#فوضى_الشعور44 #تكملة #الأخيـــــيرة #هند_الهيباني.. بعد قفلت باب التلاجه لقيتا واقفه وراه ... لابسه أسود ومنظرا مخيف شديد ..وهي بتقول لي بكرهك..بكرهك ياخ ...وبتمنى ليك الموت ...شالت السكي*نه ..وجات باتجاهي صرخت بي صوت عالي وهي مسكتني خنقتني بقوه ورفعت السكي*نه باتجاهي وهي بتقول لي زهجت منك ومن اي حاجه في الدنيا دي ...مو*تي... وأنا خنقتا لي موجعاني ...الرعب مسيطر علييي ... دي نهايتي خلاص ! صوتي ماقادر يطلع ! ولا حتى قادرة انادي على زول عشان يخلصني منها ... حسيت نفسي ..خلاص ...انتهى كل شي ...دي نهايتي ... غمضت عيوني وأنا بفكر ...في حاجه واحده غسان الحا يحصل ليهو شنو ...طع*نه قويه باتجاه قلبي ...الدم كان مالي كل اركان المطبخ نون وهي بتبتسم وكأنو انتزعت منها الرحمه ووقعت على الأرض ..... قمت بهجمه وجسمي كلو معرق! بلمس في كل حته فيني ....إتجاه قلبي ! ... ماف سكينه انا سليمه ...ماف اي جرح ! .. ماف دم ..حلم ....لا دا كابوس ... قمت من سريري وأنا ضربات قلبي بتزيد ..اكتر وأكتر .. مشيت الحمام ..غسلت وشييي .. اتوضيت ...وأنا حاسه بخوف ما طبيعي .. وقفت في المصلايه وبديت ... صليت ركعتين وأنا في نص الليل ...بكيت بكيت بكل وجع ...شكيت لي ربنا كل الألم الحاسه بيهو وعن كل شعور جواي هو أعلم بيهو اكتر مني ... شكيت لي ربنا عن الظلم الاتظلمتو.... انا يارب تايهه يائسة محطمه ماعارفه نفسي حا أعمل شنو ..ماعارفه البحصل لي دا سببو شنو ... يارب انا تبت ليك! ...عارفه اني عصيتك كتيير .. عارفه اني اغضبتك بي كم حاجه سابقه . بس انا يارب ما بقدر إتحمل عذاب اكتر من كده ..يارب دلني اعمل شنو. ...انا وحيدة ...يائسة ومحطمه ... بكيت ...شكيت....سجدت ...ودعيت لحد الأذان التاني أذن صليت الرغيبه قبل وبعداك الصبح .. ورجعت رقدت في سريري وأنا حاسه انو الخوف ..طار من قلبي وحاسه بي ارتياح غريب ... ماحسيتو ولا يوم في ال3 شهور المضت دي ! ... بقيت برتب في البيت وأنا حاسه بي سكينه غريبه ملازماني ...طمأنينه ما مرت عليي من قبل ... حاولت اتعايش مع الوضع .. واكمل بالقصه دي زي ما بديتا واتعايش براي ! .. بعد أذان العصر ..الباب كان بدق ... ماكنت قادرة اخمن دا منو !؟ ياربي يكون دا غسان ! ..كانت ضربات قلبي بتعلى اكتر وأكتر ... ماقادرة حتى أعاين بي الفتحه الفي الباب كان في ضيق مخلوط بي خوف بي مشاعر كتيره مختلطه ما كنت قادرة أفسرا هي شنو ! .. فتحت الباب ووقفت بعيد منو وأنا بعاين ... لقيتا خشت ..وقفت قدامي وقالت لي هند .. اتصدمت ! ... تبيان ! ...دايرة مني شنو والجابا شنو ؟! .. قلت ليها خير ! عرفتي بيتنا كيف ؟! .. ودايرة مني شنو ... قالت لي هند ممكن تخليني ادخل جوه وأشرب كباية مويه انا عطشانه .. في اللحظه دي بالذات ما قدرت اقول ليها اي كلمه أو حتى ارفض ..رغم عدم تقبلي ليها ولا لي زيارتا .. انا ملزمه اني اكرما كضيفه أو على الاقل أديها كباية مويه وأشوفا عاوزة مني شنو .. دخلنا جوه ! ....قعدت في الكرسي وأنا دخلت أجيب ليها مويه ..بعد اديتا ليها شربت جغمتين وقالت لي هند ..يمكن انتي مستغربه ..انا ليه جيت هنا ! مستغربه يمكن كيف عرفت البيت والجابني تحديداً ليك شنو ! ... بصراحه كده انا عرفت البيت من أمين.. ماجيت بي معرفه غسان ولا رسلني ليك .. بس بصراحه كده ..انا ياهند بقيت نفسي في علاقه زي حقتكم ...من ناحيه الحب والاخلاص ! علاقه فيها الراجل متمسك اكتر من البت .. انتي عارفه ياهند ..مرات بخش المكتب عشان اسلمو ورق بلقاه شارد ! وطوالي سرحان وما مركز ..في الاجتماعات احيانا كتيره بكون معانا بس بالو بعيد .. بقى نحيف وتحسي بيهو انو ماكويس .. قلت ليها وإنتي بصفتك شنو مدققه فيهو كده؟! مالك في شنو ! ان شاء الله تكوني اتبسطتي بعد دا .الجو وفضى ليك العبي يلا .... عاينت بعيد وهي بتقول لي ... غسان ما الراجل البقدر العب معاهو ... عاينت لي جوه عيوني وهي بتقول لي حاولت بكل الطرق أرميهو في شباكي لاكين ما اتزحزح ايمانو ...وحبو ليك خلاااا محاولاتي كلها تبوء بالفشل ..صدقيني انتي مع راجل ... انا بقدر اشلب كتااار بس اغلبيتهم شخصيات ضعيفه ومتزعزعه ..وصدقيني البتشلب عمرو ما بكون راجل ....ماف راجل بتشلب! بتشلبو الذكور مدعييين الرجوله ... بس انتي بجد مع راجل حقيقي تتحسدي عليهو .حاولي ماتخلي الشيطان يخش بيناتكم وارجعي لي غسان لأنو ياهند بستاهل! غسان فضل ليهو اقل من 3 شهور لتسديد القرض الفرضو عليهو في البنك ياهند وللأسف الشغل واقف وماشايفين اي مشاريع بتتنفذ غسان ياهند لي يوم الليله ما ادانا اي خطه نمش بيها عشان ننقذ الوضع ... وزي ما حكى لي امين ...شايل همك شديد .. بتمنى تفكري بالكلام دا. ياهند ....وتحاولي تسامحي وترجعو ..أنا ماعارفة سبب مشكلتكم شنو! بس الشي العارفاه ! انو غسان بحبك ...حب لدرجه مخليهو ما يشوف اي بت غيرك أنتي ... صدقيني عرفت كميه من الرجال بس زي غسان عمري ماشفت !.... انسان ما بلفتو اي شي ! ولا بتقدري تغريهو أو تعلقي فيك...غسان ياهند عمري ما شفتو بعاين لي بت في الشركه او بره ...عمري م شفتو بعاين معاينه غلط! والاكتر من دا كلو انو ظاهر عليهو انو مخلص ليك جداً ..... عاينت بإتجاه تبيان وانا مستغربه في كل كلمه بتقولا ! ...حاسه بضيق واستغراب ما طبيعي وانا بسمع الكلمات دي .... من منو ؟! دا فخ ولا دا شنو ! بالضبط تبيان لابسه طوييل ومكوزه طرحتا .... كلمات طلعت مني بدون اي إرادة وقلت ليها اتغيرتي ابتسمت وعاينت بعيد وقالت لي بسبب غسان ... بدت تفاصيل القصه وعيونا بتدمع ... من اول دخله لي في الشركه ...لحد اخر عمله اتفقو فيها هي وامين مع الغوست ... دا اسم احمد المستعار ! .. حسيت نفسي متضايقه ..ملخبطه ومستغربه في نفس الوقت ! ...قدر شنو الدنيا غريبه! والناس الفيها أغرب ... ممكن استثني تبيان لأنها غريبه وعادي تحقد وتحسد بس اخوي أنا ....واخو غسان ..... حاجه تخلي الزول ثقتو في الناس صفر!... بسمع في كلماتا ..حوار غسان !... مسامحتو ليها وكل التفاصيل دي وعيونا بتدمع وهي بتقول لي غسان ليهو فضل كبير عليي ...من بعد الله في التغيير دا لو مهما عملت ما حا اقدر أوفيهو حقو .. وأنا بتمنى اني اقدر اساعدو ولو بأقل حاجه ... غسان انسان كويس ما يستاهل الحزن عليك الله حاولي اعيدي النظر في قرارك دا وارجعي ليهو ياهند عليك الله ... طلعت من البيت ...وانا بي وراها ودعتها للباب... ادتني رقما وهي بتقول لي لو احتجتي لي في اي وقت دقي علييي . طلعت وخلتني مليانه حيرة ...البشر غريبين بين يوم وليله ممكن الزول يتغير ... بفكر في كل كلمه قالتا لي ...لبسا....