبوط كلامك انت عيدك غير شكل الصراحة كتر خيرك .
امان بمسخرة : شفتي شو البي طيب وكيف بحب غير جو للناس كلهن عيدهن كان نفس الشي بس انا ....غييييير .
قبل ليروح وهو واقف عند الباب وكانت هي لساها واقفة مكانها مابتعرف ليه ما مشيت معو .
امان: .....من يوم ورايح حاسبي عغلطاتك منيح لأن رح تشوفيني كتير ....لنا لقاء ..تشاو ..وغمزها وراح .
قفل الباب وراه وهي وقعت بالأرض ونزلو دمعاتها بسرعة ...اول مرة بتحس برهبة قوية من حدا وولا مرة زارها هيك شعور انو بشي يوم رح تخاف من انسان متل ماخافت هالمرة من امان ....كانت نظراتو مرعبة وصوتو كمان ترك اثر كبير عمسامعها ملامحو القاسية ماغابت من بالها .
وقت رجع امان للمعسكر سألو رئيس القسم انو شو صار معو وخبرو انو عمل متلهن وعايد عليها وفيو يتأكد منها .
ضلت كل الليل تعبانة ماعرفت شو اللي صابها بس كانت متأكدة انو بسبب زيارة امان الها.
تاني يوم وقت فاقت دنيا ماقدرت تقوم بنوب حاولت توقف بس خانتها رجليها وارتمت مرة تانية بالفرشة فكرت انو لأن مالها شي فايقة رجعت حاولت من جديد بس ابدا مافي فايدة ...خافت كتير وفكرت انو ماعاد تمشي بالمرة .
حاكت خالها وخبرتو انو مافيها تقوم جابلها الدكتور وهو جاي لعندها وخبرو الدكتور انو هي خوفة واكلة رعبة قوية خلت الأعصاب عندها مرخية وبدها شوية وقت لتقوم من جديد وانو هالشي مو خطير وبزول وقت تتحسن وتروح الرعبة منها .
بقي خالها عندها بهديك الليلة ليتطمن عليها وليقدر يساعدها وسألها ازا متل مابقول الدكتور خايفة ومن شو .
دنيا كانت عم تحكي وقصدها شي تاني : ....ااااه اي شفت قط كبير مبارح بالليل طلع بوشي فجأة وماعم يروح من بالي بنوب كل الوقت عيونو ملاحقتني بنظراتو المرعبة وصوتو المخيف.
خالها: اسم الله عليكي حبيبتي شكلك لهلأ خايفة منو ...سمعتي الدكتور شو قال مارح تقدري تمشي لتروح الخوفة منك بدك تنسي الموضوع نهائي لترجعي متل ماكنتي .
دنيا: ....اي خالو اي لازم انسى الموضوع او اتناساه (وقالت بصوت واطي) هاد ازا قدرت .
رجعت رجاء تالت يوم العيد من الحج وشافت دنيا بهالحالة وجنت عليها وصارت تبكي وطمنها اخوها انو شغلتها بسيطة بس كم يوم ليزول الخوف منها .
بقيت دنيا ملازمة الفراش يومين زيادة وماكانت تقدر تقوم كل ماتزكرت نظرات امان وصوتو بترجع بتنتكس .
بهالوقت انتبهو عليها الجنود انو غابت اكتر من اربع ايام وحبو يستفقدوها وماكانو بيعرفو انو امها رجعت من الحج .
*~💚قصص بإدارة تيم💚~*
قرر رئيس القسم يروح لعندها وتفاجأ بأنو امان بدو يروح معو ليسألو عليها.
راحو ودقو الباب الخلفي ....
فتحت رجاء الباب وكانت مفاجأة بالنبسة الهن انو مين هي الحلوة اللي متل القمر تلبكوا بالأول وهي لسا واقفة عم تستنا يحكو شي ...
رجاء: .....عفوا بشو بخدمكن .
رئيس القسم تنحنح: ....اححم ....مساالخير .
رجاء: مساالنور.
رئيس القسم : عفوا ....دنيا وين .
رجاء: عفواااا ....مين حضرتك وليه عم تسأل عن دنيا .
رئيس القسم: .....نحنا بنعرف الانسة دنيا وهي بتعرفنا بدنا نتطمن عليها ازا ممكن .
رجاء: ....اي اهلا وسهلا .
امان : عفوا حضرتك مين .
استشبهت رجاء فيه وحست انو شايفتو من قبل ونسيت انو الشب الي اسعفتو هي دنيا وقت تصاوب عباب بيتهن .
رجاء: انا امها لدنيا .
رئيس القسم: باسم الله ماشاء الله .
رجاء: ...عفوا قلت شي .
رئيس القسم : ااااه ...لاااا ابدا بس كنت بدي اسأل عن دنيا موجودة .
رجاء بنظرة حزن: اي موجودة بس تعبانة كتير .
رئيس القسم بلهفة: ....تعبانة خير شو صرلا.
رجاء: صايبتا خووفة من كم يوم وما عم تعرف تمشي بنوب .
رئيس القسم: ....خووفة ...خوفة شو ومن شو .
بهاللحظة امان ضحك ضحكة جنابية انبسط كتير وعرف انو كل هاد من تأثير نظراتو الها وانو قدر يسيطر عليها وقت شاف تمردها وانو اتصنعت الشجاعة والقوة قدامو .
رجاء: مابعرف كيف بدي اشرح الموضوع بس....عموما تفضلو بنحكي جوا .
دخلو لعند دنيا وكان امان واقف ورا رئيس القسم يعني دنيا ماانتبهتلو .
حاولت تقعد بتختها وقت دخلوا: ....اهلا وسهلا عمو تفضل .
رئيس القسم : حمدالله عسلامتك بنتي خير شو صرلك .
وقتها قدر امان يأرجيها حالو وانصدمت وارتعبت وقت شافتو لكن بقيت محافظة عهدوئها .
امان بخبث: حمدالله عالسلامة .
رئيس القسم : طمنيني دنيا شو صرلك من شو اكلة خوفة شو شفتي .
دنيا: ...ااااه لااا مافي خوفة ولا شي مين قال .
رئيس القسم : امك عم تقول انك اكلة رعبة وصايبتك خوفة من شو .
