ركز! أنت محتاج تركّز! قال رسول الله ﷺ عن شهر رمضان (وللهِ عُتَقَاءُ مِنَ النَّارِ وَذَلِكَ كُلَّ لَيْلَةٍ) في كل ليلة من شهر رمضان، ربنا عز وجل هيختار عباد من عباده وهيعتقهم من النار. والعِتق من النار يعني النجاة من النار. الحمدُ لله على كرمه ولُطفه بينا.. الحمدُ لله على الفرص اللانهائية للتوبة والرجوع إلي الله والمغفرة.. الحمدُ لله رب العالمين. مستوعبين الكرم؟ يعني ربنا عز وجل -كل ليلة- هيختار عباد ليه وهينجّيهم من النار. هيكتب لهم إنهم خلاص، فازوا، أُنقِذوا من العذاب، نجوا من النار. زي ما ربنا عز وجل عرّفنا معنى الفوز الحقيقي في القرآن وقال: (فمن زُحزِح عن النار وأُدخِل الجنة فقد فاز) فالّي ربنا هيختارهم ويعتقهم من النار دول فازوا.. وده كل ليلة. كل ليلة من ليالي رمضان هيكون الفوز العظيم ده لبعض العباد. فاحنا عايزين إيه؟ عايزين نفوز؟ عايزين نُعتَق من النار؟ عايزين ربنا ينقذنا وينجينا من عذاب النار؟ وهو في حد هيعوز غير كده؟ في حد هيقدر على غير كده؟ عندنا ٣٠ ليلة، ٣٠ ليلة كاملين هيكون فيهم كل يوم فائزين.. محتاجين نركز، محتاجين نصدق النية ونكون مخلصين لله عز وجل، ومحتاجين إنه ميعديش علينا ليلة واحدة من الليالي العظيمة دي من غير ما نترجى الله عز وجل إنه يجعلنا من العتقاء، وإنه ينجينا من النار.