طريقه كلاما وحتى نبرتا اتغيرت ...تفاصيل الحصل في السابق دا ..كل كلمة وكل حرف قالتو لي الان خلاني تايهه وحيرانه اكتر من اول ! ... عدا اليوم دا ...بعد مشيتا ... كنت بس باكل وبشرب ..بصلي وانوم ..ماعندي غير الروتين دا في جميع ايامي المضت والان ... بقى عندي روتين اضافي من بعد العشا كنت بجي وبعاين ليهو من ورا فتحة الباب ...صوت جواي بقول لي هند ارجعي .وصوت أقوى بقول لي دي لحظات ساي ودي مشاعر متأثرة بيها وحا تزول مع الأيام ... بزجر نفسي وبرجع الغرفه وبعصر النوم عصر عشان يجيني وارتاح من التفكير الكتير دا ... وكالعادة ...كان بضبط وقتو من بعد صلاة العشا جيه ومن بعد صلاة الفجر بمش .... ماحصل يوم جى دقا باب البيت ولا حاول انو يجي يزعجني أو يرسل رساله زي ما كان في السابق ... كانت الأيام ماشه بسرعه عجيبه ... بنوم وبصحى ساعات معدودة بلقى اليوم خلص .. دخلت الغرفه وانا ماشه اتعترت وضربت الدرج وقع الظرف في الارض ... رسائل غسان ...... #امين كانت حالة غسان ماعجباني. ..من بعد اليوم داك وانا في راسي هدف واحد اني اخلي غسان يرجع بضحك !كنت بفكر في الاااف الحاجات الممكن تصلح القصه دي ...مستحيل أمش أنا ... نهى ..أمي ..ابوي ..كلهم فشلو انهم يقنعوها ... مشيت المكتب وانا بخش بعد مرور الزمن دا كلو.. ولأول مرة اخشو وانا حاسس بالفخر والندم في نفس الوقت ... الفخر بي اخوي وانجازاتو ..والندم على كل يوم عملت فيهو عمله أذت الشركه دي ! ... دخلت وانا بلمح تبيان قاعده ! استغربت وانا بشوف لبسا ...تفاصيل كلاما ...وحاسي بي حاجه ما زي زمان ... مشيت وأنا محتار وبفكر تكون دي خطه منها لسه هي ما تابت وناويه تأذي الاتنين ديل مستحيل اخليها هنا ... مشيت بإتجاها وقلت ليها وانا برفع ليها كتفي ناويه على شنو ؟! ..أكيد هي لسه ما عرفت انو أنا اتغيرت حا اقعد قداما وأحاول استدرجا عشان تعترف وأبعدا من هنا ... الخطه الفاتت ياتبيان ما نجحت خلينا نعمل خطه جديده ...انتفضت بقوة وهي عيونا بتتملي دموع .. أنت بتقول في شنو ؟! انت زول في قلبك ماف رحمه عاوز شنو اكتر من كده دا اخوك دا اخوك اعوذ بالله وحسبي الله ونعم الوكيل أنا ربنا يغفر لي الماضي بس مستحيل ارجع وافكر أعمل حاجه تاني تأذي زول احسن ليك يا امين بطل البتعمل فيهو دا ... كنت مهجوم ومستغرب في نفس الوقت ! أنا بحلم؟! حاسي كل حاجه كأنها وهم ! ... تبيان ؟! ...دموعا ...انتفاضتا ...هل أنا بحلم؟! كل شي كان غريب ! . قلت ليها وانا بمد كباية الموية ليها أهدي ... أنا نفسي كنت بستدرجك بالكلام عشان اشوفك لسه ناويه تأذي الاتنين ديل قفلت اضانا وهي بتقول لي أنا عايشه وحامله جواي ندم الحصل في الشهور الفاتت بي سببنا خليني أعيش طبيعيه وما تزكرني بالحاجه دي بتهلكني ..أنا عارفه اني غلطت بس والله تبت ارحمني .... قلت ليها تبيان اشربي الموية دي وأهدي واسمعيني ..هدت شويه ... عاينت بعيد وقلت ليها ممكن عشرة دقائق من وقتك احكي ليك فيها ! مشت معاي بره ...قعدنا في مقاعد بعيدين من بعض قلت ليها وانا بعاين بعيد .. نحن الاتنين غلطنا أكبر غلط !.... حكيت ليها تفاصيل الحصل من تلاته شهور للآن بي سببنا ..كانت بتسمع في كل كلمه وتبكي.. لحد ما كلمتها بي قصه الطلاق مسكت قلبا وقالت لي لا ما تقولا 💔خربنا بيت احنا الاتنين ... لاحولا ولا قوة الا بالله أنا ربنا حا يغفر لي كيف 💔 قلت ليها ما حصل يا تبيان بس للأسف قريب حا يحصل اذا ما لقينا حل ..هند طلعت من البيت ليها 3 شهور واكتر ...رافضه تقابلو ...وحتى رافضه انها تتكلم أو تشوفو وطالبه منو الطلاق ! شايفه غسان بقى كيف ؟! ..غسان كل يوم بمش برقد يحرسا عشان ما تقعد براها ! .هلكان وبالو وبعيد ومنكسر تبيان أنا شفت لأول مرة غسان ببكي أنا كل يوم عن يوم بكره نفسي اكتر. .. نحن خلينا الشيطان يلعب بينا وخربنا بينهم ... ماف اي زول قادر يقنع هند ترجع ... وقفت على حيلا وقالت لي وصلني بيتا يا امين .. وديتا واتحركت وقفت بعيد ..لحد ما جات وقالت لي انو اتكلمت معاها وما أدتا اي رد ... مر كم يوم على مشيتا لي هند ...وماف اي شي اتغير للآن ...حاسي بي نفسي سئ شديد أنا لي يد .. والمشاركه الاكبر في الحصل دا .. لو انفصلو ماغسان بس الحا ينكسر أنا حا انكسر اكتر منو لأني حا أكون السبب في كل دا .....يوم لقيت تبيان في الشارع ووصلتها في طريقي .من وصلنا الشركه ..غسان كان بره جمب عربيتو سلمنا عليهو وعاوزين نخش قال لي امين دقيقه عاوزك في موضوع ! ... ابتسمت وقلت ليهو اتفضل .. عاين بإتجاه ما كانت تبيان ماشه وقال لي ... بتمنى تخت حدود وماتمشي معاها ! قلت ليهو غسان ماف بيناتنا اي حاجه والله ولا تفكر انو أنا وهي لسه بنخطط عشان نضركم مسكني من كتفي وهو بقول لي امين ... بطِل الشك الجواك دا ...أنا ماقصدي ليك الفي راسك .. بس ما صاح تخلو بي بت ! وماف اي ضرورة قصوى الحاجة دي ... ماف ضرورة تخليك تختلي بيها وتوصلا مكان وفي طريقه انها تركب مواصلات عامه ... معليش إذا معاك كم مرأه ممكن تركب ..لاكين براكم ..مابجوز ...ولا برضي ربنا .. ماخلا رجل بامرأة الا كان الشيطان ثالثهما ! حاول راعي ربنا عشان يرضيك وبتمنى كلامي دا تتقبلو مني كنصيحه من اخ لي اخوهو الصغير البحب ليهو الخير ...صدقني يا امين الدنيا دي فانيه ! خلي عندك تحكم في نفسك .. وحاول اهجر اي حاجه حرام ... غض البصر ..بقدر الإمكان ...النظرة الاولى ليك والتانيه عليك ... وقيس على الحاجات الباقيه ربت على كتفي وهو بقول لي ربنا يصلحنا ويهدينا طريق الرشاد .. مشى ...وخلاني بفكر في كلامو ! أنا طول عمري من سن ال١٩ سنه دخلت في القصص دي ....اي واحد عندو حبيبه وأي واحد بطلع ينزل معاها كنا احنا الشباب بنتباهى بعدد البنات المعانا ! . وأي واحد بكون عندو كم واحده ...بجرب مع دي ويطلع مع التانيه ..ودي كانت مفخرة لينا الحولينو بنات اكتر منو .... بنقعد في الجلسات وماعندنا سيرة غيرهم ... نطلع حدايق...نمش مولات ...نتفسح بالعربية ونضحك وايادينا بتضرب في بعض .. عمري ما فكرت أو انتبهت لي غض البصر ولا حتى للخلوة .. حاسي نفسي في غفله شديدة كنت ... حاولت من اليوم دا اني اتغير ... ابدا من اليوم ...ماقدرت إذا جات بت ماشه ما بقدر اكسر عيني ...كتير ...اتعودت اطلق بصري طوال السنين الفاتت ..فأكيد حا يكون الأمر دا صعب .. بقيت احس نفسي لازم انصلح عشان ابقى زي غسان .. بتزكر تفاصيل الحصل قبل كم سنه واحنا بنجوط مع بعض وانا بقول ليهم اني راجل . ما طفل لسه .. يادوب ركزت في الكلمات الكانت وقتا ... (راجل؟! ...انت لسه مراهق ساي وما قادر تتحكم في نفسك ! تصرفاتك تصرفات زول ما مسؤول ولا بتمد للرجاله بصله ..