اتطلعت دنيا بأمها نظرة انو ليش قلتي ولو تعرفي انتي شو عملتي فيي ولمين قلتي للشخص الغلط .
دنيا: ...لا ابدا مافي هيك شي بجوز امي اللي خايفة علي مو انا .
قرب منها امان ومال بحالو لعندها ليوصللها واتطلع فيها وهو رافع حاجب وابتسامة صفرة عوشو🤨: لكان اللي فيكي هاد من شو اااه .
دنيا اهتزت وقت قرب منها ورجع عطاها نفس النظرات القديمة: .......
وكمل كلامو وهو عم يهمس : اعترفي ..اعترفي انو خوفك هاد انا سببو وانو ماقدرتي تحكي لحدا شي صح؟
اتطلعت فيه وكانت عشوي رح تبكي منو .
دنيا بصوت عم يرجف: .....لاااا ابدا عم يتهيألك .
ابتسم بخبث ورفع حواجبو انو مو مسدق : ...اي بجووز .
قعد امان مكانو وامها ورئيس القسم مستغربين انو شو عم يصير.
رئيس القسم: ....اي دنيا خبريني شو قصة الخوفة .
دنيا عم تتطلع بأمان بطرف عينها : ....القصة انوووو ..احم ....بالليل طلع بوشي قط كبير وخفت منو .
امان : ....قط ؟ .....ايوااا وكيف شكلو .
دنيا: .....قط كيف بدو يكون شكلو متلو متل بقية القطط .
امان : مابظن انو بيشبه القطط عهوا ماني شايفك والخوف اللي بعيونك هاد فهد مو قط صح كلامي .
دنيا: ......بجوز انت ادرى مني .
ضحك امان وكتير عجبتو نظراتها وقت تأكد انو كل هالخوف بسببو.
رئيس القسم : طيب وليه مو قدرانة توقفي يعني .
دنيا ماعرفت شو بدها تجاوب: ......وقت خفت منو رجليي ماحملوني كان شكلو مفزع (وتقصدت تشد عالكلمة ليعرف امان انها قاصدتو) .
حس امان بفرحة غامرة انو خوفها وصل للفزع يعني فيو يسيطر عليها كيف مابدو .
امان: ....لكان ابقي ديري بالك عتصرفاتك بلا مايطلعلك هالقط كمان مرة اي .
وهنن عم يحكو اجالو اتصال لرئيس القسم وكانو اهل بيتو .
رئيس القسم : ....اهلا حبيبتي بابا كيفك ....كيف كان مشواركن .
بنتو عم تبكي عالتلفون: ....بابا نحنا بالمشفى .
*~💚قصص بإدارة تيم💚~*
رئيس القسم: شووووو ليش شو صار هند طمنيني بابا.
بنتو😭 : بابا ماما عملت حادث ونحنا راجعين والأصابة كانت من ناحها وهلأ هي بوضع حرج كتير...تعى بابا الله يخيلك.
قام واعتزر منهن .
امان : خير سيدي صاير شي.
رئيس القسم: اي مرتي وولادي عملو حادث ومرتي بحالة خطرة ...بعتذر ياجماعة لازم روح بالأزن .
اعتزر وراح هو وامان .
بعد وقت حبت دنيا تتطمن شو صار مع مرتو لرئيس القسم بس ماعرفت كيف .
رجاء: ....دنيا ...هالشب اللي اجى من شوي شايفتو بس وين ماعم اتزكر.
دنيا: .....امي هاد الشب اللي تقوص عباب بيتنا وقت اشتبكو الجنود مع المهربين عالحدود واللي اسعفنا انا وانتي .
رجاء: اي اي هلأ تزكرتو وانا عم قول لحالي وين شايفتو ....بس باينتو مو سهل وشخصيتو كتير قوية ...لاحظتي .
دنيا عم تحكي بحالها: ......هههه انا اللي لاحظت .
تاني يوم حاولت دنيا تقاوم وتقوم بدها تروح تتطمن شو صار مع مرتو لرئيس القسم .
صارت تمشي شوي وتقعد شوي وتتطلع كل شوي من باب البيت الخلفي عأمل تلمح حدا منهن ليطمنها .
طلبت من امها تروح ناح الحاجز وتخبرهن انها امها بلكي بيجي حدا معها .
راحت رجاء وهي عم تمشي ناح الحاجز لمحت واحد من الجنود عم يقرب ناحها .
وقت وصل لعندها كان امان ، سلم عليها .
رجاء: الله يعطيكي العافية .
امان : اهلا مدام كيف الصحة ...كيف صارت دنيا .
رجاء: والله لساها تعبانة بس يعني احسن من مبارح شوي قدرت تقوم وتمشي شوي ...بس ضل بالها مشغول شو صار مع مرتو لرئيس القسم كل الليل عم تفكر فيهن .
امان نزل راسو لتحت: ....والله يامدام للأسف ماقدرو ينقذوها وتوفت بعد الفجر .
رجاء: لا حول ولا قوة الا بالله الله يرحمها ويصبر البهن عفراقها .
امان : طيب ليه عزبتي حالك واجيتي لهون .
رجاء: دنيا اللي بعتتني بدها تتطمن .
امان: طيب مرة تانية لا تجي لهون لحالك هي رقم تلفوني ازا بدكن اي شي اتصلو فيني اي واعطي رقمي لدنيا كمان .
راحت رجاء وهي متدايقة وقالت لدنيا شو صار وصارت لا ارادي تبكي عليها صحي هيي مابتعرفها بس شفقت عالوضع كلو وكيف صار فجأة .
بعد تلات ايام تحسنت صحة دنيا وصارت بتقدر تقوم .
سمعت دنيا الباب الخلفي عم يندق كانت عم تعمل اكل هي وامها للجنود نشفت ايديها وراحت لتفتح الباب .
فتحتو وبقيت واقفة مكانها : ......
امان : ما حتقليلي تفضل .
دنيا: ...اي تفضل .
امان: امك وينها .
دنيا: ....جوا عم نعمللكن الغدا .
دحشها لجوا الغرفة اللي جنب الباب وقلها: اجيت لأتطمن عليكي .
دنيا كان البها رح يوقف من الخوف لما شافتو كيف قريب منها .
امان: ...طمنيني كيف صرتي .
