*بوست مفصل واسع مهم جدا عن الكليات الطبيه والفرق بينهم تفصيلا* 👇🏻👇🏻👇🏻 طبعا أولا لازم تدرك إن الكلية خطوة ضرورية علشان الشغل مش بتختار كلية و إنما بتختار نمط حياة دائم بعد ما حضرتك تخلص الكلية و المجال الي هتحبه هتتحمل وضع الكلية بتاعتك فمترهقش نفسك بتفاصيل الدراسة و إنما بتفاصيل ما بعد التخرج و طبعا بما ان ( الحكم علي الشيئ فرع بسيط عن تصوره ) ففي البوست ده انا مجمعلك معلومات عن وضع كل كلية من الكليات الطبيه علشان تختار بينهم 👇🏻👇🏻👇🏻 ١- *( كليه الطب بشري )* كلية الطب البشري عبارة عن 5 سنوات دراسة 2 أكاديمي "مواد اساسية" و 3 كلينكال و 2 امتياز تدريب عملي في المستشفيات و في اخر الكلية فيه اختبار لمزاولة المهنة ـ بعض الجامعات سنتين ونص اكاديمي وسنتين ونص كلينكال بعد ما بتتخرج حضرتك بتبقي طبيبي ممارس عام و مش من حقك تفتح عيادة بتخصص و علشان تاخد التخصص فانت بتاخد دراسات عليا ( ماجستير أو زمالة ) يعني تقريبا 5 سنين دراسة بعد التخرج علشان تقدر تشتغل بشكل كويس ومميز و تفتح عيادة غير سنتين تكليف بتقضيهم كممارس عام في الوحدات الصحية أو مستشفي حكومي و بعدها براحتك بقي لو عايز تاخد الدكتوراة أو لا فزي ما هو واضح مده الطب البشري يعتبر اطول مده من ناحية الوقت و كله مذاكرة و امتحانات و طبعا التخصص بيكون بناء علي درجاتك التراكمية في الكلية من خلال نظام تنسيق وفقا لتقديرك الجامعي فكأنك بتدخل ثانوية عامة من تاني بس علي مدار ال7 سنين و لكن كلية طب هي الاكثر تنوعا في التخصصات اكتر من 20 تخصص ( نسا و جراحه وعنايه ورمد وأطفال و جلديه و امراض دم و باطنه وغيرها الخ الخ الخ ) غير التخصصات الفرعية فده بيديك عامل ندرة التخصص أو ندرة المؤهلين يعني منافسة قليلة ففرصة شغل اكبر فربح مادي اكبر و استقرار وظيفي كويس ودائم الميزة التانية في كلية طب انه نظرا لصعوبتها و تكلفة تعليم الاطباء في الخارج كبيرة جدا ففيه اعراض عالمي عن دراسة الطب فبناء عليه فرصة السفر عالية جدا تكاد تكون الافضل علي الاطلاق سواء شرقا نحو الخليج او غربا نحو أمريكا و اوروبا و مؤخرا دكاترة مصريين بيسافروا دول افريقية بمرتبات عالية جدا طبعا تكاليف الدراسة و الشغل تكاد تكون منعدمة غير بعض التخصصات الي بتحتاج ادوات بس في الاغلب مش محتاج رأس مال كبير علشان تبدأ و دي ميزة ميزة اضافية في كلية طب أنه مفيش دخلاء في المهنة غير في بعض الجزئيات البسيطة الي مش مهمة أوي حقيقة ٢ - *تعالي بقي نتكلم عن كلية طب أسنان* كلية طب الاسنان عبارة عن 5 سنوات برضو 2 أكاديميك و 3 كلينكال و سنة واحدة امتياز في المستشفيات اول ما بتتخرج من الكلية بتبقي ممارس عام برضو بس الميزة الكبيرة هنا انه مافيش اي داعي انك تعمل دراسات عليا او زمالة غير في تخصصات معينة انما السوق شغال بشكل الي تعرف تعمله اشتغله عادي و الميزة التانية في اسنان ان الي انتا بتتعلمه في الكلية هو الي انتا بتطبقه عملي في ممارستك بعد التخرج مباشرة فزي ما هو واضح مده طب أسنان قصيره نسبيا و لكن عدد التخصصات في طب أسنان قليل جدا حوالي 7 تخصصات و مافيهمش شغل فرعي كتير و الحدود