واحد مافاهم للرجوله غير كلمه أنا راجل ... اذا ما بقيت زول مسؤول بتراعي نفسك واحكام ربنا تمشي المسجد وتصلي عاق لي امك وابوك وما رحيم مع اختك ..ولا عندك هدف ..وينو شغلك ! وينا مسؤليتك شفت ليك راجل بجد ماعندو هدف غير الرحلات والحوامه مع البنات ..وينا رجولتك وانت بتنتهك حرمات الله ؟! كنت لحظتا عاميني الغضب وماعندي في رأسي اي كلمه غير اني راجل ...الشيطان كان خاتي حائل على قلبي وعقلي ما عندي تفكير الا في الحقد والشر .. كأنو الكلمات ديك بفهما لأول مره ... لأول مرة افهم الفرق بيني وبين غسان .. فرق السما والأرض ! أنا قدامي كتيير عشان ابقى زيووو .. ما هي مظاهر وبس وآني بقيت ! غسان الكلام دا قاعد في قلبو وبعملو بي اخلاص .. لو كان يعملا مظاهر كان لقى فرصتو واتفشى فيني يومتا واحنا ما كان معانا زول بس عاملني بكل رحمه ..نصحني بعد مشت تبيان عشان ما يحرجني جنبها وفي نفس الوقت عشان يصوبني ..وداير لي الخير. . رغم انو كان عادي يعمل فيها انو هو فاهم اكتر وينصحني جنبها عشان تقول انو زول ملتزم وكويس ... من بعد طول الزمن دا كلو ادركت متأخر انو غسان انسان كل الصفات الكويسه هو شايل منها .. حا اهذب نفسي عشان ابقى زيووو وابقيهو قدوة لي .. #أحمد كل حاجه كانت سيئة ... قاعد عاطل ...لا عندي واسطه تدخلني شغل بي شهادتي! ولا قادر ارجع اشتغل نفس الشغل الكان فيهو رزقي ... بفكر كيف بسبب الحاجه دي فقدت هند! احتراما لي وحبها ! كانت بتعتبرني أخ كبير ليها وبترتاح لي .. كيف بقيت انسان سئ للدرجه دي ! وفكرت فيها تفكير زي دا ! ... عارف انو القلب ماعندنا عليهو سلطان ! بس العارفو اكتر انو اي زول بقدر يهذب نفسو وعواطفو!... رغم اني حبيتا وجيت اتصدمت انها اختي بالرضاعه محرمه عليي ..حرمة مؤبدة حتى .. اتملكني الحزن ...رغم اني قلت طول السنين دي اني ما حا اتأثر بس اتأثرت بيها وعرفت انو الشعور دا ما اختفى بل زاد اكتر بعد شفت غسان وكيف طاير بيها ! إحساس الحقد الاتملكني وانا بشوفو ناجح وعندو وعندو وفوق لي دا عندو مكانتو واخرا هند حسدتو على نعمه اداها ليهو ربنا ونسيت نفسي ونسيت الاخرة ! خليت الشر يتملكني وبقيت انسان مافي في قلبو غير اتنين ...الحسد والقروش بقيت أعمل اي حاجه عشان أرضي غروري .. جليت قبل شهر من حادث ! عربيه جاريه بي سرعه لو ما واحد سحبني كنت حا اروح فيها ! وعيت على نفسي يادوب ... صوت العربيه وارتطاما القوي خلاني افكر في الاخره أنا لو مت كان حا أمش أقول شنو وقت ربنا يسألني ؟! عمرك في ما أفنيته! في حب محرم مفترض اطهر قلبي منوو في حقد وتمثيل ظاهري وخافي باطني الأسود في أخت الراجل المابعرفو وبسبب غرور مني وحب لي اني أكون الأفضل وشعور التكبر ..لعبت بي عرض بت بريئة وشوهت سمعتا! ... بتذكر في ملامحا وبرائتا بتغني في فديو ليها ولي صاحباتا أكيد توري ليهم لعبت بي الفديو دا ونشرتو لي الاااف الناس .. أمش أقول لي ربنا اني سرقت شقى عمر واحد ما عمل لي اي شي ...سرقت مشروع تعب عليهو مده طويله ! بكبسه زر دمرت كل حاجه وراميهو الان في ديون لا ليها اول ولا اخر ! ... أقول لي ربنا شنو ؟! استخدمت موهبه زي دي في عصيانو في هتك اعراض الناس ... في تدميرهم .! في التجسس ! حاسي نفسي كنت في غفله كبيره 💔بعد كل العملتو دا ربنا يديني فرصه زي دي ..أطلع من الموت بي اعجوبه ! حاسي نفسي جبل سيئات وماشي على الارض غفله سنوات طويله في الذنوب ! ربنا حا يقبل توبتي ! ... وانا بتصفح في التلفون يجي قدامي فديو الشيخ بقول ربنا بغفر كل الذنوب ...الا حقوق عبادو ... الا الظلمتو يعفي حتى بعداك ربنا يغفر ليك .. ربنا ما بظلم زول ...رجعت لي نقطه الصفر ... حسيت بي الدنيا كلها لافه في راسي .. بقت تجيني كوابيس والنوم جافاني ... ماقدرت اقعد اكتر من كده ! أنا ضامن اعيش في الدنيا دي كم ! حا أمش واعترف ! حتى لو سجنوني أو اعدموني حتى أكون مت وانا بحاول اتصلح يارب ... طلعت من البيت ..وانا جواي صراع حاد ! .. الأول قلبي وبقول لي ربنا ! الموت ! الذنوب ! التوبه وعقلي البقول لي حياتك حا تقيف ..غسان حا يخليك تعترف عشان يرد حقو ...وسليمان حا يمسح بي كرامتك الارض . والشرطه من زمان بتفتش ليك ..انت كده كده حياتك حا تقيف احسن ليك بطل البتعمل فيهو دا وامشي استر نفسك .. خوف ..تردد ..هلع ...بس جواي كان في حاجه بتخليني أمش ...لحد ما لقيت نفسي جمب الشركه .. واقف وانا بعد في لحظاتي ... ياترى الحايحصل لي شنو ... على اقل تقدير ممكن انضرب منو ! .. اتنهدت بألم وانا بقول خليت الشيطان يغشني ودي النتيجة ...عشت طول عمرك بتأذي في غيرك وجى دورك ... دخلت جوه وقفوني بس قلت ليهم اني أخو هند كلمة غسان وحا يدخلني ... 5 دقائق وجاني هو سلم عليي ...وقال لي اتفضل .. دخلت معاهو وانا بعاين لي غسان ..شكلو متغير وجسمو بقى نحيل بس الهيبه والوقار الفيهو لسه باقي ! ..دخلت معاهو مكتبو .. قال لي قهوة ولا شاي ! قلت ليهو لا شكرا ليك. قال لي كيف احوالك ..قلت ليهو تمام الحمدلله ... ما عارف ابدا كيف ! مهمه كانت صعبه لي غمضت عيوني وفتحتها وانا بعد لي ٣ وقررت انطق اخيرا والبختارو لي ربنا كلو خير واستاهلو .. غسان ...للأسف الشديد أنا ورا الوضع الوصلت ليهو شركتكم دا ...! أنا الاخترقت حاسوبك ياغسان ورسلت التفاصيل للشركه ديك وقبضت تمنا كانت العبره بتخنقني وماقادر حتى أعاين في وشووو أكيد حا يكون اتصدم ...كيف يظن انو اخ يعمل كده مع زوج اختو أنا حتى طعنت هند في ضهرا اتكلمت كتير بكل ندم واعتزرت وبعد اكتر من ربع ساعه كلام ووصفي ليهو كل السوء الفيني الهدوء الغريب الكان سائد على المكان خلاني اتجرأ وأعاين بإتجاهو عشان اشوف ملامح وشووو. هنا حسيت بي حاجات غريبه وانا بشوفو ... ما كانت في ملامحو اي تعابير كان بارد برود التلج ! وكأنو انسان بحكي ليهو في قصه زول تاني ما بحكي ليهو عنو هو .. كنت عرقان وبتلعثم ودموعي بدت تتكون وانا بتكلم عن السوء الفيني دا بعد ماكان ظاني فيني خير طلعت اسوأ ما يكون ! .... غسان أنا آسف شديد ..خجلان من نفسي .. قال لي احمد اعتزارك حا يعمل شنو ؟! قلت ليهو وأنا بعتصر قلبي من الألم ..صدقني حا أصلح كل شي ...جاهز اني اقيف في واحد من المؤتمرات واعترف بي اني أنا السرقتها ..وشالتا الشركه ديك ...جاهز اني اتكلم ليك قدام كل الموظفين الهنا وحتى المستثمرين ..جاهز حتى اني اعترف واسلم نفسي للشرطه ! اي حاجه أنا مستعد ليها يا غسان. . قال لي تمام ! قوم الان معاي وتقيف جمب كل الموظفين البره ديل وقول القلتو دا هسي ...وانا حا اصور كل دا للمستثمرين وحا نبثها في المؤتمر الجاي ولازم تزكر كل التفاصيل ... قلت ليهو جاهز ...