دنيا: ......متل ...مالك شايفني ..انا قوية وعم بتحسن بسرعة .
امان عم يضحك باستهزاء: ...لا واضح انك قوية، يعني بدك تخبريني هلأ انك مو خايفة .
*~💚قصص بإدارة تيم💚~*
دنيا: ....ومن شو بدي خاف .
قرب منها اكتر وحط ايدو عالعرق اللي برقبتها وحس بنبضها سريع كتير .
امان : ...ليه نبضك سريع .
دنيا: ....بجوز لأني كنت عم اشتغل ...المهم بدي اطلب منك طلب ازا ممكن.
امان : تفضلي .
دنيا: بدي روح اخد بخاطرو لعمو ابوعصام ومابعرف البيت .
امان: ....مافي داعي خلص بيت الأجر .
دنيا: بعرف انو خلص بس انا متقصدة روح ومايكون عندهن حدا وانت شايف انو مافيني امشي منيح .
امان: وكيف رح تروحي لعندو .
دنيا: رح شوف ازا امي بتروح معي .
امان: طيب وليه خبرتيني لكان.
دنيا: ....كنت بدي عنوان بيتو .
امان: ...بعيد البيت انا باخدكن .
جنت مابدها تروح معو وتبقى معو وقت اطول .
دنيا: لا مافي داعي ماتعزب حالك بنروح لحالنا بس عطيني العنوان .
امان بنظرة غضب: وازا قلت لأ ....
دنيا: شو لأ .
امان : مافي روحة لحالك .
دنيا: ....كيف يعني لأ ومافي روحة لحالي انت شو دخلك اصلا .
مسكها من ايدها بقوة: ....انا اللي دخلني وقلت لحالك مافي روحة .
دنيا: بصفتك مين عم تمنعني .
امان: بصفتي امان بظن قلتلك قبل هيك .
اجت دنيا لتحكي وسمعت صوتها امها عم تندهلها ....وحست انو هاد الوقت المناسب لتخلص من قبضة امان .
دنيا: انا هون امي بغرفة خوالي .
تركها امان وبعد عنها شوي .
دخلت رجاء : ......عفوا ...انت هون من زمان .
امان بكل هدوء : اهلا مدام كيف الصحة ...انا هلأ جيت ولسا كنت عم احكي مع دنيا .
دنيا: .....اي امي الضابط امان اجى ليسألنا انو متى بنحب نروح لعند عمو ابو عصام لناخد بخاطرو .
اتطلع امان فيها نظرة تهديد وصارت بتعرف معنى هالنظرة.
امان : متى ماحبيتو .
دنيا: هلأ وقت نبعتلكن الأكل بروح انا وامي .
رجاء: امي انا ما بقدر روح اليوم خالك جاي لعنا كمان ساعتين يعني دوبني خلص اللي بايدي وبدل تيابي.
انتهز امان الفرصة ليرد الكزبة لدنيا برعبة توقف البها عالخالص: ...اي لكان انا رح باخد دنيا لبيت رئيس القسم وانتي خدي راحتك مدام .
بحلقت دنيا عيونها وماعرفت شو تحكي .
رجاء: بس بصير تروحو لحالكون هيك .
امان : ...عفوا مو مأمنة فيي .
رجاء: لا والله مو هيك قصدي بسسس ...خلص متل مابدك ابني بس ماتتأخرو وسلمولي عأبو عصام .
راحت رجاء وبقيت دنيا مع امان لحالهن .
قرب منها واشر بايدو على عيونو ورجع اشر على عيونها وقلها : ....قبل لتتهوري وتخبصي بالكلام ابقي اتطلعي بعيوني لتتأكدي من موافقتي عاللي بدك تحكي اي ....انتي اللي بلشتي وبدك تتحملي ...انا مابفوّت شي.
ماكانت بتعرف انو ما بيطلعلها معو وانصدمت من حالها انو كيف عم اتطاوعو من غير ماتجادلو كتير يمكن لأن حست بحالها عطول خسرانة معو ...
امان: .....شو رأيك تتحركي وتروحي تجهزي بدل مانك فاتحة تمك هيك متل الجدبة .....روووحي.
كانت قلقانة كيف رح تقضي كل الوقت معو لحالها .
جاب سيارتو وطلعت معو ونقزت من فكرة انو حيبقى جنبها فترة ساعة كاملة ليوصلو لبيت ابو عصام .
امان : ....احكيلك شي كلمة بالعادة لسانك ما بفوت لحلقك .
دنيا: .....شو بدي احكي .
امان : اي شي ساعة كاملة معقول انضل ساكتين هيك ....احكيلي عن حالك شوي .
صارت دنيا تحكيلو عن حياتها وكيف مات ابوها وجوازة امها وكيف راحت عاشت مع ستها وفترة دراستها بالجامعة لوقت توفت ستها والتقت فيهن .
كل الوقت امان عم يسمعلها وكان متقصد تحكيلو كل شي وهو ساكت بدو يعرف كل شي عنها رغم انو ام جمال قبل لتتوفى خبرتو بكل شي بخص دنيا لكن حب يسمع بعض التفاصيل منها مباشرة.
*~💚قصص بإدارة تيم💚~*
وصلو عبيت ابو عصام واستقبلهن بحرارة وخصوصي دنيا ماتوقع زيارتها ابدا .
سلمت عأبنو وبناتو واخدت بخاطرهن كانت لابسة فستان اسود طويل وجاكيت جينز قصير .
دنيا: ...مابعرف كيف بدي عزييك عمو او كيف صيغ كلماتي كل اللي بقلك اياه الله يخليلك هالوردات اللي عندك وتفرح فيهن ويخليلك ابنك يضل سند معك ويعنيك عترباية اخواتو .
صارت دنيا تاخد وتعطي بالحديث معو ومع بناتو لدرجة نسيت وجود امان لحتى تنحنح وزكرها انو قاعد .
اتطلعت فيه دنيا ووجهتلو بعض الكلام لحتى يزيد النقاش شوي وماكانت بتعرف انو رح بياخد القعدة كلها وقت عطتو دنيا المجال ....تفاجأت انو متحدث بشكل مو عادي فصيح اللسان بيتكلم بطلاقة عندو ثقافة مو محدودة بيعرف كيف يجذب سمع الناس ويخليهن كل الوقت مركزين معو ....حتى انتبهت عحالها انو عم تصغي لكل كلمة بتطلع من تمو بلباقة وزوء وقالت بحالها اشمعنا انا بعاملني بفظاظة وشراسة .