بين التخصصات دي مش واضحة اوي فالمنافسة مفتوحة جدا بين الكل برضو نقطة هنا ان اغلب شغل الاسنان حاليا عبارة عن مراكز اكتر من العيادات فمش محتاج تعمل اسم لنفسك علشان تبدأ شغل و لكن من ناحية تانية منافسة المراكز صعبة لانهم معاهم رأس مال كبير للادوات و التخصصات و الدعاية وهكذا طبعا اثناء الدراسة و بعد التخرج انتا بتتكلف ادوات كتير حقيقة و مستهلكات كبيرة و بتشتغل حالات علي حسابك و بعد التخرج استقلالك و عيادتك الخاصة محتاجة راس مال علشان تبدأ و هتتبهدل فترة لو معكش راس المال ده المشكلة مع طب اسنان انه فرص السفر قليلة جدا جدا تكاد تنعدم حاليا لان المجال مش محتاجينه اوي في اوروبا و امريكا و دولة زي السعودية سعودت طب الاسنان بالكامل فلو حضرتك اولويتك السفر فكلية اسنان مش ليك طبعا غالب شغل الاسنان هو شغل تجميلي في الاساس و بناء عليه انتا بتستهدف الفئة المتوسطة و الغنية و في حالات الركود الاقتصادي الناس بتعتبر ده شغل رفاهيات و بيقللوا منه او يستغنوا عنه طبعا حاليا فيه زيادة مهولة في اعداد اطباء الاسنان و المتوقع ان في خلال الفترة الي جاية هتبدأ التنافسية تكون عالية نظرا ان مافيش تخصصات كتير ولا فرص سفر كتير كلية طب أسنان ليهم تكليف برضو في وزارة الصحة و لكن عددهم زايد فممكن يستقيلوا بسهولة عادي وسيتم تحجيم اعداد المكلفين وتقليلهم مع مرور الوقت والسنين ٣ ـ *يلا بينا نتكلم عن كلية صيدلة* كلية صيدلة حاليا عبارة عن 5 سنوات دراسة + سنة امتياز طبعا النظام الجديد دلوقتي كل الصيادلة حاليا بقوا كلينكال لكن لسه ثقافة الصيدلة الكلينكال في مصر محدودة شويه و مش مفعلة و كذلك شغل التصنيع الدوائي الي اغلب دراسة طلبة صيدلة متعلقة بيه قليل جدا الي بيشتغلوا فيه و الاغلب بيشتغل في الصيدليات او في تسويق الادوية وهكذا المشكلة الي بتواجه طلبة صيدلة بالتحديد هي زيادة الاعداد المهولة الي بقالها فترة طويلة و بناء عليه التكليف الحكومي حاليا التكليف هيتلغي بداية من الدفعة الجديدة فدي مشكله كبيره ثانيا وجود كم هايل من الدخلاء الي بيشتغلوا في الصيدليات او في تسويق الادوية و ساعات بيتفضلوا عن الصيادلة علشان ارخص في الاغلب فده مخلي طلبة جدد كتير مش عارفين يشتغلوا من ناحية تانية شغل الصيدليات فيه مشكلة حاليا لانه في قانون ان فيه مسافة 100 كتر بين كل صيدلية و التانية فاغلب الاماكن المميزة الي فيها تكتلات سكنية فيها صيدليات قديمة مغطية المساحة بالفعل مم ناحية تانية الربح في الادوية قليل و محدد من قبل الدولة لحد هنا الدنيا كانت ماشية لبعض الصيادلة لكن دخول سلاسل الادوية برأس المال العملاق بتاعها و انها عملت خصومات كبيرة و توصيل ببلاش خسر الصيدليات الفردية كتير مؤخرا برضو فرص العمل في الخليج بتتضائل نتيجة السعودة و الناس دي كلها بدأت تنزل مصر فصدقا مجال الصيدلة مش احسن حاجة حد ممكن يدخلها دلوقتي الا لو معاه راس مال عملاق او هيورث بيزنس العائلة في الصيدلة ٤ - *بالنسبة لكلية علاج طبيعي* كلية علاج طبيعي من الكليات الناشئة و الصاعدة بقوة حاليا كلية علاج طبيعي برضو 5 سنوات دراسة و سنة أمتياز المشكلة