وحا أعمل اكتر من كده عشان أصلح غلطي ! .. وقف على حيلو وبقى ماشي وقف جمب الباب وقال لي ارح ...اتحركت بإتجاه الباب وانا عازم على حاجه واحده ! اني اليوم لازم أصلح كل شي افسدتو حتى لو سمعتي باظت ..تبوظ هنا احسن من تبوظ صلتي بربنا ..حا اعترف بكل دا ..في سبيل انو ربنا يغفر لي ....اتحركت خطوة ورا خطوة لحد ما وصلت الباب عاوز اطلع غسان مسكني من كتفي! لفتني عليهو وقال لي وأخيراً ...ابتسم في وشيي وهو بقول لي منتظرك لي قريب ال4 شهور .. منتظرك تجي تعترف بي دا ... غسان عارف! حسيت بي ضربات قلبي بتزيد اربعه شهور كان عارف بي دا ...هند هي الورتو ! .. قال لي أنا يا احمد ما منتظر منك تمش تفضح نفسك ! كنت منتظر اشوفك ضميرك حا يأنبك ولا لا متين حاتتوب! اصرارك لي انك تصلح غلطك الان وموافقتك بي طلبي ان اثبتت حاجه فهي اثبتت صدق نيتك ..ودا المحتاج ليهو أنا ... قلت ليهو غسان ..أنا حا أصلح كل حاجه وامش اعترف قال لي ليه؟! حا استفيد شنو اذا أخو زوجتي عمل كده ! صدقني مستحيل أأذي هند! ومستحيل أدمر حياة انسان عشان أصلح حياتي أنا حا اعفي ليك عشان ربنا ...ومتأكد مقابل الحاجه دي ربنا حا يفتح لي باب تاني عشان يطلعني من المأزق دا . . كفاي اعتزارك ...وتوبتك ...كفاك ضميرك البئنبك وعارف شنو يعني تأنيب الضمير ! الضمير أكبر عقاب ... حسيت نفسي صغير قدامو ... حسيت نفسي جمبو ولا تامي ضفرو! .. بفكر في الآخرة ...بفكر في هند ومشاعرا حتى اكتر مني ! هند ياترى هي الطلبت منو يعمل كده ؟! وعشانا قرر ! ... ربت على كتفي وعلى وشووو ابتسامة عريضه ! حسستني بالبؤس اكتر ..وحسستني بي فعالي السيئة معاه ...بكيت وهو لسه بربت على كتفي وهو بقول لي حصل خير .. صدقني يا احمد اعترافك الان حا يضرك انت وحا يضر هند ويخليها حزينه قلت ليهو أنا بعمل دا عشان افرحك قال لي وهو ببتسم بيأس صدقني ماف حاجه حا تفرحني غير....سكت قبل يتم الكلمه .. جاتو مكالمه وطلع .. وأنا قاعد جى داخل واحد وهو بقول استاذ غسان طلع وين ..الملامح المستحيل انساها سليمان ! .. قشيت دموعي وانا ما قادر حتى اجاوبو ..شايف قدام وشيي نفس الزول الأذيتو وهو ما عمل لي اي حاجه ...اذيتو حتى بدون اي سبب أذى بس عشان أرضي غروري! ... عاين لي ومد لي كباية المويه وهو بقول لي اشرب واهدا ان شاء الله خير ! .. أسوأ إحساس قابلني الان ..حاسي نفسي في المكان دا أنا السئ الوحيد .. شلت منو المويه شربت جغمتين ..قلت ليهو خير و.طلعت من هناك بدون ما أقول ليه اي حاجه تانيه ..كنت اضعف من اني اعترف ليهو بالحصل ! طلعت بسرعه وانا حاسي في جبل على قلبي لسه ما نزل ولا عمرو حا ينزل ... #غسان خلصت مكالمتي وجيت راجع لقيت احمد ماف .. بس الكان في سليمان ... قلت ليهو الكان هنا طلع ! .. قلت ليهو ايوه بس كان متأثر كده مالو عندو مشكله ولا حاجه ...قلت ليهو دا أخو هند ... قال لي ايوااا ماشاء الله سلمني ورق وقال لي عاوز اسألك يا استاذ غسان وبتمنى تجاوبني !.... #هند مر كم يوم بي نفس الروتين ... الليله كان يوم جية نهى وخالتو سوسن ..حضرت اكل وبقيت قاعدة . بعد مسافه طلعت مشيت الدكان جبت لي كم غرض ومن دخلت البيت كده اتحركت خطوتين الباب دقا وراي ..أكيد حا يكونو ناس نهى فتحت الباب وكانت الصدمه ! . احمد ..حاولت اقفل الباب مسكو بي يدو ودخل وقال لي وهو بمسك يدي وببكي زي الطفل وجسمو بتهز أستمر في الحاله دي بدون كلام اكتر من 5 دقائق قلبي وجعني اكتر ...بكى بحرقه 💔 وهو بقول لي انا سئ..أنا اسوأ انسان على الارض دي ياهند....بقى يبكي مرة ويحكي مرة تانيه كنت زعلانه منو شديد على العملو دا وانا بقول ليهو فكني .. انت دمرت غسان وسرقت تعبو في المشروع ما تعتزر مني أمش اعتزر منو ..قال لي مشيت والله مشيت💔اعترفت بي كل حاجه💔وطلبت منو السماح وعدتو اني مستعد اسلم نفسي الشرطه 💔 طلب مني اني أمش واعترف جمب كل الموظفين والمستثمرين قلبي بقى يوجعني اكتر بعد سماعي الكلام دا غسان من حقو يعمل كده 💔بس بقيت من ناحية خايفه على احمد ..وقلبي مقطوع .. قلت ليهو وانا بظهر اني ما مباليه ..ان شاء الله بعد دا تقدر تكفر اغلاطك بي اعترافك قال لي وهو بزيد بكى ياريت لو خلاني أعمل كده يمكن ارتحت..حكي لي تفاصيل الحصل كلمه كلمه لحظه بلحظه وانا حاسه بي نفسي مبعثرة. ..مستغربه وضيق شديد متملكني ... خلص كلامو وهو بقول لي انا جمبو بقيت صغير شديد ...كان بنتفض وببكي وهو متأثر شديد بردد اعفي لي ..غسان عفى ليهو بعد كل الأذى دا عشاني ! ..كنت حاسه نفسي راسي لافي .. غسان عفى ليهو ..رغم العملو ...هو اخوي معقوله أنا ما اعفي ليهو وهو واقف جنبي ببكي بالتأثير دا .. حاسه من جواي انو احمد ندمان واتغير مسكتو وانا موجوعه وجع ما طبيعي ... من كل الفيني والعلي.. من تفاصيل اخر احداث حصلت في ال٣ شهور دي وانا تعبانه ومرهقه واتغدر بي من الكل ! .. مسكتو وانا بقول ليهو عفيت ليك يا اخوي عفيت ليك بكى بحرقه وهو بقول لي خذلتك وبدل ما اكون ليك السند بعد ربنا كنت ليك سبب الأذى ... كان يوم مليان مشاعر كتيره ملخبطه ... احمد مشى بعد ما أخد قعدتو معاي ..كنت مفتكرة غسان هو الكلمو...بس قال لي انو كان ماري على واحد صاحبو هنا ولمحني بخش البيت ! ..ولحقني .. صراع حاد كان متملكني ..صوت قلبي وعقلي الرسائل الجمبي الان ..كلام تبيان ..احمد ..وجود غسان اليومي خلال ال3 شهور ..وجواي سوال واحد غسان بالنسبه لي شنو ؟! ... قطع حبل أفكاري دق الباب والمرة دي كانت نهى وخالتو سوسن.. من جو كانو بضحكو وبتونسو معاي .. وخالتو سوسن وهي بتقول لي قايمه أخت الاكل .. قالت لينا أنتو اتونسو وانا بحضرو ليكم .. بدت نهى تحكي لي عن تفاصيلا وفجأة سكتت مسافة وقالت لي هند أنا قبل كده كنت عاوزة اسألك عن حاجه ..بس اتراجعت ..بتمنى يكون بيناتنا الكلام دا وعاوزة استشيرك في موضوع قلت ليها أكيد يا نهى اتفضلي بدت كلاما وهي بتقول لي بصراحه ياهند أنا ارتبطت مع واحد كان زميلي في الجامعه لينا حكاية تبع 3 سنه مع بعض. .. وشايفاه بهتم بي واي حاجه ! بس ماعارفه في بعض الأحيان بحس اني غلط..وانو لازم اقيف ..بس اهتمامو بي وتعلقي بيهو مخليني اغيير رايي ياهند عاينت بعيد وانا بستذكر حياتي السابقه ... الحياة اللي أدتني درس عشت تفاصيلو واقع ... ابتسمت وانا بقول ليها ...بتحبي ؟! قالت لي ايوه بحبو ... قلت ليها حاجه واحده يا نهى اتعلمتها ... كل حاجه بتجي بي الحرام عمرا ما بتكمل وحتى لو كملت بكون بعدين مافيها بركه ... اذا بجد بتحبيهو وهو كمان ...صومو عن الحرام دا وتطلبو من ربنا المغفرة ... خليهو يتقدم ليك ..