اخيرا وجههلها الكلام: ....شو دنيا مشينا .
فاقت عحالها : ااااه ...اي اكيد.
سلمت عالكل وطلبت انو يجو البنات ويزوروها لأن حبتهن وحبوها كتير .
بمشوار الرجعة كانت متطمنة شوي وحست الخوف زال وقت شافتو كيف عم يحكي وانو مو مع الكل فظ وعدواني .
امان: ...كني ارتحتي بالقعدة مع البنات .
دنيا: ...اي والله حبيتهن بجوز لأننا من نفس العمر .
امان: .اي وطلعتي جوعانة حكي ...ماسكتي بنوب ضل شي ماحكتي فيه.
اتطلعت فيه وحست الدم طلع لوشها.
دنيا: ....يااخي بدي اسألك سؤال ...لاحظت عليك بتعرف تجامل وبتعرف تحكي منيح وبهدوء ورواق وزوء مع الناس ليش انا لأ ليش انا بتستقتل لتستفزني وتعمللي مشكلة .
*~💚قصص بإدارة تيم💚~*
امان: ...وكيف عم احكي معك هلأ ....انتي اللي بتختاري معي المواضيع الغلط .
دنيا: بس انا هلأ ما حكيت معك شي انت اللي بلشت .
امان : اي لأني مانسيت اخطائك القديمة ولسا ما حاسبتك عليها.
دنيا: اي وشو رح تخترعلي غلطة جديدة .
امان : حافظي عكلامك انا مابخترع شي كلو من ايدك .
دنيا: طيب قلي بشو غلطت .
امان: قلتلك انا اللي بحدد متى بحاسبك مو انتي بتفرضي علي .
دنيا نفخت بعصبية وحكت بصوت واطي: ......شو مغرور.
امان : سمعتك .
دنيا😳:.... ...
اتطلع فيها شوي وهو عم بسوق : هلأ جاوبيني شو ناوية تعملي شي مفيد بالحياة .
كلماتو كتير كانت تستفزها واتدايقها وحست انو عم ينتقيهن بحرفية ليقدر يطالعها عن طورها ويشوف الغضب عوشها .
دنيا: .....هلأ بعد ماتخرجت بدي اتدرب بالمشافي ليصير عندي خبرة بمجال الطب اكتر .
امان: ...هههههه وليه لتشتغلي اخرتك لبيت زوجك .
دنيا: ومين قال بدي اتزوج ...انا مادرست وتعزبت سنين بالجامعة لأتزوج بلا شغل ..وبعدين لنفرض اني تزوجت وين المشكلة اني اشتغل.
امان: مارح يمشي الحال معك مارح تقدري توفقي بين بيتك وبين شغلك انتي كوني بس لشي واحد.
دنيا بعصبية: ومين انت لتقيمني هيك شو بعرفك فيي شو بتعرف عني لتحكم عليي بهالشكل ....لك شو بدك مني ليش هيك عم تعاملني .
شحط بريك ومسك ايدها لفها لعندو بعصبية وصوتو كان رح يفجر ادنيها : .....هي اخر مرة بسمع صوتك عم يعلى عليي ، بوجودي لسانك بتبلعي وصوتك بيختفي فهمتييييي .
نزلو دموعها بس من قبضة ايدو كيف مع صوتو .
كانت رح تحكي وسكتها بصرخة تانية: ....مابدي اسمع منك كلمة .
ضلو كل الطريق ساكتين ودنيا دموعها ما وقفو لوصلو عالبيت نزلت واجت لتدخل من الباب الرئيسي شحطها لجهة الباب الخلفي.
امان: ....كلامي مابدي عيدو ، واللي صار من شوي بضل بينا ، عُلم.
دنيا : .....
امان : ماسمعت الجواب لسا .
دنيا: ....شو بدك مني ...اتركني بحالي .
امان : للأسف صعب مابقدر اتركك بحالك .
دنيا وهي عم تبكي: ...ليش .
امان: بعدين بتعرفي.
اجى ليروح رجع نادالها: ...صحيح ..من البيت مابتطلعي بلا ماتخبريني وشو مابصير معك بتقليلي عليه واي تصرف من دون علمي حسابو عسير واي غلطة مارح تمرق عخير لهيك ارجعيلي بكل شي ...رقمي معك لحتى ماتتحججي.
دنيا واقفة وكأنها حجر ساكن ماعم تحكي او تتحرك .
امان : في اعتراض عاللي قلتو.
ماعرفت كيف هزت راسها انو لأ .
امان: تمام لهلأ ....فوتي واقفلي الباب منيح اوام.
ماتركها لتأكد انو دخلت البيت وقفلت الباب وراها .
رجع عالمعسكر مرتاح ومبسوط انو قدر يسيطر عليها ويملي عليها كل اوامرو بدون مايلمح اي اعتراض عكلامو .
اما دنيا دخلت عالبيت من تم ساكت ودخلت للحمام مباشرة اخدت دوش ساخن ليريح اعصابها .
بقيت كل الليل فايقة مستغربة من معاملة امان الها وانو ليه عم يهاجمها بهالشكل وليه مابيتعامل معها بلطافة متل البقية .
اسألة كتير جالت بخاطرها ماكانت تلاقيلها اجوبة ...وقالت ماحدا رح يقدر يساعدها الا ابو عصام .
بنفس اليوم حضرت رجاء سلة فواكه مشكلة وباردة وطلبت من دنيا تحاكي حدا من شباب المعسكر ليجي وياخدهن وخبرتها دنيا انو رح تروح هي تبعتهن لغاية ببالها.
نزل الحارس اللي شاف دنيا جاية من بعيد لعند امان : سيدي دنيا جاية لهون بتحب روح شوف شو بدها .
امان : ....هي اكيد مجنونة او عم تتقصد تغيظني كيف بتطلع بلا ماتخبرني .
الحارس: شو سيدي روح .
امان: ....لأ ارجع لمحرسك انت انا رايح شوفا.