الي بتواجه كلية علاج طبيعي ان لسه الثقافة بتاعته منتشرتش حتي في وسط الدكاترة قبل الشعب نفسه والمجتمع و بناء عليه أغلب دكاترة العلاج الطبيعي شغالين علي التخسيس و التغذية و غيره و ده حقيقي تقليل من شأن المجال بس الموضوع محتاج شوية وقت و الثقافة هتنتشر والموضوع مع مرور الوقت سيختلف تماما أغلب المجال شغالين مراكز مش عيادات لأنه لازم يكون فيه أجهزة و أدوات و بتكلف ماديا حقيقة بس اقل من تكاليف الاسنان طبعا خصوصا ان مافيش مستهلكات كتيره الميزة في شغل العلاج الطبيعي ان المريض بيحتاج جلسات كتير متتابعة فانتا مش محتاج مرضي كتير علشان تشتغل كويس بس المشكلة الي بيواجهها اطباء العلاج الطبيعي ان طلبة تربية رياضية بياخدوا شهادات وهمية و بيشتغلوا كعلاج طبيعي و بيبقوا مقتنعين اصلا انهم مؤهلين للشغل ده و ده من حقهم فللأمانة لو محلوش المشكلة دي في الكام سنة الي جاية فوضعهم هيبقي زي الصيادلة فرص السفر كويسة شوية أحسن من أسنان بس أقل من بشري و وضعهم زي أسنان كدا الي بتتعلمه في الكلية هو الي هتمارسه و تراك قصير بتبدأ شغل بعد التخرج علطول و التخصصات مش محتاجة دراسات عليا فالدنيا كويسة الي حد ما *تعالي اصححلك مفاهيمك عن كلية التمريض* ٥ - *كلية تمريض* عبارة عن 4 سنين دراسة و سنة واحده امتياز أول حاجة انت محتاج تدركها عن كلية تمريض هو ان كلية تمريض بتخرج أخصائي تمريض الي هو بيشرف علي التمريض او بيرئسهم و بيشتغل في الحاجات المهمة الممرضين نفسهم بيبقوا خريجين معهد فني تمريض سنتين أخصائي التمريض بيقدر ياخد تخصصات زي ( نسا و ولادة - جراحة - عناية مركزة ) الخ و بيبقوا مطلوبين جدا في مصر و برا مصر و فرص سفرهم سهلة و مرتباتهم كويسة جدا و لكن هي المشكلة هنا انه مفيش نمو وظيفي حقيقي ياعني انتا هتفضل ممرض طول عمرك حتي لو اخدت تخصص فدورك برضو هو مساعدة الدكتور ليس الا و متقدرش تفتح شغل لنفسك طبعا ده غير السمعة السيئة الي عاملها الاعلام و المجتمع عن التمريض و يمكن دي أسوأ حاجة موجودة طبعا نقطة واجب طب التنويه عنها ان معاهد التمريض الخاصة الاي كلام دي بتخرج بتخرج مساعد ممرض و مرتباتهم و شغلهم زي الزفت و دي مختلفة تماما عن كلية تمريض أخيرا ايا كان مجالك دي شوية نصائح علشان الدنيا تبقي كويسة - لو ليك اهل و قرايب شغالين في مجال معين هتبقي فرصة كويسة انك تتعلم منهم و تشتغل معاهم و هيختصروا عليك وقت و جهد كبير - اي كانت كليتك لازم تحدد اولوياتك و هدفك ؟ لو انتا عايز تتعين في الجامعة فاهم حاجة بالنسبالك هتكون الدرجات و الترتيب لو انتا عايز تسافر هتذاكر لغة او معادلة و تجيب فلوس علشان تعرف تسافر لو انتا عايز تتعلم بشكل عملي انزل اتدرب و اتفرج علي الواقع بس اوعي تشتغل بفلوس غير لما تكون مؤهل عمليا و قانونا و جيب درجات كويسة برضو لو انتا مش عارف انتا عايز ايه حاول تستكشف مجالك بسرعة علشان تعرف ايه الي يناسبك و متضيعش وقتك - لازم تحاول تتميز في شغلك بخصصك النادر او شطارتك فيه او ادواتك او دعايتك ولازم تتعلم بيزنس و ادارة و علشان تعرف تعيش حياتك كويس و لازم تفضل تتعلم كل حاجة جديدة في مجالك