ويعمل خطوة رسميه وكملو تفاصيل الحب دا في بيتكم بعدين ..الرسول صلى الله عليه وسلم قال لا أرى طريقاً للمتحابين الا الزواج ...الحب في الاسلام ما حرام ..كل الناس بتحب ...بس الحاجات البتجي قبل ما يتتوج الحب دا بزواج يبقى حرام يانهى ... قولو يارب تبنا ليك ...كلميهو انو كده ماصاح 3 سنه فترة طويله يا نهى.. بتمنى انك تعقلي وتشوفي حياتك وين ..وتحددي معاهو الان ..هل هو عاوزك بجد لي قدام ومستعد يتقدم ويرضي ربنا ! ويرضيك .. ابتسمت وهي بتقول لي كلامك صاح ياهند ... حا أعمل كل القلتيهو لي بالحرف. ..... #غسان... مكالمه من البنك ...استاذ غسان الشاذلي ..طوال الفترة دي ما جيت ولا شهر اديتنا دفعه ..للأسف نحن اذا ما استلمنا حاجه لسه كمان ومع انتهاء المهله مضطرين اننا نرهن العربات والعقارات حقتك للبيع زي ما كان اتفاقنا في الورق! انتهت المكالمه وانا حاسي كل حاجه بتتبخر قدامي أنا عاجز الان عن اني أعمل حاجه انقذ بيها الموقف ! مشتت ! تايه وماعارف حا أعمل شنو .. مسحت على وشي ناديت على سليمان انو يكلم كل الموظفين بي انو بكرا الصباح حا يكون في اجتماع ... اتصلت على تلفون ابوي ، بس كان مقفول .. اتصلت طوالي لي أمي لأن زي دي الساعه بكون في البيت عشان تديني ليه ..ردت سلمت عليها وقلت ليها ابوي جمبك قالت لي لالا احنا الليله مع هند قلت ليها هند كيف طمنيني عليها ..قالت لي كويسه الحمدلله قاعده بره مع نهى وانا بعمل ليهم في الاكل ..حسيت بالحنين ليها ! ..قلت ليها أمي ..شكلي الليله خلي نهى تقعد معاها ... قالت لي طيب تمام ..داير من ابوك حاجه كان بقيت احكي ليها الحصل ..قالت لي لاحولا ولاقوة الا بالله ربنا يفرجا من عندو يا غسان .. ربنا يفرجا عليك ياولدي .... قفلت منها وانا بفكر في هند ومن ناحيه تانيه بالوصلت ليهو دا ... #هند جى الليل صلينا العشا ..خالتو سوسن رجعت وقعدت معاي نهى ...اتونسنا شويه بعدا رقدت نامت .. مشيت عاينت بفتحه الباب ما كان جى بقيت كل بعد كم دقيقه اراقب ..جات الساعه 10 وهو لسه .. دخلت جوه وما جاني اي نوم .. بقيت قاعدة وبفكر في كل الحصل الأيام الفاتت أسرع الأحداث دي تفاصيل أمس واليوم وكل الكان بحصل دا ...وانا لسه في رأسي نفس السؤال ..تايهه ومشاعري ملخبطه وبفكر .. مشى الزمن ودقت الساعه 12 مشيت و عاينت بإتجاه الفتحه لقيتو .جى ..ماعارفه المشاعر الاتملكتني لحظتا كانت شنو ! .. بدون ما احس بي نفسي فتحت الباب ووقفت عيونا اتلاقو ! ... ابتسم في وشي وهو بردد هند..حسيت نفسي مبعثرة شديد ..دا شنو البحصل الان دا ...قفلت الباب بي سرعه وانا ضربات قلبي بتتزايد اكتر واكتر وحاله من عدم الفهم لي اي حاجه بقت مرافقاني.... #غسان قمت على صوت أذان الفجر ومشيت صليت ... بفكر في الليله دي كيف كانت ... حسيت باليوم أخف شويه وانا بفكر انو هند فتحت الباب وشافتني وهي بتعاين لي كده ... اشتقت ليها شديد ابتسمت وانا من جواي فرحان ماسك نفسي منها بالقوه .... دخلت مني ..بدون ما تقول اي كلمه ..وخلتني مبعثر قعدت طويل بفكر فيها لحد ما مشى الوقت وجات الساعه 2 ..نمت شويه بس لحد ما قمت على صوت الآذان صليت ومشيت البيت . لبست ملابسي واتحركت على اتجاه الشركه.... فضل 3 ساعات على الاجتماع .... وصلت هناك ... دخلت المكتب وانا بفكر في الحا يحصل اليوم ... الزمن كان ماشي بي سرعه ... لقيت نفسي بعد 3 ساعات سليمان جنبي وهو بقول لي كل الموظفين اتجمعو اتفضل يا استاذ غسان .. اتحركت وانا حاسي بي نفسي لأول مرة ما مستعد ملخبط مشتت ...دخلت وانا حاسي بي نفسي تعبان شويه ...وحاسي بي صداع ... دخلت ولقيت كل الموظفين متجمعين ... وقفت بعد سلمت ...سكتا مسافة مسحت على راسي وانا بقول ليهم زي ما عارفين أنا خسرت المشروع حقي والبنك مطالبني بي دفع القرض الاخدتو .......ولسه المستثمرين ... بصراحة كده الاجتماع دا ..عشان أقول ليكم اني .. عاوز اديكم إجازة من الشغل ..الشركه حاليا مارة بظروف سيئة ..وما حا اقدر للأسف اديكم مرتباتكم الفترة الجايه دي ومستحيل اظلم زول ..مرتبات الشهر دا حا تنزل في حساباتكم .... مامعروف البحصل في الأيام الجايه شنو ! ولا حتى مصير الشركه نفسو ! بس كانت فرصه سعيده اني التقي بي اشخاص مخلصين زيكم كده وناس بحبو الشغل وملتزمين كده أنا ما بعتبركم موظفين وبس أنا بعتبركم اخوان لي في الله كنت مبسوط بوجودكم معاي هنا وزعلان لاني بودعكم الان .... اي واحد فيهم كان بقش في دموعو واتقلب من اجتماع لي بكى .. اول واحد وقف سليمان وهو بقول لي انا يا استاذ غسان معاك ..ماعاوز والله ولا تعريفه لما نطلع من القصه دي سوا أنا معاك ...وقف بعدو عماد وهو بقول لي وانا والله يا غسان قروش الشهر دا زاتو ما عاوزو ..لحد ما نطلع الشركه لي بر الأمان ! .. فاروق...تبيان...مصطفى ...كان واحد ورا واحد بقيف وبقول لي أنا معاك ..دموعي جرت لا ارادياً وانا بقول يارب انت رحيم كريم . .كانو واقفين جنبي وبقولو لي مادام بتعتبرنا اخوان ليك ..من حق الاخوان أنهم يقيفو جمب بعض ...ردد سليمان منو بضم صوتو لي صوتي ! كل واحد كان بقول أنا معاك ...لحد ما الكل رفعو يديهم وقالو لي نحن معاك ... ابتسمت وانا بعاين ليهم وحاسي بي نفسي عاجز عن شكر نعمه ربنا دي ..دقائق معدودة واسمع صوتا وهي بتقول وانا بضم صوتي لي صوتهم أنا معاكم ... اتلفتا بإتجاه الباب وانا حاسي نفسي كأني بحلم ! هند ! ..معقوله ..شكلي بحلم ... بشوف تبيان وهي بتجري عليها وتحضنا لا أكيد ما قاعد أحلم .. هند الان واقفه هنا على أرضية الشركه حقتي بعد شهور ...حاسي نفسي ماقادر اقيف من الفرح .. اتقدمت بخطوات بطيئة جرت كرسي وقعدت وهي بتقول بعد كل الدعم دا يا استاذ غسان .. ورينا ! خطتك شنو ! .. كان الفرح المتملكني بي قعادا دا ووقفتا الان اداني قوة كبيره ..حسيت نفسي لأول مرة ..عندي الشغف ..حاولت اتماسك وامسك مشاعري شويه وقفت وبقيت أقول ليهم ..الوقت صغير شديد.. والشروع فشل أكيد بعد تمت سرقتو ! لو تمينا فيهو احنا حا نكون كأننا بنقلدهم وما حا يكون في اي جديد وحا نفقد سمعتنا ..حا تكون شركتين .. بس نفس التفاصيل والافكار ...مفترض تغير المشروع بس المشكله التمويل ...والقرض والديون البقت والمستثمرين ..بقيت احكي ليهم كل التفاصيل والمشاكل دي ..وأي واحد بفكر ومركز في كلامي وكل مرة واحد يرفع يدو يقترح عليي مشروع بكون حلو بس في نفس الوقت ماعندي الان ليهو امكانيات ...وقفت هند على حيلا وهي بتعاين لي بي ثقه وقالت ..احنا ما حا نغير رأينا عشان زول ..نحن حا نواصل في المشروع دا ... كلهم بقو يقولو ليها هند زي ما قال غسان ما ممكن لأنو كدا حا نكون قلدناه .. التفتت عليي وقالت لي أنا عندي فكرة بس محتاجه شوية وقت ..