راحت دنيا ووقت قربت من الحاجز شافت حدا منهن عم يقرب ناحها وزمت شفايفها بعصبية وقت شافت انو امان وقالت بحالها (شووو مافي غيرو بالمعسكر ليجي هوو. شو هالحظ).
وصل امان لعندها : .....خير شو جابك.
دنيا: ...امي بعتتلكن هدول .
امان عم يتطلع بالسلة: شوو هي .
دنيا: فواكه .
امان: ..انتي ليه مصرة ماتسمعي الكلام.
دنيا: وشو عملت هالمرة .
امان: انا ماقلتلك ماتطلعي بدون ماتخبريني .
دنيا: ماانا جاية لهون يعني رح تشوفني .
امان : وافرضي انا مجاز ....يعني مارح شوفك ...قلت بتخبريني بكل تحركاتك.
دنيا: ...حاضر ...بس كنت بدي قلك بدي رقم عمو ابوعصام .
امان : ليش ؟
دنيا: بدي احكي معو واتطمن عليه وامي بدها تاخد بخاطرو .
*~💚قصص بإدارة تيم💚~*
امان : ااااااه هيك يعني .
اتطلع بعيونها مباشرة: ....دنيااا..اي تصرف اهوج مارح اسمح فيه..مفهوم.
دنيا: ....والله فهمت .
عطاها الرقم وطلب منها ترجع عالبيت وبقي واقف لشافها غابت ناح بيتها.
صبحية تاني يوم حاكت ابو عصام واتطمنت عليه وشكرتو عحسن استقبالهن وسألتو متى رح يرجع عشغلو وخبرها انو راجع عبداية الأسبوع يعني بعد اربع ايام ...وطلبت منو بسرية تامة انو بدها منو وقت بيرجع عشغلو قبل ليروح للمعسكر يمرق لعندها بدها تحكي معو بشي ضروري وطلبت انو امان بالزات مايعرف..ووعدها انو رح يجي لعندها وحيكون كل شي بالسر.
مرقت الأربع ايام بطيئة كتير ماطلعت فيهن دنيا من البيت لحتى ماتضطر تتصل وتخبرو لأمان وتعطي فرصة انو يتحكم فيها .
بيوم الصبح وصل ابو عصام لعند دنيا .
ابو عصام: ....كيفك يا بنتي شو اخبارك .
دنيا: منيحة انا بس محتارة وماعم يهدى بالي بنوب وقلت بس انت اللي بايدك تريحني .
ابو عصام : تفضلي اسألي شو بدك تعرفي .
دنيا: ...امان .
ابو عصام: ...شوبو .
دنيا: ...مين بكون وليه هيك عم يعاملني وشو بدو مني .
ضحك ابو عصام عليها : رح خبرك كل شي لان باين من اسألتك انو ماقدرتي تاخدي منو لا حق ولا باطل .
دنيا: ...ليش عم يعطيني فرصة احكي هو اللي شاطر في بس يعطيني اوامر ويعصب عليي .
ابو عصام: روقي عمي امان عم يعمل هيك من خوفو عليكي ولمصلحتك .
دنيا: اي مصلحة هي ....بصفتو مين عم يسمح لحالو يتدخل بكل امور حياتي وبدو مني خبرو انا وين رايحة ومنين جاية يعني منيح اللي مابعد عليي النفس او كم لقمة عم اكل .
ابو عصام: ههههه لا مو لهالدرجة .
دنيا: والله اكتر من هيك عمو هو عم يخنقني بلا مبرر بتعرف لو يشرحلي سبب تصرفاتو معي بجوز ارتاح شوي بس غموضو عم يقتلني عم يستفزني ....وصرت لارادي طيعو وحس حالي كاني بلا شخصية وانو هو مسؤول عني صرت حس حالي لعبة بتخصو وعم تشتغل عالريموت.
ابو عصام: رح اشرحلك كلشي بس مابتخبري امان باللي رح قلك اياه.
دنيا: ليش هو بيعطيني مجال احكي .
ابو عصام: ...ستك الله يرحمها قبل لتموت كتبتلك البيت هاد بأسمك والأرض اللي جنب البيت ومبلغ صغير بالبنك لحتى ماتحتاجي حدا ...وكل هالشي صار بمعرفة امان ومساعدتو وعن طريقو تعاملت مع المحامي اللي عمل كل شي الك .
دنيا مصدومة: ....البيت والارض بأسمي انا ...ليش .
ابو عصام: هيك ستك بدها وخوالك بيعرفوا وعندهن علم ومو زعلانين لأن هني مو بحاجة واللي عرفتو انو خوالك مناح كتير معكن ماهيك .
دنيا: اي مزبوط ....مع هيك ماجاوبتني عسؤالي بخصوص امان ليه هيك عم يعمل معي وليه كل تعامل ستي مع المحامي عن طريقو هو .
ابو عصام: رح جاوبك عكل شي ....ستك اللي طلبت من امان يشوفلها محامي شاطر لان بتوثق في كتير وبتحبو كتير كتير وكان مميز عندها وهو كمان كان يحبها بشكل مو عادي لأن عوضتو عن حرمانو من امو .
دنيا: ليش امو ميتة .
ابو عصام: لأ عايشة وساكن معها بس امو وابو منفصلين امو انسانة مهملة كتير لزوجها ولبيتها وحتى لامان مااهتمت فيه بنوب حتى بصغرو ،كان عندها اهتمامات تانية ....وهالشي خلاها كتير تبعد عنو وماتعتني فيه بتاتا وعلاقتو فيها لهلا سطحية كتير لهيك هو مابياخد اجازات كتير بحب يبقى هون اكتر وشاف من ستك الحنية والحب والحكمة وكانت الله يرحمها كلنا بكفة وامان لحالو بكفة واللي بدي قلك عليه انو ليه امان بيتحكم فيكي كتير وخانقك بطلباتو لأنو ستك موصيتو فيكي ماطلبت مني انا هالشي وطلبتو بس من امان .
دنيا : .....وصتو فيي ....ليش .
ابو عصام: ...قلتلك كانت تحبو كتير وتثق في كتير لدرجة انو ماامنت عليكي حتى مع امك وطلبت انو يكون في لمسة سيطرة بحياتك وشافت انو اجدر شي هو امان لأن بيتمتع بهي الصفات ...كلنا زعلنا عليها وقت توفت لكن امان كانت صدمتو اكبر وكنا لأول مرة بنشوفو عم يبكي متل طفل صغير مضيع امو ..ووقت طلبت منو يكون هو الوصي عليكي وافق عطول لأن مابيقدر يردلها طلب .
*~💚قصص بإدارة تيم💚~*
دنيا: ...يعني هلأ امان هو المسؤول عني بكل شي بكل شي .
ابو عصام: ايوااا هو وبس وولا اي حدا الو سلطة عليكي غيرو الا ازا تزوجتي وبرضو زواجك ما حيصير الا بأزنو وامرو .
دنيا : يعني وقت كان يقلي انومسؤول عني كان عرفان شو عم يحكي .
ابو عصام: مافي حدا بيفهم بالكلام وبيعرف يحكي قد امان، هو انسان مو عادي ومو سهل التعامل معو بكل الأمور، غامض لأبعد الحدود وعصبي بشكل مخيف لهيك ديري بالك من عصبيتو وماتحاولي تثيري ابدا لأن ماحتحبي وهو معصب ...لكن بنفس الوقت هو حدا كتير حنوووون هادي وقت مابكون شي معصبو او شاغلو او مستفزو ،صبور كتير وقد الحمل والمسؤولية شخصيتو راااااائعة بتعجبني كتير قوي بكل المقاييس راكز وماعندو ولدنات ...هي ببساطة صفاتو لأمان فيكي تتعرفي عليه عن طريق التعامل معو وقت ماحبيتي ....بس ماتبينيلو انك عرفتي كل هالشي وبالزات عن طريقي انا فهمانة علي....خلي كل شي طبيعي اتفقنا .
دنيا وعم تفوق من صدمتها: .....مفهوم عمي مفهوم وشكرا كتير الك عزبتك معي .
ابو عصام: ابدا ماتحكي هيك انتي متل بناتي ...واي شي بتحتاجي انا جاهز .
ضلت عم تفكر بكلام ابو عصام امان مسؤول عنها وانو ستها موصيتو فيها طيب ليش عندها ام وخوال ليش اختارتو هو بالزات ليش هالشي خلاها تضرب اخماس بأسداس ...ولهيك كان يطلب منها تقلو عكل تحركاتها وهالشدة اللي عليها مو من قليل بس لتضل تحسبلو حساب .
تغيرت نظرتها لأمان بعد هالكلام 180 درجة وصارت تشوفو بعين الرضى وقالت لو مو ثقة وقد المسؤولية ماكانت ستها رمت حمولها عليه وهي الحكيمة الرزينة اللي كل بياخد بشورها وكلامها .
كان امان رايح ليشوف دنيا ودق الباب الخلفيكتير وراح ورجع بنفس النهار تلات مرات وبلا فايدة .
*~💚قصص بإدارة تيم💚~*
كانت دنيا طالعة مع امها لبيت ام عادل اللي كانت مرت بسام جوزها التاني لرجاء كانو معزومين عالغدا وقضو كل النهار عنهدن .
المسا وقت رجعو حست دنيا انو في حدا اجى لعندهن وقالت لامها هالشي .
رجاء: وشو عرفك انو في حدا اجى لعنا .
دنيا: احساسي ياامي وعالأغلب من الجنود.
دخلت رجاء تتحمم وتركت دنيا قاعدة وسرحانة ومافي ثواني والا الباب عم يندق ،ركضت دنيا وفتحتو وكان امان واقف ومعصب .
دنيا: ....اهلا امان تفضل .
امان : وين كتتي كل اليوم .
دنيا: يعني انت اجيت لهون .
امان : هي المرة الرابعة بجي ومابلاقيكي .
دنيا: خبرتك انو بجوز نروح لبيت ام عادل نتغدى عندهن ؟
امان : ايواااا ولهلأ .
دنيا: اي .
امان: مو ملاحظة انك مو عاملتيلي اعتبار وحسابك تقل .
دنيا: ....حساب جديد.
امان: اي انا اصلا ماحاسبتك عكل غلطاتك نسيانة .
دنيا: اي تفضل عم اسمعك .
امان: انتي كيف بتسعفيني وبتطالعي الرصاصات من جسمي وانتي ماكنتي مخلصة دراسة .
دنيا: ههههههه .اي بس كنت بكلية الطب وباخر فصل .
امان : وافرضي صرلي شي وانا بين ايديكي .
دنيا: بس الحمدلله ماصار شي .
بهالوقت رن موبايلو وكان رئيس القسم خبرو يرجع بسرعة .
امان: ربك بحبك بنكفي كلام بعدين .
تاني يوم اتصلت بأمان وكانت بشوق لتسمع صوتو وتشوفو لتقلو انها جاية لتجيبلهن الأكل وبلكي بكمل كلامو معها اللي نهوا قبل بيوم ...بقيت عم تدقلو وكل شوي يعطيها مغلق .
استسلمت ورنت لأبو عصام.
ابو عصام: اهلا وسهلا بالحلوة دنيا .
دنيا: ..ههه اهلا عمو كيف صحتك .
ابو عصام: الحمدلله منيح كتير .
دنيا: عمو عم دق لأمان عم يعطيني مغلق خير في شي .
ابو عصام: امان مجاز من مبارح بالليل روح.
اتدايقت وقت سمعت هالكلام وسألتو كمان مرة: ....طيب عمو متى بيرجع بكرة يعني .
ابو عصام: لأ هالمرة اخد اسبوع اجازة .
دنيا : اسبووع ...ليه يعني .
ابو عصام: قال تعبان وعندو شوية مشاكل عائلية وبدو يرتاح شوي .
اتدايقت لدرجة انو تغيرت نبرة صوتها وطلبت من ابو عصام يخبرها وقت بيرجع وانو يجي تنين من الشباب لياخدو الغدا .
مرق عليها اول يوم بصعوبة اماتاني يوم فما قدرت تتحمل وقررت اتطالع اي حجة لتحاكيه .
دقتلو وفتح خط : ..الوو.
دنيا: ...صباح الخير حضرة الضابط .
امان : هههه عجبتني هي حضرة الضابط بس ماتعيديها اي .
انسحرت بضحكتو رغم صغرها الا انها كانت اول مرة بتسمعو عم يضحك .