وبتمنى منك يا استاذ غسان انك ترجع تتكلم مع المستثمرين وتقنعهم وتحاول تشرح ليهم انهم يكملو في المشروع .. ... كنت مستغرب في كلاما بس أنا بثق في هند شديد .. نص ساعه تانيه وانتهى الاجتماع وأي واحد طلع بره وهند عاوزة تطلع وقفتها وانا بقول ليها مامتخيله اني مبسوط قدر شنو بي رجعتك دي ..ياهند أنا مسكتها وحاوطتها بي ايديني ما مسكتني ولا حتى قالت لي كلمه رجعت لي ورا وشفتها بتعاين بعيد يمكن هي رجعت بس للآن في حاجه جواها ... ابتسمت وانا بقول ليها الشركه نورت .. ومنتظر اسمع فكرتك بعد تحبي تكلميني... عاين بإتجاه المكان ..قفلت الباب .. وقالت لي بصراحه ..الفكرة الان عندي ... بس في الوقت الراهن نحافظ على السريه لحد ما نعلن القصه دي ...لأني خايفه يكون في جاسوس لي ناس الشركه ديك ..أو حتى واحد يشترو منهم ويعرفو عن طريقو حاجه تضرنا ... المهم حا نكمل في المشروع بس حا نبدع فيهو المشروع الأول كان حا نستخدم فيهو الالات التقليدية عشان نضفي لمسه الملابس القديمه المصنوعه يدوياً وكنا حا نستخدم اقمشه اقل سعر عشان نخلي كل الناس تقدر تشتري ... حا تكون صناعه يدويه وبتاخد وقت ...أنا حاسه الحصل دا لي خير ...يا غسان .. حسيت يادوب انو الافكار بدت تجيني ..هند.نبهتني لي حاجه مهمه .. قلت ليها ممكن نعمل قسم للصناعات اليدويه ! بس كمان ممكن نزيد غيرا...قالت لي بالضبط .. نجيب الأليات الحديثه .تابعت ليها (انظمه إدارة الانتاج ) تصميم ثلاثي الابعاد ...أكثر تعقيد وجمال سرعه في العمل ! وانتاجيه عاليه .. قالت لي وبالنسبه للأقمشه حابه نزيد كم نوع اقمشه ملابس بي اقمشه رخيصه عشان الناس المامستطيعه تشتري واقمشه تانيه اضافيه تكون نفس اللبسه بعدة اقمشه النساء زي الحرير ..... ممكن نعمل للملابس الرياضيه برضو بولستر مخلوط نضيف اقمشه المخمل والكشمير ..ووممكن نستخدم الصوف برضو ... ممكن نعمل برضو قسم خاص بالزفافات ! دي فكرة ما كان في المشروع السابق وبدل الرجال ... تصاميم فساتين مختلفه بعدة اشكال .. واقمشه مختلفه من الكشمير والمخمل والحرير يكون في فساتين للطبقه البرجوازيه بي مجوهرات حقيقيه ..واقل مزينه بالكريستال ...واقل شويه مزينه بي الخرز أو المجوهرات الصناعية ... الحاجه دي حا تخلينا توب ياغسان .. كنت فخور وانا بسمع في كلمات هند دي ! .. بدت من اليوم دا رحلة الشغل في المشروع دا .. بحزر شديد وبناس محدودة بثق بيهم .. من ضمنهم كانو امين ..وتبيان سليمان .. أما التفاصيل الصغيرة كانت بيناتنا أنا وهند والمصممين ...المكان كان جاهز والحاجات منتظرة التأكيد عشان تتشحن تجي السودان. طلبت تمويل أكبر المرة دي وانا كلي ثقه انو حا انجح ..إحساس داخلي كان بقول لي انو ربنا مستحيل يضيعني ... شهر مرا واحنا شغالين في كل التفاصيل دي .. هند كانت بتساعدني كتير في الحسابات كان في بيناتنا حدود لسه ما انكسرت .. وحاسي انو هند للآن شايله حاجه جواها بدليل انها لسه ما رجعت البيت .. أستمر الحال على حالو ..بتجي الشغل واي حاجه بس ماكان بيناتنا في اي كلام غير في الشغل .. بس الحاجه دي بالذات كانت بتسعدني عالأقل انها رجعت ولو بسيط لي ... كنا شغالين والزمن بمشي وبمشي بي سرعه وأي واحد في الموظفين كان شغال بي اخلاص .. #مرور_شهرين #هند رجعت ...بعد المكالمه اللي سمعتها وانا داخله على المطبخ ..غسان كان بحكي عن المشكله الحاصله معاه حسيت بي قلبي بيوجعني ..... فكرت بي حاجه واحده غسان وقع في المشكله دي بي سبب اخوي أنا ..سامحو والان هو واقع في ورطه ..الليل كلو النوم ماجاني وانا بفكر في حاجه اساعدو بيها وبقيت ادعي ... شوفتي لي غسان لحظتا خلت احاسيس كتيره مؤثرة تطلع جواي صاح أنا زعلانه منو بس ما لي درجة اني اخليهو في عز حوجتو ..غسان عمل لي حاجات كتيره والبحصل ما بسببو أنا مشكلتي مع غسان ما مع الشغل ..لو قدمت ليهو مساعدة ورجعت ما معناها اني خلاص سامحت... صحيت بكريتا على مكالمه من تبيان وهي بتقول لي هند غسان طلبنا كلنا في اجتماع الساعه 9 بتمنى تجي ..عليك الله ما تكسري خاطري .. صراع قوي كان بتملكني بين عقلي وقلبي وفاز التاني ...مشيت هناك ! ودخلت ... شوفة غسان ...تظاهري بالقوة وانا مليانه بمشاعر مختلطه الافكار الجاتني حسيتا كأنو ربنا الهمني ليها الهام عشان اساعدو بيها ... وكأنو عاوز يجعلني سبب .. تفاصيل الشغل .. مشيي كل يوم لهناك ما بقدر اكذب وأقول ما مبسوطه ..حاسه يادوب الحياة بقى عندها طعم ... بمشي كل يوم ..وبنشتغل بلقى متعه في دا ... بعد مرور الشهرين دي كنت بحن ليهو .. غسان نحف كتير واتغير وبقى هزيل .. بتزكر المواقف المرت علينا .. وانا بشوفو مرهق في المكتب وطوالي ماسك راسو ..بقيت كل ما اجي أعمل ليهو كباية قهوة.. رغم كل الحصل أنا جواي مشاعر ما قادرة اتجاوزا لي غسان ..مراقبتي ليهو بدون ما يعرفني ... اللحظات البتمر علينا واحنا يحصل بيناتنا صدام نظرات العيون وتفاصيل كتيره عشتها خلال الشهرين دي دعوات ..قيام ليل ... قبول عشرات المصممين والشغل بي الالات الحديثه وسرعه الانتاجيه مشاركه ناس عندهم خبرات اكتر قدرنا نطلع اول مجموعه ..وقدر يسجل المصنع دا والفكرة دي المرة دي ويحفظا بحقوق قانونيه .. رجع البنك واداهم تفاصيل الحصل وبفضل من الله مددو ليهو الفترة لي 6 شهور تانيه .. كانت حاجه كويسه شديد بتزكر للآن غسان وهو بسجد سجدة شكر وعيونو بتدمع ..... قاعدة الان في كرسي وانا بحضر في المؤتمر ..الصحفي ..لأول اعلان علني وتمويل للمكان ..... بعاين ليهو الآن وهو واقف عشان يلقي كلمتو وبفكر بي تفاصيل الحصل الصباح .. وهو شايفني لابسه فستان ورابطه حزامي وعامله ميك اب . .....قرب لي وهو ببتسم وقال لي هند عارفه البزعلني شنو صاح؟! طلعت الحزام بكل هدوء قال لي وتاني ؟! قلت ليهو غسان دي مناسبه خليني بيهو .ميك اب خفيف ..قال لي ما برضيني ..ماعارفه كان البحصل لي دا شنو مسحتو باس راسي وهو بقول لي ربنا يديمك ليا .. رجع لي ورا وهو بقول لي طالع كيف ؟! ابتسمت وقلت ليهو أنيق ..ابتسم لي مشاعري كلها اتبعثرت ... وعيت من التفكير دا بصوت غسان وهو بلقي كلمتو ببداها بالسلام والترحيب بالكل ... وبدا يتكلم عن المشروع كنت بسمع فيهو وانا حاسع نفسي من دواخلي مبسوطه ! ...