دنيا: ...لكان شو بتحب ناديك .
امان : ...بأسمي ببشو بدك تناديني .
دنيا: ...هيك بدون القاب .
امان: اي خلي البساط احمدي وناديني امان وبس .
دنيا: متل مابدك....طمني عنك .
امان : الحمدلله بخير ...غريبة اول مرة بتدقيلي وبتحكي بهداوة خير مرضانة شي .
دنيا: ...الله يسامحك مافي شي بس دقيتلك لقلك انو بدي روح انا وامي لييت خالي .
امان : وشو عندهن بيت خالك ليش يعني بدكن تروحو .
دنيا: مافي شي بس هيك، اكتر من مرة عزمو علينا لنسهر عندهن وبمااني مو مشغولة ومالة قلت لنروح هالمرة ، وبحكم انك طلبت مني خبرك عن كل تحركاتي لهيك دقيتلك .
امان: ايواااا صايرة مطيعة بس هالتغييير هاد مو عاجبني وحاسس انو في شي من ورا ماهيك والا انا غلطان .
دنيا حست انو رح يكشفها : ....لا هو القصة انو قررت اعمل معك هدنة لشو الناقردي والمجاكرة وقلت بكسبك اخ لألي .
انزعج من كلمة اخ: ...قلتيلي اخ مااا طيب ماشي غيرو وين رحتي وماخبرتيني .
دنيا: سم الموت ازا طلعت شي مشوار الا مبارح ...
قاطعها بعصبية: مبارح شو طلعتي ؟انا شو خبرتك ماتطلعي بدون ماتخبريني .
دنيا: ..
*~💚قصص بإدارة تيم💚~*
...امان روق عليي شوي ماكملت كلامي لسا ....مبارح كنت دقلك وكان موبايلك مغلق كنت بدي قلك اني جاية لعندكن عالمعسكر وجايبتلكن الغدا ولما انت مارديت اضطريت دق لعمو ابو عصام واجو عماد واحمد اخدو الغدا وانا ماطلعت بنوب والله وازا بدك اسألهن .
امان : ....ازا هيك بسيطة ....واليوم ضروري مشوارك مو ضروري مااا معناها مافي روحة .
دنيا عم تضحك عأسلوبو: هههههه عم تسأل وتجاوب لحالك شوباك ، امبلى امان مشواري اليوم ضروري خالي كتير عزم عليي واصر اكتر من مرة اني روح لعندهن وانا كنت ارفض بحجة اني مشغولة بس هالمرة جد انا مالة وحابة اطلع الله يوفقك ماتكسفني .
امان: ومتى رايحة.
دنيا: المسا .
امان: مع مين او كيف رح تروحو .
دنيا: رح نحكي لخالي يجي وياخدنا منيح هيك .
امان : يلا ماشي الحال بس ماتكتريها هالزيارت اي ...ووقت بتروحي بتخبريني ووقت بترجعي بتخبريني .
دنيا: هههه ماشي الحال سلام .
امان : .....الله معك .
فرح لأن كانت اول مرة بيسمع صوتها عالتلفون وانو لاول مرة بتشاورو بشي هو طلبو منها لكن بقي عندو شك انو في شي مغيرها ولازم يعرفو .
المسا صار متل مابدو امان وحاكتو دنيا قبل لتطلع ووقت رجعت وشي غريب لمع بألبها مافهمت معناه .
طالت اجازتو لأمان هيك شافتها دنيا رغم انو ماغاب الا اسبوع الا انها كانت تحس اليوم يومين ومابتعرف ليش اشتاقت تشوفو .
كان موبايل دنيا عم يرن وماكانت سامعتو كانت عم تاخد دوش وردت امها ..
رجاء: الوو
ابو عصام: صباح الخير دنيا .
رجاء: صباح النور ...انا ام دنيا .
ابو عصام: عفوا بعتذر نفس الصوت ....كيفك مدام .
رجاء: الحمدلله تمام كيف الصحة .
ابو عصام: نشكر الله بخير...دنيا موجودة .
رجاء: موجودة بس مشغولة شوي هلأ وقت تفضى بخليها اتدقلك .
ابو عصام بحرج : اي شكرا كتير ...بس خليها تحاكيني ضروري ازا ممكن .
رجاء: على عيني .
طلعت دنيا وخبرتها امها انو ابوعصام عايزها ضروري.
ركضت دنيا عموبايلها ودقت لأبو عصام: ....صباح الخير عمو .
ابو عصام: ياصباح الورد ...كيفك حبيبتي .
دنيا: الله يسلمك يارب قالتلي امي انك دقيتلي.
ابو عصام: ...اي بدي قلك انو الوحش رجع .
دنيا ضحكتها ملت البيت عالتشبيه: ههههههههههههه قلتلي الوحش .
ابو عصام: انتي هيك سميتي من قبل بتتزكري .
دنيا خجلت من حالها : اي بتزكر بس ماكنت بعرف مين امان .
*~💚قصص بإدارة تيم💚~*
بهاليوم كان لازم يعملو الغدا وتقصدت تعمل غدا مميز هالمرة وقررت تروح مع الشباب عالمعسكر بحجة انو الأغراض كتيرة ....ودقت لأمان لتخبرو بجيتها.
دنيا: ....مرحبا امان كيفك.
امان: اهلا دنيا كيفك .
دنيا: انا.....منيحة الحمدلله ....كنت بدي.قلك انووو....الغدا صار جاهز انو خلي الشباب يجو يساعدوني لننقل الأكل .
امان : الله يعطيكي العافية هلأ ببعت الشباب بس انتي لا تجي لهون.
خاب املها واتدايقت انو ليه لأ .
دنيا: ....ليه لأ الاغراض كتيرة مافيهن يحملوهن لحالهن.
امان: هلأ ببعت تلاتة مو تنين انتي خليكي بالبيت مع امك .
دنيا: امي راحت لبيت خالي معزومة عالغدا .
امان : خليكي بالبيت.
دنيا: ....طيب ليش لأ.
امان بنبرة جدية: ....المعسكر كلو رجال مابدي اتضلي تخفقي لعنا وماتنسي انك رح تمشي معهن كل الطريق.
دنيا حست بخوفو عليها انو هيي بنت ومابصير تبقى بين الرجال.
امان: ...شو بشوف سكتي .
دنيا: ....لا ولاشي عم اسمعك .
امان: واي شي بدك تبعتي لاتجي انتي دقيلي وببعتلك حدا ماشي .
دنيا: كمان هي .
امان: مابدي عيد كلامي .
دنيا: ....متل مابدك .
تنكست لأنها ماقدرت تشوفو ولا حتى تقنعو بروحتها وكان كتير عبالها هالمرة تشوفو لأن نظرتها الو اختلفت وقدرت تفهم سيطرتو واصرارو عأزعاجها شو سببو .
بقيت كل النهار متنكدة لان ماصحلها تشوفو ،كانت امها عند اخوها وماقبلت دنيا تروح معها .
المسا مرق ابن خالها لدنيا ليسأل عن اخبارهن وازا لازمهن شي .
فتحت دنيا الباب وتركت باب المنخل مسكر وحاكت ابن خالها من ورا الباب .
بقيت واقفة معو قريب العشر دقايق ماكانت بتعرف انو في حدا عم يراقبها من بعيد وكان عم يشعل متل النار .
بعد ماراح ابن خالها بربع ساعة دق الباب الخلفي ...ركدت دنيا عالباب وتمنت يكون امان اللي جاي .
فتحت الباب وضحكت لا ارادي وقت شافتو .
كان حاطط ايدو عطرف الباب ومرتكي عليه ومنزل راسو ورافع عيونو لفوق .
دنيا: .....اهلا وسهلا ...كيفك .
امان: ....منيح .....وانتي .
بلعت ريقها بصعوبة: ....منيحة انا .
امان: ....رجعت امك .
دنيا: لأ لسا بدها تسهر عندهن كمان .
اشرلها بأيدو تفوت عالبيت وفات وراها وقفل الباب.
راحو للغرفة اللي كان فيها وقت تصاوب ..
امان: ....بدي تفهميني من نظرة عيوني وقت بأشرلك بعيني او بأشرلك بأصبعي عشي بلا مااحكي .
ماكانت منتبهة عحالها انها عم تتطلع فيه بأمعان وعم تركز بكل كلمة عم تطلع من تمو وتعابير وشو وقت بيحكي ونظراتو واختلافهن وقت بصر عشي .
امان: ......هي هي وين رحتي عم احكي معك .
فاقت دنيا: ....ااااااه اي معك .
امان: بشو سرحانة.
دنيا: لااا مافي شي .
امان : طمنيني خبريني وين رحتي شو عملتي بهالأسبوع اللي غبتو اكيد طلعتي براحتك وماخبرتيني قلتي اني مو موجود وفرصة لاتحرر من اوامرو صح؟
دنيا: ....لا والله ابدا ماطلعت ولا مشوار الاسبوع هاد الا عبيت خالي وقت اتصلت فيك وسألتك .
كان بيعرف بس كان بدو اياها تحكي ليشوف ازا بتكزب عليه او لأ .
امان: ..بس.
دنيا: والله بس.
تمان: طيب ماحدا اجى لعندك بهالأسبوع.
دنبا: خالي جمال اجى اخدنا لما رحنا سهرنا عندهن واليوم خالي ايمن اخد امي .
امان: بس ماحدا تاني اجى.
دنيا: ...ماحدا ....ومن شوي اجى ابن خالي .
قرب منها اكتر لصار مواجهها: ....ابن خالك مع مين اجى وشو بدو.
دنيا: لحالو ....كان مارق صدفة من طريق بيتنا وقال بسأل ازا محتاجين شي .
امان وتغيرت نظرتو للحدة : وكيف دخلتي عندك وانتي لحالك.
دنيا: مادخل لهون كنا واقفين برا وماطول اصلا بس عشر دقايق .
امان : اي وليش ليسألك مو امك عندهن .
دنيا: لا امي عند خالي ايمن وهاد ابن خالي جمال.
امان: وحلوة وقفتك معو هيك قدام الجيران.
*~💚قصص بإدارة تيم💚~*
دنيا: كنت واقفة من جوا ومسكر عليي باب المنخل وهو برا .
اتطلعت دنيا فيه وركزت منيح : امان عأساس انت يعني مابتعرف مين بيجي لعندي وانا وين بطلع صح ايدي عراسك ماكنت بتعرف انو ابن خالي كان هون .
امان بضحكة جنابية: .......امبلى بعرف.
دنيا باستغراب: .....لكان ليه هريتني اسألة وانت بتعرف كل شي .
امان بثقة :....استنطاق .
دنيا: ....لتشوفني بكزب عليك او لأ صح.
امان: مزبوط.
دنيا: ....كيف بدي كزب عليك وانت بتعرف عني كل شي وسهل تكشف كزبتي .
امان بكل هدوء: ....لشوف ردة فعلك كيف رح تكون.
كمل كلامو:....دنياااا كل حركة وسكنة بتصير معك او قبل لتصير بدي اعرفها .
دنيا: والله مابعمل شي بدون علمك .
قرب منها لصارت لزقو ومال براسو ناح ادانها وحكى بصوت هادي كلو حنية : لا تشغلي بالي عليكي بدي ضل متطمن ومرتاح انك بخير .....حطيني دايما بالصورة اي دنيا .(كان عم يحكي ويشم ريحة شعرها) .
كان البها حيتفجر من سرعة نبضاتو من قربو منها ونفسها سريع كتير ،غمضت عيونها وهو عم يحكي وكأنها مستسلمة لطلباتو .
بعد شوي عنها وشافها كيف عم ترجف ومغمضة عيونها ، ضحك بخبث عمنظرها وعجبو هالشي كتير انو رجفتها هالمرة مو خوف لأ شي تاني حلو كتير .
التقت عيونهن وبقيو حصة عم يتطلعو ببعض نظرات غريبة مو مفهومة لكل واحد وشو معناها.
راح امان وترك دنيا بحالة غريبة كانت بدنيا غير الدنيا ماكان ببالها الا عيونو ونظراتو الها وقربو منها وهمسو بأدنها وبحة صوتو كل شي كان مميز هالمرة ماكانت حابة يتركها ابدا .
*يـــــتـــــبــــــع…⤹⇣*
❤️
👍
♥️
💗
💚
💜
🤍
46