مبسوطه انو غسان قدر يطلع من المشكله دي ... مبسوطه انو كل حاجه حا تتحسن .. بشرح ليهم بطريقه جميله شديد خلتني أنا أحب التفاصيل دي رغم اني أنا عارفاها قبل يعلنا ... بعد مسافة قال ليهم ختاماً أشر لي واحد يفتح الشاشه وهو بوصف بإتجاها وهو بقول ليهم دا شعارنا الحا يكون في اي قطعه تطلع من المصنع استغربت غسان ما جاب لي السيرة دي .. بقيت مترقبه اشوف ... فتحت الشاشه ومكتوب شعار كبير بالانجليزيه (HG Fashion) كل الناس كان بتصفق بحراره .. شكرهم وبعدا قاليهم عاوز اوريكم اسم التسميه دي بتحمل الحرف الأول من اسم زوجتي .. اللي ليها الفضل من بعد ربنا في اني اقيف قدامكم هنا والتصاميم دي تطلع النور... زوجتي دي هي الادتني الافكار ودعمتني في كل تفاصيل الشغل .بقولو وراء كل رجل عظيم امرأة عظيمه ... أنا بهدي النجاح دا لي زوجتي وحبيبتي وبت عمي وصحبتي وشريكتي في الحياة وفي الشغل نجاحي دا وبقول ليها من بعد الله لولاك أنتي ما كنت حا أكون واقف هنا اليوم ... كنت حاسه بي نفسي مبعثرة ..الااف المشاعر المختلطه ..بكيت وانا بسمع فيهو بقول عني كده .. الكل كانو بصفقو ... بعدها شكر كل الموظفين فرداً فرداّ.. أنتهى المؤتمر ..غسان وقف مسافه سلم واتصور مع كم واحد وجى وقف قدامي وهو ببتسم فتح ايديهو وهو بقول لي هند هانت ... بكيت ولأول مرة من بعد الشهور دي كلها ارتمي في حضنو وأبكي ..فقدتو ..اشتقت ليهو شديد .. طلعنا من هناك وكان سايق وماسك يدي ... مشينا البحر ... محل ما القصه ابتدت ...ووقفت ..رجعنا هناك عشان نحييها ... وصلنا هناك ..ابتسم في وشي وقال لي ..أنتي عارفة ما قومتك ووقفتك جمب العالم ديل كلهم ليه لأنك حاجه بتخصني ما بخلي كميه من الناس ديل يتفرجو فيك ...ولا ممكن أقبل واحد يصورك ..كنت حا أخرب المؤتمر وأضرب واحد فيهم .. ضحكت بخجل ..عاين لي مسافة وهو بتنهد تنهيده طويله وبقول لي ااااااخ لو تعرفي قدر شنو مشتاق اشوف الضحكه دي ...هند رجوعك لي بسطني اكتر من الوصلنا ليهو الان .مسك يدي وهو بقول لي آسف غلطان حقك علييي اعفي لي وامسحيها لي في وشي ... قلت ليهو سامحتك .. قال لي صافيه لبن ؟! قلت ليهو قشطه .. رجعنا من اليوم داك !... رجعت بيتو وكانو كلهم فرحانين برجوعنا ... بكى مختلط بي فرحه ..كان اليوم كأنو عيد .. لأول مرة احس نفسي مرتاحه ..وانوم وانا متكيفه ... الشركه بقت ماشه بفضل ربنا ... بيديروها غسان وامين ..كنا بنلقى طلبات كتيره في اقل من شهر كانت الملابس بتكون خلصت وننتج جديد .....كان ... بتزكر غسان بعد الفساتين انتجنا منها تصاميم كتيره عرضو عليهو يعمل عرض للأزياء دي رفض .. وهو بقول ليهم اعصي ربنا بعد أنعم عليي ! سمعتنا ،،وتصوير الازياء دي بدون ما ننشرا بصور بنات ولا شباب ..ربنا قادر انو يخلينا نتفوق بدون ذنوب .. الان ماف زول ما بعرف الشركه دي ... الارباح كانت كبيرة شديد .. بجونا ناس لي تصاميم ...ناس حتى من بره السودان بطلبو وبتتشحن ليهم ... القرض اتسدد في وقت اقل من 4 شهور . واتفتحت علىهم شديد .... كنا أنا وتبيان بنشرف على قسم البنات ... في خلال الشهور دي اقرب واحده بقت لي تبيان .. انسانه كانت بتقيف معاي وقفه كبيره لو تعبت بتجي تقيف في رأسي ..مصدعه بتعمل لي شاي مرات قهوه ومرات تمسد لي راسي ..بقت تجيني في البيت كل بعد فترة مرات تحنني ومرات تسرح لي شعري لقيت فيها صديقه حقيقيه لي ... كانت اعظم فرحه لي يوم امين قال عاوزا ... مرت التفاصيل دي ونحن بنطلبا من اهلا ... خطوبه اربعه شهور وبعدا قررو انهم يتزوجوا ... نهى انفصلت عن حبيبا ودخلت في حاله حزن بس كنت بهون عليها وبهديها لحد ما جيت وواجهتها وانا بقول ليها صدقيني ربنا ما منعنا من الحب المحرم دا الا لأنو عارف اننا بنات حساسات الراجل بقدر يعيش حياتو لاكين البت بتدمر وهي سمعتا البتتأثر ..ممكن عادي يقضي معاك سنين وفي الآخر يمشي يخليك ويقول انك ما نافعه معاه .. رغم انو ممكن تكوني اول حب ليك هو ..واول راجل يخش حياتك بس في الاخر ممكن يمش يعرس واحده تانيه طوالي بدون ما يتكلم معاها ! رغم انو لو عمل معاك كده من الأول كان صانك أنتي وصان نفسو...بكت كتيير ... طبطبت عليها وقلت ليها لو كان خيراً لبقى توبي لي ربنا وادعي بالاحسن منو وصدقيني حا ترجعي زي ما أنتي طاهره عفيفه ممكن هو يكون بقى ماعاديك كده بس ربنا لا ...ربنا بقبلك وبطهرك من ذنوبك... كنت اكتر زوله حاسه بيها لأني عشت شعور التخلي والخذلان دا ... #احمد قررت اني لازم اسلم نفسي ..اتعاقب في الدنيا قبل الاخرة...مشيت ووريتهم أنا منو .. بسبب الاعتراف ادوني عقاب مخفف 8 شهور ..مع دفع غرامه ... بقولو السجن بصنع الرجال ... اتغيرت كتير واتعلمت فيهو حاجات اكتر واتعلمت الاهم أمور ربنا ... بعد 5 شهور بس ..جاني واحد وهو بقول لي انت حر طلعت بي كفاله ! .. طلعت معاهو ولقيتو غسان بره.. شكرتو كتير وانا ممتن ليهو ..حتى الغرامه دفعا لي .. طلعنا بره وقال لي هند ليها فترة بتسأل عنك .. واجي ألقاك دخلت السجن ..ليه ..؟! شرحت ليهو كل الحصل وليه عملت كده ابتسم وقال لي وهو بضرب راسي ضرب خفيف عقل زي دا لازم يطلع بره عشان يبتكر ! ياغوست ابتسمت ليهو ردد لي أنا عاوزك معاي يا احمد ...محتاج لي مهارتك دي بس ماتخاف في عمل خير ! هنا كان التغيير بدا في حياتي .. اول شغله شريفه اشتغلا...كنت بعمل بي اخلاص عشان ارد ولو جزو قليل من العملو لي دا .... قررت. اخطب ..واول واحده جات في بالي نفس البت العملت ليها كل دا قبل كم سنه .. أخت سليمان ..طلبت من غسان يمشي معاي كان مبسوط شديد وهو بشكر لي فيهو وقال لي بالمناسبه سليمان متأكد ما حا يرفض .. بقى نسيب لينا قلت ليهو بجد ؟! قال لي زواجو هو واختي نهى قرب حا يكون مع امين ..نستعجل وننجزكم كلكم مع بعض ولا كيف ضحكنا ...ومشينا قعدت مع ابوها وحددو لي يوم النظرة .. جيت اليوم داك أنا وهند قعدت معاها وانا جواي ضربات قلبي بتزيد دي نفس البت الانا عملت فيها كده ...بس حاجه جذبتني ليها .... تمت الموافقه ما حبيت حتى اخطبا واتكلم معاها كتير طلبت من ابوها يعقد لينا طوالي !.. بس قبل كل شي قررت اعترف لي سليمان بي كل حاجه ...مرت تفاصيل اليوم داك بسلام .. ما اتخيلتها حتى ! سليمان كان عارف كل التفاصيل من غسان ! حكى لي كل شي وقال لي غسان شرح لي كل شي ....امممم حا اسامحك بس بي شرط ! تعلمني مهاراتك دي ... ربنا كان كريم علييي شديد شهر واحد بس احنا عقدنا ...غسان وامين وكلهم كانو واقفين معاي . . قررت حتى تعارفنا يبدا بالحلال ... حبيتا وانجذبت ليها اكتر وانا قريب ليها ! قدر شنو غريب القدر يجمعنا بصورة غريبه ... تمر الأيام واعترف ليها بكل الحصل ! .. ابتسمت وهي بتقول لي أنا مبسوطه انو انت الدخلت حياتي ...الناس نظرتهم للبت مختلفه .. أكيد الحا يجي كان حا يعايرني ..انما دي لو أعمال يدك انت فانا في أمان سيدي القرصان ! ضحكنا اليوم داك ضحكات طويله ..وكانت اعتزارات من جانبي !... سليمان قرب عرسو واتزوجنا في نفس اليوم .. كان عرس كبير وفخم. ... كل اللبس كان من الشركه .. واخدنا اجازه من الشركه . .... #هند بعد الزواج ...بقينا نحضر لي زواج امين وتبيان ... لحد ما فأجاني غسان انو عاوز يعيد زواجنا حاولت أرفض بس قال لي أنا ما استمتعت خالص شردتي لي وحيرتيني ..ضحكت زيين ووافقت... ندى اختي وابوي كان رجعو السودان عشان يحضرو عرس احمد ...وندى بعد وريتا ضحكت فيني وقالت لي ترجعي البيت احبسك أنا .. غسان بعد عرف قال لي غييرت رأيي لو حا تبعدي العرس خليتو ..قلت ليهو ابيت ... عشت شهر بتونس مع غسان بالتلفون ومحبوسه كأني عروس جديده .. لحد ما جى اليوم المنتظر ..فساتين الزفاف كانت رهيبه ..الصاله ..الكوفير ... اتعادت لي كل التفاصيل دي ... وكأني عروس لأول مره. .. غسان جى الكوفير ... ...الخجل ..قبلة الجبين ..مسكة اليد والتعليقات... طلعت معاهو على العربيه ..وسط أصوات البوري والزغاريت...اتمنيت لو أمي كانت هنا وتشوف فرحتي دي ربنا يرحمك يا امي ... كان عرس اسلامي مفصول ..الرجال في صاله والنسوان براهم ...ماجو غسان وامين الا عشان يسلمو على اهاليهم من النسوان ...ويباركو ليهم ساعه واحده وركبنا العربات ..ونهى واخوي احمد وكلهم كانو حاضرين في اليوم دا اسبوع من الوقت دا كنا بنطلع في الاوراق للسفر عمرة أنا وتبيان وغسان وامين ... ومن هناك مشينا شهر العسل دبي ... اوقات يطلعو ..كنا أنا وتبيان بنتونس مع بعض ونجي نفرق على بعض ... وأنا وغسان قاعدين سوا وبنتونس وانا راقده على كتفو .. قال لي هند أنا لو شكرت ربنا مية سنه ما حا اقدر أوفيه ...أنتي نعمه وحلم لي وأنا اكتر زول مبسوط ..بوجودك جنبي ... قلت ليهو غسان صدقني ..وجودك معاي أكبر فرح لي صدقني انا فخورة انك راجلي الان ..انت بجد انسان قدوة وشخص عظيم ....قال لي كيف قلبك طاوعك تبعدي عني ...قلت ليهو ماعاوزين احزان أنا كل يوم كنت بتقطع وانا مشتاقه ليك ياخ ... شوق اكتر من شوقي ليك أنا ؟! بقينا نتشاكل منو المشتاق اكتر ..وقضينا الليل ضحك لحد ما اتصلت خالتو سوسن علينا فديو وبقت تتونس معانا قالت لي غسان هوي أنا كبرت دايره اشوف ولدك ياغسان ..ولد اشيلو في يدي .. غسان قال ليها ان شاء الله يا امي. . سلمت علييي وهي بتوصي فيني وتدعي لي بعدا اتونست مع ندى وابوي .. قفلتا منهم قبل علييي وهو بمسك يدي وقال لي هااا دايره كم ولد ! قلت ليهو واحد بس قال لي بتستهبلي واحد كيف يعني ! أنا داير املأ البيت دا مليي افتح بيهم روضه ! . قلت ليهو وأنا بضييق عيوني شايفني شنو ؟! الا كان تشوف ليك كم واحده عشان تجيب ليك ديل كلهم .. مسك يدي وهو بقول لي غيرك ماعاوز انتي الاولى والتانيه والتالته والرابعه ... انتي بتتحملي واحده تانيه ؟! عبست ملامحي وقلت ليهو بمزح بموت لو حصل أنا عاوزاك انت بس لي أنا براي ... واممم حياتي دي كلها كانت عباره عن فوضى شعور .. نفسي اجيب ولد اسميهو فياض ..ضحك بصوت عالي وقال لي وانا نفسي في بت عشان نسميها مشاعر ...قلت ليهو بتجاريني كمان ؟! وملينا ارجاء المكان بي ضحكاتنا ...... #امجد كانت الأيام بتمشي وكل الأخبار ماف غير غسان ونجاحاتو اخر مؤتمر ليهو وكلامو عن هند حسسني قدر شنو كانت جنبي نعمه وضيعتها بتهوري .ضيعت انسانه لو فتشت كل الدنيا ما ممكن القى زيها ... هند مشت وخلتني وهي بتقول لي عافيه ليك عشان لا عاوزة نتلاقى لا دنيا لا اخره... بس أنا لسه عالق هناك ..هي اتجاوزتني بس أنا عمري ما حا اقدر اتجاوزا ..قاعد وبعاين لي خيبتي معقوله كنت بتونس مع نون ؟! ساذج .. غلطت ووقعت وما سميت . بس عرفت غلطي في الوقت الغلط اتأخرت شديييد ... وأنا الان بعد ما دمرتها السنتين دي ..عايش ببقايا انسان محطم بتدمر كل يوم وبعيش الألم نفسو أو يمكن أشد.... #هند رجعتنا السودان غسان الح علييي انزل جامعه واكمل تعليمي... رجعت الجامعه الاولى البعدت عنها بسبب مشاعري ..رجعت وانا عندي هدف واحد اني اكمل .. بدعم من غسان ...كان بقول لي انا وراك .. وجمبك سند ليك من بعد ربنا..لازم تتعلمي وتنجزي لأنو الانسان بدون شهاده ما بتقيم في اي مكان ... وقف معاي لحد ما كملت ..اخر يوم من الجامعه مشينا حديقه واداني ورد وهدايا وهو ببارك لي ..على طريقتو .. قررت اغني ليهو وبديت بي اول بيتين مسك خشمي بي يدو وهو بقول لي انا بغير ...خايف اي واحد يجي ماري هنا يسمع صوتك وينجذب ليهو ... من حقي أنا بس هاا . ابتسمت وانا بقارن ... امجد كان بقعدني جمب الكل عشان أغني واسمعهم صوتي ..ويتراهن علييي .. انما غسان خايف حتى واحد يمر ساي ويسمعو... فرق بين المعجب بيك والعاوز يقشر بيك والبحبك . ... غسان كان بقول لي هند أقري لي قران صوتك بريحني يوم عن يوم بقيت ابعد عن الغنا واتلو ليهو كل يوم قران لحد ما حفظنا المصحف سوا في سنتين ..بمساعدة وعدم منو ... بقيت اتعب واحس بي دوخه طوالي ..وبعد الفحص طلع حمل ...كان الكل حا يطير من الفرح .. مرت ال9 شهور وجبنا كتكوته صغيرونه ملت البيت فرح وسميناها مشاعر ... ثمرة قصتنا أنا وغسان البدت بصورة غريبه ... كره اتحول لي حب ...اقدار ربنا البتجي بصورة مرتبه وكل الاحزان والمأسي البتجي بس ورااها بكون رحمه ...فوضى مشاعر ..بس رتبت حياتي .. هذبتني وخلتني زوله جديدة...فاهمه اكتر ... وعايشه بكل حب علمتني انو الدنيا ما بتدوم على حال واحد ... ويمكن الحياة الراسمه لي قدام ما تجي زي ما متخيل... علمتني انو ما اثق بي أي زول ! نون ورغم اني عفيت لي الكل بس هي الوحيدة الماقادرة اعفي ليها تمن استغفالي كل السنين دي وهي حاقده علييي استقوت علييي وانا رافعه قضيتا لي ربنا يقتصاها لي هناك .... علمتني انو ممكن الطنه تجيك من اقرب قريب ... احزر من عدوك مرة ومن صديقك الف مرة ... تبيان العديتا عدو لي بقت حاليا اقرب انسانه لي ... علمتني مااعايير زول لله في خلقه شئون عادي السئ اليوم بكرا يبقى احسن ويلتزم .. علمتني اقبل بي اقدار ربنا بكل احوالا وما اوقف حياتي على اي زول كان لأني عمرا الحياة ما بتقيف على زول ... الأن الأن هند جديدة بتعيش حياتا بكل بساطة .. مغمورة بلطف الله وعنايته ... بتعاين لي طفلتا الكبرت سنتين .. غسان ومشاعر وهو بلعبا وانا واقفه ماده بوزي وبقول ليهو بقيت تدلعا اكتر مني خلاص بعتني صاح ؟! ضحك بقوه وهو يقول لي شكلي عندي طفلتين ما واحده ... ضحكت وانا بمش بإتجاهو وبابتسامه قلت ليهو وانا بخت يدي على بطني عندك تلاته...... #تمت_بحمد_الله #النهايه.... رمضان مبارك وتصومو وتفطرو على خير ... رمضان ماحايكون فيهو روايه..بس ما حا انقطع باذن الله .ولا حا أطول عليكم ... شكرا لي المتابعه والدعم تسلمو كتير ... وايكادولي❤️❤️